Mark 4:1-41
4 Beʼekʼid bąąhgi Jesus nínáázhdíʼníitą́ą́ʼ. Áko diné tʼóó ahayóí haa áłah silı̨́ı̨́ʼ, éí bąą tsinaaʼeeł biih jííyáago biiʼdóó dah dzineezdá, áko diné áłah silı̨́ʼígíí tʼáá átʼé tábąąhgóó yílʼá.
2 Nítʼééʼ haneʼ bee akʼidiʼdootı̨́įłii ląʼígóó bee nazʼneeztą́ą́ʼ, áko nazhʼnitingo ábijiní,
3 Daʼíísółtsʼą́ą́ʼ! Kʼééʼdídléehii léiʼ álástsiiʼ kʼiididoolééłgóó chʼíníyá.
4 Áko álástsiiʼ łaʼ nihiyiiłkaad, nítʼééʼ łaʼ atiinjįʼ ahineezdeeʼ. Atiinjįʼ ahineezdeeʼígíí tsídii nidahaastʼaʼgo ałtso yaa nahodeeskai.
5 Náánáłaʼ tsétahjįʼ ahineezdeeʼ, ákweʼé łeezh doo hózhǫ́ hólǫ́ǫ da, áko łeezh doo ditánígíí biniinaa tʼáadoo hodíínaʼí hadaneesą́,
6 áko doozhǫǫgo dah adiiʼą́ągo, hadaneesánígíí yideez, índa bihétłʼóól ádingo biniinaa daniiłnaʼ.
7 Náánáłaʼ chʼil dadeeníinii bitahgóó ahineezdeeʼ, áko chʼil dadeeníinii bilááh daneesą́ągo ałtso bííghą́ą́ʼ, áko tʼáadoo bineestʼąʼ dahazlı̨́įʼ da.
8 Índa náánáłaʼ łeezh yáʼátʼéehjįʼ ahineezdeeʼgo dadínéesą́ą́dóó nidahineesą́ągo bineestʼąʼ dahazlı̨́ı̨́ʼ, łaʼ tádiindi, łaʼ hastą́diindi, łaʼ neeznádiindi bilááh nídaasdlı̨́ı̨́ʼ.
9 Áko ázhdííniid, Tʼáá hajaaʼ hólǫ́ǫgo azdiitsʼaʼígíí hániʼ ajíistsʼą́ą́ʼ.
Haneʼ bee akʼidiʼdootı̨́įłii biniyé átʼéii (Mt. 13:10-17; Lk. 8:9,10)
10 Áádóó tʼáá sáhí dzizlı̨́įʼgo, tʼáá ákǫ́ǫ́ hanaagóó naakitsʼáadahígíí áádóó yił naháaztánígíí haneʼ bee akʼidiʼdootı̨́įłii yíndahódééłkid.
11 Áko ábizhdííniid, Diyin God bee bóhólníihgo bił hazʼáanii bee naʼnitinii doo bééhózin daígíí nihichʼįʼ ííshją́ą́ ádaalyaa, nidi doo nihichʼijí danilíinii bichʼįʼgo tʼéiyá tʼáá ałtso haneʼ bee akʼidiʼdootı̨́įłii átʼéego bee bił dahaneʼ,
12 áko dazhníłʼı̨́į nidi doo deizdoołtséeł da,dazdiitsʼaʼ nidi doo bikʼidazhdiʼdootı̨́įł da;doodaiiʼ bąąhági ádadziidzaaígíí bitsʼą́ąjįʼ ninázhdookah, áádóó há yóóʼanídahididootʼááł.
Kʼééʼdídléehii binahjįʼ haneʼ bee akʼidiʼdootı̨́įłii ááhyiłníinii (Mt. 13:18-23; Lk. 8:11-15)
13 Áko Jesus áhodííniid, Daʼ díí haneʼ bee akʼidiʼdootı̨́įłiísh tʼáadoo bikʼidaʼdootą́ą da? Ákoshąʼ haa yitʼéego haneʼ bee akʼidiʼdootı̨́įłii tʼáá ałtso bikʼidadiʼdoohtı̨́ı̨́ł?
