Mark 14:1-72
14 Áko atisʼadeesdzá bee bééhániihii áádóó dííkʼǫsh tʼáágééd bááh ályaii hodílzingo áłah náʼádleeh éí naaki jı̨́ hadziih. Áko aláahgo náádaʼiiłniihii áádóó bee hazʼáanii yíndaʼniłtinii éí Jesus tʼáá nahontʼinee deidoołtsoł áádóó deidiyoołhéłígíí yíkadadiltsʼiʼ,
2 nidi ádadííniid, Hodílzingo áłah náʼádleeh góneʼ éí dooda, háálá ákódeiidzaago diné hadahodínóołchał.
Jesus éí Béthaniigi akʼah bee atsʼábiʼdeeltı̨́ (Mt. 26:6-13; Jn. 12:1-8)
3 Áko Béthaniigi Sáíman éí łóód atsʼíís yiyáanii naałdzidii bee bąąh dah hazʼą́ą́ nítʼéʼígíí bighan góneʼ ajiyą́ągo dzizdá, nítʼééʼ asdzání léiʼ chʼil nard wolyéii bikʼah tʼáá bízhání tʼáá íiyisí ílíinii éí tózis tsé alabáster wolyéhígíí bee ályaago yee yah ayííʼą́, áádóó tózis bidáaʼgi yistsʼilgo hatsiiʼkáaʼjįʼ akʼahígíí hatsiiʼ yikʼi yayiiziid.
4 Nidi łaʼ, Haʼátʼíishąʼ biniyé díí akʼah kótʼéego tʼóó bee naʼasʼneʼ, daʼahidiʼníigo yikʼee doo bił dahóózhǫǫd da.
5 Háálá díí akʼahígíí táadi neeznádiin denériyas* tʼah biláhígo bą́ą́h ílı̨́įgo nahidoonih nítʼééʼ, áko éí béesoígíí diné badahojoobáʼíígíí bitaasʼniiʼ doo nítʼééʼ, daaníigo yee haa nídaatʼı̨́.
6 Nidi Jesus áhodííniid, Tʼáadoo baa nídaahtʼíní; haʼátʼíísh biniyé baa nídaahtʼı̨́? Háálá yáʼátʼéhígi shá ádzaa.
7 Háálá badahojoobáʼíígíí tʼáá áłahjįʼ nihitaadaakai, áko tʼáá ooleełgi ándeinohdzįįhgo yáʼátʼéehii bá baa ninádaahkah, nidi shí tʼéiyá doo áłahjįʼ nihitaasháa da.
8 Tʼáá bízhneelʼánígi ádziidzaa; shitsʼíís yóóʼádoolníłígíí tʼáá bítséedi shidzistłah.*
9 Áko tʼáá aaníígóó ánihidishní, Nahasdzáán tʼáá siʼą́ą́ nítʼééʼ bikááʼgóó haneʼ yáʼátʼéehii baa dahaneʼgóó, díí asdzání ádzaaígíí bee bééhániih biniyé ałdóʼ baa haneʼ dooleeł.
Júdas éí Jesus ninéididooʼáałgi yee lą́ asłı̨́ı̨́ʼ (Mt. 26:14-16; Lk. 22:3-6)
10 Ákohgo Júdas Iskáriyat, éí naakitsʼáadahígíí łaʼ nilı̨́įgo, aláahgo náádaʼiiłniihii yaa hodidooʼááł yiniyé yaa níyá.
11 Áko éí deidiiztsʼą́ąʼgo bił dahóózhǫǫdgo, Béeso naa dadiiʼnił, dahodííniid. Áádóó haʼátʼéegoda ashjaʼiilaago nináhozhdidooʼáałgi baa nitsídzíkeesgo hodideeshzhiizh.
Atisʼadeesdzá bee bééhániihii hódahoołʼaahii bił dazhdooyı̨́ı̨́ł (Mt. 26:17-25; Lk. 22:7-14,21,23; Jn. 13:21-30)
12 Nítʼééʼ dííkʼǫsh tʼáágééd bááh ályaii hodílzingo áłah náʼádleeh łaʼa jı̨́ aleeh góneʼ atisʼadeesdzá bee bééhániih dooleełgo dibé yázhí náádajiiłniih baa hoolzhiizhgo hódahoołʼaahii ádahodííniid, Atisʼadeesdzá bee bééhániihgo yidánígíí dííyı̨́ı̨́ł biniyé háadishąʼ ná hashtʼediilnííł?
