Mark 3:1-35
3 Kin biiʼ áłah náʼádleeh góneʼ Jesus yah anáádzoodzáago ákweʼé diné bílaʼ tʼááłáhájígo bąąh dah hazʼą́ą́ léiʼ sidáá lá.
2 Áko tʼáá ałtso hadahasíidgo ádeinízin, hááʼáyı̨́ı̨́h jı̨́ı̨́ góneʼ daatsʼí náábizhdidoołááł, díí yee hakʼi dahodidooʼááł biniyé.
3 Áko diné bílaʼ bąąh dah hazʼáanii hágo yidííniid.
4 Áádóó Férisii danilíinii nayídééłkid, Hááʼáyı̨́ı̨́h jı̨́ı̨́ góneʼ daatsʼí yáʼátʼéehgo ázhdoonííł, doodaiiʼ atízhʼdoolíiłgo daatsʼí bee hazʼą́; hináanii yisdázhdoołtééł, doodaiiʼ azhdiyoołhéełgo daatsʼí bee hazʼą́? Nidi tʼáadoo hadaasdzíiʼ da.
5 Áádóó doo binídahazʼáágóó bąąh hániʼgo doo hoł hózhǫ́ǫ́góó bitah dzideezghalgo diné bílaʼ bąąh dah hazʼánígíí ábijiní, Kʼídílchííd. Áko kʼídeeshchidgo bílaʼ hadaałtʼé násdlı̨́ı̨́ʼ.
6 Áádóó Férisii danilíinii chʼékaigo haʼátʼéegoda dahodiyoołhéłígíí yee hondahazʼą́ągo Hérad yichʼijí danilínígíí tʼáá áko yił haa nídaastʼįįd.
Beʼekʼid bąąhgi diné yílʼá
7 Áko Jesus bídahoołʼaahii beʼekʼidgóó yił dah diikai, áko tʼóó ahojíyóí Gáliliidę́ę́ʼ bikééʼ nidziiskaii áádóó Judíyadę́ę́ʼ
8 áádóó Jerúsalem kin haalʼáhídę́ę́ʼ áádóó kéyah Idumíya hoolyéédę́ę́ʼ áádóó Jórdan tooh wónaanídę́ę́ʼ áádóó Táir índa Sáídan kin haalʼáhídę́ę́ʼ tʼóó ahojíyóí Jesus yaa naagháhígíí tʼáá ałtso dajííniiʼgo baa dziiskai.
9 Áádóó tʼóó ahojíyóigo bąą doo dahozhdoołjish da biniyé, hódahoołʼaahii ábizhdííniid, Tsinaaʼeeł yázhí łaʼ kojįʼ shá ninołʼeeł,
10 háálá ląʼí náádabizhdiiłjéeʼgo, ka nidaakaígíí tʼáá ałtso hodadidiilchił danízingo hakʼijįʼ daʼahiljizh.
11 Áádóó níłchʼi danchxǫ́ʼígíí nídahoołtséehgo hayaajįʼ anídaʼdiilghą́ąhgo éí yéego háádadilwoshgo ádaaní, Diyin God biYeʼ nílíinii ánítʼı̨́.
12 Áádóó bichʼįʼ hadzoodzíiʼgo ábijiní, Tʼááká shaa chʼídahoohʼááł lágo.
Jesus éí naakitsʼáadahígíí náyiizlááʼ (Mt. 10:1-4; Lk. 6:12-16)
13 Áádóó Jesus dayílkʼidgóó ajííyáago tʼáá hóznízinígíí hágo bizhdííniid, áko éí haa haaskai.
14 Áádóó diné naakitsʼáadah bił nijikai dooleełgo éí Diyin God bizaad yaa dahodoolnihgóó ahizhdoołʼaał biniyé bitsʼázhnínil,
15 áádóó bee óhólníihii bee dahólǫ́ǫgo [bąąh dah nahazʼáanii hadaałtʼé anídeidleʼ, áádóó] níłchʼi bidaʼiiníziinii biiʼ dahólóonii yiiʼdę́ę́ʼ hadeiniiłkaad doo ałdóʼ biniyé bitsʼázhnínil.
