Matthew 10:1-42
10 Áádóó Jesus hódahoołʼaahii naakitsʼáadahígíí hágo bizhdííniidgo níłchʼi danchxǫ́ʼíii ayiʼdę́ę́ʼ hadeiniiłkaad doo biniyé bee óhólnííh bitaazdeezʼą́, áádóó nidaałniih tʼáá ałtso índa ka nidaakaígíí tʼáá ałtso hadaałtʼé áńdazhdoodlííł ałdóʼ biniyé bee óhólnííh bitaazdeezʼą́.
2 Áko naakitsʼáadahgo daalʼaadii éí kódaolyé: áłtséhígíí Sáíman, éí Peter wolyéhígíí, áádóó yił hááʼáázh Andrew; Zébedii biyeʼké, James índa yił hááʼáázh John;
3 Philip áádóó Barthálemew; Thomas áádóó Matthew tax nahalyéhígíí yiniyé sidáii; James éí Alfíyas biyeʼ, índa Lebíyas, Thádiyas ałdóʼ wolyéhígíí;
4 Sáíman éí Kéínan dineʼé jílínígíí, índa Júdas Iskáriyat éí nináhodidooʼáłígíí.
Jesus bídahoołʼaahii naakitsʼáadahígíí dayííłʼaad (Mk. 6:7-13; Lk. 9:1-6)
5 Jesus kóníigo díí diné naakitsʼáadahgoígíí ayiisʼaʼ, Doo Jew dineʼé danilíinii tʼááká bitahjįʼ dadohkááh yíilaʼ, áádóó Samériya dineʼé łaʼ bikin haalʼáajįʼ dadohkááh lágo,
6 nidi Ízrel dineʼé éí dibé nahalingo yóóʼadahaaskaígíí bichʼįʼgo dadohkááh.
7 Áádóó dayínóhkááhgóó kódadohníigo dahołneʼ, Yáʼąąshii bee bóhólníihgo bił hazʼáanii koshídę́ę́ʼ bichʼįʼ hoolzhish.
8 Áádóó diné bitah dahoneezgaígíí náádahidoołjeeh, łóód atsʼíís yiyáanii naałdzidii bee bąąh dah nidahazʼáanii hadaałtʼé áńdaahdleʼ, diné daneeznáanii hinááh áńdaahdleʼ, níłchʼi biʼiiníziinii biiʼ dahólóonii biyiʼdę́ę́ʼ hadahinołkaad. Nihaa dadeestʼánígíí tʼáá jííkʼe nihaa dadeestʼą́, áko tʼáá jííkʼe bee ádaahnííł.
9 Óola áádóó béésh łigaii índa béésh łitsoida łaʼ nihidah naʼayizii biih daohʼááł lágo,
10 áádóó dah sidoohkaigóó azis bee naʼaljidí, índa nihiʼééʼ naakigo, áádóó nihikeeʼ, índa nihigishda tʼáadoo dayínóhjáhí, háálá naalnishí baʼdooltsołgi yą́ą́h nilı̨́.
11 Áko tʼáá haaʼída kin hadaasʼáagi índa kin naazhjaaʼgi nidahohkáahgo, diné bił ílíinii hazhóʼó bíndaʼídółkid, áko dah náádahidoohkáahjįʼ tʼáá ákwii nahísóotą́ą doo.
12 Índa hooghangi yah adahohkáahgo, Díí hooghangi hózhǫ́ǫ leʼ, dadohníi doo.
13 Áko hooghangi kéédahatʼíinii bił daʼílı̨́įgo, bíniʼdii kʼé bee yínóhʼníinii bił hólǫ́ǫ dooleeł, nidi doo yą́ą́h danilı̨́ı̨́góó, éí kʼé dadooniidii nihichʼįʼ tʼą́ą́ʼ nídoodleeł.
14 Áádóó tʼáá háiida doo danihinízingóó índa nihizaad doo deidiitsʼaʼgóó, éí hooghandóó, doodaiiʼ kin haalʼáádóó dah náádahidoohkáahgo nihikeeʼ łeezh bąąh nidahołdéeh dooleeł.*
15 Tʼáá aaníí ánihidishní, Ánihwiitʼaah beiníłką́ądi éí kin haalʼáhígíí Sádam índa Gomárah biláahgo atíbidiʼdoolnííł.
Atíʼélʼı̨́įjįʼ hoolzhish (Mk. 13:9-13; Lk. 21:12-17)
16 Jóʼakon, dibé éí mąʼiitsoh yitahgóó dadeeskaígi átʼéego danihidishʼá; éí bąą tłʼiish hóyánígi átʼéego dahonohsą́, áádóó hasbídí baʼátʼeʼ ádinígi átʼéego nihaʼátʼeʼ ádaadin.
