Matthew 16:1-28
16 Nítʼééʼ Férisii índa Sádjusii danilíinii neheeskaigo hákadaʼiiłhilgo, Yáʼąąshdę́ę́ʼ nibee adziilii bee bééhózinii łaʼ nihił ííshją́ą́ ánílééh, dahodííniid.
2 Nidi Jesus hachʼįʼ hanáádzíiʼgo ání, Eʼeʼáahgo, Yáʼáhootʼéeh doo lá, háálá nihoochiiʼ, dadohní.
3 Abínígo, Díí jı̨́ doo yáʼáhootʼéeh da doo lá, háálá shábítłʼájiichiiʼ áádóó kʼos diilkǫʼ, dadohní. [Nihí tʼóó ádahodołʼíinii,] wódahgo áhootʼéii binahjįʼ áhootʼée dooleełgi nihił béédahózin, nidi dahwéelzhíishii bee béédahózinii, daʼ éísh tsʼídá doo bikʼidaʼdoohtįįh da?
4 Doo yáʼáshxǫ́ǫ́góó índa adilyé yee ahoolchíiłii bee ééhózinii hadeintá, nidi bee ééhózinii doo łaʼ bá ádoolníił da, tʼáá hazhóʼó Jónah bee ééhoozinii tʼéiyá, bizhdííniidgo bitsʼą́ą́ʼ dashdiiyá.
Férisii áádóó Sádjusii danilíinii bidííkʼǫsh bee aniilyółí (Mk. 8:14-21)
5 Áko hódahoołʼaahii wónaaníjįʼ haʼnaa bił haʼazʼéél, nítʼééʼ łeesʼáán łaʼ dayíjáah doo yę́ę yaa dayooznah lá.
6 Áko Jesus áhodííniid, Férisii índa Sádjusii danilíinii bidííkʼǫsh bee taosʼniiʼ niilyółí bitsʼąą ádaa ádahołyą́.
7 Áko éí yaa nídaatʼı̨́įgo ádaʼahidiʼní, Łeesʼáán tʼáágééd niikai, éí biniinaa ánihidííniid.
8 Áko Jesus éí yaa ákoniizı̨́įʼgo áhodííniid, Tʼįįhdígo daʼiinohdláanii, haʼátʼíishąʼ biniyé łeesʼáán nihee ádaadinígíí baa nídaahtʼı̨́?
9 Daʼ tʼah doósh bikʼidaʼdohtįįh da? Daʼ łeesʼáán ashdlaʼgo diné ashdladi mííl yílʼáago bá nihétiʼígíí, áádóó chʼínííłnaʼígíí tsʼiizis díkwíí hadadoołbįįdígíísh doo béédaałniih da?
10 Índa dı̨́įdi mííl jílʼáago łeesʼáán tsostsʼid há nihétiʼígíí, áádóó chʼínííłnaʼígíí tsʼiizis díkwíí hadadoołbįįdígíísh doo béédaałniih da?
11 Haʼátʼéegoshąʼ łeesʼáán doo bee nihichʼįʼ haasdzíiʼ daígíí tʼáadoo bikʼidaʼdootą́ą da? Nidi Férisii áádóó Sádjusii danilíinii bidííkʼǫsh bee taosʼniiʼ niilyółí bitsʼąą ádaa ádahołyą́.
12 Áko índa dííkʼǫsh bee taosʼniiʼ niilyółí bitsʼąą ádaa ádahołyą́ doo hałníígóó, nidi Férisii áádóó Sádjusii danilíinii binaʼnitin bitsʼąą ádaa ádahołyą́ hałníigo bikʼidazhʼdiitą́.
Peter éí, Christ Diyin God biYeʼ nílı̨́, yidííniid (Mk. 8:27-30; Lk. 9:18-21)
13 Ákohgo Jesus hódahoołʼaahii bił Sesaríya Fílipai kéyahdi jíkaigo, hódahoołʼaahii kóbijiníigo nabízhdééłkid, Diné ádashiłníigoshąʼ, Diné Silı̨́įʼii háí átʼı̨́, daaní?
14 Áko ádadííniid, Łaʼ éí John Tó Yee Ası̨́įhii yę́ę átʼı̨́, daniłní, łaʼ éí Iiláíjah, náánáłaʼ éí Jeremáíyah, éí náádoodago Diyin God yá dahalneʼii yę́ę łaʼ átʼı̨́, daniłní.
15 Áko ábizhdííniid, Nidi nihíshąʼ éí háí ájítʼı̨́ dashidohní?
