Mark 16:1-20
16 Áko hááʼáyı̨́ı̨́h jı̨́ azlı̨́ı̨́ʼdóó bikʼijįʼ, Mary Mágdaliin áádóó Mary, James bimá, índa Salómii éí łikání halchinii spáis wolyéii łaʼ nidadziisniiʼ, haazhdookahgo bee dahozhdoołtłah biniyé.
2 Áko Damı̨́įgo tʼóó haʼííʼánígo tséníʼootséélgóó jookahgo,
3 Háí lá tséníʼootséelgi tsé dáádeelmázígíí nahgóó nihá iidoołmas lá? daʼahizhdiʼní.
4 Nítʼééʼ hadadzizghalgo éí tsé nahjįʼ eelmááz lágo dajiiłtsą́; jó, éí tʼáá íiyisí nitsaa.
5 Áko tséníʼootséél góneʼ yah ajookai, nítʼééʼ dinééh léiʼ algaigo hadítʼéego nishʼnáájígo sidáago dajiiłtsą́, áko tʼóó bikʼee tsídazdeesyiz.
6 Nítʼééʼ áhodííniid, Tʼáadoo tʼóó nihił adahayóí; jó, Názarethdóó Jesus, tsin ałnáoszid bikáaʼjįʼ bił oʼoolkaalígíí hadanohtá. Éí daaztsą́ą́dę́ę́ʼ náádiidzá, áko doo kweʼé da, jóʼakon, sitı̨́ı̨́ nítʼééʼ yę́ęjįʼ dadóhʼı̨́ı̨́ʼ.
7 Nidi nihílááh, nihibaʼ Gáliliigóó jideeyáhígíí éí Jesus yídahoołʼaahii índa Peter ałdóʼ bił dahołneʼ; tʼáá yee nihił hoolneʼ yę́ęgi átʼéego áadi dahwiidoołtsééł.
8 Áko tséníʼootsééldóó chʼééjíkaigo dashdiijééʼ, háálá bikʼee tʼóó hoł adahayóigo hatah dahoditłid, áko nídadzildzidgo biniinaa diné łaʼ tʼáadoo bee bił dahojoolneʼ da.
Jesus éí Mary Mágdaliin yichʼįʼ yitʼíní íʼdiilyaa (Mt. 28:9,10; Jn. 20:11-18)
9 [Áko Damíigo aleeh góneʼ dadziztsą́ą́dę́ę́ʼ náázdiidzáádóó bikʼijįʼ tʼáá íiyisí tʼah abínígo Mary Mágdaliin, éí asdzání biyiʼdę́ę́ʼ níłchʼi biʼiiníziinii tsostsʼid hazhnííłkaadígíí, éí tsʼídá áłtsé bichʼįʼ yitʼíní ízhʼdiilyaa.
10 Ákohgo yił naakai yę́ę atínídadindleeh áádóó daacha lágo baazhníyáago bił hojoolneʼ.
11 Azhą́ éí jiináago dayííniiʼ nidi, áádóó asdzání hoołtsánígíí bił béédahoozin nidi doo dayoosdląąd da.
Jesus éí bídahoołʼaahii nidiltʼéego yichʼįʼ yitʼíní íʼdiilyaa (Lk. 24:13-35)
12 Ákódzaadóó bikʼijįʼ łahgo átʼéego diné nidiltʼé atiingóó yiʼashgo, bichʼįʼ yitʼíní ánáázhʼdiilyaa.
13 Áko tʼą́ą́ʼ níjítʼáazhgo łaʼ ídahoołʼaahii bee bił dahojoolneʼ, nidi doo dahoosdląąd da.
Jesus éí bídahoołʼaahii łaʼtsʼáadahígíí naanish yeidiyiizʼą́ (Mt. 28:16-20; Lk. 24:36-49; Jn. 20:19-23; Acts 1:6-8)
14 Áádóó náábíkʼijįʼ łaʼtsʼáadahígíí daʼayą́ągo bichʼįʼ yitʼíní ánáázhʼdiilyaa, áko dadziztsą́ą́dę́ę́ʼ náázdiidzáádóó dahoołtsánígíí doo dayoodlą́ą́góó áádóó bijéí doo binídahazʼáhígíí biniinaa dzideezteh.
15 Áko ábizhdííniid, Nihílááh, nahasdzáán nidaneesʼą́ąjįʼ diné tʼáá átʼé haneʼ yáʼátʼéehii bee bił dahołneʼ.
16 Tʼáá háiida oosdląąd áádóó tó bee biʼdoolzı̨́įʼgo éí yisdádooltééł, nidi tʼáá háiida doo oodlánígíí éí tiʼhooʼnííhgóó bá nihodootʼááł.
17 Áko daʼoodlánígíí éí bee ééhózinii kódaatʼéhígíí ádayoolíiłgo yídaneelʼą́ą doo: éí shízhiʼ bee níłchʼi biʼiiníziinii ayiʼdę́ę́ʼ hadeiniiłkaad doo, áádóó saad ałʼąą ádaatʼéii yee yádaałtiʼ doo,
18 índa tłʼiish nídayiiláah doo, áádóó haʼátʼíhígíida daʼagháanii deidlą́ą nidi doo atídabileʼ da doo, índa bąąh dah nidahazʼánígíí yikʼi dah dahidilníihgo hadaałtʼé ninádahadleeh dooleeł.
Jesus yáʼąąshgóó dah nídiidzá (Lk. 24:50-53; Acts 1:9-11)
19 Áko Bóhólníihii Jesus hachʼįʼ haadzííʼdóó bikʼijįʼ yáʼąąsh góde anáhóóleʼgo Diyin God binishʼnáájí dah neezdá.
20 Áádóó daʼníłtsʼą́ą́ʼgóó adadziiskaigo haneʼ yáʼátʼéehii baa dahojoolneʼ, Bóhólníihii hoł hólǫ́ǫgo nidajilnish, áko bee éédahózinii bee ádajooníłígíí bee hazaad bidziilgo ádeileʼ. Tʼáá ákótʼée doo.]*
Footnotes
^ Saad dah naazhjaaʼígíí 9-20 łaʼ naaltsoos Gríik kʼehjí ádaalyaaígíí doo bikáaʼ da.
