Matthew 18:1-35
18 Íídą́ą́ʼ Jesus bídahoołʼaahii baa yíkaigo ádabidííniid, Háishąʼ yáʼąąshii bee bóhólníihgo bił hazʼáanii biyiʼdi aláahdi ayóó átʼéii nilı̨́?
2 Nítʼééʼ áłchíní yázhí łaʼ hágo bizhdííniidgo, biníiʼgi bidziisįʼ,
3 áko ájíní, Tʼáá aaníígóó ánihidishní, Doo łahgo átʼéego dahinohnáágóó índa doo áłchínígi átʼéego ídaʼdoołyaagóó, yáʼąąshii bee bóhólníihgo bił hazʼáanii tsʼídá doo biih dadoohkah da.
4 Éí bąą tʼáá háiida díí áłchíní yázhígi átʼéego aʼohgo ádaa nitsídzíkeesígíí, éí yáʼąąshii bee bóhólníihgo bił hazʼáanii biyiʼdi aláahgo ayóó átʼéii jílı̨́.
5 Tʼáá háiida áłchíní yázhí kótʼéhígíí łaʼ shízhiʼ bee bichʼįʼ kʼéznídzinígíí, éí shí shichʼįʼ kʼéznídzin.
Bąąhági átʼı̨́ ájiilaaígíí (Mk. 9:42-48; Lk. 17:1,2)
6 Tʼáá háiida díí áłchínígi átʼéego aʼohgo ádaa nitsídaakeesgo dashoodlánígíí łaʼda bąąhági átʼı̨́ ájiilaaígíí, tʼáá hó tsé daashjééʼ nitsaii hazéédéetʼą́ągo, tónteel biiʼ táłtłʼááh hoʼdoolʼééljí há yáʼátʼéeh doo nítʼééʼ.
7 Nihokááʼ dineʼé biniinaa bąąhági áhodooníiłgo naʼíhontaah nihwiileehii doo bá hojoobaʼ ájíníi da! Naʼíhontaah tsʼídá tʼáádóo nídí áánííł, nidi hatsʼą́ą́dóó áhooníiłii atihíláaneʼgo há hazʼą́!
8 Áko nílaʼ éí doodaiiʼ nikeeʼ bee bąąhági ánítʼı̨́ ánóhsingo, éí kʼínígéeshgo yóóʼahíłhan,* nitsʼíís łahgo ádin nidi, éí doodaiiʼ naʼníłhod nidi iiná biih yíníyáájígo doo ná yáʼátʼéeh da, nidi nílaʼ tʼáá ałchʼijígo áádóó nikeeʼ tʼáá ałchʼijígo hoolʼáágóó hodookʼą́ąłjįʼ andiʼyoolghą́ą́łjí agháago doo ná yáʼátʼéeh da.
9 Áádóó ninááʼ éí bąąhági ánítʼı̨́ ánóhsingo, éí haniʼaahgo yóóʼahíłhan; ninááʼ tʼááłáʼí nidi iiná biih yíníyáájígo doo ná yáʼátʼéeh da, nidi ninááʼ tʼáá ałchʼijígo hoolʼáágóó kǫʼ biiʼ tiʼhooʼnííh bił hazʼą́ąjįʼ andiʼyoolghą́ą́łjí agháago doo ná yáʼátʼéeh da.
Dibé yóóʼííyáii binahjįʼ haneʼ bee akʼidiʼdootı̨́įłii (Lk. 15:3-7)
10 Díí áłchínígi átʼéego aʼohgo ádaatʼéii łaʼ dajiinohłáa dooleełgi bitsʼąą ádaa ádahołyą́, háálá ánihidishní, Éí diyingo nidaalʼaʼí baa ádahalyáanii* yáʼąąshdi dahólǫ́, éí tʼáá áłahjįʼ shiTaaʼ yáʼąąshdi hólóonii yił daʼahinílʼı̨́.
11 [Háálá Diné Silı̨́įʼii yóóʼadahaaskaígíí yisdéidiyoonił yiniyé níyá.]
