Mark 5:1-43
5 Nítʼééʼ beʼekʼid wónaaníjįʼ Gádara* dineʼé bikéyahjįʼ haʼnaa nidaʼdzisʼéél.
2 Tsinaaʼeeł biyiʼdę́ę́ʼ hajííyáago tʼáá áko dajishchááʼdę́ę́ʼ diné léiʼ níłchʼi nichxǫ́ʼí tsiʼnabiiłáago hadááh yílwod,
3 éí dajishchááʼgóó tʼéí naagháá lá, áádóó diné doo łaʼ beʼótłʼóół átʼée da, béésh daʼahólzhaʼígíí bee nidi dooda,
4 háálá ląʼídi akétsíín nináʼniłí bąąh niiʼnil, áádóó béésh bee bééʼátłʼóóh nidi, béésh niyiiníísh, áádóó akétsíín nináʼniłí neheltǫʼ, áko diné łaʼda doo bikʼeh dódleʼ átʼée da.
5 Tłʼéeʼgo índa jı̨́įgo tʼáá áłahjįʼ dilwoshgo tsé yee niʼídiilgéeshgo dziłgóó áádóó dajishchááʼgóó naaghá.
6 Nítʼééʼ tʼáá nízaadę́ę́ʼ Jesus yiyiiłtsą́ągo yichʼįʼ nídiilwod, áádóó nitsidinígoʼgo hachʼįʼ nahasáago
7 yéego hadoolghaazhgo ání, Jesus, Diyin God Aláahgo Ayóóʼátʼéii biYeʼ nílíinii, haashąʼ shíléehgo ánítʼı̨́? Diyin God binahjįʼ nánooshkąąh, atíshóólééh lágo.
8 Háálá díí tʼah bítséedi Jesus ábidííniid, Níłchʼi nichxǫ́ʼí nílíinii, diné biiʼdę́ę́ʼ haninááh!
9 Áko, Haashąʼ yinílyé, jiníigo nabízhdééłkid. Áko ánáádooʼniid, Ląʼí yinishyé, háálá tʼóó ahoniiʼyóí.
10 Áádóó tʼáá íiyisí Jesus náyookąąhgo ání, Díí kéyahígíí bitsʼánihinóółkaad lágo.
11 Nítʼééʼ ákweʼé yílkʼid binániigi bisóodi daʼałchozhgo ląʼí naakai,
12 áko níłchʼi danchxǫ́ʼí nídahookąąhgo ádaaní, Bisóodi bichʼįʼ danihidíłʼá, éí biih hidiijah.
13 Áko bazhʼdiʼníʼą́ągo níłchʼi danchxǫ́ʼí éí diné yiiʼdę́ę́ʼ hahaazhjéeʼgo bisóodi yiih heezhjééʼ, áádóó bisóodi tʼáá ałtso bidah chʼééjéeʼgo beʼekʼid yiih heezhjééʼ, áko tó dabííghą́ą́ʼ. Éí bisóodi naakidi mííl daatsʼí nítʼééʼ.
14 Áko bisóodi baa ádahojilyánígíí dashdiijéeʼgo kin haalʼáagi áádóó binaagóó baa nidahodzisneʼ. Áko díí áhóótʼįįdígíí nihił béédahodoozįįł danízingo diné łaʼ ákǫ́ǫ́ yíkai.
15 Áko Jesus baa dziiskaigo diné níłchʼi bidaʼiiníziinii ląʼí biiʼ hólǫ́ǫ́ nítʼééʼ yę́ę biʼééʼ hólǫ́ǫgo áádóó bintsékees yáʼátʼéehgo índa hashtʼedítʼéego ákwii sidáago dajiiłtsą́, áko tʼáá ádzíłtso tʼóó hayadahodeesyiz.
16 Áádóó dabíínáłígíí diné éí níłchʼi bidaʼiiníziinii biiʼ hólǫ́ǫ́ nítʼééʼ yę́ę ádzaaígíí índa bisóodi ádaadzaaígíí tʼáá ałtso baa nidahodzisneʼ.
17 Áko nídahojookąąhgo, Nihikéyahdóó nówehjįʼ haninááh, dahojiníigo haa nízhdiikai.
18 Áko tsinaaʼeeł biih jigháahgo níłchʼi bidaʼiiníziinii biiʼ hólǫ́ǫ́ nítʼéʼígíí náhookąąhgo áháłní, Nikééʼ naasháa doo.
19 Nidi Jesus tʼáadoo haʼdiʼníʼą́ą́góó kóhodííniid, Nílááh, nighangóó nikʼéí bichʼįʼ nídídáahgo ayóó ádaatʼéii Bóhólníihii ná yaa naayáhígíí índa yee naa joozbaʼígíí bee bił dahólneʼ.
20 Áko dashdiiyáago kéyah Diikápolis hoolyéégóó tʼáá átʼéé nítʼééʼ Jesus ayóó átʼéii há yaa naayáhígíí baa hojilneʼgo tázhdíghááh, áko diné tʼáá ałtso tʼóó bił adahayóí.
Jéíʼiras bitsiʼ áádóó asdzání Jesus biʼééʼ yideelchidii (Mt. 9:18-26; Lk. 8:40-56)
21 Áádóó beʼekʼid tséʼnaagóó Jesus hoł nináʼníʼéelgo, diné tʼóó ahayóí haa nánízą́, áko beʼekʼid bibąąhgi dzizı̨́.