13 Áko nítʼééʼ hódahoołʼaahii naakigo dashdiiłʼaʼgo ábizhdííniid, Kin haalʼáhígóó dohʼaash, áadi diné łaʼ bidaaʼí yee tó yooʼáałgo nihidááh doogááł, éí tʼáá bikééʼ wohʼash doo,
14 áko éí tʼáá yah ííyáhí góneʼ kin bee bóhólníihii ábididoohniił, Naʼnitiní nilíinii, Diné nidahakáahgo bá nahazʼánígíí daatsʼí łahgo tʼáá shá hazʼą́? Ákweʼé shí áádóó shídahoołʼaahii atisʼadeesdzá bee bééhániihgo yidánígíí bił dadeeshı̨́ı̨́ł, niłní.
15 Áko kin náʼádeídi hótsaago tʼáá áłdįįd hashtʼehoolyaago nihichʼįʼ íidoolííł. Ákóneʼé nihibaʼ hashtʼedidoohʼnííł.
16 Áko íhoołʼaahii dashdiiʼáazhgo kin haalʼáhígóó jiníʼáázh, nítʼééʼ tʼáá aaníí tʼáá áhodííniidígi átʼéego bikʼízhníʼáázh; ákweʼé atisʼadeesdzá bee bééhániihgo dadoodı̨́łígíí tʼáá áłdįįłtʼéego ájiilaa.
17 Iʼííʼą́ągo hódahoołʼaahii naakitsʼáadahígíí ákwii bił jíkai.
18 Áko daʼjiyą́ągo nidzíiztą́, nítʼééʼ Jesus ání, Tʼáá aaníí ánihidishní, Nihí nihił daʼashánígíí łaʼ nináshididoohʼááł.
19 Áádóó tʼááłáʼí jinítínígo bąąh dahániʼgo tʼáá ałkééʼ, Daʼ shíísh? dajiníigo baa nízhdiikai.
20 Áko ánááhodooʼniid, Jó, naakitsʼáadahígíí łaʼ, tʼáá shił ééʼéʼáhígíí éí áhodishní.
21 Háálá Diné Silı̨́įʼii tʼáá bá bee akʼeʼashchínígi bikʼehgo ábidiʼdoolnííł, nidi Diné Silı̨́įʼii ninázhdiníʼánígíí, éí doo hojoobaʼ ájíníi da! Éí dinéhígíí tʼáadoo hoʼdizhchı̨́ı̨́jígo há yáʼátʼééh nítʼééʼ.
Bóhólníihii Bidiyingo Adą́ áyiilaa (Mt. 26:26-30; Lk. 22:15-20; 1Cor. 11:23-25)
22 Áko daʼjiyą́ągo bááh néidiiʼą́ągo yikʼi sodoolzingo niyiiztiʼ índa hataizniiʼgo áhodííniid, Nídahidoohʼaahgo daohsą́; díí shitsʼíís átʼé.
23 Áko doodlı̨́įłii néidiiką́, áádóó sodoolzingo yaa ahééh niizı̨́įʼgo hainíką́, áko ałtadzideeską́ągo tʼáá ádzíłtso dajoodlą́ą́ʼ.
24 Áko ábizhdííniid, Díí shidił,* bee ahaʼdeetʼáanii ániidíii, diné tʼóó ahayóí bá deeznaʼígíí átʼé.
25 Tʼáá aaníígóó ánihidishní, Kodóó chʼil naʼatłʼoʼii bitooʼ doo łaʼ náádeeshdlı̨́įł da, Diyin God bee bóhólníihgo bił hazʼáanii biyiʼdi índa chʼil naʼatłʼoʼii bitooʼ ániidíii náádeeshdlı̨́ı̨́ł.
26 Áádóó sin łaʼ bee dahojíítáalgo,* Dził Álivz hoolyéhígóó dashdiikai.
Peter éí, Jesus doo bééhasin da, bidizhdooniiłígíí tʼáá bítséedi baa haneʼ (Mt. 26:31-35; Lk. 22:31-34; Jn. 13:36-38)
27 Áko Jesus áháłní, Díí tłʼééʼ tʼáá ánółtso shiniinaa tʼą́ą́ʼ anídínóohdah, háálá kótʼéego bee akʼeʼashchı̨́,
Naʼniłkaadii atídeeshłííł, áádóó dibé daʼníłtsʼą́ą́ʼgóó taidoojah.
