Malachi 1:1-14
1 Ízrel dineʼé bide áhootʼéii éí Málakai binahjįʼ Bóhólníihii hachʼįʼ haadzííʼ.
2 Bóhólníihii ání, Ayóóʼánihííníshʼníí nítʼééʼ. Nidi nihí ádadohní, Haash yitʼéego ayóóʼánihííníʼníí nítʼééʼ? Áko Bóhólníihii ánáánihidiʼní, Íísa éí Jéíkab bikʼis nilı̨́ yaʼ? Nidi Jéíkab ayóóʼííníshʼníí nítʼééʼ.
3 Áádóó Íísa éí jooshłáago dah daaskʼidii bííʼ dooleełgo baa deetʼáanii honoojíígóó mąʼii bá tʼáá ádzaaí íishłaa.
4 Nihił hóóchxǫʼ yę́ęgi nináhidiikahgo kin dááchxǫʼ yę́ę áńdadiilnííł, azhą́ Íídam kózhdííniid nidi, tʼáá ałtsoní bee Bóhólníihii kóní, Kin áńdajiidlaa nidi, hatsʼą́ą́ʼ nahideeshkał. Áádóó éí kódabidiʼníi doo, Doo yáʼáshóonii bee hoodzo, áádóó, Dadineʼé éí hoolʼáágóó Bóhólníihii bichʼįʼ hashké nídzinii, daolyée doo.
5 Díí tʼáá nihí nihinááʼ bee deidoołtséełgo ádadidoohniił, Ízrel dineʼé bikéyah bilááhdę́ę́ʼ Bóhólníihii ayóó átʼéii nilı̨́.
Bóhólníihii éí náádaʼiiłniihii yideezteh
6 Ayeʼ éí bizhéʼé bił nilı̨́, índa naalʼaʼí éí binanitʼaʼí bił nilı̨́. Áko aTaaʼ nishłı̨́įgo bee nihił nishłíiniishąʼ háájí? Áádóó nihiNanitʼaʼí nishłı̨́įgo bee shitsʼąąh hastiʼiishąʼ háájí? nihiłní tʼáá ałtsoní bee Bóhólníihii. Nááʼiiłniihii danohłíinii, shízhiʼ daahʼįįd. Nidi ádadohní, Haash yitʼéego nízhiʼ deiitʼįįd?
7 Shibikááʼ nááʼiiniihí bikáaʼjįʼ chʼiyáán dááchǫʼígíí náádahoołniiʼ lá. Índa ádadohní, Haash yitʼéego daniilchxǫʼ? Bóhólníihii bibikááʼ adání bá nahatʼiʼ, dadohníigo ádaahtʼı̨́ı̨́ lá.
8 Tʼáá ałtsoní bee Bóhólníihii ání, Alı̨́ı̨́ʼ doo daʼooʼíinii náádahołniihgo éí tsʼídá doo yáʼáshǫ́ǫ da. Alı̨́ı̨́ʼ nidaʼniłhodígíí índa bąąh nidahałniihígíí náádahołníihgo éí tsʼídá doo yáʼáshǫ́ǫ da. Éí nihinanitʼaʼí baa nohłéego daatsʼí bił yáʼátʼéeh doo? Doodaiiʼ éí nihichʼįʼísh kʼénídzin doo?
9 Kʼad Diyin God yáʼátʼéehii baa nideinohkąąhgo daatsʼí nihaa joobaʼ doo. Ákódaatʼéii náádahoołniiʼígíí daatsʼí binahjįʼ nihaa joobaʼ doo? ní tʼáá ałtsoní bee Bóhólníihii.
10 Shibikááʼ nááʼiiniihí bikááʼ tʼáadoo biniyéhígóó doo kǫʼ didoołtłiłgo náádaʼiyołniih da doo biniyé nihitahdóó naagháii łaʼ shikin biiʼ sohodizin bichʼįʼ ahóótʼiʼígíí yidádiʼdoołkał laanaa nisin. Doo shił dahonohshǫ́ǫ da doo índa náádahołniihii doo łaʼ nihílákʼeedóó nidideeshłéeł da, ní tʼáá ałtsoní bee Bóhólníihii.
11 Jó, hááʼátʼááhdóó anáʼátʼáahjįʼ ałʼąą dineʼé bitahgóó shízhiʼ ayóó átʼée doo. Índa tʼáá ałtsogóó tsin bijeeh dilidgo łikání halchinii áádóó nááhániihii chin bąąh ádinii shichʼįʼ náádayiiłniih doo. Háálá ałʼąą dineʼé bitahgóó shízhiʼ ayóó átʼée doo, ní tʼáá ałtsoní bee Bóhólníihii.
12 Bóhólníihii bibikááʼ adání tʼóó baaʼih áádóó bikáaʼgi chʼiyánígíí éí baaʼih hasin, dadohníigo tʼáá nihí doo dílzingóó ádaahłaa.
13 Dooládóʼ tʼóó ádił naʼídááh átʼée da, jóʼakon! ałdóʼ dadohníigo daałchingo bitsʼą́ąjįʼ háádanołniih, ní tʼáá ałtsoní bee Bóhólníihii. Índa naaldlooshii ałchinii dabííʼaalii áádóó nidaʼniłhodii índa bąąh nidahałniihii nidahishooʼeezhgo náádahołniih. Daʼ díísh nihitsʼą́ą́dóó nídideeshłééł? ní Bóhólníihii.
14 Binaʼadloʼii bilı̨́ı̨́ʼ bitahdóó bikąʼii łaʼ yee ádee haadzíiʼgo, nidi doo hadaałtʼéhígíí Bóhólníihii yichʼįʼ nááyiisniiʼígíí hóyéeʼgo bá haʼdoodzih, háálá shí naatʼáanii ayóó átʼéii nishłı̨́ índa ałʼąą dineʼé bitahgóó shízhiʼ dílzin, ní tʼáá ałtsoní bee Bóhólníihii.