14 Kʼééʼdídléehii éí Diyin God bizaad kʼiidilé.
15 Áko díí saad kʼidoolyáhígi łaʼ atiinjįʼ ahineezdeeʼígíí ádaatʼé; éí saad tʼáá deidiitsʼı̨́ı̨́hgóó, tʼáá áko Séítan yigháahgo dabijéí biyiʼdi kʼidoolyáhígíí hááyiiʼnííł.
16 Áádóó tʼáá ákónáánátʼéego tsétahgóó ahineezdeeʼígíí éí saad tʼáá dazdiitsʼı̨́ı̨́hgóó, tʼáá áko baa hoł dahózhǫ́ǫgo nídazhdiiléhígíí ádaatʼé,
17 áko dahayiʼdi ahétłʼóól ádaadin, nidi tʼóó kónígháníjįʼ hwee dahodinaʼ, áko nítʼééʼ saadígíí biniinaa hachʼįʼ nidahwiiʼnáago, doodaiiʼ atídahoʼdilʼı̨́įgo haa níʼdiildahgo tʼáá áko bitsʼáníjiijeeh.
18 Áádóó łaʼ chʼil dadeeníinii bitahgóó ahineezdeeʼígíí éí saad deidiitsʼı̨́ı̨́h,
19 nidi nahasdzáán bikáaʼgi bee daʼiináanii baa nitsáhákees, áádóó atʼı̨́ hodíníʼah, índa tʼáá ałtso bidáhoneení ghadahodiitʼaahgo éí saad yę́ę deighą́, áko doo bineestʼąʼ dahaleeh da.
20 Nidi łeezh yáʼátʼéehii biih hineezdeeʼígíí éí saad deidiitsʼı̨́įhgo nídeidiyiilééh, áádóó bineestʼąʼ dahaleehgo łaʼ tádiindi, łaʼ hastą́diindi, łaʼ neeznádiindi bilááh ninádahadleeh.
Adiníłdíinii bił yaa azʼą́ (Lk. 8:16-18)
21 Áádóó Jesus ánáádíʼní, Diné doo bee hoolʼiní yidiiłtłiʼgo tsitsʼaaʼ yił yaa niíʼaah da, doo nidi tsáskʼeh yiyaa iiʼaah da, daʼ bá yaʼiiʼáhígíísh doo yikáaʼgi dah yidooʼáał da?
22 Háálá baa hastiʼgo dah noolʼı̨́įłii nidi bééhodoozįįłgo átʼé, áko tʼáá haʼátʼíhída bikʼéʼéstiʼígíí hahgoda báádiʼdooltsos.
23 Diné łaʼda hajaaʼ hólǫ́ǫgo azdiitsʼaʼígíí éí hániʼ ajíistsʼą́ą́ʼ.
24 Áádóó Jesus ánáádooʼniid, Dadoohtsʼaʼígíí hazhóʼó dayísółtsʼą́ą́ʼ, háálá tʼáá łaʼ bá ídaʼnóołʼąądígi ánéeltʼeʼgo nihá índaʼdíʼnóolʼąął, áádóó daʼdoohtsʼaʼígíí tʼáá biláahgo nidi nihaa náádidootʼááł.
25 Háálá tʼáá háiida haʼátʼíhída hwee hólónígíí biláahgo łaʼ haa náádoolyééł, áádóó haʼátʼíhída hwee ádinígíí, éí tʼáá hwee hólónígíi nidi haghadoolyééł.
Kʼeelyéí naniseʼgi binahjįʼ haneʼ bee akʼidiʼdootı̨́įłii
26 Jesus ánáádooʼniid, Diyin God bee bóhólníihgo bił hazʼáanii éí kótʼé: diné léiʼ álástsiiʼ nihiʼjiiłkaadgo kʼizhʼdíílá.
27 Áko tłʼéeʼgo níʼjiilwosh áádóó jı̨́įgo náázhdiiʼnah, áádóó álástsiiʼ hadaneesą́ áádóó dadínéesą́, áko hadaʼneesánígíí índa dadíʼnéesánígíí tʼáadoo hoł bééhoozin da.