28 Nidi dasétsą́ą́dę́ę́ʼ nááshiʼdiilzáádóó bikʼijįʼ Gáliliigóó nihibaʼ yisháał dooleeł.
29 Nidi Peter áháłní, Azhą́ tʼáá ádzíłtso tʼą́ą́ʼ anázhníídeeʼ nidi, shí éí tsʼídá doo tʼą́ą́ʼ anídeeshtłish da.
30 Áádóó Jesus áháłní, Tʼáá aaníígóó ándishní, Tʼáá díí tłʼééʼ naaʼahóóhai bikąʼí tʼáadoo naakidi ániihí, táadi, Doo hwééhasin da, náshididííʼniił.
31 Nidi bił niʼdeeltáalgo hadzoodzíiʼgo ájíní, Tʼáá níighah dasétsą́ą nidi, Doo hwééhasin da, doo nidideeshniił da. Nítʼééʼ tʼáá ałtso tʼáá ákótʼéego hadaasdzííʼ.
Gethsémaniigi Jesus sodilzin (Mt. 26:36-46; Lk. 22:39-46)
32 Áádóó Gethsémanii hoolyéhígi jíkaigo hódahoołʼaahii ábizhdííniid, Tʼáá kweʼé nahísóotą́, shí nahí sodideeszįįł.
33 Áko Peter áádóó James índa John bił dashdiikai, nítʼééʼ tʼáá íiyisí yíní biih níjíítłizh áádóó nitsidzídzá.
34 Áko ábizhdííniid, Shiiʼ sizíinii nitseeltłah, tʼáá hoyółhéełgo. Tʼáá kǫ́ǫ́ nahísóotą́ągo shił hadaʼísídółʼı̨́ı̨́ʼ.
35 Áádóó tʼáá áháníjįʼ dashdiiyáago ákwii tséʼyaa jineeshjoolgo kójíníigo sozdoolzin, Bohónéedzą́ą́ ládą́ą́ʼ díí bił shaa hoolzhiizhígíí shitsʼą́ąjįʼ kódoolnííł.
36 Áádóó ánáázhdooʼniid, Ába,* shiTaaʼ, tʼáá ałtsoní bíninilʼą́; díí doodlı̨́įłii shitsʼą́ąjįʼ kónílééh, ákondi, shí íinisinígíí éí dooda, nidi ni íinínízinígíí éí ádoonííł.
37 Áádóó baa nídzídzá, nítʼééʼ daʼałhosh lá, áko Peter ábijiní, Sáíman, daʼ íłhoshísh? Tʼááłáʼí ahééʼílkidjįʼ nidiísh doo haʼísííd ánítʼée da?
38 Hadaʼísídółʼı̨́ı̨́ʼ áádóó sodadołzin, áko doo nihídahodíʼnóotah da; níłchʼi iiʼ sizíinii éí lą́ nízin, nidi atsʼíís éí doo bidziil da.
39 Áko anáádzoodzáago tʼáá ákótʼéego sodizin tʼáá éí bee sonáázdoolzin.
40 Áádóó haa nínáádzídzá, nítʼééʼ náádaʼjiłhosh lá, háálá tʼáá íiyisí bił hoʼniighą́ą́ʼ, áko haʼátʼéegoda bichʼįʼ hadazdoodzihígíí doo hoł béédahózin da.
41 Áko táadi aleeh góneʼ haa nínáádzídzáago áhojiní, Daʼ tʼahdiísh daʼołhosh áádóó háádaałyı̨́ı̨́h? Kʼadíhéi, áajįʼ oʼoolkid, jóʼakon, Diné Silı̨́įʼii bąąhági ádaaníiłii bílákʼeejįʼ ninádeetʼą́.
42 Nídoohjeeh, kʼad yiikah doo, jóʼakon nináshideeʼaahígíí aadę́ę́ʼ yigááł.
Jesus ninádeetʼą́ áádóó biʼdiiltsood (Mt. 26:47-56; Lk. 22:47-53; Jn. 13:3-12)
43 Tʼáá áko, tʼah yájíłtiʼgo Júdas, naakitsʼáadahígíí łaʼ nilíinii níyá, áádóó aláahgo náádaʼiiłniihii índa bee hazʼáanii yíndaʼniłtinii áádóó diné yá aląąjįʼ naazíinii bitsʼą́ą́dóó, diné tʼóó ahayóí diltłish índa tsihał dayíjáahgo yił haa níná.
