Mark 8:1-38
8 Éí yoołkááł yę́ędą́ą́ʼ tʼóó ahayóí haa áłah náánásdlı̨́įʼgo tʼáadoo dayóyą́ʼígóó biniinaa Jesus hódahoołʼaahii hágo bizhdííniidgo ábijiní,
2 Díí diné yílʼáhígíí baa aʼááh nisin, háálá tʼáá shaa áłah nilı̨́įgo kʼad tááʼ yiską́, áko tʼáadoo dayóyą́ʼí da;
3 tʼáá dichin danilı̨́įgo hooghangóó bééʼayéłniiʼgo hooghan tʼáá yiʼoh dahidínóołnah, háálá łaʼ nízaadę́ę́ʼ nidaakai.
4 Áko hódahoołʼaahii hachʼįʼ hadaasdzííʼ, Díí doo naagháhígi háádę́ęʼshąʼ bááh shóidootʼeełgo díí diné daʼdooyı̨́įłgo hwiih dadooleeł?
5 Áko, Díkwíishąʼ łeesʼáán nidaahjaah? jiníigo nabízhdééłkid. Áko ádahodííniid, Tsostsʼid lą́ą.
6 Áko diné yílʼáhígíí, Niʼgóó dinohbįįh, bizhdííniid, áádóó łeesʼáán tsostsʼidígíí nízhdiinilgo Diyin God bichʼįʼ sozdilzingo baa ahéésniizı̨́ı̨́ʼ, índa nijiitíihgo hódahoołʼaahii bitaa jiniih, éí diné yitaa deidoonih biniyé, áko éí yílʼáhígíí yitaa deizniiʼ.
7 Łóóʼ ádaałtsʼísígíí ałdóʼ tʼáá díkwíí nideijaah lá, áko éí bikʼi sozdoolzingo hódahoołʼaahii, Diné bitaa daahniih, bizhdííniid.
8 Áko daʼííyą́ąʼgo hwiih daazlı̨́ı̨́ʼ, áádóó biʼoh daʼoodą́ʼígíí náádadziisdláaʼgo tsʼiizis tsostsʼid hadazdeesbįįd.
9 Daʼííyą́ʼígíí dı̨́įdi mííl daatsʼí ánéelą́ą́ʼ. Áko éí, Nídayínóhkááh, bizhdííniid,
10 áádóó tʼáá áko hódahoołʼaahii bił tsinaaʼeeł biih náájookaigo, Dalmanútha nahósʼaʼjįʼ tséʼnaa hoł niʼníʼéél.
Bee ééhózinii daniidzin daaníigo dayííkeed (Mt. 16:1-4)
11 Férisii danilíinii neheeskaigo nidahódíłkidgo yaa nídiikai, áko hákadaʼiiłhilgo ádaaní, Yáʼąąshdę́ę́ʼ nibee adziilii bee bééhózinii łaʼ dadíníilʼįįł.
12 Jesus yéego ádił hadzoodzolgo ájíní, Haʼátʼíí lá biniyé díí kʼad ahoolchíiłii bee ééhózinii hadeintá? Tʼáá aaníígóó ánihidishní, Díí kʼad ahoolchíiłii bee ééhózinii doo łaʼ bá ádoolníił da.
13 Áko bitsʼą́ą́ʼ dashdiiyáago tsinaaʼeeł biih náádzoodzáago tséʼnaa dah náádazhʼdiiłʼéél.
Férisii áádóó Hérad bidííkʼǫsh bee aniilyółí (Mt. 16:5-12)
14 Hódahoołʼaahii łeesʼáán łaʼ dayíjáah doo yę́ę yaa dayooznah lá, áko łeesʼáán tʼááłáʼí tʼéiyá tsinaaʼeeł biyiʼ siʼą́ą́ lá.
15 Hazhóʼó ábizhdííniidgo ájíní, Férisii danilíinii bidííkʼǫsh bee taosʼniiʼ niilyółí índa Hérad bidííkʼǫsh bee taosʼniiʼ niilyółí bitsʼąą ádaa ádahołyą́.
16 Áko éí yaa nídaatʼı̨́įgo ádaʼahidiʼní, Łeesʼáán nihee ádin, éí biniinaa ánihidííniid.
17 Áko Jesus éí yaa ákoniizı̨́įʼgo áháłní, Haʼátʼíishąʼ biniyé łeesʼáán nihee ádinígíí baa nídaahtʼı̨́? Daʼ tʼah doósh nihił éédahoozįįh da, doo nidi akʼidaʼdoohtįįh da? Daʼ nihijéísh doo binídahazʼáa da daazlı̨́ı̨́ʼ?
18 Nihinááʼ dahólǫ́ǫ nidiísh doo bee daʼoohʼı̨́į da? Nihijaaʼ dahólǫ́ǫ nidiísh doo bee daʼdoohtsʼaʼ da? Índa doósh éédaałniih da?
19 Diné ashdladi míildi ánéelą́ąʼgo łeesʼáán ashdlaʼ bá nihétiʼ yę́ędą́ąʼshąʼ chʼínííłnaʼígíí díkwíí tsʼiizis hadadoołbįįd niʼ? Áko ádahodííniid, Naakitsʼáadah lą́ą.
20 Áádóó dı̨́įdi mííl jílʼáago łeesʼáán tsostsʼid há nihétiʼ yę́ędą́ąʼshąʼ ałdóʼ chʼínííłnaʼígíí díkwíí tsʼiizis hadadoołbįįd niʼ? Áko ánáádabizhdiʼní, Tsostsʼid lą́ą.
