Mark 2:1-28
2 Tʼáá díkwíida yiską́ągo Kapérniyamgi náádzídzá, áko hooghangi dzizdá haʼníigo dadideezdláád.
2 Tʼóó ahayóí áłah silı̨́įʼgo chʼéʼétiinjįʼ nidi doo hooʼaʼ da, áko Diyin God bizaad bee bił hojoolneʼ.
3 Nítʼééʼ diné dı̨́ltʼéego diné bitah doo nahwiiʼnáa da léiʼ hachʼįʼ dayíłtsóós.
4 Áko hachʼą́ą́h dáázhdeelʼáago doo hachʼįʼ ajókááh átʼéégóó biniinaa Jesus éí kin biyiʼ góneʼ sidáagi bighą́ą́ʼdę́ę́ʼ ąą dazdeeznilgo* diné bitah doo nahwiiʼnáa daígíí bikʼi antéhí tʼáá bee Jesus bidáahjįʼ hadah adahodzizloʼ.
5 Áko bidaʼoodląʼ yee aa dadzólíii jiiłtsą́ągo diné bitah doo nahwiiʼnánígíí ábizhdííniid, Shiyeʼ, ádił niʼiyínílzíʼígíí ná yóóʼadootʼą́.
6 Áko nítʼééʼ bee hazʼáanii yíndaʼniłtinii łaʼ ákwii nidaháaztą́ągo tʼáá dabiyiʼídi tʼóó bił daahaadago nitsídaakees,
7 Haʼátʼéegoshąʼ díí diné ákóní? Diyin God íʼdílʼı̨́! Háishąʼ tʼéiyá ádił niʼiidzííh á yóóʼiidiiʼaah? Diyin God tʼáá bí tʼéiyá.
8 Tʼáá áko tʼáá dabiyiʼídi ákótʼéego nidaʼídíłkidígíí Jesus hoł bééhoozingo ábijiní, Haʼátʼéegoshąʼ tʼáá danihijéí biyiʼídi tʼóó nihił daahaadago díidíígíí baa nitsídaahkees?
9 Háidíígíishąʼ doo nantłʼagóó díí diné bitah doo nahwiiʼnánígíí bichʼįʼ bee haʼdoodzih, Ádił niʼiyínílzíʼígíí ná yóóʼadootʼą́, haʼnííjí daatsʼí, éí doodago, Nídiiʼnéehgo bikʼi nítéhí nídiiłtsóosgo dah diinááh, haʼnííjí daatsʼí?
10 Nidi nahasdzáán bikáaʼgi Diné Silı̨́įʼii ádił niʼiidzííh á yóóʼiidiiʼaah yee bóhólníhígíí nihił béédahózin doo nisin, jidííniidgo bitah doo nahwiiʼnánígíí ábizhdííniid,
11 Nídiidááh, nidishní, áádóó bikʼi nítéhí nídiiłtsóosgo nighangóó nídídááh.
12 Áko nízhdiiʼnaʼ, áádóó tʼáá áko bikʼizhnitéhí nízdiiłtsoozgo tʼáá ałtso dabinááł chʼízhníyá, áko éí bikʼee diné tʼáá ałtso tʼóó bił adahóóyóí áádóó Diyin God yaa dahaniihgo ádaaní, Tʼah doo ákóhánéehgo deiiltséeh da!
Líívai, Shikééʼ yínááł, biʼdooʼniid (Mt. 9:9-13; Lk. 5:27-32)
13 Áádóó Jesus éí beʼekʼid bąąhgóó anáádzoodzáago, áadi diné tʼáá yílʼáá nítʼééʼ haa áłah silı̨́įʼgo nazneeztą́ą́ʼ.
14 Áádóó joogááł, nítʼééʼ Alfíyas biyeʼ, Líívai wolyéhígíí, tax nahalyéhígi sidáago jiiłtsą́, áko ábizhdííniid, Shikééʼ yínááł. Áko nídiiʼnaʼgo hakééʼ dah diiyá.
15 Nítʼééʼ Líívai bighan góneʼ Jesus ajiyą́ągo dzizdá, nítʼééʼ tax nahalyéhígíí yiniyé naazdáii tʼóó ahayóí Jesus áádóó bídahoołʼaahii yił nidaháaztą́ągo daʼayą́, háálá éí tʼóó ahayóí hakééʼ tádíkááh.
16 Áko bee hazʼáanii yíndaʼniłtinii Férisii yichʼijí danilínígíí Jesus éí bąąhági ádaaníiłii índa tax nahalyéhígíí yiniyé naazdáii bił daʼjiyą́ągo dahoołtsą́ągo hódahoołʼaahii ádeidííniid, Haʼátʼéegoshąʼ tax bichʼįʼ nidahalyéii áádóó bąąhági ádaaníiłii bił daʼjiyą́?
