Luke 7:1-50
7 Áko diné dahwíístsʼą́ʼígíí ałtso bichʼįʼ niyázhʼníłtiʼgo Kapérniyamgi jiníyá.
2 Áádóó siláo neeznádiin yiltʼéego yinanitʼaʼí łaʼ bá naalʼaʼí ayóogo bił nilínígíí, éí daatsaahgo dadootsaałjįʼ ahoolzhiizh lá.
3 Áko Jesus baa hozdiiztsʼą́ąʼgo, Áádę́ę́ʼ shaazhdoogáałgo shá naalʼaʼí náábizhdidoołááł, jiníigo Jew dineʼé aląąjįʼ naazíinii Jesus bichʼįʼ ajííłʼaʼ.
4 Áko Jesus yaa yíkaigo, tʼáá íiyisí nídayooskango ádaaní, Díí bá ádííníiłii tʼáá yą́ą́h nilı̨́,
5 háálá nihidineʼé ayóóʼáyóʼní, áádóó kin biiʼ áłah náʼádleehígíí nihá áyiilaa.
6 Áko Jesus yił dah diikai. Bighan tʼáá áyídí hadziihgo, siláo binanitʼaʼí bikʼisóó łaʼ hachʼįʼ ayííłʼaʼgo áháłní, Bóhólníihii shaa wóóyaʼ lágo, háálá shighan góneʼ shił yah adíínáałgi doo bą́ą́h nishłı̨́į da,
7 áádóó tʼáadoostiʼee doo nidááh deesháał da nidi. Tʼóó saad bee handziih, áko shá naalʼaʼí náádidoodááł.
8 Háálá shí ałdóʼ shinanitʼaʼí hólǫ́, áádóó siláo binanitʼaʼí nishłı̨́, áko łaʼ, Ákǫ́ǫ́ díínááł, bidishniihgo dah diighááh; náánáłaʼ, Hágo, bidishniihgo shaa yighááh, áádóó shinaalteʼ, Kónínééh, bidishniihgo tʼáá áko éí áyiiłʼįįh.
9 Áko Jesus díidí yidiiztsʼą́ąʼgo hakʼee tʼóó bił ahóóyóí, áádóó názyizgo diné bikééʼ nooyéłígíí áyidííniid, Ánihidishní, Oodlą́ bee aa dzódlí kótʼéii Ízrel dineʼé bitahgi nidi tʼah doo łaʼ bikʼínísháah da.
10 Áádóó siláo yinanitʼaʼí éí yiyííłʼaadígíí hooghangi nákai, nítʼééʼ éí naalʼaʼí yáʼátʼééh násdlı̨́ı̨́ʼ lá.
Néin hoolyéedi Jesus asdzání bąąh áhásdįįdii biyáázh néidiisá
11 Áádóó náábiiskání Néin hoolyéedi kin haalʼáágóó jiníyá, áko hódahoołʼaahii índa diné tʼóó ahayóí hoł yíkai.
12 Nítʼééʼ kin haalʼáago bił yah eʼatiin bidáádílkałjįʼ ajííyáago, jóʼakon, łaʼ dadziztsą́ lágo chʼíhoʼdeeltı̨́, éí tʼáá hó tʼéiyá asdzání bąąh áhásdįįdii nilíinii biyáázh jílı̨́ı̨́ nítʼééʼ lá, áádóó kin haalʼáádóó diné ląʼí baa áłah nilı̨́.
13 Áko Bóhólníihii hoołtsą́ągo haa aʼááh niizı̨́įʼgo áhodííniid, Tʼáadoo nichaí.
14 Áádóó hwíighahgi deeyáago bee nidahoʼdiltéhígíí yideelchidgo, daʼíłteehii deizįʼ. Áko daaztsánígíí áyidííniid, Dinééh, ándishní, Nídiidááh.
15 Áádóó neezdáago, ayáʼniiłtiʼ. Áádóó hamá yaa náhoníłtı̨́.
16 Áko tʼáá ałtso tʼóó bił daayéeʼgo Diyin God yaa dahaniihgo ádaaní, Diyin God yá halneʼii ayóó átʼéii nihitahgi nídiidzáá lá! áádóó, Diyin God bidineʼé yíká adoolwoł yiniyé yaa níyáá lá!
17 Áádóó Judíya kéyah biyiʼgóó tʼáá átʼéé nítʼééʼ índa binaagóó díí bee haa haneʼgo adahideezdláád.
John Tó Yee Ası̨́įhii bitsʼą́ą́dę́ę́ʼ naalʼaʼí (Mt. 11:2-19)
18 Áko John hódahoołʼaahígíí díí tʼáá ałtso yee hoł nídahoolneʼ.
19 Áko John hóhoołʼaahii nidiltʼéego hágo bizhdííniidgo, éí Jesus bichʼįʼ ajííłʼaʼgo kóbididoohniił bijiní, Daʼ niísh doogááł haʼnínę́ę ánítʼı̨́, éí doodago náánáłaʼ daatsʼí bíká dadíitʼı̨́įʼ doo?