12 Haash yitʼéego baa nitsídaahkees? Diné łaʼ dibé neeznádiin bilı̨́ı̨́ʼ, nítʼééʼ łaʼ yóóʼííyáago, daʼ doósh náhástʼédiindóó baʼaan náhástʼéígíí dah daaskʼidjįʼ yiʼdoołnihgo yóóʼííyáhígíí haidínóotaał da?
13 Tʼáá aaníígóó ánihidishní, Nínéidiiłtı̨́įgo éí náhástʼédiindóó baʼaan náhástʼéígíí tʼáadoo yóóʼadahaaskaígíí biláahdi átʼéego yóóʼííyáhígíí nínéidiiłtı̨́įgo yaa bił hózhǫ́ǫ doo.
14 Tʼáá ákótʼéego nihiTaaʼ yáʼąąshdi hólóonii díí áłchínígi átʼéego aʼohgo ádaatʼéii doo łaʼ ádoodįįł da nízin.
Akʼis achʼįʼ bąąhági ádzaii
15 Áádóó nikʼis nichʼįʼ bąąhági ádzaago, baa díínáałgo, yee nichʼįʼ ádąąh dah hastʼánígíí tʼáá sáhí bił chʼídííʼááł. Áko nidiiztsʼą́ą́ʼ ládą́ą́ʼ nikʼis kʼé nándooʼniid doo.
16 Nidi doo níistsʼą́ą́ʼgóó diné tʼááłáʼígo, doodaiiʼ naakigo ákǫ́ǫ́ bił dííkah, áko ooʼíinii naakida, táaʼda hadahadziihígíí binahjįʼ saad tʼááłáʼí níʼánígo há hashtʼéédeidoodlííł.
17 Áádóó éí doo nááyiyíistsʼą́ą́ʼgóó daʼoodlání áłah nádleehígíí bił chʼínáádíítʼááł, áko áłah nádleehígíí ałdóʼ doo nááyiyíistsʼą́ą́ʼgóó, bíniʼdii doo Jew dineʼé danilíinii łaʼ índa tax nahalyéhígíí yiniyé naazdáii łaʼ átʼı̨́įgo bee baa nitsíníkees doo.
Beʼestłʼǫ́ǫgo áádóó kʼééʼootʼahgo
18 Tʼáá aaníí ánihidishní, Haʼátʼíida nahasdzáán bikáaʼgi bee aʼdiʼnooʼánígíí, tʼáá éí yáʼąąshdi bee aʼdeetʼą́ą doo, áádóó haʼátʼíida nahasdzáán bikáaʼgi doo bee aʼdiʼnooʼánígíí, tʼáá éí yáʼąąshdi ałdóʼ doo bee aʼdeetʼą́ą da dooleeł.
19 Áádóó ánáánihidishʼní, Nahasdzáán bikáaʼgi nihitahgi nidinołtʼéego haʼátʼíida bee ahaʼdiʼnoohtʼą́ągo yínóhkeedígíí, shiTaaʼ yáʼąąshdi hólóonii nihá yiʼdoolííł.
20 Háálá tʼáá azlı̨́įʼgi naaki éí doodaiiʼ táaʼda shízhiʼ yee ahíikaigo, ákweʼé biníiʼgi honishłǫ́.
Naalʼaʼí doo joobaʼii baa haneʼ bee akʼidiʼdootı̨́įłii
21 Ákohgo Peter hachʼįʼ dah diiyáago áháłní, Bóhólníihii, shikʼis shichʼįʼ bąąhági ánátʼįįhgoshąʼ díkwíidi bá yóóʼanídideeshʼáałgo doo bikʼijįʼ séłʼą́ą da doo? Tʼáá daatsʼí tsostsʼidídi?
22 Áko Jesus áháłní, Tʼáá tsostsʼidídi éí doo nidishníi da, nidi tsostsʼidiin tsostsʼidi ahą́ą́h nániiláago.