44 Áko nináhodiníʼánígíí éí yaa honíłtínígíí bee ééhózin dooleełii łaʼ yee yił hoolneʼ lá, kóníigo, Tʼáá sétsʼǫsígíí ííshją́ą́ éí bí átʼı̨́į doo; éí dadoohsiłgo hazhóʼó dah dadidoohłóós.
45 Áko níyáago tʼáá áko hachʼįʼ dah diiyáago, Naʼnitiní, hałníigo haztsʼǫs.
46 Áko dahasiłgo dahoołtsood.
47 Nidi hoł naazínígíí łaʼ bidiltłish hayíítą́, áádóó aláahgo nááʼiiłniihii binaalteʼ néidííłhaalgo bijaaʼ naʼiidiiłhaal.
48 Áko Jesus hachʼįʼ haadzíiʼgo áháłní, Daʼ diltłish índa tsihał dayínóhjáahgo aghaʼiiʼníiłii bichʼįʼ oonééł nahalingo shił nidadoohdił biniyé shichʼįʼ chʼínooná?
49 Shą́ą́ʼ, tʼáá ákwíí jı̨́ kin biiʼ sohodizin bił hazʼą́ą́ góneʼ nihitaasháago naʼnishtin nítʼééʼ, nidi tʼáadoo dashoołtsood da. Nidi haaʼíshąʼ bíniʼdii Diyin God bizaad bee akʼedaʼashchíinii bidahodoolnííł.
50 Áko hódahoołʼaahii tʼáá ałtso hatsʼą́ą́ʼ dah diijéeʼgo yóóʼaheeswod.
Dinééh léiʼ yóóʼeelwod
51 Nítʼééʼ dinééh léiʼ áłtsʼóózígo yisdizígíí bee naʼatʼą́hí łigaii ditsʼidgo ályaii tʼéiyá bikʼéstiʼgo hakééʼ yigááł, áko deisił,
52 nítʼééʼ naʼatʼą́hí yiiʼ haalwodgo tʼáá łichíʼígo dah diilwod.
Jesus éí diné ándahaʼáii bidááhdę́ę́ʼ nihoʼdeedlóóz (Mt. 26:57-68; Lk. 22:54,55,63-71; Jn. 18:13,14,19-24)
53 Áko Jesus éí aláahgo nááʼiiłniihii yaa deizlóóz; áadi aláahgo náádaʼiiłniihii áádóó diné yá aląąjįʼ naazíinii índa bee hazʼáanii yíndaʼniłtinii tʼáá ałtso áłah silı̨́ı̨́ʼ.
54 Áádóó Peter tʼáá nízaadę́ę́ʼ hakééʼ yigáałgo, aláahgo nááʼiiłniihii bikin binaa hazʼą́ągi bináʼástłʼiní góneʼ yah ííyá; ákweʼé kǫʼ léiʼgi siláo yił naháaztą́ągo náʼiidzííł.
55 Áko aláahgo náádaʼiiłniihii áádóó diné ándahaʼáii tʼáá ałtso, Jesus biniinaa diyoolyéełii chʼééh yíkadadiltsʼiʼ, nidi tʼáá ádin lá.
56 Háálá ląʼí woochʼííd yee haa nidahasneʼ, nidi yee haa nidahasneʼígíí doo ahidaałtʼée da.
57 Áko łaʼ deizįʼgo woochʼííd yee haa nidahasneʼgo kódaaní,
58 Nihí lą́ą éí kójíníigo dahosidiitsʼą́ąʼ niʼ, Díí kin biiʼ sohodizin yílá bee ályaaígíí atídeeshłííł, áádóó tááʼ yiską́ąjįʼ náánáłaʼ yílá doo bee ályaii ninádeeshʼááł.
59 Kótʼéego dahoolneʼ nidi, baa haneʼ doo ahidaałtʼée da.
60 Áko aláahgo nááʼiiłniihii nídiiʼnaʼ áádóó ałníiʼgi yiizįʼgo Jesus nayídééłkidgo ání, Daʼ doósh ákʼihadidíídzih da? Díí dinéshąʼ haʼátʼíí yee naa dahalneʼ?