28 Háálá niʼ tʼáá bí aneestʼąʼ yidínísééh, áłtsé yiitsoh áádóó bitʼąąʼ haleeh, nááʼákóneʼ bineestʼąʼ nááhádleeh, áádóó áadi índa ałtso nitʼı̨́ı̨́h.
29 Áádóó antʼı̨́įhgo iigéeshjįʼ ahalzhishgo, tʼáá áko bee iigéshí bee aneestʼánígíí jiigéeshgo baa nízhdiidááh.
Mástad bílástsiiʼ binahjįʼ haneʼ bee akʼidiʼdootı̨́įłii (Mt. 13:31,32,34; Lk. 13:18,19)
30 Áádóó Jesus ánáádooʼniid, Diyin God bee bóhólníihgo bił hazʼáaniishąʼ haʼátʼíí bił ahąąh nidadiiʼnił, áádóó haneʼ bee akʼidiʼdootı̨́įłiishąʼ haʼátʼíí bee baa dahodiilnih?
31 Jó, éí chʼil mástad wolyéhígíí bílástsiiʼ nahalin, háálá éí kʼeelyéí dahólónígíí tʼáá ałtso biʼoh áníshéhígo kʼidilyééh,
32 áko kʼidilyéehgo hanisééh, áko dówózhiigi áníłtsogo dahólónígíí tʼáá ałtso yilááh áníłtso yileeh, áko bitsʼáozʼaʼ dantsxaaz daaleehgo bichahaʼohgóó tsídii nidahatʼahígíí bitʼoh ádayiiłʼįįh.
Jesus haneʼ bee akʼidiʼdootı̨́įłii yinahjįʼ naʼnitin (Mt. 13:34,35)
33 Tʼáá yikʼidaʼdootą́ʼígi átʼéego haneʼ bee akʼidiʼdootı̨́įłii ląʼí bee diné nazneeztą́ą́ʼ;
34 haneʼ bee akʼidiʼdootı̨́įłii tʼáágéedgo diné doo nazhnitin da nítʼééʼ, nidi hódahoołʼaahii bił tʼáá sáhí jileehgo, haneʼ bee akʼidiʼdootı̨́įłii ááhyiłníinii hazhóʼó yaa halneʼ.
Jesus tó náádadiidáahii índa níyol hashtʼeidííłtʼeʼ (Mt. 8:23-27; Lk. 8:22-25)
35 Tʼáá éí bijı̨́ iʼííʼą́ągo áhodííniid, Tįʼ, beʼekʼid wónaanígóó nihił adooʼoł.
36 Áko hódahoołʼaahii diné áłah silı̨́ʼígíí yitsʼą́ąjįʼ dah diikaigo, tsinaaʼeeł yázhí biiʼ dzizdáhígíí yiih yikaigo tsinaaʼeeł łaʼ hanaagóó naaznilígíí bił wónaanígóó dah dazhʼdiiłʼéél.
37 Nítʼééʼ ayóó átʼéego deeyol, áádóó tó náádadiidáhígíí tsinaaʼeeł biih yilkʼoołgo tsinaaʼeeł kʼadę́ę tó biiʼ hadibin.
38 Jesus tʼéí akéédę́ę́ʼ tsiiʼááł bikáaʼgi ajiłhosh, áádóó hódahoołʼaahii chʼéédahasidgo ádahodííniid, Naʼnitiní, daʼ tó nihidooghą́łígíísh doo niʼdiiłʼáa da?
39 Áko chʼéédzídzidgo níyol dzideeztehgo tó ábijiní, Kʼadí! Hashtʼedítʼeeh! Áko ííyol, índa tʼáá íiyisí hodiiyeel.
40 Áko Jesus áhodííniid, Haʼátʼíishąʼ biniyé nídaałdzid? Daʼ tʼahdii nidiísh doo daʼiinohdlą́ą da?
41 Áko hódahoołʼaahii tʼáá íiyisí nídaaldzidgo ádaʼahidooʼniid, Ákoshąʼ díí lá háí átʼı̨́įgo, níyol áádóó tó nidi bikʼeh dahółʼı̨́?
