Mark 9:1-50
9 Áádóó ánááhodiʼní, Tʼáá aaníígóó ánihidishní, Kǫ́ǫ́ naazínígíí łaʼ, Diyin God bee bóhólníihgo bił hazʼáanii bibee adziilii yił yígháhígíí tʼáadoo dayiiłtséhí aniné tsʼídá doo deidoolįh da.
Łahgo ázhnoolningo áhoʼdiilyaa (Mt. 17:1-13; Lk. 9:28-36)
2 Áko hastą́ą́h yiską́ą́dóó bikʼijįʼ Jesus éí Peter áádóó James áádóó John dziłghą́ą́ʼgóó tʼáá sáhí hajizhʼeezh, ákohgo tʼáá dabinááł łahgo ázhnoolningo áhoʼdiilyaa,
3 áko haʼééʼ [yasgi átʼéego] tʼáá íiyisí łigaigo bitsʼádiʼnílííd silı̨́ı̨́ʼ, nahasdzáán bikáaʼgi tʼáadoo ákótʼéego łigaii óʼóleʼí da.
4 Áádóó Iiláíjah índa Mózes, Jesus yił ałchʼįʼ yádaaltiʼgo dajiiłtsą́.
5 Áko Peter éí Jesus áyidííniid, Naʼnitiní, dooládóʼ yáʼátʼéeh da kweʼé neiikaígíí; haaʼíshąʼ, chahaʼoh táaʼgo ádadiilnííł, łaʼ ni ná, łaʼ éí Mózes bá áádóó łaʼ éí Iiláíjah bá.
6 Háálá bee hazdoodzihii doo hoł bééhózingóó biniinaa kótʼéego hadzoodzííʼ, háálá tʼáá íiyisí nídadzisdzííd.
7 Nítʼééʼ kʼos hoł łeeshoogizhgo biyiʼdę́ę́ʼ iinééʼ diistsʼą́ąʼgo ání, Díí shiYeʼ ayóóʼóóshʼníinii jílı̨́, dahwíísółtsʼą́ą́ʼ!
8 Nidadzizghal nítʼééʼ Jesus éí diné bił nidzizı̨́ı̨́ nítʼééʼ yę́ę tʼáadoo hooyání háájí shı̨́ı̨́ silı̨́ı̨́ʼ lá, Jesus tʼéí tʼáá sáhí sizı̨́įgo dajiiłtsą́.
9 Áko dziłghą́ą́ʼdę́ę́ʼ hadah níjookahgo hadzoodzíiʼgo ábijiní, Danóołʼı̨́ʼígíí tʼááká diné łaʼ bee bił dahoołneʼ yíilaʼ, Diné Silı̨́įʼii daaztsą́ą́dę́ę́ʼ náádiidzáago índa.
10 Áko áhodooʼniidígíí doo baa dahojilneʼ da, nidi daʼaztsą́ą́dę́ę́ʼ náádidoodááł nínígíí éí lá haʼátʼíí ááhyiłníí lá dajiníigo bíndaʼahízhdílkid.
11 Áádóó kódajiníigo Jesus nidayízhdééłkid, Haʼátʼíishąʼ biniyé bee hazʼáanii yíndaʼniłtinii éí Iiláíjah átsé doogááł daaní?
12 Áko ánáábizhdooʼniid, Iiláíjah tʼáá aaníí átsé doogááł, áko tʼáá ałtsoní hashtʼéidoodlííł, ákoshąʼ haa yitʼéego Diné Silı̨́įʼii kótʼéego yeinítʼı̨́įgo bee akʼeʼashchı̨́, Ląʼígóó tiʼhwiizhdoonih, áádóó doo ił jílı̨́į da doo?
13 Nidi shí ánihidishní, Iiláíjah tʼáá íídą́ą́ʼ níyá,* áko tʼáá bee akʼeʼashchínígi átʼéego tʼáá bí danízinígi ádayííłʼįįd.
