Matthew 2:1-23
2 Hérad aláahgo naatʼáanii nilı̨́įgo yoołkááł yę́ędą́ą́ʼ* Judíya kéyah biyiʼ Béthlehemgi Jesus yizhchı̨́, nítʼééʼ jóʼakon, haʼaʼaahdę́ę́ʼ Jerúsalemjįʼ hastóí dahóyáanii yíkaigo kódaaní,
2 Háadiyeeʼ Jew dineʼé Aláahgo biNanitʼaʼí yizhchı̨́? Jó, haʼaʼaahdi bisǫʼ deiiltsą́, áko bichʼįʼ nidahodiidlaał biniyé niikai.
3 Hérad aláahgo naatʼáanii nilíinii díidí yidiiztsʼą́ąʼgo niseeltłah, áádóó Jerúsalemgi kéédahatʼíinii ałdóʼ tʼáá ałtso ákódaadzaa,
4 áko aláahgo náádaʼiiłniihii índa bee hazʼáanii yíndaʼniłtinii tʼáá ałtso áłah áyiilaago háadi Christ doochíłígíí yínaʼídééłkid.
5 Nítʼééʼ ádahodííniid, Judíya kéyah hoolyéii biyiʼ Béthlehemgi lą́ą, háálá kótʼéego Diyin God yá halneʼii yee akʼeʼashchı̨́:
6 Júdah bikéyahgi Béthlehem nílíinii,Júdahgi naatʼáanii danilíinii bitahdóó doo akéédę́ę́ʼ ánítʼée da,háálá nitsʼą́ą́dóó naatʼáaniishidineʼé Ízrel yooʼish dooleełii chʼídoogááł.
7 Nítʼééʼ Hérad éí hastóí dahóyáanii yíkaígíí tʼáá nantʼinee hágo yidííniidgo, tsʼídá haaʼí hoolzhishgo sǫʼ dajiiłtsánígíí hatsʼą́ą́dóó bił bééhoozin.
8 Áko Béthlehemgóó hoʼníłniiʼgo áhodííniid, Nihílááh, tsʼídá haleebee awééʼ hadanohtá, áko bikʼínohkaigo haneʼ shaa nídadoohʼááł, áko shí ałdóʼ ákǫ́ǫ́ deesháałgo bichʼįʼ nahodeeshłaał.
9 Aláahgo naatʼáanii áhodííniidígíí dazdiiztsʼą́ąʼgo dah náázhdiikai, nítʼééʼ jóʼakon, haʼaʼaahdi sǫʼ dajiiłtsánígíí halą́ąjįʼ nihináánádzáago ashkii áłtsʼíísí sitínígíí bikáaʼgi niiltłah.
10 Sǫʼ dajiiłtsą́ągo tʼáá íiyisí bąą hoł dahóózhǫǫd,
11 áko kin góneʼ yah ajookai nítʼééʼ ashkii áłtsʼíísígíí bimá Mary tʼáá bił dajiiłtsą́, áko Jesus bichʼįʼ nitsidazdeezgoʼgo bichʼįʼ nidahodzisá, índa hanaalyeʼé daʼílíinii ąą ádajiilaago, óola áádóó tsin bijeeh łikání halchinii fránkinsens índa mir wolyéii baa dajiiznil.
12 Áádóó naʼiigeełgo Hérad baa nínáánóhkááh lágo hoʼdooʼniidgo, nákʼeeʼąągo hakéyahgóó aníjookai.
Ííjipgóó chodaʼdzoosʼįįd
13 Áko dah nízhdiikaigo, jóʼakon, Jóseph nayiiyeełgo Bóhólníihii bidiyingo naalʼaʼí bichʼįʼ yitʼíní íʼdiilyaago ábidííniid, Nídiidááh, áádóó ashkii áłtsʼíísígíí bimá bił tsʼídá tsxı̨́įłgo Ííjipgóó dohkááh. Nił náhweeshʼneʼjįʼ áadi nihighan doo, háálá Hérad éí ashkii yidiyoołhééł biniyé háidínéeztą́ą́ʼ.
14 Áko nízhdiiʼnaʼgo ashkii áłtsʼíísígíí áádóó bimá ałdóʼ bił tʼáá tłʼééʼ Ííjipgóó ajookai.
15 Áadi kééhojitʼı̨́įgo Hérad yę́ę daaztsą́. Áko, ShiYeʼ Ííjipdę́ę́ʼ wóshdę́ę́ʼ chʼínínááh bidííniid, níigo Bóhólníihii éí Diyin God yá halneʼii biniitʼaa yee haadzíiʼii bohoolyaa.
Áłchíní yázhí naaztseed
16 Nítʼééʼ Hérad éí hastóí dahóyáanii bindaʼazloʼgo nákʼeeʼąągo anáákaígíí bił bééhoozingo tʼáá íiyisí yikʼee ádá hoolchįįd. Áko Béthlehemgi índa binaagóó ashiiké naaki béédááhaidóó yaagoígíí yichʼįʼ iʼiisʼaʼgo ałtso nidabiʼdiztseed, éí hastóí dahóyáanii sǫʼ yaa chʼídahazʼánígíí bikʼehgo ákóhóótʼįįd.
17 Éí Diyin God yá halneʼii Jeremáíyah kóníigo yee haadzííʼ yę́ę bohoolyaa:
18 Réímahgi iinééʼ diistsʼą́ą́ʼ,yínííł yee chanahałeʼgo áádóó yichago índa ayóó átʼéego atíńdindleeh,Réíchel baʼáłchíní náás ahoolchíiłii yaa yicha,haʼíídóolniiłígíí doo yinízin da,háálá áłchíní yę́ę ábiʼdisdįįd.
Ííjipdę́ę́ʼ náʼíldeeʼ
19 Nidi Hérad daaztsą́ą́dóó bikʼijįʼ, jóʼakon, Ííjipgi Jóseph nayiiyeełgo Bóhólníhii bidiyingo naalʼaʼí bichʼįʼ yitʼíní íʼdiilyaago
20 ábíłní, Nídiidááh, ashkii áádóó bimá ałdóʼ bił Ízrel bikéyahgóó nihéénóhkááh, háálá ashkii yidaʼniiłhı̨́ yę́ę daneezná.
21 Áko nízhdiiʼnaʼgo tʼáá áko ashkii índa bimá ałdóʼ bił dashdiikaigo Ízrel bikéyahgóó níjíkai.
22 Nítʼééʼ Judíyagi Arkiléíyas éí bizhéʼé Hérad yę́ę bitsáskʼehgi naatʼáanii nilı̨́įgo jííniiʼgo biniinaa ákǫ́ǫ́ nízhdooʼnéłígíí béédzísdzííd, áko baa nináájiisgeelgo honááʼílniiʼgo Gálilii kéyahgóó jiníná.
23 Diyin God yá dahalneʼii, Názariin deiłníi dooleeł, daaní yę́ę bohodoolnííł biniyé Názareth kin haalʼáagi jinínáago ákwii kééhojitʼı̨́.
Footnotes
^ 37 B.C.dóó 4 B.C.jįʼ Hérad Ayóóʼátʼéii hodiʼníinii éí tʼáá átʼé Ízrel dineʼé binanitʼaʼí jílı̨́ı̨́ nítʼééʼ.
