Mark 15:1-47
15 Tʼáá áko abínígo aláahgo náádaʼiiłniihii éí diné yá aląąjįʼ naazíinii áádóó bee hazʼáanii yíndaʼniłtinii índa diné ándahaʼáii tʼáá átʼé áłah silı̨́įʼgo haa nídaastʼįįd, áko Jesus yedaʼaztłʼǫ́ǫgo dah deidiilóóz, áádóó Páílat yaa dahodeezʼą́.
2 Áko Páílat nahódééłkidgo áháłní, Daʼ niísh Jew dineʼé Aláahgo biNanitʼaʼí nílı̨́? Áko ábizhdííniid, Jó, bee háínídzííʼ.
3 Áádóó aláahgo náádaʼiiłniihii ląʼígóó hakʼi dahodiiʼą́. [Nidi tʼáadoo hadzoodzíiʼ da.]
4 Áko Páílat kóníigo ninááhódééłkid, Daʼ niísh doo tʼą́ą́ʼ háádíídzih da? Jóʼakon, haa shı̨́ı̨́ néelą́ą́ʼ yee nikʼídahaʼááh.
5 Nidi Jesus tʼáadoo hachʼįʼ hanáádzíiʼ da, áko Páílat díidíígíí yikʼee tʼóó bił ahayóí.
Jesus hodiʼyoolyéełjįʼ há nihootʼą́ (Mt. 27:15-26; Lk. 23:13-25; Jn. 18:39-19:16)
6 Áko hodílzingo áłah náʼádleeh baa náhwiilzhíishgo, Páílat éí awáalyaaí tʼááłáʼígo tʼáá diné bíndayókiʼígíí yá chʼéiyiiłtʼeʼ łeh.
7 Íídą́ą́ʼ nidaachxǫʼgo naatʼáanii yił daʼahigą́ągo awáalyaa shijéʼígíí bitahdóó diné łaʼ iisxíinii nilı̨́įgo Barábas wolyéé lá.
8 Áko diné ląʼí áłah nilínígíí Páílat yaa nísą́ągo [hadadeeshghaazhgo] ádeiłní, Tʼáá nihá ánánítʼįįhígi átʼéego nihá ánáádííʼnííł.
9 Nítʼééʼ áhodííniid, Daʼ Jew dineʼé Aláahgo biNanitʼaʼí nilíiniísh nihá béédíshchííd?
10 Háálá aláahgo náádaʼiiłniihii dahoołchʼı̨́įdgo biniinaa haa deizlóozgo hoł bééhózin.
11 Nidi aláahgo náádaʼiiłniihii éí áłah nilínígíí yíniʼ yá ádahoolaago, Éí dooda, Barábasgo nihá chʼééníłtʼeʼ dadidoohniił, deidííniid.
12 Ákoshąʼ Jew dineʼé Aláahgo biNanitʼaʼí dabidohnínígíí haa deeshłííł? hałníigo Páílat hachʼįʼ hanáánáádzííʼ.
13 Áko, Tsin ałnáoszid bikáaʼjįʼ bił oʼołkaałgo sołhé, daaníigo hanáádadeeshghaazh.
14 Nítʼééʼ Páílat ájíní, Haʼátʼéegoshąʼ? Haʼátʼíí doo aaníí shı̨́įshąʼ yaa naayá? Nidi, Tsin ałnáoszid bikáaʼjįʼ bił oʼołkaałgo sołhé, daaníigo tʼah yówehígo hanáádadeeshghaazh.
15 Áko Páílat éí áłah nilínígíí kʼadę́ę bíniʼ bá biʼjilééh biniyé Barábas bá chʼéézhníłtʼeʼ, nidi hazaad kʼehgo Jesus nibíʼíltsxasgo tsin ałnáoszid bikáaʼjįʼ hoł idaʼdoolkał biniyé baa hozhdiníʼą́.
Jesus éí siláo há nidahastʼiʼ (Mt. 27:27-31; Jn. 19:2,3)
16 Ákohgo naatʼáanii bikin, éí Priitóriyam* hoolyéé góneʼ yah adahazlóozgo, siláo tʼáá yinélee haa áłah ádayiilaa.
17 Áko éénééz tsídídééh nahalingo łichíʼígíí yee hadahodiilaa, áádóó chʼil hooshahii nídeiniisxodgo chʼah ádayiilaago hakʼi deideezʼą́.
