Mark 7:1-37
7 Áko Férisii danilíinii áádóó bee hazʼáanii yíndaʼniłtinii łaʼ Jerúsalemdę́ę́ʼ neheeskaígíí Jesus yaa áłah silı̨́įʼgo,
2 hódahoołʼaahii łaʼ Jew dineʼé binahaghaʼ bikʼehgo yílá tánágisígíí tʼáadoo yidaʼaléhí idaʼniiyą́ą́ʼ nítʼééʼ, éí dayiiłtsą́ągo [doo bił adaaníi da].
3 Háálá bizází yę́ę biʼéʼélʼįʼ bikʼehgo Férisii áádóó Jew dineʼé danilíinii tʼáá ałtso bílaʼ tʼáadoo táádeigisí doo daʼayą́ą da,
4 áádóó ałdóʼ, nidaʼiiniihdę́ę́ʼ nináhákáahgo binahaghaʼ bikʼehgo tʼáadoo táʼádadigisí doo daʼayą́ą da, áádóó bizází yę́ę biʼéʼélʼįʼ ałdóʼ ląʼí yidaʼałʼı̨́, jó, éí bee adlání áádóó łeetsʼaaʼ índa łeetsʼaałtsooí tánágis ádaatʼéiida.
5 Áko Férisii índa bee hazʼáanii yíndaʼniłtinii nidahódééłkidgo ádaaní, Haʼátʼéegoshąʼ nídahoołʼaahii nihizází yę́ę biʼéʼélʼįʼ doo yikʼehgo dayíkááhgóó bílaʼ tʼáadoo táádeigisí daʼayą́?
6 Áko ábijiní, Tʼáá bee akʼeʼashchínígi átʼéego nihí tʼóó ádahodołʼíinii, Aizéíyah tsʼídá niheełtʼéego tʼáá nihítséedi nihaa hoolneʼ:
Díí diné tʼáá bizábąąhídóó tʼéiyá yee shił danilı̨́,nidi dabijéí doo yee shitʼáhíjįʼ ádaatʼée da.
7 Naʼníleʼdii shichʼįʼ dahodísin,háálá diné yee nahasʼáanii binaʼnitin danilı̨́įgo yee nidaʼnitin.
8 Diyin God yee hasʼáanii nahjįʼ kódaałʼı̨́įgo diné biʼéʼélʼįʼ dayínóhtąʼ. [Jó, Jew dineʼé binahaghaʼ bikʼehgo łeetsʼaaʼ áádóó bee adlání táádaahgis, áádóó ákódaatʼéhígíí ląʼí ádaałʼı̨́.]
9 Áko ánáábizhdooʼniid, Nihí daohchįįhgo nihiʼéʼélʼįʼ tʼáá dayínóhtąʼ doo biniyé Diyin God yee hasʼáanii nahjįʼ kódaałʼı̨́!
10 Háálá Mózes ádííniid,
Nizhéʼé índa nimá nił nilı̨́įgo íínísin, áádóó,Tʼáá háiida bizhéʼé, doodaiiʼ bimá yiyíídzíʼígíí tsʼídá bidiyoolyééł, níigo yee hasʼą́,
11 nidi nihí diné łaʼda bizhéʼé, doodaiiʼ bimáda, Tʼáá haʼátʼíhída bee níká adeeshwoł yę́ę éí Kórban átʼé, yiłnínígíí, éí binahjįʼ bizhéʼé áádóó bimá doo bił nilı̨́į da nidi, éí tʼáá áko dadohní. (Kórban éí Diyin God baa deetʼą́ jiníigo óolyé.)
12 Áko bizhéʼé índa bimáda yíká adoolwoł yę́ę dooda dadohní.
13 Ákótʼéego nihí nihiʼéʼélʼįʼ yił ahoolchíiłii éí bee Diyin God bizaad doo idééłníígóó ádaałʼı̨́. Áádóó ákódaatʼéhígíí ląʼí baa naahkai.
Diné bidoołchxǫǫłii (Mt. 15:10-20)
14 Áádóó diné yílʼáhígíí hágo náábizhdooʼniidgo ábizhdííniid, Dashíínółtsʼą́ą́ʼ, tʼááłáʼí nootínígo, áádóó díí bikʼidaʼdoohtįįh:
15 haʼátʼíhída tʼáá bikááʼdę́ę́ʼ diné biih hwiileehii éí doo nibiiłchxǫǫh da, nidi biiʼdę́ę́ʼ hahwiileehii tʼéiyá nibiiłchxǫǫh.
16 [Diné łaʼda hajaaʼ hólǫ́ǫgo azdiitsʼaʼígíí hániʼ ajíistsʼą́ą́ʼ.]
17 Áko áłah ílínígíí bitsʼą́ą́ʼ kin góneʼ yah ajííyáago, hódahoołʼaahii haneʼ bee akʼidiʼdootı̨́įłii baa níjítʼı̨́ı̨́ nítʼéʼígíí yíndahódééłkid.
