Matthew 14:1-36
14 Áko íídą́ą́ʼ Hérad, naatʼáaniishchíín jílíinii, Jesus baa hozdiiztsʼą́ąʼgo
2 há nidaalʼaʼí ábizhdííniid, Díí John Tó Yee Ası̨́įhii daaztsą́ą́dę́ę́ʼ náádiidzáago átʼı̨́ı̨́ lá; éí bąą díí adziil bee ayóó átʼéego ádahooníiłii biiʼ hólǫ́ǫgo yinahjįʼ áánííł lá.
3 Háálá Hérad éí hatsilí Philip beʼasdzą́ą́ Heródiyas wolyéii biniinaa John jiiłtsood, áko beʼdziztłʼǫ́ǫgo awáalyaa góneʼ yah ajííłtʼeʼ.
4 Háálá íídą́ą́ʼ John áhodííniid, Nitsilí beʼasdzą́ą́ bił naniʼaashgo doo bee ná hazʼą́ą da.
5 Áko azhą́ hodiyeeshxééł hóʼníi nidi diné áłah nilínígíí yinásdzííd, háálá John éí Diyin God yá halneʼii nilı̨́ dayóʼní.
6 Nidi Hérad biʼdizhchı̨́ı̨́ yę́ęjįʼ anáhoolzhiizhgo, áłah silı̨́ʼígíí binááł Heródiyas bichʼéʼé oolzhiizhgo Hérad yił hóóshǫǫd,
7 áko atʼééd tʼáá yiyííkeedígíí yeididooʼáałgo yee ádee hadoodzííʼ.
8 Áko atʼééd bimá ábíłníigo kódííniid, John Tó Yee Ası̨́įhii bitsiitsʼiin kweʼé łeetsʼaatʼą́hí biiʼ siʼą́ągo shaa níkaah.
9 Áko aláahgo naatʼáanii tʼáá íiyisí bąąh bíniʼ, nidi ádee hadoodzíʼígíí índa baa iisdeeʼígíí biniinaa baa dootʼáałgo yee hoołʼaʼ,
10 áko ákǫ́ǫ́ iʼííłʼaʼgo awáalyaadi John bitsiitsʼiin kʼélneʼ,
11 áko bitsiitsʼiin łeetsʼaatʼą́hí bee náką́ągo atʼééd baa yíką́, áádóó atʼééd éí bimá yeiníką́.
12 Nítʼééʼ John hódahoołʼaahii danilı̨́ı̨́ nítʼéeʼii yíkaigo hatsʼíís dah deidiiłtı̨́įgo yóóʼádayiilaa, áádóó dah diikaigo Jesus yił dahoolneʼ.
Diné ashdladi mííl yiltʼéego baʼíltsood (Mk. 6:30-44; Lk. 9:10-17; Jn. 6:1-14)
13 Ákohgo Jesus éidíígíí yiyííniiʼgo, áádóó dah diiyáago tsinaaʼeeł bee doo naagháhígóó iʼjííłʼéél. Nidi diné yílʼáhígíí haa dahodiiztsʼą́ąʼgo kin hadaasʼáádę́ę́ʼ tʼáá niʼ hakééʼ niheezhjééʼ.
14 Áko tsinaaʼeeł biiʼdę́ę́ʼ Jesus hajííyáago, ayóó átʼéego diné yílʼáago jiiłtsą́, áko baa aʼááh jiniizı̨́įʼgo bąąh dah nidahazʼánígíí náádabizhdiyiisá.
15 Nítʼééʼ hííłchʼįʼgo hódahoołʼaahii kódaaníigo haa yíkai, Kweʼé doo naagháhí da, áádóó tʼáá íídą́ą́ʼ kʼadę́ę anááʼátʼaah; diné yílʼáhígíí nídayínóhkááh bidiní, áko bíniʼdii kin dah naazhjaaʼgóó chʼiyáán deidooyı̨́łígíí tʼáá bí ádá nideidiyoołnih.
16 Nidi Jesus áhodííniid, Doo nihidahaaskai da nidi tʼáá nihí badaʼnołtsóód.
17 Áko ádahałní, Łeesʼáán tʼáá ashdlaʼí áádóó łóóʼ tʼáá naakíhí tʼéiyá nideiijaah.
18 Áko, Wóshdę́ę́ʼ shaa nohnííł, jidííniid.
