Malachi 4:1-6
4 Áajįʼ ayííłką́ągo bááh bighan góneʼ honeezgai nahalin doo índa tʼáá ádíláahgo deíkáahii áádóó tʼáá íiyisí doo yáʼáshǫ́ǫ́góó ádaaníiłii tʼáá ałtso ehégod adidookʼą́ą́ł nahalingo beidoołkááł índa behétłʼóól áádóó bitsʼáozʼaʼ doo łaʼ doodzih da, jóʼakon, ní tʼáá ałtsoní bee Bóhólníihii.
2 Nidi nihí shízhiʼ dadíínóhsinii éí Jı̨́honaaʼéí Tsʼídá Tʼáá Ákogi Átʼéii hadoogáałgo bitʼaʼ biyaadóó hadaałtʼé nídadoohdleeł. Béégashii yáázh neeyą́ągo bighandę́ę́ʼ chʼíltʼeʼ nahalingo chʼídoohkah.
3 Áádóó beiníłką́ądi tʼáá íiyisí doo yáʼádajíshóonii hakʼi nidoohkah, índa łeeshchʼiih nahalingo nihikétłʼááh bee hakʼi nidoohkah, ní tʼáá ałtsoní bee Bóhólníihii.
4 Shá naalʼaʼí Mózes bibee hazʼáanii éí yee nihwiizʼáanii áádóó yee nihodiiʼaahii tʼáá bił Dził Hórebgi Ízrel dineʼé tʼáá ałtso bee bichʼįʼ haasdzíiʼii béédaałniih.
5 Bóhólníihii beiníłką́ądi ayóó átʼéego índa bikʼee tʼóó ił ahayóigo haʼdooʼáłígíí tʼah bítséedi Diyin God yá halneʼii Iiláíjah nihaa deeshʼaał, jóʼakon.
6 Áádóó azhéʼé éí baʼáłchíní yił łáʼí nídadoodleeł índa aʼáłchíní éí bizhéʼé yił łáʼí nídadoodleeł, áko kéyah éí doo hóyéeʼgo bá hadeesdzihgo atídeeshłíił da.
