Matthew 15:1-39
15 Ákohgo Férisii danilíinii áádóó bee hazʼáanii yíndaʼniłtinii kódaaníigo Jerúsalemdę́ę́ʼ Jesus yaa yíkai,
2 Haʼátʼéegoshąʼ nídahoołʼaahii nihizází yę́ę biʼéʼélʼįʼ doo yikʼehgóó ádaatʼée da? Háálá adaʼniiyı̨́įhgo bílaʼ doo táádeigis da.
3 Áko ábizhdííniid, Haʼátʼíishąʼ biniyé nihí ałdóʼ nihiʼéʼélʼįʼ biniinaa Diyin God yee hasʼáanii bilááh nidahidołtaał?
4 Háálá Diyin God ání,
Nizhéʼé índa nimá nił nilı̨́įgo íínísin,áádóó,Tʼáá háiida bizhéʼé, doodaiiʼ bimáda yiyíídzíʼígíí, tʼáá aaníí hodiʼyoolyééł, níigo yee hasʼą́.
5 Nidi nihí ádadohní, Tʼáá háiida bizhéʼé, doodaiiʼ bimáda, Tʼáá haʼátʼíhída bee nihíká adeeshwoł yę́ę éí Diyin God baa deetʼą́, yiłnínígíí,
6 éí binahjįʼ bizhéʼé [doodaiiʼ bimáda] doo bił nilı̨́į da nidi éí tʼáá áko, dadohní. Áko nihiʼéʼélʼįʼ biniinaa Diyin God bibikʼeh óʼooʼníiłii doo idééłníígóó ádaahłaa.
7 Nihí tʼóó ádahodołʼíinii! Tsʼídá niheełtʼéego Aizéíyah tʼáá nihilą́ąjįʼ kóníigo nihaa hoolneʼ:
8 Díí diné tʼáá bizábąąhídóó tʼéiyá yee shił danilı̨́,nidi dabijéí doo yee shitʼáhíjįʼ ádaatʼée da;
9 Naʼníleʼdii shichʼįʼ dahodísin,háálá diné yee nahasʼáanii binaʼnitin danilı̨́įgo yee nidaʼnitin.
Diné bidoołchxǫǫłii (Mk. 7:14-23)
10 Áádóó diné yílʼáhígíí hágo bizhdííniidgo ábijiní, Daʼíísółtsʼą́ą́ʼ áádóó díí bikʼidaʼdoohtįįh:
11 haʼátʼíhída diné bizahwiileehígíí éí doo nibiiłchxǫǫh da, nidi bizééʼdę́ę́ʼ hahwiileehígíí éí nibiiłchxǫǫh.
12 Ákohgo hódahoołʼaahii yíkaigo ádahodííniid, Díí bee háínídzíʼígíí Férisii danilíinii deidiiztsʼą́ąʼgo yikʼee doo bił dahóózhǫǫd daígíísh nił bééhózin?
13 Áko ábijiní, ShiTaaʼ yáʼąąshdi hólóonii chʼil doo kʼiidííláhígíí tʼáá ałtso hadahidooltsʼǫł.
14 Éí tʼáadoo baa nídaahtʼíní; doo daʼooʼı̨́ı̨́góó nidaʼaʼeeshígíí ádaatʼı̨́. Áko diné doo ooʼíinii náánáłaʼ diné doo ooʼíinii yoolóosgo, tʼáá áłah aʼą́dínóodah.
15 Nítʼééʼ Peter áhodííniid, Haneʼ bee akʼidiʼdootı̨́įłii baa nánítʼínígíí ááhyiłníinii bee nihił hólneʼ.
16 Áko Jesus áhodííniid, Daʼ nihíísh ałdóʼ tʼah nidi doo akʼidaʼdoohtįįh da?
17 Daʼ díísh tʼah doo bikʼidaʼdoohtįįh da? Haʼátʼíhída azééʼ góneʼ ahwiileehii éí abid yiih hwiileeh, áádóó agháhwiileeh.
18 Nidi azééʼdę́ę́ʼ hahwiileehii éí ajéí biiʼdę́ę́ʼ hahwiileeh, áko éí diné nibiiłchxǫǫh.
19 Háálá ajéí biiʼdę́ę́ʼ nichxǫ́ʼógo nitsáhákees hahwiileeh, diné naatseed, adilyé, naʼageh bee tsiʼnaʼadá, aniʼı̨́ı̨́ʼ, woochʼíidgo haneʼ, tʼáá ádzaagóó aa haneʼ.
20 Díidí diné nibiiłchxǫǫh, nidi yílá doo tánásgizgóó adą́ągo éí diné doo niyiiłchxǫǫh da.
Kéínan dineʼé asdzání nilíinii biʼoodląʼ (Mk. 7:24-30)
21 Áko Jesus áádóó dashdiiyáago Táir índa Sáídan kéyah bił hazʼą́ą́ góneʼ ajííyá.