16 Sáíman wolyéhígíí Peter ałdóʼ bee jíízhiʼ;
17 Zébedii biyeʼké James índa yił hááʼáázh John, éí Bowanérjiiz ałdóʼ bizhdííniid, éí iiʼniʼ biyeʼké jiníigo óolyé;
18 Andrew, áádóó Philip, áádóó Barthálemew, áádóó Matthew, áádóó Thomas, áádóó James éí Alfíyas biyeʼ, áádóó Thádiyas, áádóó Sáíman éí Kéínan dineʼé jílínígíí,
19 índa Júdas Iskáriyat, éí nináhodidooʼáłígíí, díí tʼáá ałtso bitsʼázhnínil. Ákohgo kin góneʼ Jesus bił yah ajookai.
Jesus índa Béíyalzííbab (Mt. 12:22-32; Lk. 11:14-23; 12:10)
20 Diné yílʼáhígíí haa áłah náánásdlı̨́įʼgo doo daʼjóyą́ą́ʼ ádzaa da.
21 Áko hakʼisóó danilínígíí dayííniiʼgo dahwiidoołtsoł yiniyé haa yíkai, háálá łaʼ ádaaní, Tsizhʼdeeyáá lá.
22 Áádóó bee hazʼáanii yíndaʼniłtinii Jerúsalemdę́ę́ʼ yíkaígíí ádaaní, Béíyalzííbab hwiiʼ hólǫ́ǫ́ lá, áko níłchʼi bidaʼiiníziinii binanitʼaʼí bee níłchʼi bidaʼiiníziinii ayiʼdę́ę́ʼ hahizhniłkaad lá.
23 Áko bee hazʼáanii yíndaʼniłtinii hágo bizhdííniidgo haneʼ bee akʼidiʼdootı̨́įłii binahjįʼ ábijiní, Haash yitʼéego Séítan tʼáá bí haʼídínóolchééł?
24 Jó, łaʼ dineʼé tʼáá bił dah nahazʼą́ą́góó tʼáá bí ałkʼi néijahgo éí doo didoonaał da.
25 Áádóó łahgo hooghandóó tʼáá bí ałkʼi néijahgo doo bee hodidoonaał da.
26 Áko Séítan tʼáá bí áchʼįʼ nídiibaaʼgo áádóó ákʼinéilwodgo ałdóʼ doo didoonaał da, nidi bá nihodootʼih.
27 Diné bidziilii bighan góneʼ diné łaʼ doo yah adoogáałgo binaalyeʼé yighaidiyooʼnił da, tʼáá hazhóʼó diné bidziilii átsé yiʼdootłʼóół, áádóó índa bighandę́ę́ʼ binaalyeʼé yitsʼą́ą́ʼ chʼíidiyoojih.
28 Tʼáá aaníígóó ánihidishní, Diné yee bąąhági ádaatʼíinii tsʼídá tʼáá ałtso, áádóó Diyin God baaʼihgo bá yátiʼ tʼáá ałtso éí bá yóóʼanídahiditʼaah dooleeł,
29 nidi tʼáá háiida Níłchʼi Diyinii baaʼihgo yá hahadziihígíí, éí tsʼídá doo bá yóóʼanídidootʼáał da, nidi éí hoolʼáágóó bąąhági átʼéii bee ádąąh dah hodzistʼą́,
30 háálá bee hazʼáanii yíndaʼniłtinii, Níłchʼi nichxǫ́ʼígíí hwiiʼ hólǫ́ǫ́ lá, daaní.
Jesus bimá índa bitsilíké (Mt. 12:46-50; Lk. 8:19-21)
31 Áádóó hamá índa hatsilíké ákweʼé yíkai, áko tłʼóoʼdi naazı̨́įgo hágo dahałníigo hachʼįʼ yah adaʼasʼaʼ.
32 Áádóó diné tʼóó ahayóí hanaagóó naháaztą́ągo ádahodííniid, Tłʼóoʼdi nimá áádóó nitsilíké níkadantá.
33 Áko ábijiní, Háishąʼ shimá índa shitsilíké danilı̨́?
34 Áko hanaagi naháaztánígíí bitah dzideezghalgo ázhdííniid, Jó, kǫ́ǫ́ shimá áádóó shitsilíké!
35 Tʼáá háiida Diyin God íinízinii bidaʼjiłʼínígíí éí shitsilí índa shideezhí índa shimá jílı̨́.