16 Nítʼééʼ Sáíman Peter haadzíiʼgo, Diyin God hináanii biYeʼ Christ nílı̨́, hodííniid.
17 Áko Jesus ánááhodooʼniid, Sáíman, Jónah biyeʼ nílíinii, nízháneeʼ! Háálá bitsʼíís índa bidił hólóonii doo nił ííshją́ą́ áyiilaa da, nidi shiTaaʼ yáʼąąshdi hólóonii nił ííshją́ą́ áyiilaa.
18 Áádóó shí ándishní, Peter* ánítʼı̨́, áko díí tséʼéłkáʼígíí bikááʼdóó dashoodláanii tʼáá łaʼ bizhiʼee kin álnéhígi átʼéego deeshtłʼı̨́ı̨́ł, áko hoolʼáágóó tiʼhooʼnííh bibee adziilii doo bikʼeh didoodleeł da.
19 Yáʼąąshii bee bóhólníihgo bił hazʼą́ągi bee ąą ńdítı̨́hí naa deeshnił, áko haʼátʼíhída nahasdzáán bikáaʼgi doo bee aʼdííníʼánígíí, tʼáá éí yáʼąąshdi doo bee aʼdeetʼą́ą da doo, índa haʼátʼíida nahasdzáán bikáaʼgi bee aʼdííníʼánígíí, tʼáá éí yáʼąąshdi bee aʼdeetʼą́ą dooleeł.
20 Ákohgo hódahoołʼaahii hó Jesus éí Christ jílínígíí diné łaʼda tsʼídá doo bee bił dahozhdoolnihgóó bee bichʼįʼ hadzoodzííʼ.
Jesus bidiʼyoolyéłígíí yaa halneʼ (Mk. 8:31—9:1; Lk. 9:22-27)
21 Áádóó bikʼijįʼ Jesus éí Jerúsalemjįʼ jideeyáago diné yá aląąjįʼ naazíinii áádóó aláahgo náádaʼiiłniihii índa bee hazʼáanii yíndaʼniłtinii bikʼee ląʼígóó tiʼhwiizhdoonih, áádóó hodiʼyoolyééł, índa tágí jı̨́ aleeh góneʼ, nááhodiʼdoodláłígíí éí hódahoołʼaahii bee bił ahozhniilneʼ.
22 Nítʼééʼ Peter atsʼáhonílóozgo hodeeztehgo áháłní, Bóhólníihii, Diyin God naa joobaʼgo doo ákóndiʼdoolníił da.
23 Nidi Peter bitsʼą́ąjįʼ nídzízyizgo ábizhdíiniid, Séítan nílíinii, shidinínáágóó aninááh! Shiníłtłʼaii nílı̨́, háálá doo Diyin God kʼehgo nitsíníkees da, nidi diné kʼehgo tʼéí nitsíníkees.
24 Áko Jesus éí hódahoołʼaahii ábizhdííniid, Diné tʼáá háiida shikééʼ dashdiigháhígíí éí ádeizhdiyooʼnah, áko hatsin ałnáoszid nízhdidootı̨́ı̨́ł áádóó shikééʼ joogáał doo.
25 Háálá tʼáá háiida jiinánígíí bąąh hą́ą́snízinígíí éí yóóʼazhdootłish, nidi tʼáá háiida shí shiniinaa jiinánígíí ninázhdiníʼą́ągo, éí jiinánígíí ádá shóizhdoołtʼeeł.
26 Háálá diné łaʼda nahasdzáán tʼáá siʼą́ą́ nítʼééʼ hóóʼ dooleeł biniyé tʼáá ákójínéehgo hwiiʼ sizíinii yóóʼazhdííʼą́ągo, haa néelą́ą́ʼ há bínéidoodił? Éí doodaiiʼ, diné łaʼda tʼáá hó hwiiʼ sizíinii haʼátʼíí bił aheełtʼé shı̨́įshąʼ bił ałnázhdoolééł?
27 Diné Silı̨́įʼii biTaaʼ bee bitsʼádiʼnílíidii yee, bidiyingo nidaalʼaʼí yił dookah, áko índa diné tʼááłáʼí jinítínígo ádajíítʼįįdii bikʼehgo haa dadiʼyoolyééł.
28 Tʼáá aaníígóó ánihidishní, Kǫ́ǫ́ naazínígíí łaʼ éí Diné Silı̨́įʼii bee bóhólníihgo bił hazʼáanii yił yígháhígíí tʼáadoo dayiiłtséhí aniné tsʼídá doo deidoolįh da.
Footnotes
^ Peter jiníigo éí tsé jiníigo óolyé.