18 Áko hachʼįʼ nehekáahgo, Yáʼátʼéhéi, Jew dineʼé Aláahgo biNanitʼaʼí nílíinii! dahałníigo haa nídiikai.
19 Áko lókʼaatsoh yee hatsiitsʼiin nínádeidiiłhał, áádóó hakʼídahidizheeh, índa hachʼįʼ nitséédadigohgo hachʼįʼ nidahałá.
20 Índa há nidahastʼiʼdóó bikʼijįʼ, éénééz tsídídééh nahalingo łichíʼígíí haa nídeidiiłtsoozgo tʼáá hó haʼééʼ yee háádahodiidlaa. Áádóó tsin ałnáoszid bikáaʼjįʼ hoł adaʼdoołkał biniyé chʼídahazlóóz.
Tsin ałnáoszid bikáaʼjįʼ Jesus hoł oʼoolkaal (Mt. 27:32-44; Lk. 23:26-43; Jn. 19:17-27)
21 Nítʼééʼ Sairíin hoolyéédę́ę́ʼ diné léiʼ Sáíman wolyéego, Alezáander áádóó Rúfas bizhéʼé nilı̨́įgo dádaʼakʼehdę́ę́ʼ yigááł, áko, Tsin ałnáoszid yítı̨́ı̨́ł, deiłníigo áajįʼ adeineeshchą́ą́ʼ.
22 Áko Gálgatha hoolyéejįʼ adahazlóóz, éí tsiitsʼin siʼání jiníigo óolyé.
23 Áádóó wáin, jeeh mir wolyéii bił ałtahgo jidoodlı̨́ı̨́ł biniyé haa deizką́, nidi doo jinízin da.
24 Áko tsin ałnáoszid bikáaʼjįʼ hoł adaʼaskaal, índa haʼééʼ tʼááłáʼí níłtsoozígo yiniyé yááʼiiltʼeʼ yaa naaskaigo ałtaadeisʼniiʼ.
25 Abínígo náhástʼéigi oolkiłgo tsin ałnáoszid bikáaʼjįʼ hoł adaʼaskaal.
26 Yee hakʼi dahodiiʼánígíí éí, Jew dineʼé Aláahgo biNanitʼaʼí, níigo bee akʼeʼashchı̨́.
27 Áádóó aniʼįįhii nidiltʼéego ałdóʼ tʼáá ałʼąą tsin ałnáoszid bikáaʼjįʼ bił adaʼaskaal, łaʼ éí honishʼnáájí dah hidiiltʼeʼ, łaʼ éí honishtłʼají.
28 [Áko, Bee hazʼáanii yilááh nidahideestáalii bił biʼdééltaʼ, níigo bee akʼeʼashchínígíí bohoolyaa.]
29 Áko hwíighah dahidikáhígíí há nidahałtʼiʼgo bitsiitsʼiin deiłneʼgo ádaaní, Há háa! Kin biiʼ sohodizin atídeeshłííł, áádóó tááʼ yiską́ąjįʼ ninádeeshʼááł dííníniidii,
30 tsin ałnáoszid bąąhdę́ę́ʼ hadáánídáahgo yisdáʼádílteeh.
31 Tʼáá ákótʼéego ałdóʼ aláahgo náádaʼiiłniihii áádóó bee hazʼáanii yíndaʼniłtinii há nidahałtʼiʼgo ádaʼahidiʼní, Náánáłaʼ yisdánídziiznil nidi, tʼáá hó tʼéí doo yisdáʼázhdóltééł átʼée da.
32 Kʼad Christ, Ízrel dineʼé Aláahgo biNanitʼaʼí jílíinii hániʼdii dahoníilʼı̨́įgo tsin ałnáoszid bąąhdę́ę́ʼ hadajighááh, áko índa dahwiidiidląął. Áádóó nidiltʼéego, hoł bił adaʼaskaalígíí ałdóʼ hóóʼįįd.