23 Éí bąą yáʼąąshii bee bóhólníihgo bił hazʼáanii díí bił ahąąh naaʼnilgo baa nitsáhákees: éí aláahgo naatʼáanii léiʼ bá nidaalʼaʼí yąąh hadeisʼáago éí bá nináʼdoolyééł biniyé bá yídéeshtah niizı̨́ı̨́ʼ.
24 Áko yá yiʼííníiłtaʼgo neeznáadi mííl tálent* bąąh hááʼáhígíí bichʼįʼ niidlóóz,
25 nítʼééʼ doo nináʼódlééł átʼéégóó biniinaa binanitʼaʼí kótʼéego bá haadzííʼ, Hweʼasdzą́ą́ áádóó haʼáłchíní índa hwee hólónígíí tʼáá ałtso tʼáá bił nahodiʼyoonih, áko éí bee nináʼdoolyééł.
26 Nítʼééʼ naalʼaʼí nitsidinígoʼgo binanitʼaʼí náyookąąhgo ííłní, Shinanitʼaʼí, haʼíínílní, tʼáadoo tsı̨́ı̨́ł shíłʼíní, tʼáá ná nináʼdeeshdléełgo átʼé.
27 Áko naalʼaʼí éí binanitʼaʼí bikʼédí silı̨́įʼgo bąąh hayííłʼáhígíí tʼóó yikʼi adeezogo béidííchid.
28 Nidi tʼáá éí naalʼaʼí chʼíníyáago yił nidaalʼaʼígíí łaʼ neeznádiin denériyas* yąąh hayííłʼáhígíí yikʼíníyá, áko éí yisiłgo kóníigo yizákʼíidiiníihgo yaa nídiidzá, Nąąh hááłʼáhígíí shá nináʼnídlé, yiłní.
29 Áko éí nitsidinígoʼgo nábooskango ábíłní, Haʼíínílní, tʼáadoo tsı̨́ı̨́ł shíłʼíní, tʼáá ná nináʼdeeshdléełgo átʼé.
30 Nidi tʼáadoo íiniizı̨́įʼ da. Hąąh hááʼáhígíí nináʼjídláajįʼ tʼóó yah ahóółtʼeʼ.
31 Áko yił nidaalʼaʼí áhóótʼįįdígíí dayiiłtsą́ągo tʼáá íiyisí yikʼee bíniʼ deiʼaʼ, áko binanitʼaʼí yaa yíkaigo tʼáá átʼé yee yił dahoolneʼ.
32 Nítʼééʼ hananitʼaʼí hágo nááhodooʼniidgo áháłní, Naalʼaʼí doo yáʼáníshóonii, ni nąąh hááʼáhígíí baa náshiisíníkango tʼóó ná bikʼiʼadízoh;
33 daʼ doósh naa jiisébaʼ yę́ęgi átʼéego ni ałdóʼ bił nidanilʼaʼígíí baa jiidííbaał nítʼééʼ?
34 Áko binanitʼaʼí báhóóchįįdgo hąąh hááʼáhígíí ałtso nináʼjídláajįʼ yah adaʼiiníiłii yaa hodíníʼą́.
35 Tʼáá éí bikʼehgo tʼááłáʼí nootínígo nihikʼis nihichʼįʼ bąąhági ádaatʼı̨́įgo nihijéí tłʼááhdę́ę́ʼ doo tʼáá aaníí bá yóóʼanídahidohʼaahgóó, shiTaaʼ yáʼąąshdi hólóonii ałdóʼ tʼáá ákónihiłʼı̨́į doo.
Footnotes
^ Díí tsʼídá tʼáadoo niʼiyísíhí, níigo ání.
^ Diyingo nidaalʼaʼí baa ádahalyáanii daaníigo diné tʼááłáʼí danítínígo bidiyingo nidaalʼaʼí dahólǫ́, deinízin nítʼééʼ.
^ Béeso tálent wolyéhígíí tʼááłáhídi mííl béeso daatsʼí bíighahgo óolyé.
^ Denériyas łaʼa jı̨́įjįʼ nidaalnishgo nídayííłbįįh nítʼééʼ.
