Matthew 1:1-25
1 Jesus Christ éí David bitsʼą́ą́dóó oochíiłii nilı̨́, áádóó David éí Éíbraham bitsʼą́ą́dóó oochíiłii nilı̨́. Kótʼéego Jesus Christ bizází yę́ę náás daʼahílchı̨́.
2 Éíbraham éí Áízak há yizhchı̨́, áádóó Áízak éí Jéíkab há yizhchı̨́, áádóó bikʼijįʼ Jéíkab éí Júdah áádóó bikʼisóó há niheezhchı̨́,
3 Áádóó ákóneʼ Téímar éí Píírez índa Zíírah, Júdah bá jishchı̨́, áádóó bikʼijįʼ Píírez éí Hézran há yizhchı̨́ áádóó bikʼijįʼ Hézran éí Ram há yizhchı̨́
4 áádóó áadi Ram éí Amínadab há yizhchı̨́, áádóó bikʼijįʼ Amínadab éí Náshan há yizhchı̨́, ákóneʼ, Náshan éí Sálman há yizhchı̨́
5 nááʼákóneʼ Réíhab éí Bóʼaz, Sálman bá jishchı̨́, áádóó bikʼijįʼ Ruth éí Óbed, Bóáz bá jishchı̨́ʼ áádóó áadi Óbed éí Jésii há yizhchı̨́,
6 áadi índa Jésii éí David aláahgo naatʼáanii há yizhchı̨́.
Áádóó bikʼijįʼ Yoráíyah beʼasdzą́ą́ nítéʼígíí éí Sálaman, David bá jishchı̨́,
7 áádóó bikʼijįʼ Sálaman éí Riihobówam há yizhchı̨́, ákóneʼ Riihobówam éí Abáíjah há yizhchı̨́, áádóó áadi Abáíjah éí Éísa há yizhchı̨́,
8 áádóó bikʼijįʼ Éísa éí Jiiháshafat há yizhchı̨́, ákóneʼ Jiiháshafat éí Jiihóram há yizhchı̨́, áádóó nááʼákóneʼ Jiihóram éí Azáíyah há yizhchı̨́,
9 áádóó áadi Azáíyah éí Jótham há yizhchı̨́, áádóó bikʼijįʼ Jótham éí Éíhaz há yizhchı̨́, áádóó nááʼákóneʼ Éíhaz éí Heziikáíyah há yizhchı̨́,
10 áádóó áadi Heziikáíyah éí Manáseh há yizhchı̨́, áádóó bikʼijįʼ Manáseh éí Éíman há yizhchı̨́, áádóó nááʼákóneʼ Éíman éí Josáíyah há yizhchı̨́,
11 Áadi índa Bábilangóó hoʼdisnááh yę́ędą́ą́ʼ Josáíyah éí Jekonáíyah índa bikʼisóó há niheezhchı̨́.*
12 Áádóó índa Bábilangóó hoʼdisnááhdóó bikʼijįʼ Jekonáíyah éí Shiyáltiyel há yizhchı̨́, áadi índa Shiyáltiyel éí Zerábabel há yizhchį,
13 áádóó ákóneʼ Zerábabel éí Abáíyad há yizhchı̨́ nááʼákóneʼ Abáíyad éí Iiláíyakim há yizhchı̨́, áádóó bikʼijįʼ Iiláíyakim éí Éízor há yizhchı̨́,
14 nááʼákóneʼ Éízor éí Zéídak há yizhchı̨́, áádóó índa Zéídak éí Éíkim há yizhchı̨́, áádóó bikʼijįʼ Éíkim éí Éíkim éí Iiláíyad há yizhchı̨́,
15 nááʼákóneʼ Iiláíyad éí Eliyéízer há yizhchı̨́, áádóó bikʼijįʼ Eliyéízer éí Máthan há yizhchı̨́, índa Mátham éíʼJéíkab há náánázhchı̨́,
