Luke 5:1-39
5 Ákódahoodzaago Genésaret beʼekʼid bąąhgóó dzizı̨́įgo, diné yílʼáhígíí Diyin God bizaad deididootsʼı̨́ı̨́ł biniyé hachʼįʼ ałkʼi naakai.
2 Nítʼééʼ beʼekʼid bąąhgi tsinaaʼeeł naaki sinilgo jiiłtsą́, nidi łóóʼ hadayiileehí tsinaaʼeeł yiyiʼdę́ę́ʼ haakaigo biłóóʼ bee hadahaltsósí dayiigis lá.
3 Áko Sáíman bitsinaaʼeeł biih jííyáago, Tábąąhdóó tʼáá áháníjįʼ niʼníłʼeeł, bizhdííniid. Áko tsinaaʼeeł biyiʼdóó dasneezdáago diné áłah silı̨́ʼígíí nazneeztą́ą́ʼ.
4 Áádóó ałtso niyázhníłtiʼgo Sáíman ábizhdííniid, Tó ditą́ąjįʼ niʼníłʼeeł, áádóó nihiłóóʼ bee hadahaltsósí bee hadadiʼyoołtsos biniyé taah daałtsóós.
5 Áko Sáíman áháłní, Naʼnitiní, tłʼééʼ bíighah dayíníilníísh, ákondi tʼáadoo łaʼ shódeisiiltʼeʼ da! Nidi nizaad kʼehgo kʼad łóóʼ bee hahaltsósí taah deestsos.
6 Ákódadziidzaago, łóóʼ tʼóó ahayóí biyadaʼdziiłtsooz, áádóó hałóóʼ bee hahaltsósí hatsʼą́ą́ʼ dahadlaadgo,
7 náánáłaʼ tsinaaʼeeł biyiʼdi diné bił ałchʼodajóʼnínígíí háká adoojah biniyé áchʼįʼ bídazhʼdeezhgish. Áádę́ę́ʼ haa daʼasʼéelgo tsinaaʼeeł tʼáá áłah łóóʼ biiʼ hadazhdééłbįįdgo bąą tsinaaʼeeł hatsʼą́ą́ʼ táłtłʼááh nidééh.
8 Sáíman Peter éí yiyiiłtsą́ągo Jesus yiyaajįʼ nitsidinígoʼgo kójíní, Bóhólníihii nílíinii, shitsʼánínááh, háálá bąąhági ááníiłii nishłı̨́.
9 Háálá łóóʼ tʼóó ahayóí hadadzistsoozígíí bąą hoł naakaígíí bił tʼóó hoł adahayóí;
10 James índa John éí Zébedii biyeʼké nilı̨́įgo, Sáíman yił ałchʼodaaʼníhígíí ałdóʼ ákódaadzaa. Áádóó Jesus éí Sáíman áyidííniid, Tʼáadoo bikʼee nił yéʼí; kodóó náásgóó diné niłnée doo.
11 Áko bitsinaaʼeeł tábąąhjįʼ ninádeisʼéelgo, tʼáá ałtsoní tʼáá ákǫ́ǫgo Jesus bikééʼ dashdiikai.
Jesus éí diné łaʼ łóód atsʼíís yiyáanii naałdzidii bee bąąh dah hazʼą́ągo néidiisá (Mt. 8:1-4; Mk. 1:40-45)
12 Ákódahoodzaago kin haalʼáá léiʼgi nijigháá nítʼééʼ, łóód atsʼíís yiyáanii biiłhéé léiʼ hadááh níyá; éí Jesus yiyiiłtsą́ągo yiyaajįʼ nitsidinígoʼgo náyookąąhgo ání, Bóhólníihii, íinínízin ládą́ą́ʼ nááshididííłááł.
13 Áko Jesus kʼídeesníiʼgo hodeelchidgo áháłní, Íinisin lą́ą; łóód nąąh óodįįh. Tʼáá áko łóód atsʼíís yiyáanii naałdzidii hąąh ásdįįd.