17 Jesus éí yidiiztsʼą́ąʼgo áhodííniid, Diné doo bąąh dah nidahazʼánígíí éí azeeʼ ííłʼíní doo yichʼįʼ dadikáah da, nidi bąąh dah nidahazʼánígíí tʼéiyá; tsʼídá tʼáá ákogi ádaatʼéii doo bíká ádideeshniił biniyé níyáa da, nidi bąąhági ádaaníiłii, Łahgo átʼéego Diyin God bichʼįʼ tsíńdadohkeesgo nihibąąhági átʼéii bitsʼáhóhkááh, bidideeshniił biniyé níyá.
Hodílzingo doo adą́ągi bínaʼídíkid (Mt. 9:14-17; Lk. 5:33-39)
18 John bídahoołʼaahii índa Férisii danilíinii dahodísingo doo daʼayą́ą da nítʼééʼ, áko diné łaʼ haa yíkaigo ádahodííniid, Haʼátʼéegoshąʼ John bídahoołʼaahii áádóó Férisii danilíinii bídahoołʼaahii hodílzingo doo adánígíí yee ádá nídahoolʼaah, nidi ni nídahoołʼaahii doo ákódaatʼı̨́į da?
19 Áádóó Jesus áhodííniid, Iiyehii tʼah bił nijikaigo iigehgi neheeskaígíísh dahodísingo doo daʼdooyı̨́įł da? Iiyehii tʼáá hataagháhájįʼ daʼjiyą́ą doo.
20 Nidi beidoołkááł, iiyehii hatsʼą́ą́ʼ nídidooltééł, áko éí bijı̨́įdi índa dahozdísingo doo dazhʼdooyı̨́įł da.
21 Diné łaʼda haʼééʼ haastihgo, adanídaditʼaʼí ániidíígíí doo bidanídazhdidooʼáał da; ákódziidzaago adanídaditʼaʼí ániidíígíí haʼééʼ haastihígíí bitsʼádoodlałgo haʼééʼ ídládígíí tʼóó yówehda adoodlał.
22 Índa diné łaʼda wáin ániidíígíí tó abid hadaastihii doo yiih yikaah da; ákódziidzaago wáin éí tó abid deidoołdoh, áko wáin éí yóóʼíínaʼ doo, índa tó abid éí tʼáá ádzaaí dadooleeł, nidi wáin ániidíígíí tó abid ádaaniidíígíí biih yikááh.
Jesus bídahoołʼaahii hááʼáyı̨́ı̨́h jı̨́ı̨́ góneʼ tłʼoh naadą́ą́ʼ deinizh (Mt. 12:1-8; Lk. 6:1-5)
23 Hááʼáyı̨́ı̨́h jı̨́ azlı̨́įʼgo Jesus hódahoołʼaahii bił tłʼoh naadą́ą́ʼ bitahgóó jookah, nítʼééʼ hódahoołʼaahii tłʼoh naadą́ą́ʼ yidaʼniinizh.
24 Áko Férisii danilíinii ádahodííniid, Shoo, haʼátʼéegoshąʼ hááʼáyı̨́ı̨́h jı̨́ı̨́ góneʼ doo bee hazʼánígíí baa nijikai?
25 Áko ábizhdííniid, David índa yił naakaígíí dichin daazlı̨́įʼgo ádaadzaa yę́ęgi daʼ éísh doo baa daʼíínółtaʼ da?
26 Shą́ą́ʼ, Abáíyathar aláahgo nááʼiiłniihii nilı̨́ı̨́dą́ą́ʼ, David éí Diyin God bikin góneʼ yah ajííyáago Diyin God bichʼįʼ bááh nááhániihii jííyą́ą́ʼ, hoł naakaígíí ałdóʼ łaʼ bazʼníłtsood, éí náádaʼiiłniihii tʼéiyá yidooyı̨́įłgo bee hazʼą́ą́ nítʼééʼ.
27 Áádóó ánéídooʼniid, Hááʼáyı̨́ı̨́h jı̨́ éí diné bá ályaa, nidi diné éí hááʼáyı̨́ı̨́h jı̨́ doo bá áhoʼdiilyaa da;
28 éí bąą Diné Silı̨́įʼii hááʼáyı̨́ı̨́h jı̨́ nidi bee bóhólnííh.
Footnotes
^ Hooghan bikáaʼgi éí tsin áádóó hashtłʼish bee ádaalyaa, áko bigháʼíʼnííł doo nantłʼa da nítʼééʼ.