17 Diné bitsʼąą ádaa ádahołyą́, háálá á nidahwiiʼaahii bidááhdę́ę́ʼ nidanihidiyooʼish, áádóó kin yiiʼ áłah nídaadleehí naaznilgóó ninihídaʼiiłtsxáas doo,
18 áádóó shiniinaa naatʼáanii índa aláahgo naatʼáanii naazdáágóó bidááhdę́ę́ʼ nidanihiiʼéeshgo, éí índa doo Jew dineʼé danilíinii binááł shá nidahołneʼ doo.
19 Nidi nidanihiiʼéeshgo, haʼátʼéegoda índa haʼátʼíida bee hadadoohdzihii tʼáadoo biniinaa ádił nidahodołchiłí, háálá bee hadadoohdzihii áadi índa nihił béédahodoozįįł,
20 háálá nihí doo hadoohdzih da, nidi nihiTaaʼ biNíłchʼi Diyinii nihiyiʼdóó yáłtiʼígíí hadoodzih.
21 Áádóó ashiiké tʼáá łaʼ hajííʼáazhgo łaʼ bidiʼyoolyéełjįʼ nináʼahidiitʼaah doo, áádóó azhéʼé nilíinii baʼáłchíní ninéidiiʼaah doo, índa áłchíní bishchíinii yichʼįʼ nídahidiikáahgo nahodiʼdootsiłjįʼ ninádahodiiʼaah dooleeł,
22 áádóó shízhiʼ biniinaa diné tʼáá ałtso nihikʼee dadiniih doo, nidi tʼáá háiida tʼáá nihoníyáajįʼ haʼólnínígíí éí yisdádooltééł.
23 Nidi kin haalʼáagi łaʼ atídanihiłʼı̨́įgo, náánáłahdi kin hanáánáálʼáajįʼ chodaʼiidoołʼįįł, háálá tʼáá aaníí ánihidishní, Diné Silı̨́įʼii níyáajįʼ Ízrel dineʼé bikin hadaasʼáágóó doo ałtso tádadoohkai da dooleeł.
24 Íhoołʼaahii éí nahonitinii doo biláahgo ájítʼée da, índa naalnishí éí hananitʼaʼí doo biláahgo ájítʼée da;
25 íhoołʼaahii nahonitinii bił ahijíłtʼé jileehígíí hoł tʼáá áko doo, áádóó naalnishí hananitʼaʼí bił ahijíłtʼéhígíí hoł tʼáá áko doo. Kin bee bóhólníihii éí Béíyalzííbab deiłníigo, kin bee bóhólníihii baʼáłchíní ałdóʼ tʼah yówehgo ákódeiłníi doo!
Háishąʼ báhádzid doo? (Lk. 12:2-7)
26 Éí bąą kódaatʼéhígíí tʼáadoo béédaałdzidí, háálá tʼóó bił ídaʼítʼéhígíí tʼáá ałtso dadooʼnih, áádóó nidanilʼinígíí tʼáá ałtso béédahodoozįįł.
27 Haʼátʼíhída tʼáá nantʼinee bee nihił hashneʼii tʼáadoo bahatʼaadí baa dahołneʼ, áádóó haʼátʼíhída bee nihijeeh náníshniihígíí kin bighą́ą́ʼdóó baa dahołneʼ.
28 Atsʼíís deidiyoołhéełgo yídaneelʼáanii nidi iiʼ sizíinii tsʼídá doo dayiyółhééł átʼée daígíí tʼáadoo béédaałdzidí, nidi hoolʼáágóó tiʼhooʼnííh bił hazʼą́ądi iiʼ sizíinii áádóó atsʼíís tʼáá yił íidoołdįįłgo yíneelʼáanii béédaałdzid.