Jesus dadziztsą́ (Mt. 27:45-56; Lk. 23:44-49; Jn. 19:28-30)
33 Nítʼééʼ ałníʼníʼą́ą́dóó táadi ahééʼílkidjįʼ tʼáá átʼéé nítʼééʼ chahóółhéél.
34 Áko táʼígi oolkiłgo Jesus yéego hadoolghaazhgo ání, Éílii, Éílii, lama sabákthanii? Éí, ShiDiyin God, shiDiyin God, haʼátʼéegoshąʼ yóóʼashidííníʼą́? jiníigo óolyé.
35 Áko łaʼ ákǫ́ǫ́ naazínígíí éí deidiiztsʼą́ąʼgo, Jóʼakon, Iiláíjah yíká ání, dadííniid.
36 Áko łaʼ dah diilwodgo tó náyiitsʼǫsígíí chʼil naʼatłʼoʼii bitooʼ dókʼǫ́zhígíí yénéízʼą́, áádóó lókʼaatsoh bílátahgi dah yizʼą́ągo bąąh jidootsʼǫs biniyé haa yíʼníłtsih kóníigo, Átsé, tʼáadoo baa nídaahtʼíní, haaʼíshąʼ Iiláíjah daatsʼí haa doogáałgo adahodoołtééł dadíníilʼįįł.
37 Nítʼééʼ Jesus yéego hazhdoolghaazhgo hajííyol.
38 Áko kin biiʼ sohodizin biyiʼ góneʼ achʼą́ą́h naníbaal wódahdę́ę́ʼ yaago ałchʼáádláád.
39 Ákohgo siláo neeznádiingo binanitʼaʼí hadááhdę́ę́ʼ sizínígíí ákótʼéego [hazhdoolghaazh áádóó] hajííyolgo yiyiiłtsą́ągo ání, Tʼáá aaníí, díí diné Diyin God biYeʼ nilı̨́ı̨́ nítʼééʼ lá.
40 Ákweʼé ałdóʼ asdzání łaʼ Mary Mágdaliin áádóó Mary, éí James akéédę́ʼígíí áádóó Jóses bimá, índa Salómii nízaadę́ę́ʼ dadéezʼı̨́įʼgo atah naazı̨́.
41 Éí díí asdzání, Gáliliidi nijighá yę́ędą́ą́ʼ hakééʼ naakaigo há nidaalʼaʼ nítʼééʼ, áádóó asdzání náádaałaʼ ląʼí Jerúsalemgi bił jíkaígíí ałdóʼ áadi atah naazı̨́.
Jesus yóóʼáhoʼdiilyaa (Mt. 27:57-61; Lk. 23:50-56; Jn. 19:38-42)
42 Áko hííłchʼįʼgo hashtʼehodiʼnééh bijı̨́, jó, éí biiskání hááʼáyı̨́ı̨́h jı̨́ dooleełgo bąą,
43 Arimathíya hoolyéédę́ę́ʼ Jóseph éí diné ándahaʼáii bitahdóó hastóí ílíinii jílı̨́, hó ałdóʼ Diyin God bee bóhólníihgo bił hazʼáanii nijólí, áko éí tʼáadoo dzistiʼí Páílat baazhníyáago Jesus bitsʼíís yę́ę bíjííkeed.
44 Áko Páílat, tʼáá daatsʼí íídą́ą́ʼ dadziztsą́ niizı̨́įʼgo tʼóó bił ahayóí, áko siláo binanitʼaʼí hágo yidííniid, Tʼáá daatsʼí íídą́ą́ʼ dadziztsą́, níigo nayídééłkid.
45 Áko siláo binanitʼaʼí bitsʼą́ą́dę́ę́ʼ náhóóneʼgo índa Jesus bitsʼíís yę́ę Jóseph yeidiníʼą́.
46 Áádóó Jóseph éí áłtsʼóózígo yisdizígíí bee naʼatʼą́hí łigaii ditsʼidgo ályaii nayiisniiʼ, áádóó tsin ałnáoszid bąąhdę́ę́ʼ nayííłtı̨́įgo éí yił yizdis, índa tséníʼootséél góneʼ ayííłtı̨́įgo tsé yidéidiníłmááz.
47 Áko Mary Mágdaliin índa Mary, Jóses bimá éí nihoʼdeeltínígi bił bééhoozin.
Footnotes
^ Naatʼáanii bikin áádóó éí binaagi hazʼą́ągo bináʼástłʼingo hazʼą́. Naatʼááh kin ałdóʼ hoolyé.