22 Áko diné áłah náʼádleehgo á dah náńdaahígíí łaʼ, Jéíʼiras wolyéhígíí, níyáago, hoołtsą́ągo hachʼįʼ nitsidinígoʼ,
23 áádóó tʼáá íiyisí náhookąąhgo ání, Shitsiʼ áłtsʼíísígíí biʼniitsą́. Tįʼ ákǫ́ǫ́, hadaałtʼé nídoodleełígíí biniyé bikʼi dah didíílnih, áko náádidoodáałgo hináa doo.
24 Áádóó ákǫ́ǫ́ Jesus hoł dah diiʼáázh.
Áko diné tʼóó ahayóí hakééʼ yikahgo hoł dinííyił.
25 Nítʼééʼ ákweʼé asdzání léiʼ dił bigháńdiniiltałgo naakitsʼáadah nááhai lá,
26 áko azeeʼ ádeiłʼíní ląʼí chʼééh ádahóółʼįįdgo biniinaa ałtso ádaa nahozdeesdzá, nidi tʼáadoo náázdiidzáa da, nidi tʼóó tséʼédinda ádziidzaa.
27 Nítʼééʼ Jesus baa hojííniiʼ, áko diné ahénálʼáago Jesus bineʼdę́ę́ʼ nizhníyáiiʼ biʼééʼ bizhdeelchid.
28 Háálá ájíní, Biʼééʼ tʼéiyá bidinishchid nidi hadaałtʼé nídeeshdleeł.
29 Tʼáá áko dił haghánílínígíí ásdįįd, áko hąąh dah hazʼánígíí náázdiidzáago hoł bééhoozin.
30 Áko Jesus bee adziilii hatsʼáhoníleʼgo baa ákozniizı̨́įʼgo honásʼáhígíí bichʼįʼ nídzízyizgo ájíní, Háishąʼ shiʼééʼ yideelchid?
31 Áko hódahoołʼaahii ádahodííniid, Jó, diné ninásʼáhígíí nił bééhózin. Haʼátʼéegoshąʼ háí shideelchid diní?
32 Nidi hodeelchidígíí yizdoołtsééł biniyé diné bitaa dzizghal.
33 Nítʼééʼ asdzání doo átʼéhí da áhoʼdiilyaaígíí hoł bééhózingo, nídzíldzidgo hatah hoditłidgo Jesus baazhníyáago biyaajįʼ nitsizhdinígoʼ, áko tʼáá ałtso tʼáá aaníígóó bee bił hojoolneʼ.
34 Áko asdzání ábizhdííniid, Shitsiʼ, neʼoodląʼ bee doo ánítʼéhí da násínídlı̨́ı̨́ʼ; nił hózhǫ́ǫgo náádááł, áádóó nąąh dah hazʼą́ nítʼéʼígíí bitsʼą́ąjįʼ hadaníłtʼée doo.
35 Áko Jesus tʼah yájíłtiʼgo diné łaʼ Jéíʼiras bighandę́ę́ʼ yíkaigo ádaaní, Nitsiʼ daaztsą́. Tʼáásh doo biniyéhégóó Naʼnitiní baa nínáánítʼı̨́į dooleeł?
36 Nidi haʼoodzíʼígíí Jesus doo yaa náʼáhodíltʼı̨́ı̨́góó áłah náʼádleehgo á dah náńdaahígíí áyidííniid, Tʼáadoo nił yéʼí, tʼóó iinídlą́ągo aa dzíínílí.
37 Áko diné doo łaʼ hakééʼ yigáał da dooleełgo ájiilaa, tʼáá hazhóʼó Peter áádóó James índa James bitsilí John tʼéiyá bił ákǫ́ǫ́ jíkai.
38 Áko áłah náʼádleehgo á dah náńdaahígíí bighandi jíkai, nítʼééʼ diné hahóółʼáago łaʼ daacha índa łaʼ ayóó íitsʼaʼgo ákʼidadiitʼaahgo jiiłtsą́.
39 Áko yah ajííyáago ábizhdííniid, Haʼátʼíishąʼ biniyé hahoołʼáago daahcha? Atʼééd doo daaztsą́ą da, nidi tʼóó ałhosh.
40 Áko tʼóó há nidahałtʼiʼgo haa daadloh. Nidi tʼáá ádzíłtso chʼíhonizhníłkaadgo atʼééd bizhéʼé índa bimá áádóó bił nijikaígíí tʼéiyá atʼééd sitíní góneʼ bił yah ajookai.
41 Áko atʼééd bílaʼ jiiłtsoodgo ábijiní, Talétha kóomii, éí, Atʼééd, nídiidááh nidishní, jiníigo óolyé.
42 Tʼáá áko atʼééd nídiiʼnaʼgo dah diiyá, háálá éí naakitsʼáadah binááhai. Tʼáá áko tʼáá ádzíłtso tʼáá íiyisí tʼóó hoł adahóóyóí.
43 Áko Jesus hachʼįʼ haadzíiʼgo áháłní, Tʼááká diné łaʼda bił dahoołneʼ yíilaʼ, áádóó ábizhdííniid, Atʼééd baʼnołtsóód.
Footnotes
^ Diyin God bizaad tʼáá ałkʼidą́ą́ʼ bee akʼedaʼashchínígíí łaʼ kótʼéego dabikááʼ, Gérgasa dineʼé; łaʼ, Gérasa dineʼé.