29 Daʼ tsídiiłbáhíísh naakigo doo tʼááłáʼí sindáo bą́ą́h ílı̨́įgo nahaniih da? Ákondi nihiTaaʼ doo íinízingóó tʼááłáʼí nidi doo łaʼ niʼjįʼ nidootłish da.
30 Jó nihitsiiʼ tʼááłáʼí níláhígo nidi ałtso dayééltaʼ.
31 Éí bąą tʼáadoo nídaałdzidí; tsídiiłbáhí tʼóó ahayóí nidi biláahgo daʼnohłı̨́.
Diné binááł Christ bee ádééhozdoolzįįłígíí (Lk. 12:8,9)
32 Éí bąą tʼáá háiida diné binááł shee ádééhodzílzinígíí, shí ałdóʼ shiTaaʼ yáʼąąshdi hólóonii bidááhdę́ę́ʼ hwee ádééhodeeszįįł.
33 Nidi tʼáá háiida diné binááł, Doo hwééhasin da, shididooniiłígíí, shí ałdóʼ shiTaaʼ yáʼąąshdi hólóonii bidááhdę́ę́ʼ, Doo hwééhasin da, hodideeshniił.
Kʼé hólǫ́ doo bił níyáa da, nidi diltłish nítą́ (Lk. 12:51-53; 14:26-27)
34 Nahasdzáán bikáaʼgi tʼáá kʼé hólǫ́ǫ dooleeł biniyé jiníyá tʼáadoo danohsingo shaa nitsídaahkeesí; kʼé hólǫ́ǫ dooleeł doo biniyé níyáa da, nidi diltłish nítą́.
35 Háálá diné bizhéʼé yikʼijįʼ nilı̨́įgo, índa achʼéʼé nilíinii bimá yikʼijįʼ nilı̨́įgo, áádóó azhááʼáád nilíinii yizhááʼáád nilíní yikʼijįʼ nilı̨́įgo ádadeeshłííł biniyé níyá,
36 áko diné tʼáá hó haʼáłchíní łaʼ hweʼanaʼí danilı̨́į doo.
37 Tʼáá háiida hazhéʼé, doodaiiʼ hamáda shiláahgo ayóóʼájóʼnínígíí, éí doo shą́ą́h jílı̨́į da, índa tʼáá háiida hayeʼ, doodaiiʼ hatsiʼ shiláahgo ayóóʼájóʼnínígíí, éí doo shą́ą́h jílı̨́į da.
38 Áádóó tʼáá háiida doo hatsin ałnáoszid nízhdiitįįhígíí áádóó doo shikééʼ joogáłígíí, éí doo shą́ą́h jílı̨́į da.
39 Tʼáá háiida jiinánígíí tʼáá hó ádá shójoostʼeʼgo éí yóóʼazhdoołdił, áádóó tʼáá háiida shí shiniinaa jiinánígíí yóóʼazhdííʼą́ągo éí jiinánígíí shóízhdoołtʼeeł.
Nidoolyéełii (Mk. 9:41)
40 Tʼáá háiida nihichʼįʼ kʼé nídzinígíí éí shichʼįʼ kʼéznídzin, áádóó tʼáá háiida shichʼįʼ kʼéznídzinígíí éí Diyin God shiníłʼaʼígíí ałdóʼ bichʼįʼ kʼéznídzin.
41 Tʼáá háiida Diyin God yá halneʼii tʼáá aaníí Diyin God yá halneʼii nilínígíí bąą bichʼįʼ kʼéznídzingo, éí Diyin God yá halneʼii baa doolyéełii haa doolyééł, áádóó tʼáá háiida diné tsʼídá tʼáá ákogi átʼéii tʼáá aaníí tʼáá éí nilínígíí bąą bichʼįʼ kʼéznídzingo, éí diné tsʼídá tʼáá ákwii átʼéii baa doolyéełii haa doolyééł.
42 Tʼáá aaníí ánihidishní, Tʼáá háiida díí aʼohgo ádaatʼéii łaʼ shíhoołʼaahii nilínígíí bąą tó sikʼazii yidoodlı̨́ı̨́ł biniyé baazhníką́ągo, éí haa doolyéłígíí tsʼídá tʼáá aaníí haa doolyééł.
Footnotes
^ Nihikeeʼ łeezh bąąh nidanołdééh, jiníigo Diyin God bitsʼą́ą́dóó yóóʼahodootʼą́ągo óolyé. Acts 13:51.