18 Áko ábizhdííniid, Daʼ nihíísh ałdóʼ tʼáá ákótʼéego doo akʼidaʼdoohtįįh da? Daʼ díísh doo nihił béédahózin da? Haʼátʼíhída tʼáá bikááʼdę́ę́ʼ diné biih hwiileehgo doo bółchxǫǫh átʼée da,
19 háálá éí hajéí doo yiih hwiileeh da, nidi habid tʼéiyá yiih hwiileeh áádóó haghá hwiileeh. (Kózhdííniidígíí bee chʼiyáán tʼáá ałtso tʼáadoo átʼéhígóó yidą́ jidííniid.)
20 Áko ánáázhdíʼní, Diné biiʼdę́ę́ʼ hahwiileehii éí diné niyiiłchxǫǫh.
21 Háálá diné biiʼdę́ę́ʼ, bijéí biiʼdę́ę́ʼ nichxǫ́ʼógo nitsáhákees hahwiileeh, adilyé, naʼageh bee tsiʼnaʼadá, diné naatseed,
22 aniʼı̨́ı̨́ʼ, adáhonooní, bąąhági áhoonííł, naʼadloʼ, tsiʼnaʼadá, oochʼı̨́ı̨́d, baaʼihgo áyátiʼ, ádaa haʼniih, áhodiigis.
23 Díí tʼáá ałtso doo yáʼádaashxóonii diné biiʼdę́ę́ʼ hadahwiileehgo nidabiiłchxǫǫh.
Sáirofiníishiya dineʼé asdzání nilíinii biʼoodląʼ (Mt. 15:21-28)
24 Áko Jesus nízhdiiʼnaʼ áádóó dashdiiyá, áko Táir índa Sáídan nahósʼaʼdi jiníyá. Áadi kin léiʼ biyiʼ góneʼ yah ajííyáago diné łaʼ doo yidoonih da jinízin, nidi chʼééh naʼázhdinilʼin.
25 Nítʼééʼ tʼáá áko asdzání łaʼ, bichʼéʼé áłtsʼísí léiʼ éí níłchʼi nichxǫ́ʼí biiʼ hólǫ́ǫgo haa hóóniiʼ lá, áko haa níyáago hachʼįʼ nitsidinígoʼ.
26 Éí asdzání Gríik dineʼé nilı̨́įgo Sáirofiníishiya hoolyéedi biʼdizhchı̨́. Áko náhookąąhgo áhodííniid, Níłchʼi biʼiiníziinii shichʼéʼé biiʼdę́ę́ʼ haníłchééh.
27 Áko Jesus áhodííniid, Bíniʼ áłchíní átsé hwiih daaleeh, háálá áłchíní bichʼiyąʼ łééchąąʼí bichʼįʼ ajiiłtłʼiidgo doo aaníi da.
28 Nidi asdzání ánááhodooʼniid, Tʼáá aaníí ákótʼé, Bóhólníihii, nidi bikááʼ adání bikááʼdę́ę́ʼ łeesʼáán bizéí áłchíní bílákʼee hadandéhígíí łééchąąʼí deiyą́.
29 Áko asdzání ánáábizhdooʼniid, Jó, yáʼátʼéehgo háínídzííʼ. Nílááh náádááł; jó, níłchʼi biʼiiníziinii nichʼéʼé biyiʼdę́ę́ʼ hahóóleʼ.
30 Áko hooghangóó nídzídzá, nítʼééʼ atʼééd tsáskʼeh yikááʼ sitı̨́įgo jiiłtsą́, níłchʼi biʼiiníziinii biyiʼdę́ę́ʼ hahóóleʼ lá.
Jesus éí diné bijééhkał áádóó ałtʼandzihii hadaałtʼé ánáyiidlaa
31 Áko Jesus éí Táir índa Sáídan nahósʼaʼdóó dah náázdiidzáago, Diikápolis biyiʼ góneʼ chʼízhníyáago Gálilii beʼekʼidi jiníyá.
32 Áko diné łaʼ bijééhkał índa ałtʼandzihgo yił haadaaskaigo, Bikʼi dah didíílnih, dahałníigo nídahookąąh.
33 Áko jílʼáhígíí bitsʼą́ądi tʼáá sáhí hoł nizhníʼáázh, áko áadi bijeeyiʼ góneʼ azhdoolchid áádóó azhdíízhéeʼgo bitsooʼ bizhdeelchid,
34 áádóó yáʼąąshgóó dzidéezʼı̨́įʼgo ádił hadzoodzolgo áhojiní, Éfatha, éí, Ąą ánínééh, jiníigo óolyé.
35 Tʼáá áko hajeeyiʼ aníʼdíídláád índa hazaad doo átʼéhígóó tʼáá bééhózínígo hadzoodzííʼ.
36 Áko, Tʼááká diné łaʼ bee bił dahoołneʼ yíilaʼ, bizhdííniid; tʼáá ákóbijiníi nidi, tʼóó yówehda yee haa tádahodoolneʼ.
37 Áko nádı̨́ʼídi tʼóó hoł adahayóigo ádajiní, Tʼáá ałtso yáʼátʼéehgo áyiilaa; bijééhkałii nidi adiitsʼaʼgo, índa doo yáłtiʼii nidi yáłtiʼgo ánáyoodlííł lá.
