Mark 11:1-33
11 Áko Jerúsalem tʼáá bichʼįʼdóó Dził Álivz bitsı̨́įgi Béthfajii índa Béthanii wolyéego kin sinilígíí bichʼįʼ tʼáá áyídídę́ę́ʼ jookahgo hódahoołʼaahii naaki ajííłʼaʼgo
2 ábijiní, Nihílááh, náwónaanídi nihidááhjí kin sinilíjįʼ dohʼaash, áko tʼáá nooʼáázhgóó télii yázhí tʼah doo adiyeehígíí dahaastłʼǫ́ǫgo bikʼídoohʼash; éí kʼeʼdoohʼałgo nídoohłóós.
3 Áko diné łaʼda, Haʼátʼíishąʼ biniyé óhtʼı̨́? nihidííniidgo, Jó, Bóhólníihii choidoołʼįįł, bididoohniił, áádóó tʼáá áko áádę́ę́ʼ nihił yiʼdoołnih.
4 Áko dashdiiʼáazhgo kintaaʼaztiinígíí bibąąhgóó kin léiʼ bichʼéédą́ąʼgi télii yázhí dahaastłʼǫ́ǫgo bikʼízhníʼáázh, áko kʼeʼjííʼah.
5 Nítʼééʼ ákǫ́ǫ́ naazínígíí łaʼ ádahodííniid, Haʼátʼíishąʼ baa naahʼaashgo, télii yázhí kʼeʼohʼad?
6 Áko tʼáá Jesus ádidoohniił hodííniidígi ázhdííniid, áko yił hodaʼasniiʼ.
7 Áko télii yázhí éí Jesus baazhnílóozgo, habeeldléí bikáaʼjįʼ ádadziiznil, áádóó Jesus éí yikʼi dah neezdá.
8 Áko ląʼí dabibeeldléí atiingóó há dayíłkaad, náánáłaʼ éí atiin bąąhgóó tsin biʼiil dadíłchʼilii dayiigéeshgo atiingóó há dayíłjeeh.
9 Áko alą́ąjįʼ índa akéédę́ę́ʼ nooyéłígíí dadilwoshgo ádaaní,
Baa haʼniih leʼ! Bóhólníihii bízhiʼ bee biʼdójíigo yigáłígíí bikʼihojidlíi doo!
10 Nihizhéʼé yę́ę David bee bóhólníihgo bił hazʼáanii dooleełígíí bikʼihojidlíi doo!Aghánáhóóʼáádę́ę́ʼ baa haʼniih leʼ!
11 Áko Jerúsalemgi Jesus jiníyáago kin biiʼ sohodizin bił hazʼą́ą́ góneʼ yah ajííyá, áko tʼáá ałtsogóó nidzizghaldóó bikʼijįʼ, iʼííʼą́ągo naakitsʼáadahígíí bił Béthaniigóó dashdiikai.
Fig sikaadii bineestʼąʼ doo bąąh nááhodoodleełgóó bá haʼoodzííʼ (Mt. 21:18,19)
12 Áádóó biiskání Béthaniidóó chʼíjíkaigo dichin dzizlı̨́ı̨́ʼ.
13 Áko atiin tʼáá bitsʼáhoníʼą́ądi fig léiʼ bitʼąąʼ hólǫ́ǫgo sikaadgo jiiłtsą́, áko bineestʼąʼ daatsʼí bąąh hólǫ́ jinízingo bichʼįʼ jiníyá. Áko baazhníyáá nítʼééʼ, bitʼąąʼ tʼéiyá bąąh hólǫ́ǫ́ lá, háálá fig dadínóotʼı̨́įłjįʼ tʼah doo ahalzhíish da.
14 Nítʼééʼ fig sikaadii ábizhdííniid, Kodóó hoolʼáágóó diné doo łaʼ nąąh nááʼdoodı̨́įł da. Áko hódahoołʼaahii díí deidiiztsʼą́ą́ʼ.
Kin biiʼ sohodizin nidayiiłchxǫǫhii chʼíneelkaad (Mt. 21:12-17; Lk. 19:45-48; Jn. 2:13-22)
15 Áko Jerúsalemdi jíkai. Áádóó kin biiʼ sohodizin bił hazʼą́ą́ góneʼ yah ajííyáago, ákóneʼ baa nidaʼiiniihígíí índa nidaʼiiłniihígíí chʼízhneełkaadgo baa nízdiidzá, áádóó bikáaʼgi béeso ałgháádaʼaʼnilígíí índa hasbídí baa nidahaniihii yikááʼ dah naazdáhígíí naaʼadziistłʼííd,*
16 áádóó kin biiʼ sohodizin bił hazʼą́ągi haʼátʼíhígíida doo naalyée da doogo bee hojiiłʼaʼ.*
17 Áádóó nazʼneeztą́ąʼgo ábijiní, Daʼ kótʼéegoósh doo bee akʼeʼashchı̨́į da, Shikin éí ałʼąą dineʼé tʼáá ałtso bá kin biiʼ sohodizin wolyée doo? Nidi aghadaʼiiʼníiłii beʼaʼáán ádaahłaa lá.