14 Áko áhodííniid, Tʼááká diné łaʼda bił hóólneʼ lágo, nidi nílááh dah diináahgo nááʼiiłniihii bíniʼdii átsé niníłʼı̨́, áádóó náániʼdiilzáhígíí bąą nááhániihii Mózes yee nihoníʼáanii bikʼehgo nááʼayíłniih, áko éí bee nilóód náádzíiʼii diné bił béédahózin doo.
15 Nidi tʼóó yówehda bee haa haneʼígíí adahideezdláád, áko tʼóó ahayóí deididootsʼı̨́ı̨́ł biniyé áádóó bąąh dah nidahazʼánígíí náádabidiʼdoodlááł biniyé haa áłah silı̨́ı̨́ʼ.
16 Nidi bitsʼą́ą́ʼ honoojíígóó dashdiiyáago áadi sozdoolzin.
Jesus éí diné doo bitah nahwiiʼnáanii néidiisá (Mt. 9:1-8; Mk. 2:1-12)
17 Ákódahoodzaago łah jı̨́įgo nináázhʼnítingo, ákwii Férisii danilíinii índa bee hazʼáanii yíndaʼniłtinii, éí Gáliliidi índa Judíya kéyahdi kin hadaasʼáhídę́ę́ʼ tʼáá ałtso índa Jerúsalemdę́ę́ʼ neheeskaigo naháaztą́ą́ lá, áádóó Bóhólníihii bibee adziilii bee náázhdiʼdoołááł biniyé hoł hólǫ́.
18 Nítʼééʼ diné léiʼ bitah doo nahwiiʼnáágóó bikʼi antéhí yee hachʼįʼ dayíłtsóós, áko éí yahadooltéełgo hayaajįʼ nidooltééł danízin,
19 nítʼééʼ tʼóó ahayóí áłah ílı̨́įgo biniinaa yah adahozhdoołtééł góneʼ chʼééh hadazneeztą́ąʼgo, kin bighą́ąʼjįʼ hadahodzistı̨́, áádóó kin bighą́ą́ʼdę́ę́ʼ ąą dazdeeznilgo haníiʼjįʼ Jesus bidáahjįʼ bikʼi antéhí bee hadah adahodzizloʼ.
20 Áko bidaʼoodląʼ yee aa dadzólíii jiiłtsą́ągo ájíní, Kwáʼásiní, ádił niʼiyínílzíʼígíí ná yóóʼadootʼą́.
21 Áko bee hazʼáanii yíndaʼniłtinii índa Férisii danilíinii nidaʼídíʼníiłkidgo ádaaní, Díí Diyin God íʼdiilyaago hahadziihígíishąʼ háí átʼı̨́? Háishąʼ ádił niʼiidzííh á yóóʼiidiiʼaah? Diyin God tʼéiyá ni.
22 Nidi baa nitsídadzikeesígíí Jesus bił bééhoozingo áhodííniid, Haʼátʼíishąʼ biniyé danihijéí biiʼ tʼóó nihił daahaadago nitsídaahkees?
23 Háidíígíishąʼ doo nantłʼagóó bee haʼdoodzih? Ádił niʼiyínílzíʼígíí ná yóóʼadootʼą́, haʼnííjí daatsʼí, éí doodago, Nídiiʼnéehgo dah diinááh, haʼnííjí daatsʼí?
24 Nidi nahasdzáán bikáaʼgi Diné Silı̨́įʼii ádił niʼiidzííh á yóóʼiidiiʼaah yee bóhólníihgo nihił béédahózin doo, jidííniidgo bitah doo nahwiiʼnánígíí ábizhdííniid, Nídiidááh, nidishní, áádóó bikʼi nítéhí nídiiníiłgo nighangóó nídídááh.
25 Tʼáá áko hanááł nídiiʼnaʼgo yikʼi sitı̨́ı̨́ nítʼééʼ yę́ę néidiinil, áádóó Diyin God yaa haniihgo bighangóó dah nídiidzá.
26 Áko tʼáá ałtso tʼóó bił adahayóigo Diyin God yaa dahaznih áádóó tʼáá bił daayéeʼgo ádaaní, Díí jı̨́ doo nihił béédahózin da yę́ę daníilʼı̨́ı̨́ʼ.