61 Nidi tʼáadoo ákʼihazdoodzíiʼ da. Áko aláahgo nááʼiiłniihii ninááhódééłkidgo ánááhodiʼní, Daʼ niísh Aláahgo Baa Haʼniihii biYeʼ, Christ nílı̨́?
62 Áko Jesus ázhdííniid, Aooʼ, shí éí áshtʼı̨́. Jó, Diné Silı̨́įʼii Aláahgo Bidziilii yinishʼnáájí dah sidáago índa yádiłhił biyiʼdę́ę́ʼ kʼos bił yildohgo deidoołtsééł.
63 Áko aláahgo nááʼiiłniihii ákʼinaʼooldláadgo ání, Haʼátʼíishąʼ biniyé łaʼ chʼínáádahótʼaah doo?
64 Diyin God baaʼihgo bá hadzoodzíiʼgo dahosidootsʼą́ą́ʼ. Éí haash yitʼéego baa nitsídaahkees? Nítʼééʼ hodiʼyoolyéełgo tʼáá ałtso há hadaasdzííʼ.
65 Áko łaʼ hakʼídahidizheehgo áádóó hanákʼe ninádaʼałbałgo índa yéego nínádahodiikaʼgo, Diyin God yá halneʼii nílı̨́įgo háishąʼ nándííłtsʼin bee nihił hólneʼ, dahałníigo haa nídiikai. Áádóó siláo dah dahodiilóozgo yéego hoł dzinídeidikaʼgo yaa naaskai.
Peter éí, Jesus doo bééhasin da, jiní (Mt. 26:69-75; Lk. 22:56-62; Jn. 18:15-18,25-27)
66 Áko Peter wóyahdi kin binaagi hazʼą́ągo bináʼástłʼiní góneʼ dzizdáago, aláahgo nááʼiiłniihii asdzání bá nidaalʼaʼígíí łaʼ ákweʼé níyá,
67 áko Peter náʼiidzíiłgo yiyiiłtsą́ índa honééłʼı̨́įʼgo áháłní, Ni laʼ ałdóʼ Jesus Názarethdóóígíí bił nanikai niʼ.
68 Nidi dooda jidííniid kójíníigo, Baa nánítʼínígíí doo shił bééhózin da, doo nidi nikʼiʼdiishtįįh da. Áko tłʼóóʼgóó chahaʼoh dah sikáníjįʼ chʼízhníyá, nítʼééʼ naaʼahóóhai bikąʼí ádííniid.
69 Nítʼééʼ asdzání łaʼ nááhoołtsą́ągo ákǫ́ǫ́ naazínígíí ánéidooʼniid, Díí éí łaʼ átʼı̨́.
70 Nidi dooda náázhdooʼniid. Áádóó tʼóó nááhodooʼnaʼgo ákǫ́ǫ́ naazínígíí ánáádahodooʼniid, Tʼáá aaníí ni éí łaʼ ánítʼı̨́, háálá Gálilii dineʼé nílı̨́ (nizaadígíí bee nééhózin).
71 Nidi ádił niʼjítʼįįhgo ádee hanáázdoodzííʼ, Diné baa nídaahtʼínígíí doo bééhasin da nihidishní.
72 Tʼáá áko naaʼahóóhai bikąʼí ánáádooʼniidgo, éí bił naakidi azlı̨́ı̨́ʼ. Áko Peter éí Jesus, Naaʼahóóhai bikąʼí tʼáadoo naakidi ániihí táadi doo hwééhasin da shididííniił, hodííniidígíí bééjoolniiʼgo jíícha.
Footnotes
^ Denériyas łaʼa jı̨́įjįʼ nidaalnishgo nídayííłbįįh nítʼééʼ.
^ Diné łaʼ ádingo bitsʼíís tʼah doo nahjįʼ kólnééhgóogo éí tłah łikání halchinii áłtsé bąąh álʼįįh nítʼééʼ.
^ Shidił bee ahaʼdeetʼáanii ániidíii nínígíí éí naaldlooshii nááhaazniiʼii bidił diné bikʼístahígíí éí nahalin. Ex. 24:8.
^ Atisʼadeesdzá bee bééhániihii ałtsogo Sin 115-118 bee dahojiitáál.
^ Ába, jiníigo éí Jesus saad yee yáłtiʼígíí kʼehgo, Shizhéʼé nílíinii, jiníigo óolyé.
