Mark 13:1-37
13 Áko Jesus bídahoołʼaahii yił kin biiʼ sohodizin bił hazʼą́ą́dóó chʼíjíkáahgo hódahoołʼaahii łaʼ áháłní, Shoo, Naʼnitiní, dooládóʼ tséda, áádóó dooládóʼ daakinda!
2 Áko Jesus áhodííniid, Díí kin ayóó ádaatʼéhígíísh yíníʼı̨́? Kweʼé tsé doo łaʼ tʼáá ałkʼi dah siʼą́ą da dooleeł, nidi tʼáá ałtso naaʼahidoolkał.
Achʼįʼ nahwiiʼnáa dooleełígíí alą́ąjįʼ baa hojoolneʼ (Mt. 24:3-14; Lk. 21:7-19)
3 Nítʼééʼ Dził Álivz binániidi kin biiʼ sohodizin binaashiijí dzineezdáago, Peter áádóó James áádóó John índa Andrew tʼáá sáhí nidahódééłkidgo ádaaní,
4 Baa chʼíhwííníʼánígíishąʼ hahgo ákódadoonííł bee nihił hólneʼ, áádóó díidí ádahodooníłígíishąʼ kʼadę́ę tʼáá ałtso ádaanéehgo haʼátʼíí bee bééhózin dooleeł?
5 Áko Jesus hachʼįʼ ayáʼniiłtiʼgo ání, Ádaa ádahołyą́, áko diné doo łaʼ yóóʼadanihidínóoʼah da.
6 Ląʼí shízhiʼ yee ádadójíigo nidahidookah, Shí Christ áshtʼı̨́! daaníigo, áko ląʼí yóóʼadeidínóoʼah.
7 Áko daʼanaaʼ índa anaaʼ baa dahaneʼgo dadoohtsʼaʼgo tʼáadoo nitsidaahkaaí, háálá díidí tsʼídá ádahodoonííł, nidi tʼah doo nihoogháah da doo.
8 Háálá ałʼąą dineʼé ałchʼįʼ nídahidiibáah doo, áádóó łahgo nihokááʼ bee bóhólníihgo bił hazʼáanii índa náánáłaʼ nihokááʼ bee bínááhólníihgo bił nááhástʼáanii yił ałchʼįʼ nídahidiibáah dooleeł, índa łahgóó niʼ nídahidiʼnáah doo, áádóó dahodichin índa achʼįʼ nidahwiiʼnáa doo; díidíígíí tiʼhooʼnííh bee dadeeztʼiʼii ádaatʼé.
9 Nidi nihí ádaa ádahołyą́, háálá aa nídahatʼı̨́įjįʼ adanihidiyooʼish, áádóó kin biiʼ áłah nídaʼadleehí biyiʼgóó nídanihiniłhał doo; shiniinaa naatʼáanii índa aláahgo naatʼáanii naazdáágóó bidááhdę́ę́ʼ nisoozı̨́įgo shá nidahołneʼ doo.
10 Áádóó ałʼąą dineʼé tʼáá ałtso haneʼ yáʼátʼéehii áłtsé tsʼídá bee bił dahodoonih.
11 Áádóó aa nídahatʼı̨́įjįʼ adanihidiyooʼishgo, tʼáá bítséedi haʼátʼíhída dadidoohniiłígíí tʼáadoo biniinaa ádił nídahodołchiłí; áajįʼ ahoolzhiizhgo índa tʼáá nihiih yilyáhígíí éí bee hadoohdzih, háálá nihí doo hadoohdzih da, nidi Níłchʼi Diyinii éí hanihidiyoołdzih.
12 Áádóó ashiiké tʼáá łaʼ hajííʼáazhgo łaʼ bidiʼyoolyéełjįʼ nináʼahididootʼááł, áádóó azhéʼé nilíinii baʼáłchíní ninéididooʼááł, índa áłchíní bishchíinii yidááhdę́ę́ʼ nídahidiikáahgo nahodiʼdootsiłjįʼ ninádahodiiʼaah dooleeł;
13 shízhiʼ biniinaa diné tʼáá ałtso nihikʼee dadiniih doo. Nidi tʼáá háiida tʼáá nihoníyáajįʼ haʼólníhígíí éí yisdádooltééł.
Ayóó átʼéego achʼįʼ nahwiiʼnáa doo (Mt. 24:15-28; Lk. 21:20-24)
14 Nidi (díí tʼáá jółtaʼígíí hániʼ bikʼizhʼdiitįįh) doo yildingóó niʼiiłchxǫǫhii [éí Daniel, Diyin God yá halneʼii, yaa chʼíhoníʼánígíí] doo sizı̨́į da dooleeł yę́ęgi sizı̨́įgo daołtsą́ągo, áyąądą́ą́ʼ Judíyagi kéédahatʼíinii bíniʼdii dziłjįʼ chodaʼiidoołʼįįł,
15 áko łaʼda bikin bighą́ąʼdi naagháago wóneʼdę́ę́ʼ tʼáadoo leʼé chʼíidoolééł biniyé doo yah anídoolwoł da,
16 áádóó łaʼda dáʼákʼehgi naagháago biʼéétsoh tʼááká tʼą́ą́ʼ yaa náolyeed lágo.
17 Áko éí beiníłką́ągo dadzooltsánígíí índa awééʼ dahałtʼoʼígíí doo hashtʼeʼígóó doo há hojoobaʼ hazʼą́ą da doo!
18 Áko éí haigo doo áhodooníił daígíí bíká sodadołzin.