19 Áko diné yílʼáhígíí, Hootsogóó dinohbįįh, bizhdííniid, áádóó łeesʼáán ashdlaʼígíí índa łóóʼ naakiígíí nízhdiinilgo, yáʼąąshgóó jidéezʼı̨́įʼgo bikʼi sozdoolzin, áádóó nijiitíihgo łeesʼánígíí hódahoołʼaahii bitaa jiniihgo, éí diné yílʼáhígíí yitaa deizniiʼ.
20 Áko tʼáá ałtso daʼííyą́ąʼgo hwiih daazlı̨́ı̨́ʼ. Áko nidahaastiʼgo biʼoh daʼjííyą́ʼígíí náádadziisdláaʼgo tsʼiizis naakitsʼáadah hadazdeesbįįd.
21 Asdzání áádóó áłchíní tʼáadoo wóltaʼí dinéhígíí tʼáá bízhánígo ashdladi mííl daatsʼí daʼííyą́ą́ʼ lá.
Jesus táłkááʼ yigááł (Mk. 6:45-52; Jn. 6:15-21)
22 Ákohgo Jesus hódahoołʼaahii, Tsinaaʼeeł biih hohkáahgo wónaanígóó shilą́ąjįʼ daʼdołʼeeł, áko shí éí jílʼáhígíí nídayínóhkááh bidideeshniił, bizhdííniid.
23 Áko jílʼáhígíí nídayínóhkááh bizhdííniidóó bikʼijįʼ sozdidoolzįįł biniyé tʼáá sáhí dził bíjiiyá. Áko iʼííʼą́ągo tʼáá sáhí áadi nijighá,
24 ákohgo tsinaaʼeeł táʼałnííʼgóó yiʼoł, nítʼééʼ bidááhdę́ę́ʼ níyolgo biniinaa tó bínízdiiłhałgo yiʼoł.
25 Áko yikáíhtʼáahjįʼ ayííłką́ągo, táłkááʼgóó joogáałgo baa nídzídzá.
26 Nítʼééʼ hódahoołʼaahii táłkááʼ joogáałgo dahoołtsą́ągo hwéédaasdzííd, áko, Haʼátʼíí shı̨́ı̨́ bichʼı̨́įdii átʼı̨́! daaníigo hakʼee bił yééʼ dahazlı̨́įʼgo hadadeeshghaazh.
27 Nidi tʼáá áko Jesus kóníigo hachʼįʼ haadzííʼ, Nihił dahózhǫ́, shíyeeʼ áshtʼı̨́; tʼáadoo nídaałdzidí.
28 Nítʼééʼ Peter hachʼįʼ haadzíiʼgo ádííniid, Bóhólníihii, ni ánítʼı̨́ı̨́ ládą́ą́ʼ táłkáaʼgi shaa nínááh, shidiní.
29 Áko, Hágo, bizhdííniid. Áádóó tsinaaʼeeł biiʼdę́ę́ʼ Peter hajííyáago Jesus baazhdoogááł biniyé táłkááʼ jideeyá,
30 nidi níyol bidziilgo hoł bééhoozingo nídzísdzííd, áko yaazhdeezhtłizhgo, Bóhólníihii, yisdáshíłteeh, jiníigo hazhdoolghaazh.
31 Tʼáá áko Jesus kʼídeeshchidgo hasił kóháłníigo, Tʼįįhdígo iinídláanii! Haʼátʼéegoshąʼ nił naaki hazlı̨́ı̨́ʼ?
32 Áko tsinaaʼeeł biih níjootʼáazhgo ííyol.
33 Nítʼééʼ tsinaaʼeeł yiiʼ naháaztánígíí hachʼįʼ nitsidadeezgoʼgo ádaaní, Tʼáá aaníí Diyin God biYeʼ nílı̨́ı̨́ lá.
Jesus éí Genésaretdi bąąh dah nidahazʼáanii néidiyiiłjeeh (Mk. 6:53-56)
34 Tséʼnaa hoł niʼníʼéelgo kéyah Genésaret hoolyéejįʼ jíkai.
35 Ákwii diné kéédahatʼínígíí hwéédahoosįįdgo, éí kéyah bikáaʼgi tʼáá níłtéél nítʼééʼ haneʼ ádayiilaa, áko bąąh dah nidahazʼánígíí tʼáá ałtso haa dayiizhjaaʼgo,
36 Bíniʼdii niʼééʼ bijánil tʼéiyá nidi yidahidilchííd, dahałníigo nídahooskan, áko hodahideeshchidígíí tʼáá ałtso hadaałtʼé nídaasdlı̨́ı̨́ʼ.