Jesus éí ashkii níłchʼi biʼiiníziinii biiʼ hólóonii hadaałtʼé ánáyiidlaa (Mt. 17:14-21; Lk. 9:37-43)
14 Áko hódahoołʼaahii łaʼígíí baa níjíkai, nítʼééʼ tʼóó ahayóí baa áłah ílı̨́įgo bee hazʼáanii yíndaʼniłtinii yił ałghadaʼditʼááh lágo dajiiłtsą́.
15 Tʼáá áko áłah ílínígíí dahoołtsą́ągo tʼáá íiyisí tʼóó bił adahóóyóí, áko kʼé dahałníigo hadááh heezhjééʼ.
16 Áko bee hazʼáanii yíndaʼniłtinii nayízhdééłkidgo ábijiní, Haʼátʼíishąʼ baa nídaahtʼı̨́?
17 Áko diné áłah nilínígíí łaʼ ání, Naʼnitiní, shiyeʼ bił naa níʼáázh, jó, éí níłchʼi doo yájíłtiʼgóó áhoolaii hayiʼ hólǫ́,
18 áádóó tʼáá nahwiiłáágóó naaʼanáhwiilghą́ąhgo hazhééʼ hahagháahgo hawooʼ ahízhdíłkʼash índa kʼééjíjił, nítʼééʼ nídahoołʼaahii ábidishní, Biiʼdę́ę́ʼ hadanołchééh, nidi chʼééh ádayííłʼįįd.
19 Áko ánáábizhdooʼniidgo ájíní, Doo daʼoodlą́ą́góó ahoolchíiłii danohłíinii, haash nízáagi nihił honishłǫ́ǫ doo? Haash nízáagi nihichʼįʼ haʼííníshníi dooleeł? Níláhdę́ę́ʼ hoł shaa nohkááh.
20 Áko ashkii bił baa jíkai, nítʼééʼ níłchʼi biʼiiníziinii éí Jesus yiyiiłtsą́ągo tʼáá áko ashkii ahaniiníʼą́, áko naaʼajíígoʼgo hazhééʼ hahagháahgo nidzimaas.
21 Áko Jesus éí ashkii bizhéʼé nayízhdééłkidgo ábijiní, Hádą́ąʼshąʼ kótʼı̨́ silı̨́ı̨́ʼ? Áko ájíní, Tʼáá áłchíní nilı̨́ı̨́dą́ą́ʼ.
22 Áko tʼáá hodiyoołhéełgo tʼáá ahą́ą́h dzídza náhwiilghą́ą́h índa taah náhwiilghą́ą́h, nidi bíninilʼą́ą́ ládą́ą́ʼ nihaa jiiníbaahgo nihíká anilyeed.
23 Nítʼééʼ Jesus áháłní, Iisínídląądgo lą́ą! Diyin God yoodláanii yeeʼ tʼáá ałtsoní bá bohónéedzą́.
24 Tʼáá áko ashkii bizhéʼé chayiʼ yádeestiʼgo ání, Ooshdlą́, nidi hózhǫ́ ooshdlą́ą doogi bee shíká anilyeed!
25 Nítʼééʼ Jesus éí diné tʼóó ahayóí kodę́ę́ʼ dayíjeehgo jiiłtsą́ągo níłchʼi nichxǫ́ʼígíí dzideeztehgo ábijiní, Ni, níłchʼi doo yájíłtiʼgóó áádóó doo azdiitsʼaʼgóó áhwiinilaii hwiiʼdę́ę́ʼ haninááh, áádóó tʼááká hwiih náodzaʼ yíilaʼ, nidishní.
26 Ákohgo hadoolghaazhgo tʼáá íiyisí ahanihoníʼą́ągo hwiiʼdę́ę́ʼ hahóóleʼ, áko ashkii daaztsą́ nahalin silı̨́ı̨́ʼ, áko diné agháʼánéelą́ąʼgo, Daaztsą́, dadííniid.
