Malachi 2:1-17
2 Nááʼiiłniihii danohłíinii, díí kʼad bikʼeh óʼooʼníiłii nihá átʼé.
2 Doo dashíínółtsʼą́ą́ʼgóó índa nihijéí tłʼááhdę́ę́ʼ shízhiʼ doo baa dahohniih dago tsʼídá hóyéʼígi átʼéego bee nihá hadeesdzihii nihikʼijįʼ kódeeshłííł. Áádóó bee nihikʼihojidlíii hóyéeʼgo bá hadeesdzih; tʼáá aaníí, tʼáá íídą́ą́ʼ hóyéeʼgo bá haasdzííʼ, háálá tʼáadoo bee ádiih tsídasookéez da, ní tʼáá ałtsoní bee Bóhólníihii.
3 Dashoołchíinii dadeeshchxǫǫł, índa hodílzingo áłah náʼádleehgo náádahoołniiʼii bichaan nihiniiʼjįʼ bee deeshdlish áádóó éí bił chʼínihidínéeshkał, jóʼakon.
4 Shibee ahaʼdeetʼáanii éí Líívai bá náás yitʼih dooleeł biniyé díí bikʼeh óʼooʼníiłii nihichʼįʼ kóshłaago nihił béédahózin doo, ní tʼáá ałtsoní bee Bóhólníihii.
5 Iiná áádóó achʼįʼ hózhǫ́ bee bił ahaʼdinishtʼą́; éí hodísin doo biniyé baa diníʼą́, áko shidísingo shízhiʼ bił nilı̨́ı̨́ nítʼééʼ.
6 Bee hazʼáanii tʼáá aaníinii yee yáłtiʼgo doo ákwii ádaatʼéii doo yee yáłtiʼ da nítʼééʼ; achʼįʼ hózhǫ́ índa tsʼídá tʼáá ákóneʼ átʼéii biyiʼgóó shił yiʼash nítʼééʼ, áádóó diné tʼóó ahayóí ádił nidaʼiilzíihii yitsʼą́ąjįʼ yił nináhaaskai.
7 Nááʼiiłniihii éí ił ééhózinii yee yáłtiʼgo doo nahjįʼ kódooníił da nítʼééʼ áádóó bee hazʼáanii bee diné nazhnitin doo nítʼééʼ, háálá tʼáá ałtsoní bee Bóhólníihii binaalʼaʼí jílı̨́.
8 Nidi kʼéhézdon honítʼiʼ bitsʼáhóhjeehgo bąą áádóó tʼáá ádzaagóó bee hazʼáanii bee naʼnitin biniinaa tʼóó ahayóí ádił daʼasiihgo Líívai bibee ahaʼdeetʼáanii daołchxǫʼ lá, ní tʼáá ałtsoní bee Bóhólníihii.
9 Éí bąą diné tʼáá ałtso binááł nihá nahatʼiʼgo ánihiishłaa, háálá áníshtʼéii doo bikʼehgo deínóhkáah da, nidi bee hazʼáanii doo bikʼehgóó ałʼoh átʼéego baa nitsídasookééz lá.
Ízrel dineʼé doo badaʼahódlíii biʼdeesteh
10 Tsʼídá tʼáá áníiltso tʼááłáʼí nihiTaaʼ. Diyin God tsʼídá tʼááłáʼígíí ánihiilaa. Áko haash yitʼéego nihí tʼááłáʼí niitínígo nihikʼisóó bindaʼsiidloʼgo bee danihizhéʼé yę́ę bibee ahaʼdeetʼáanii deiilchxǫ?
11 Júdah dineʼé naʼadloʼ nidayiisdéél índa Ízrel kéyahgi áádóó Jerúsalem kin haalʼáagi doo yildinígi ádaadzaa; jó, Júdah dineʼé éí diyin bidiʼníinii bitsiʼ bá dzízyehgo hodiyingo hazʼáanii éí Bóhólníihii ayóóʼáyóʼnínígíí doo diyingóó ájiilaa.
12 Jéíkab dineʼé dah yinééłdóó diné łaʼ kójíítʼįįdígíí naʼnitiní, doodaiiʼ ídahoołʼaahii, doodaiiʼ tʼáá háiida tʼáá ałtsoní bee Bóhólníihii bichʼįʼ nááʼjiiłniihígíí éí Bóhólníihii áhółdįįh leʼ.
13 Áko díigi ánáádaahdzaa. Bóhólníihii bibikááʼ nááʼiiniihí nihinákʼeeshtoʼ bikʼi nidasoonil índa ádił háádaahdzołgo daahcha, háálá náádahołniihígíí doo yinízin da, doodaiiʼ doo nihá néidiilée da.
14 Nidaʼídółkidgo ádadohní, Haʼátʼéegoshąʼ? Ániid nanináádą́ą́ʼ neʼasdzą́ą́ binaʼíloʼgo biniinaa nihitaʼgi Bóhólníihii ooʼíinii nilı̨́ı̨́ nítʼééʼ. Éí tʼahdii nichʼooní átʼé nidi, bee ahaʼdeetʼáanii binahjįʼ neʼasdzą́ą́ silı̨́ı̨́ʼ nítʼééʼ nidi, ákódaohdzaa.
15 Daʼ doósh Diyin God tʼáá łaʼ sookéhígíí tʼáá łah dinołtʼéhígo ánihiilaa da? Índa éí bee iiná nihaa yiilé. Haʼátʼíísh biniyé tʼáá łaʼ sooké? Shoołchínígíí diyingo dayíkáah doo biniyé. Éí bąą ániid nanináádą́ą́ʼ neʼasdzą́ą́ silı̨́įʼii tʼáadoo binaʼíloʼí.
16 Háálá ałtsʼáʼítʼaash jooshłxá, ní Ízrel biBóhólníihii Diyin God. Tʼáá naʼníleʼdii óʼooʼnííł bee biʼéeʼgo naagháhígíí ałdóʼ jooshłxá, ní tʼáá ałtsoní bee Bóhólníihii. Éí bąą ádaa ádahołyą́ índa tʼáadoo nihindaʼadloʼí.
Aa hwiinítʼįįh beidoołkááł tʼáá áyídí hadziih
17 Bóhólníihii nihizaad yąąh chʼééh deeyá. Áko ádadohní, Haash yitʼéego doo bił hózhǫ́ǫ́góó ádeiilyaa? Bóhólníihii binááł tʼááłáʼí jinítínígo, Tʼáá íiyisí doo yáʼáshóonii ájíítʼįįdii éí yáʼátʼééh índa éí bił hóshǫ́, dadohnínígíí biniinaa. Áádóó nidaʼídółkidgo ádadohní, Diyin God tʼáá ákogi átʼéego ánihwiiʼaahiishąʼ háájí?