21 Áko ábizhdííniid, Daʼ ákoósh tʼah doo akʼidaʼdoohtįįh da?
Bethséyidadi diné doo ooʼíinii ooʼı̨́ ánábiʼdiilyaa
22 Áko Bethséyida kin haalʼáhídi jíkai. Áko diné doo ooʼı̨́į da léiʼ haa deizlóozgo, Bididííłchił, dahałníigo nídahookąąh.
23 Áko Jesus éí diné doo ooʼínígíí bílaʼ jiiłtsoodgo kintahdóó chʼíznílóóz, áko áadi binákʼezhdíízhéeʼgo hálaʼ tʼáá ałchʼishjí bee bikʼi dasdeesniiʼgo ábijiní, Haʼátʼíhígíidaásh yíníʼı̨́?
24 Áko hajííghalgo ájíní, Diné éí tsin naazkaadii nidahalingo tádazhdikáahgo yishʼı̨́.
25 Áádóó Jesus éí diné binááʼ yikʼi náádiilniiʼ, áko hazhóʼó kʼéhézdon dzidéezʼı̨́įʼgo hanááʼ hadaałtʼé násdlı̨́ı̨́ʼ, áko tʼáá ałtsoní nizhónígo daatʼı̨́įgo jiiłtsą́.
26 Áko Jesus hooghangóó dah náhodiiłʼaʼgo áháłní, Tʼááká kintahjįʼ nídóódzaʼ yíilaʼ, [áádóó łaʼda bee bił hóólneʼ yíilaʼ].
Peter éí, Christ Diyin God biYeʼ nílı̨́, yidííniid (Mt. 16:13-20; Lk. 9:18-21)
27 Áádóó Jesus hódahoołʼaahii bił Sesaríya Fílipaigi kin dah naazhjaaʼgóó jíkai, áko ákǫ́ǫ́ jookahgo nabízhdééłkidgo ábijiní, Diné ádaaníigoshąʼ éí háí ájítʼı̨́ dashiłní?
28 Áko hoł dahoolneʼgo ádaaní, Łaʼ John Tó Yee Ası̨́įhii yę́ę átʼı̨́; náánáłaʼ éí Iiláíjah yę́ę átʼı̨́, nidi náánáłaʼ éí Diyin God yá halneʼii yę́ę łaʼ átʼı̨́, daaní.
29 Áko ninááhózhdééłkidgo áhojiní, Nidi nihíshąʼ éí háí ájítʼı̨́ dashidohní? Áko Peter hanáánáádzíiʼgo áhodííniid, Ni Christ ánítʼı̨́.
30 Áko hadzoodzíiʼgo áhojiní, Tʼááká diné łaʼda shee bił dahoołneʼ yíilaʼ.
Jesus bidiʼyoolyéłígíí yaa halneʼ (Mt. 16:21-28; Lk. 9:22-27)
31 Áko náhozhdíníitą́ąʼgo áhojiní, Diné Silı̨́įʼii tsʼídá ląʼígóó tiʼhwiidoonih, áko diné yá aląąjįʼ naazíinii áádóó aláahgo náádaʼiiłniihii índa bee hazʼáanii yíndaʼniłtinii doo dahodínóozįįł da, áko hodiʼyoolyééł, áádóó tááʼ yiską́ągo náázhdidoodááł.
32 Díí tʼáadoo nazhniłʼiní bee hadzoodzííʼ. Nítʼééʼ Peter atsʼáhonílóozgo hodeezteh.
33 Nidi nídzízyizgo hódahoołʼaahii bikʼizhnághalgo Peter dzideeztehgo ábijiní, Séítan nílíinii, shidinínáágóó aninááh, háálá doo Diyin God kʼehgo nitsíníkees da, nidi diné kʼehgo tʼéí nitsíníkees.
34 Áko diné yílʼáhígíí hódahoołʼaahii bił hágo bizhdííniidgo ájíní, Diné tʼáá háiida shikééʼ dashdiigháahgo ádeizhdiyooʼnah, hatsin ałnáoszid nízhdidootı̨́ı̨́ł áádóó shikééʼ joogáał doo.
35 Háálá tʼáá háiida jiinánígíí bąąh hą́ą́snízinii éí yóóʼazhdootłish, nidi tʼáá háiida shí shiniinaa índa haneʼ yáʼátʼéehii biniinaa jiinánígíí ninázhdiníʼą́ągo, éí jiináa dooleeł.
36 Jó, diné łaʼda nahasdzáán tʼáá siʼą́ą́ nítʼééʼ hóóʼ dooleeł biniyé tʼáá ákójínéehgo hwiiʼ sizíinii yóóʼazhdííʼą́ągoshąʼ, haa néelą́ą́ʼ há bínéidoodił?
37 Diné łaʼda tʼáá hó hwiiʼ sizíinii haʼátʼíí bił aheełtʼéé shı̨́įshąʼ bił ałnázhdoolééł?
38 Áko tʼáá háiida díí adilyé bee índa bąąhági átʼéego ahoolchíiłii biyiʼ łaʼ shizaad áádóó shí shaa yázniizı̨́ʼígíí, tʼáá éí Diné Silı̨́įʼii biTaaʼ bitsʼádiʼnílíidii yee diyingo nidaalʼaʼí yił yíkaigo haa yádínóozįįł.