18 Áko bee hazʼáanii yíndaʼniłtinii índa aláahgo náádaʼiiłniihii éidí deidiiztsʼą́ą́ʼ, áko haʼátʼéegoda dahodiyoołhéłígíí chʼééh yaa nídaastʼįįd, háálá diné tʼáá ałtso hanaʼnitin bikʼee tʼóó bił adahayóigo biniinaa hwéédaaldzid.
19 Áko tʼáá anáʼátʼááh bikʼeh kin haalʼáhídóó chʼééjídááh.
Fig sikaadgo siganígíí bee naʼnitin (Mt. 21:20-22)
20 Áádóó abínígo fig sikaadígóó níjookah, nítʼééʼ tʼáá bihétłʼóóldę́ę́ʼ sigango dajiiłtsą́.
21 Áko Peter yénáálniiʼgo áhodííniid, Shoo, Naʼnitiní! Fig sikaadii nichxǫ́ʼógo bá háínídzíʼígíí sigan lá.
22 Áko hachʼįʼ hanáánáádzíiʼgo áháłní, Diyin God deinohdlą́ągo baa dadzíínóhłí.
23 Tʼáá aaníígóó ánihidishní, Tʼáá háiida díí dziłígíí, Dah niʼdootʼaahgo tónteel biih nidiʼyólghan, yidííniidgo áádóó bee hadzoodzíʼígíí bohodoolnííł jinízingo hajéí tʼáadoo bił naaki nilíní joodlą́ągo éí há bohodoolnííł.
24 Éí bąą ánihidishní, Tʼáá haʼátʼíhída dayínóhkeedgo bíká sodadołzinígíí éí tʼáá íídą́ą́ʼ nihaa deetʼą́ągo deinohdlą́ą leʼ, áko danihííʼ dooleeł.
25 Áádóó tʼáá sodadołzin bikʼeh łaʼda tʼáá baaní hólǫ́ǫgo bikʼijįʼ danohłínígíí bá yóóʼanídahidohʼaah, áko doo ákǫ́ǫ́ ádaahdzaaígíí nihiTaaʼ yáʼąąshdi hólóonii nihá yóóʼánéididooʼááł.
26 [Nidi náánáłaʼ diné nihichʼįʼ bąąhági ádaadzaii doo bá yóóʼanídahidohʼaahgóó nihiTaaʼ yáʼąąshdi hólóonii ałdóʼ bąąhági ádaohtʼįįdii doo nihá yóóʼanéididooʼáał da.]
Jesus háí bee óhólnííh beidiníʼánígíí bínabídéékid (Mt. 21:23-27; Lk. 20:1-8)
27 Áádóó Jerúsalemdi náájíkai. Áko kin biiʼ sohodizin bił hazʼą́ą́ góneʼ joogáałgo aláahgo náádaʼiiłniihii áádóó bee hazʼáanii yíndaʼniłtinii índa diné yá aląąjįʼ naazíinii haa yíkaigo
28 ádahałní, Haʼátʼíí bee óhólnííh shı̨́įshąʼ bikʼehgo díidí baa naniná, áádóó háishąʼ díí bee óhólnííh neidiníʼą́ągo bikʼehgo baa naniná?
29 Áko Jesus áháłní, Shí ałdóʼ łahgo nanihídídéeshkił, bee shił dahoołneʼgo índa shí ałdóʼ bee óhólnííh bikʼehgo díidí baa naasháhígíí bee nihił hodeeshnih.
30 John lá háádę́ę́ʼ bee óhólníihii bikʼehgo tó yee ası̨́ı̨́h nítʼééʼ, yáʼąąshdę́ę́ʼ daatsʼí, éí doodaléiʼ diné bitsʼą́ą́dóó daatsʼí? Bee shił dahołneʼ.
31 Áko yaa nídaatʼı̨́įgo ádaaní, Yáʼąąshdę́ę́ʼ dadiiʼniidgo laʼ, ádidooniił, Ákoshąʼ haa yitʼéego doo dahwiisoohdląąd da?
32 Doodaléiʼ, Diné bitsʼą́ą́dóó, dadiiʼniidgo laʼ, diné yéédaaldzid, háálá diné tʼáá ałtso John tʼáá aaníí Diyin God yá halneʼii nilı̨́ı̨́ nítʼééʼ dayóʼní.
33 Áko Jesus yichʼįʼ hadaasdzíiʼgo ádaaní, Doo nihił béédahózin da. Áko Jesus áhodííniid, Shí ałdóʼ bee óhólnííh bikʼehgo díidí baa naasháhígíí doo bee nihił hodeeshnih da.
Footnotes
^ Sohodizin bił hazʼą́ą́ góneʼ dibé hadaałtʼéii áádóó hasbídí nidahaniihígíí diné nízaadę́ę́ʼ nidaakaígíí yichʼįʼ nidayiiłniiʼ. Ałʼąą kéyahdę́ę́ʼ nidaakaigo biniinaa bibéeso łahgo átʼéego áádóó Jew dineʼé ałdóʼ bibéeso kin biiʼ sohodizin bibéeso bił ałgháádaʼjiʼnil nítʼééʼ.
^ Dził Álivz wolyéhígíí bichʼįʼ hééł nídeidigéehgo bichʼįʼ nízaadgo biniinaa sohodizin bił hazʼą́ągi bichʼéédą́ą́ʼ góneʼ hééł nídeidigééh nítʼééʼ, háálá áájígo éí áyídí. Kódaatʼı̨́įgo nidahwiiłchǫǫh.