20 Áko diné éí Jesus yaa níʼáazhgo áyidííniid, John Tó Yee Ası̨́įhii nichʼįʼ anihííłʼaʼgo kóbididoohniił nihiłní, Daʼ niísh doogááł haʼnínę́ę ánítʼı̨́, éí doodago náánáłaʼ daatsʼí bíká dadíitʼı̨́įʼ doo?
21 Áko tʼáá ákweʼé oolkiłgo ląʼí ka nidaakaii índa bąąh nidahałniih hadaałtʼé áńdajidleʼ áádóó níłchʼi biʼiiníziinii biiʼ dahólónígíí biyiʼdę́ę́ʼ hahizneeskaad, índa ląʼí doo daʼooʼínígíí daʼooʼı̨́įgo áńdajidleʼ.
22 Áko Jesus hachʼįʼ hanáánáádzíiʼgo áhodííniid, Nihílááh nááhtʼash, díidí woołtsánígíí índa disootsʼą́ʼígíí bee John bił hodoołnih: doo daʼooʼínígíí daʼooʼı̨́ áńdaalneʼ, nidaʼniłhodígíí nidaakai áńdaalneʼ, łóód atsʼíís yiyáanii naałdzidii bee bąąh dah nidahazʼánígíí hadaałtʼé áńdaalneʼ, áádóó bijédaahkałígíí daʼdiitsʼaʼ áńdaalneʼ, daneeznánígíí nááhidiiljeeh, badahojoobáʼíígíí haneʼ yáʼátʼéehii bee bił dahaneʼ, dohníigo.
23 Áádóó tʼáá háiida doo bił naaki danilı̨́ı̨́góó shaa nitsídaakeesígíí éí bikʼidahojidlí.
24 Áko John bá naalʼaʼí dah nídiitʼáazhgo, Jesus éí áłah ílínígíí yichʼįʼ John baa ayázhʼniiłtiʼgo ájíní, Haʼátʼíishąʼ dadínóołʼįįłgo honoojíígóó nidasoohkai? Lókʼaaʼ níyol bighádígíí daatsʼí?
25 Nidi haʼátʼíishąʼ deidoołtséełgo ákǫ́ǫ́ nidasoohkai? Diné éí ééʼ daalzhólíii yee hadítʼéii daatsʼí? Jóʼakon, diné tʼáá íiyisí ílı̨́įgo hadadítʼéii índa tʼáá ałtsoní yee nídaʼaldįįhii éí aláahgo naatʼáanii dabinághangóó kéédahatʼı̨́.
26 Áko haʼátʼíishąʼ deidoołtséełgo ákǫ́ǫ́ nidasoohkai? Diyin God yá halneʼii daatsʼí? Éí lą́ą, áádóó Diyin God yá halneʼii yiláahgo átʼéii nilíinii nihidishní.
27 Jó, éí kótʼéego bee akʼeʼashchínígíí átʼı̨́:
Jóʼakon, shá halneʼii nilą́ąjįʼ deeshʼaał,éí ná honítʼiʼii nilą́ąjįʼ ná hashtʼeidoolííł.
28 Nihił hashneʼ, Diné nidahaazhchíinii bitahdóó doo łaʼ John Tó Yee Ası̨́įhii yiláahgo átʼée da, nidi tʼáá háiida Diyin God bee bóhólníihgo bił hazʼáanii biyiʼ aʼohgo ájítʼéii nidi éí John biláahgo ájítʼé.
29 Áádóó diné tʼáá ałtso índa tax nahalyéhígíí yiniyé naazdáii John Tó Yee Ası̨́įhii tó yee dabíísı̨́įʼii éí díí deidiiztsʼą́ąʼgo ádadííniid, Diyin God tsʼídá tʼáá ákogi átʼéé lá,
30 nidi Férisii danilíinii índa bee hazʼáanii yíndaʼniłtinii éí Diyin God binahatʼaʼ doo ádá deinidzin dago biniinaa, John tó yee dabidoosı̨́łígíí doo deinízin da nítʼééʼ.
31 Bóhólníihii ání, Kʼad diné ahoolchíłígíishąʼ haʼátʼíí bił ahąąh nideeshniłgo binahjįʼ baa hodeeshnih, áádóó haʼátʼíishąʼ nidahalin?
32 Jó, éí nidaʼiiniihgóó áłchíní nidaháaztą́ągo yił nidaanéhígíí kótʼéego yichʼįʼ ádaanínígíí nidahalin,
Tsin bee íʼdílzoołí nihá nidasiiʼneʼ, nidi doo daʼoołzhiizh da;nihichʼįʼ atídadiniidlı̨́ı̨́ʼ, nidi nihí tʼáadoo daohcha da.
33 Háálá John Tó Yee Ası̨́įhii łeesʼáán doo bichʼiyąʼgóó índa wáin doo yidlą́ą́góó níyá, áko nihí ádadohní, Níłchʼi biʼiiníziinii biyiʼ hólǫ́ǫ́ lá.