27 Nidi Jesus hálaʼ yiyiiłtsoodgo náhodiidzı̨́ı̨́z, áko dziizįʼ.
28 Áko Jesus hooghan góneʼ yah ííyáago bídahoołʼaahii tʼáá sahdii nidabídééłkidgo ádabidííniid, Nihíshąʼ éí haa yitʼéego hadaniilchéehgo chʼééh ádeiilʼįįd?
29 Áádóó ánáábizhdooʼniid, Sohodizingo [áádóó hodílzingo doo adą́ą́góó] tʼéiyá kódaatʼéhígíí hadínóolkał.
Jesus bidiʼyoolyéłígíí yaa nááhálneʼ (Mt. 17:22,23; Lk. 9:43-45)
30 Áádóó dah náázhdiikaigo Gálilii kéyah góneʼ chʼíjíkai. Áko éí diné łaʼda doo yidoonih da dzinízin,
31 háálá hódahoołʼaahii nazhnitingo kóbijiní, Diné Silı̨́įʼii diné bílákʼeejįʼ ninábidiʼdootʼáałgo dabidiyoołhééł, áko biʼdiisyı̨́ı̨́dóó bikʼijįʼ tááʼ yiską́ągo náádidoodááł.
32 Nidi bee haʼoodzíʼígíí tʼáadoo bikʼidazhʼdiitą́ą da, áádóó tʼóó bíndabízhdídóołkiłgi nidi bitsʼąą dajíítiid.
Háishąʼ aláahdi ayóó átʼéii nilı̨́? (Mt. 18:1-5; Lk. 9:46-48)
33 Áádóó Kapérniyamgi jíkaigo hooghangi yah ajííyáago hódahoołʼaahii nayízhdééłkidgo ábijiní, Níláhdę́ę́ʼ wohkahgoshąʼ haʼátʼíí baa nídaahtʼı̨́ı̨́ nítʼééʼ?
34 Nidi tʼáadoo hadaasdzíiʼ da, háálá jookahdę́ę́ʼ, Háí lá nihitahdóó aláahdi átʼée dooleeł lá, dajiníigo baa nídajitʼı̨́ı̨́ nítʼééʼ.
35 Áko jineezdáago naakitsʼáadahígíí hágo bizhdííniidgo ábijiní, Diné tʼáá háiida łaʼ alą́ąjįʼ naʼázhdiiltéego éí akéédę́ę́ʼ jílı̨́į doo, áádóó tʼáá ałtso binaalʼaʼí jílı̨́į doo.
36 Áko áłchíní yázhí łaʼ biníiʼgi bidziisįʼ, áádóó nízhdiiłtı̨́įgo hódahoołʼaahii ábizhdííniid,
37 Tʼáá háiida áłchíní yázhí kótʼéhígíí łaʼ shízhiʼ bee bichʼįʼ kʼéznídzinígíí éí shichʼįʼ kʼéznídzin, áádóó tʼáá háiida shichʼįʼ kʼéznídzinígíí éí doo shí tʼéí shichʼįʼ kʼéznídzin da, nidi shiníłʼaʼígíí ałdóʼ bichʼįʼ kʼéznídzin.
Doo nihikʼijįʼ nilínígíí éí nihichʼijí nilı̨́ (Lk. 9:49,50)
38 Nítʼééʼ John áháłní, Naʼnitiní, diné léiʼ nízhiʼ bee níłchʼi bidaʼiiníziinii hainiiłkaadgo dahwiiltsą́, áko, Tʼáadoo ánítʼíní, dahodiiʼniid, háálá doo hoł nikééʼ neiikai da.
39 Nidi Jesus ání, Tʼáadoo ánítʼíní, tʼáadoo dabidohníní, háálá diné łaʼ shízhiʼ bee naanish ayóó átʼéii yaa naagháago tʼáá áko doo nichxǫ́ʼógo shá hadoodzih da.