22 Nítʼééʼ jóʼakon, tʼáá éí nahósʼaʼdóó Kéínan dineʼé asdzání léiʼ níyáago hadoolghaazhgo ání, Bóhólníihii, David biYeʼ nílíinii, shaa jiiníbaah; níłchʼi biʼiiníziinii tʼáá íiyisí shichʼéʼé yiʼniiłhı̨́.
23 Nidi tʼáadoo bichʼįʼ hadzoodzíiʼ da. Áko hódahoołʼaahii yíkaigo nídahookąąhgo ádaaní, Nówehjįʼ bidiní, háálá nihikééʼ doolwosh.
24 Nidi ábizhdííniid, Ízrel dineʼé éí dibé nahalingo yóóʼadahaaskaígíí tʼéiyá bichʼįʼ shiʼdoolʼaad.
25 Nidi asdzání haa níyáago hachʼįʼ nitsidinígoʼgo ání, Bóhólníihii, shíká anilyeed.
26 Áko ábizhdííniid, Áłchíní bichʼiyąʼ łééchąąʼí bichʼįʼ ajiiłtłʼiidgo doo aaníi da.
27 Nidi asdzání ádííniid, Tʼáá aaníí ákótʼé, Bóhólníihii, áko łééchąąʼí nidi yíhółníihii bibikááʼ adání bikááʼdę́ę́ʼ łeesʼáán bizéí hadandéhígíí deiyą́.
28 Áko Jesus ánáázhdooʼniid, Asdzání, dooládóʼ neʼoodląʼ bee aʼíínílíii ayóó átʼéé lá! Tʼáá íinínízinígíí bikʼehgo ná ádoonííł. Tʼáá áko bichʼéʼé náábiʼdiilzá.
Ląʼí náádabiʼdiiljééʼ
29 Áko áádóó Jesus dashdiiyáago Gálilii beʼekʼid bąąhgóó jiníyá. Áádóó wókʼą́ąjįʼ hajiyá, ákwii dzineezdá.
30 Nítʼééʼ diné tʼóó ahayóí haa haaskai, łaʼ nidaʼniłhod, łaʼ doo daʼooʼı̨́į da, łaʼ doo yádaałtiʼ da, łaʼ bąąh dah nidahazʼą́, áádóó náádaałaʼ ka nidaakaígíí ląʼí yił haa haaskaigo hayaajįʼ nidayiizhjaaʼ, áko náádabizhdiyiisá,
31 áko diné áłah nilínígíí éí diné doo yádaałtiʼii yádaałtiʼgo, áádóó bąąh dah nidahazʼáanii doo ádaatʼéhígóó, áádóó nidaʼniłhodii yáʼátʼéehgo nidaakaigo, índa doo daʼooʼíinii daʼooʼı̨́ áńdaalyaago, éí dayiiłtsą́ągo bikʼee tʼóó bił adahóóyóí; áko Ízrel biDiyin God yaa dahaznih.
Diné dı̨́įdi mííl yiltʼéego baʼíltsood (Mk. 8:1-10)
32 Ákohgo Jesus hódahoołʼaahii hágo bizhdííniidgo ábijiní, Díí diné yílʼáhígíí baa aʼááh nisin, háálá tʼáá shaa áłah nilı̨́įgo kʼad tááʼ yiską́, áko tʼáadoo dayóyą́ʼí da, nidi tʼáá dichin danilı̨́įgo doo tʼáá kʼad bééʼayéłniiʼ da, háálá dabighan yiʼoh dahidínóołnah.
33 Áko hódahoołʼaahii ádahałní, Díí honoojíigi háádę́ęʼshąʼ bááh łaʼ shódeidiiltʼeełgo díí diné áłah nilínígíí daʼdooyı̨́įłgo hwiih dadooleeł?
34 Nítʼééʼ Jesus áhodííniid, Łeesʼáánshąʼ díkwíí nidaahjaah? Áko ádaaní, Tsostsʼid lą́ą, áádóó łóóʼ ádaałtsʼíísígíí ałdóʼ tʼáá díkwíí yeeʼ.
35 Áko diné yílʼáhígíí, Niʼgóó dinohbįįh, bizhdííniid,
36 áko łeesʼáán tsostsʼid índa łóóʼ nízhdiinilgo, Diyin God bichʼįʼ sozdilzingo baa ahéésniizı̨́ı̨́ʼ, áádóó nijiitíihgo hódahoołʼaahii bitaa jiniih índa éí diné yílʼáhígíí yitaa deizniiʼ.
37 Áko tʼáá ałtso daʼííyą́ąʼgo hwiih daazlı̨́ı̨́ʼ, áádóó biʼoh daʼoodą́ʼígíí náádadziisdláaʼgo tsʼiizis tsostsʼid hadazdeesbįįd.
38 Áko asdzání áádóó áłchíní tʼáadoo wóltaʼí dinéhígíí tʼáá bízhánígo dı̨́įdi mííl daʼííyą́ą́ʼ lá.
39 Áko, Nídayínóhkááh, bizhdííniidgo tsinaaʼeeł biih jííyá, áádóó Mágdala nahósʼaʼjįʼ tséʼnaa nidaʼdzisʼéél.