34 Diné Silı̨́įʼii éí doodı̨́įłii áádóó doodlı̨́įłii yiyą́ągo níyá, áko ádadohní, Jóʼakon, diné dibidii índa adláanii nilı̨́ı̨́ lá, tax nahalyéhígíí yiniyé naazdáii índa bąąhági ádaaníiłii yichʼooní nilı̨́ı̨́ lá!
35 Áko hódzą́ ááníłígíí bee tʼáá ákogi átʼéego bééhózin.
Jesus éí Sáíman, Férisii nilíinii, yighandi sidá
36 Áádóó Férisii łaʼ adiidı̨́ı̨́ł hodííniid, áko éí Férisii bighangi jiníyáago azhdooyı̨́ı̨́ł biniyé dzineezdá.
37 Nítʼééʼ kin haalʼáagi asdzání łaʼ, bąąhági ááníiłii nilı̨́įgo, Férisii bighan góneʼ dzizdáago ajiyą́ągo bił bééhoozin, áko tózis tsé alabáster yolyéhígíí bee ályaago akʼah yee yah ayííʼą́,
38 áko Jesus tłʼazdéestı̨́įgo hakeeʼ yichʼįʼ yiizįʼgo yichago binákʼeeshtoʼ yee hakeeʼ néístłéeʼgo bitsiiʼ yee hakeeʼ yiyíítʼóód, áádóó hakeeʼ yiztsʼǫs, índa akʼah yikʼijįʼ yayiiziid.
39 Áko éí Férisii hágo hodííniidii díí yiyiiłtsą́ągo, tʼáá biyiʼídi ání, Díí diné Diyin God yá halneʼii nilı̨́įgo, díí asdzání hódílnihígíí átʼíinii hoł bééhózin doo nítʼééʼ, háálá asdzání bąąhági ááníiłii nilı̨́.
40 Áádóó Jesus haadzíiʼgo áhodííniid, Sáíman, bee nichʼįʼ hadeesdzihii hólǫ́. Áko ádííniid, Haʼátʼíishąʼ, Naʼnitiní?
41 Jesus áhodííniid, Béeso aʼiiníiłii léiʼ diné nidiltʼéego yąąh hayííłʼá; łaʼ ashdladi neeznádiin denériyas,* náánáłaʼ éí ashdladiin.
42 Áko tʼáá áłah tʼáadoo nináyódléłí dago, tʼáá áłah tʼóó yá yikʼi adeezo. Éí bąą háidíígíishąʼ agháago ayóóʼáhóʼníi dooleeł?
43 Sáíman haadzíiʼgo ádííniid, Atisgo bąąh hááʼáhígíí shı̨́ı̨́. Áko áháłní, Tʼáá ákóneʼ háínídzííʼ.
44 Áádóó asdzání bichʼįʼgo nídzízyizgo Sáíman ábizhdííniid, Díí asdzáníísh yíníʼı̨́? Shí nighan góneʼ yah ííyáago shikeeʼ biniyé tó łaʼ tʼáadoo shéíníką́ą da, nidi bí tʼéiyá binákʼeeshtoʼ yee shikeeʼ néístłéeʼgo bitsiiʼ yee yiyíítʼóód.
45 Ni tʼáadoo shisínítsʼǫs da, nidi díí asdzání tʼáá yah ííyáádóó tʼáadoo áhodiilzéhí shikeeʼ néineeztsʼǫ́ǫ́z.
46 Shitsiiʼtʼáagi tʼáadoo akʼah bikʼi yeiniziid da,* nidi bí tʼéiyá shikeeʼ akʼah yikʼi yayiiziid.
47 Éí bąą ándishní, Habąąhági átʼéii tʼóó ahayóígíí há yóóʼanídootʼą́ągo bąą, tʼáá íiyisí ayóóʼíʼjóʼní, nidi tʼáá háiida aʼohgo há yóóʼanídootʼánígíí, tʼáá éí aʼohgo íʼjóʼní.
48 Áko asdzání áyidííniid, Bąąhági íínítʼįįdígíí ná yóóʼadootʼą́.
49 Áko daʼjiyáníjįʼ bił nidzíiztánígíí kódaʼahidooʼniid, Díishąʼ háí átʼı̨́įgo bąąhági átʼéii nidi á yóóʼiidiiʼaah?
50 Áko asdzání éí áyidííniid, Neʼoodląʼ bee aa dzíínílíii yisdánííłtı̨́; nił hózhǫ́ǫgo náádááł.
Footnotes
^ Denériyas łaʼa jı̨́įjįʼ nidaalnishgo nídayííłbįįh nítʼééʼ.
^ Haa ídzáhígíí éí diné nízaadę́ę́ʼ haa haakáhígíí áliv bee tłah ályaii bitsiiʼ áádóó biniiʼ yąąh ádeidoolííł biniyé bá chojoołʼı̨́ı̨́ nítʼééʼ.