19 Háálá éí beiníłką́ągo Diyin God tʼáá ałtsoní áyiilaadóó wóshdę́ę́ʼ díí jı̨́įjįʼ achʼįʼ nahwiiʼná ákótʼéii tʼah doo yiiltséeh da yę́ę, kʼad índa, áádóó tsʼídá doo ákónáádooʼníił da.
20 Áko Bóhólníihii éí yoołkáłígíí doo áłtsʼísí ánáyiidlaagóogo nihokááʼ dineʼé doo łaʼ doodzih da, nidi atah yiyiizláaʼii, tʼáá bí yitayiizláʼígíí biniinaa éí yoołkáłígíí áłtsʼísí ánáyiidlaa.
21 Áádóó diné łaʼda, Shoo, kǫ́ǫ́ Christ naaghá, éí doodaléiʼ, Shoo, níláhjí naaghá, danihiłníigo tʼáadoo deinohdlání.
22 Háálá Christ ádahodilʼíinii índa tʼóó ádahodilʼı̨́įgo dahalneʼii dahodooleełgo álílee kʼehgo bee éédahózinii índa bikʼee tʼóó ił ahayóigo ádahooníiłii ádeiłʼı̨́į doo, áko yídaneelʼą́ą́ ládą́ą́ʼ Diyin God atah yiyiizláʼígíí nidi yóóʼadeidínóoʼah.
23 Nidi ádaa ádahołyą́, jóʼakon, díí tʼáá ałtso tʼah doo ádahanééhdą́ą́ʼ bee nihił hashneʼ.
Diné Silı̨́įʼii nídoodáłígíí (Mt. 24:29-31; Lk. 21:25-28)
24 Nidi éí yoołkáłígíí biyiʼ achʼįʼ nahwiiʼná bighá yooską́ą́dóó bikʼijįʼ jı̨́honaaʼéí bił chahodoołhił, áádóó ooljééʼ doo adiníłdíin da dooleeł,
25 índa yádiłhił biyiʼdę́ę́ʼ sǫʼ nidahindéeh doo, índa yótʼááh hiníláii biyiʼdi bee dahółdzilígíí dadoogał.
26 Ákohgo índa Diné Silı̨́įʼii kʼos bił yildohgo áádóó bee adziil ayóó átʼéii índa atsʼádiʼnílííd yił yigáałgo deizdoołtsééł.
27 Áadi índa bidiyingo nidaalʼaʼí iidiyoołʼaałgo tʼáá dı̨́ı̨́ʼgóó niʼ nidaneesʼą́ą́dę́ę́ʼ índa yá nidaneesʼą́ą́dę́ę́ʼ atah yiyiizláaʼii áłah ádeidoolííł.
Fig sikaadii néitsóhígíí binahjįʼ naʼnitin (Mt. 24:32-35; Lk. 21:29-33)
28 Fig sikaadii binahjįʼ haneʼ bee akʼidiʼdootı̨́įłii nihił béédahoozįįh: jó, éí bitsʼáozʼaʼ ditʼódí yileeh áádóó índa bitʼąąʼ néitsóohgo, kʼadę́ę chʼínáshı̨́įhgo nihił béédahózin łeh.
29 Díidíígíí bidahoolníiłgo danółʼı̨́įgo Diné Silı̨́įʼii kʼad tʼáá áyídídę́ę́ʼ nihichʼéédą́ąʼjįʼ nidi, bił ahoolzhiizh lá danohsingo nihił béédahózin doo.
30 Tʼáá aaníígóó ánihidishní, Díí oochíłígíí doo bił yóóʼahodoogáał da, díidí tʼáá ałtso ádaadzaago índa.
31 Yádiłhił índa nahasdzáán bił yóóʼahodoogááł, nidi shizaad tʼéiyá doo bił yóóʼahodoogáał da.
Ákwii yoołkáłígíí índa oolkiłígíí diné łaʼda doo hoł bééhózin da (Mt. 24:36-44)
32 Nidi ákwii yoołkáłígíí índa oolkiłígíí diné łaʼda doo hoł bééhózin da, yáʼąąshdi diyingo nidaalʼaʼí nidi dooda, aYeʼ nidi dooda, nidi aTaaʼ tʼéiyá bił bééhózin.
33 Nihoolzhíísh doo nihił béédahózin daígíí bąą ádaa ádahołyą́, hadaʼísídółʼı̨́ı̨́ʼ áádóó sodadołzin.
34 Diné Silı̨́įʼii éí díigi átʼé: diné łaʼ haghan bitsʼą́ą́ʼ náánáłaʼ kéyahgóó dashdiiyáago há nidaalʼaʼí tʼááłáʼí nítínígo, Díí ninaanish dooleeł, dabizhdííniidgo hookʼee nizhnínil, áádóó chʼéʼétiin yaa áhályáanii, Hazhóʼó haʼísííd, bizhdííniid.
35 Éí bąą hadaʼísídółʼı̨́ı̨́ʼ, háálá éí kin bee bóhólníihii nídoodááł bijínígíí doo nihił béédahózin da, iʼííʼą́ągo daatsʼí, tłʼéʼííłníiʼgo daatsʼí, naaʼahóóhai bikąʼí ádííniidgo daatsʼí, abínígo daatsʼí nídoodááł.
36 Doo hadaʼísídółʼı̨́ı̨́ʼgóó tʼáadoo hooyání nídoodáałgo, daʼołhoshgo nihikʼídoogááł.
37 Áko díí ánihidishnínígíí éí tʼáá ádzíłtso áhodishní, Hadaʼísídółʼı̨́ı̨́ʼ.