Jesus éí Líívai, Shikééʼ yínááł, yidííniid (Mt. 9:9-13; Mk. 2:13-17)
27 Éí ákódahoodzaadóó bikʼijįʼ chʼízhníyá, nítʼééʼ tax nahalyéhígíí yiniyé sidáii Líívai yolyéego, tax nahalyéhígi sidáago jiiłtsą́, áko, Shikééʼ yínááł, bizhdííniid.
28 Áádóó nízhdiiʼnaʼgo tʼáá ałtsoní tʼáá ákǫ́ǫgo bikééʼ dashdiiyá.
29 Nítʼééʼ Líívai tʼáá bí bighangi ayóó átʼéego Jesus yá ádaʼíísįįd, áádóó ákwii tax nahalyéhígíí yiniyé naazdáii índa binaadę́ę́ʼ danilíinii tʼóó ahayóí yił daʼayą́ągo nidaháaztą́.
30 Áko Férisii danilíinii índa bee hazʼáanii yíndaʼniłtinii yił łáʼí danilíinii éí hódahoołʼaahii yaa nídaastʼįįdgo ádaaní, Haʼátʼéegoshąʼ tax nahalyéhígíí yiniyé naazdáii índa bąąhági ádaaníiłii bił daʼohsą́?
31 Áádóó Jesus hachʼįʼ haadzíiʼgo áhodííniid, Diné doo bąąh dah nidahazʼánígíí éí azeeʼ ííłʼíní doo yichʼįʼ dadikáah da, nidi bąąh nidahazʼánígíí tʼéiyá;
32 tsʼídá tʼáá ákogi ádaatʼéii doo bíká ádideeshniił biniyé níyáa da, nidi bąąhági ádaaníiłii, Łahgo átʼéego Diyin God bichʼįʼ tsíńdadohkeesgo nihibąąhági átʼéii bitsʼáhóhkááh, bidideeshniił biniyé níyá.
Hodílzingo doo adánígíí bínaʼídíkid (Mt. 9:14-17; Mk. 2:18-22)
33 Áádóó ádahodííniid, John bídahoołʼaahii tʼáá ahą́ą́h hodílzingo doo adą́ yee ádá nídahoolʼaah áádóó sonídadilzįįh, Férisii danilíinii bídahoołʼaahii ałdóʼ tʼáá ákódaatʼı̨́, nidi ni nídahoołʼaahii éí doodı̨́įłii áádóó doodlı̨́įłii deiyą́.
34 Áko Jesus áhodííniid, Iiyehii tʼah yił naakaigo iigehgi neheeskaígíísh dahodísingo doo daʼayą́ą́góó ádadoohłííł? Dooda lą́ą!
35 Nidi iiyehii hatsʼą́ą́ʼ nídidooltéłígíí beidoołkááł, áko éí bijı̨́įdi índa dahozdísingo doo daʼjiyą́ą da doo.
36 Áádóó haneʼ bee akʼidiʼdootı̨́įłii łaʼ yee hoł nááhoolneʼ: Diné łaʼda ééʼ ániidíígíí yiididoozǫ́ǫsgo ééʼ haastihii doo yineididooʼáał da; ákódziidzaago, ééʼ ániidíígíí azdoozǫ́ǫ́s, áádóó ániidíígíí bidoodǫ́ǫzii haastihígíí doo bił aheełtʼée da dooleeł.
37 Áádóó diné łaʼda wáin ániidíígíí tó abid hadaastihii doo yiih yikaah da; ákódziidzaago, wáin ániidíígíí tó abid deidoołdohgo tʼáá ádzaaí dooleeł, áádóó tó abid ałdóʼ tʼáá ádzaaí dadooleeł.
38 Nidi wáin ániidíígíí tó abid ádaaniidíígíí biih yikááh [áko tʼáá áłah nízaadgóó chooʼı̨́].
39 Áádóó diné éí wáin ałkʼidą́ą́ʼ ádaalyaaígíí yidlą́ągo, ániidíígíí doo yidínóozįįł da, háálá ání, Wáin ałkʼidą́ą́ʼ ádaalyaaíjígo yáʼátʼééh.