40 Háálá doo nihikʼijįʼ nilínígíí éí nihichʼijí nilı̨́.
41 Jó, tʼáá aaníígóó ánihidishní, Christ bííʼ nohłı̨́įgo łaʼda shízhiʼ bee tó doohdlı̨́ı̨́ł biniyé nihainíką́ągo, éí baa doolyéłígíí tsʼídá tʼáá aaníí baa doolyééł.
Bąąhági átʼı̨́ ájiilaaígíí (Mt. 18:6-9; Lk. 17:1,2)
42 Tʼáá háiida díí áłchínígi átʼéego aʼohgo ádaa nitsídaakeesgo dashoodlánígíí łaʼda bąąhági átʼı̨́ ájiilaaígíí, tʼáá hó tsé daashjééʼ nitsaii hazéédéetʼą́ągo tónteel biih hodiʼyoolghanjígo, há yáʼátʼéeh doo.
43 Áádóó nílaʼ bąąhági ánítʼı̨́ ánóhsingo, éí kʼínígéésh,* háálá tʼááłáhíjí nílaʼ nidi iiná biih yíníyáájígo doo ná yáʼátʼéeh da, nidi nílaʼ tʼáá ałchʼijígo hoolʼáágóó tiʼhooʼnííh bił hazʼą́ąjįʼ kǫʼ doo nitséesii biih nidiʼyoolghą́ą́łjí agháago doo ná yáʼátʼéeh da
44 [ákweʼé hazʼą́ągi chʼosh doo daninée da, índa kǫʼ doo nitsées da].
45 Áádóó nikeeʼ bąąhági ánítʼı̨́ ánóhsingo, éí kʼínígéésh, háálá naʼníłhod nidi iiná biih yíníyáájígo doo ná yáʼátʼéeh da, nidi nikeeʼ tʼáá ałchʼijígo hoolʼáágóó tiʼhooʼnííh bił hazʼą́ąjįʼ [kǫʼ doo nitséesii biih] nidiʼyoolghą́ą́łjí agháago doo ná yáʼátʼéeh da
46 [ákweʼé hazʼą́ągi chʼosh doo daninée da, índa kǫʼ doo nitsées da].
47 Áádóó ninááʼ bąąhági ánítʼı̨́ ánóhsingo, hadííʼááł, háálá ninááʼ tʼááłáʼí nidi Diyin God bee bóhólníihgo bił hazʼáanii biih yíníyáájígo doo ná yáʼátʼéeh da, nidi ninááʼ tʼáá ałchʼijígo hoolʼáágóó tiʼhooʼnííh bił hazʼą́ąjįʼ kǫʼ biih nidiʼyoolghą́ą́łjí agháago doo ná yáʼátʼéeh da,
48 ákweʼé hazʼą́ągi chʼosh doo daninée da, índa kǫʼ doo nitsées da.
49 Áshįįh akʼéʼniłígi átʼéego tʼáá ádzíłtso kǫʼ hakʼídadooʼnił [áádóó nááhániihígíí tʼáá ałtso áshįįh bee halniihgo ádadoolnííł].
50 Áshįįh éí yáʼátʼééh, nidi áshįįh doo halniih da silı̨́įʼgoshąʼ haʼátʼéego halniih áńdoolnííł? Áshįįh nihiyiʼdi dahólǫ́ nidahonohłin doo, áádóó kʼé daʼahíínóhníi doo.
Footnotes
^ Iiláíjah tʼáá íídą́ą́ʼ níyá, níigo éí Diyin God yee haadzíiʼii Iiláíjah doogááł dííniidígíí éí John Tó Yee Ası̨́įhii yiʼiilaa. Mal. 4:5,6.
^ Haʼátʼíí shı̨́ı̨́ binahjįʼ niʼiyísíhígíí, ílı̨́į nidi nitsʼą́ąjįʼ kóníléé, níigo ání.