16 Jéíkab éí Jóseph há yizhchı̨́, áko Jóseph éí Mary bahastiin silı̨́ı̨́ʼ Mary éí Jesus, Christ wolyéhígíí, jishchı̨́.
17 Áko Éíbraham hiná yę́ędóó David hiná yę́ęjįʼ dı̨́ı̨́ʼtsʼáadahdi ałkʼi náʼázhchı̨́, áádóó David hiná yę́ędóó Babliangóó hoʼdisnááh yę́ęjı̨́ dı̨́ı̨́ʼtsʼáadahdi ałkʼi náʼáazhchı̨́, ákóneʼ Bábilangóó hoʼdisnááh yę́ędóó Christ* yizhchı̨́įjįʼ dı̨́ı̨́ʼtsʼáadahdi ałkʼi náʼázhchı̨́.
Jesus Christ biʼdizhchı̨́ (Lk. 2:1-7)
18 Jó, kótʼéego Jesus Christ hoʼdizhchı̨́. Hamá Mary éí Jóseph yił ahaa dootʼashgo yił ahaʼdeetʼą́,* nidi tʼah doo yił ahaítʼaashgóó, Níłchʼi Diyinii bibee adziilii bee izʼniiltsąądgo bééhoozin.
19 Áko Jóseph, hahastiin dooleełígíí, diné tʼáá ákogi átʼéii nilı̨́įgo, tʼáá nahonitʼinee nahjįʼ nihodideeshʼáałgo doo haa yáhodoosįįł da niizı̨́ı̨́ʼ.
20 Nidi díí yaa nitsíkees nítʼééʼ nayiiyeełgo Bóhólníihii bidiyingo naalʼaʼí bichʼįʼ yitʼíní íʼdiilyaago ábíłní, Jóseph, David biyeʼ nílíinii, Mary neʼasdzą́ą́ yileehígíí tʼáadoo bikʼee nił yéʼí, háálá Níłchʼi Diyinii bibee adziilii bee izʼniiltsąąd.
21 Áko ashkii yidoołchííł, áádóó Jesus* bee yídíízhiił, háálá bidineʼé bibąąhági ádaatʼéii yitsʼą́ąjįʼ yisdéidiyoonił.
22 Diyin God yá halneʼii binahjįʼ Bóhólníihii hahaasdzíiʼii ałtso bohodoolnííł biniyé ádzaa:
23 Jóʼakon, chʼikę́ę́h tʼah doo diné bee haleehii awééʼ bee hodooleełgo ashkii yidoołchííł,Éí Imányowel bee yídóojiił,
(éí Diyin God nihił hólǫ́ jiníigo óolyé).
24 Nítʼééʼ Jóseph tsʼéédzídzidgo nízhdiiʼnaʼ, áko Bóhólníihii bidiyingo naalʼaʼí áhodííniidii biʼjiilaago, Mary bił ahaa jítʼáázh,
25 nidi tʼáadoo baa níjítʼįįhí biyáázh yishchı̨́, áádóó Jesus bee jíízhiʼ.
Footnotes
^ 598 B.C. yę́ędą́ą́ʼ Jew dineʼé Bábilandi hoʼdisnááh. 2Kgs. 24:14,15; 2Chr. 36:10; Jer. 27:20.
^ Christ jiníigo éí Mesáíyah ałdóʼ óolyé.
^ Yił ahaa dootʼash yił ahaʼdeetʼą́ nínígíí íídą́ą́ʼ tʼáá bee hazʼą́ kʼehgo tʼáá íídą́ą́ʼ yił ahaítʼaash baa nitsáhákees nítʼééʼ. Tʼáá háiida doo tʼáá ákogi áánííłgóogo bił nizdooniiłgo bee hazʼą́. Lk. 1:27.
^ Jesus éí Yisdáʼiiníiłii jiníigo óolyé. Lk. 1:31.
