Matthew 20:1-34
20 Jó, yáʼąąshii bee bóhólníihgo bił hazʼáanii, éí díí nahalin: diné léiʼ kéyah bił hazʼą́ągi bee bóhólníihii bichʼil naʼatłʼoʼii bitahgóó bá nidadoolnishii łaʼ tʼah abínídą́ą́ʼ yíká dah diiyá.
2 Nidaalnishí éí denériyas* łaʼa jı̨́ yikʼé nidaalnish doogo yił ahadaʼdeestʼą́ą́dóó bikʼijįʼ, bichʼil naʼatłʼoʼii yitahjįʼ yiʼníłniiʼ.
3 Áádóó náhástʼéigi daatsʼí oolkiłgo chʼínáánádzá, nítʼééʼ nidaʼiiniih bá hazʼą́ągi náánáłaʼ tʼáadoo yaa nidaakaígóó tʼóó nidaazįʼgo nááyiyiiłtsą́,
4 áko áyidííniid, Nihí ałdóʼ nihílááh, shichʼil naʼatłʼoʼii bitahgóó dadohkááh, áko tʼáá néhébįįhígi átʼéego tsʼídá tʼáá ákwii átʼéego nihichʼįʼ nidiʼyeeshłééł. Áko ákǫ́ǫ́ dah diikai.
5 Áádóó ałníʼníʼą́ągo daatsʼí áádóó bikʼijįʼ táadi daatsʼí aleehgo chʼínáánádzáago tʼáá ákónáánádzaa.
6 Áádóó ashdlaʼígi daatsʼí oolkiłgo chʼínáánádzá, nítʼééʼ náánáłaʼ tʼóó nináádaazįʼgo yikʼínáánádzá, áko ííłní, Haʼátʼíishąʼ biniyé kweʼé shá bíighah tʼáadoo baa nidaahkaígóó tʼóó nidaahsįʼ?
7 Nítʼééʼ ádahałní, Jó, diné doo łaʼ shá nidaałnish nihiłníi da. Áko ánéidooʼniid, Nihí ałdóʼ nihílááh, shichʼil naʼatłʼoʼii bitahgóó dadohkááh [áko tʼáá néhébįįhígi átʼéego tsʼídá tʼáá ákwii átʼéego nihichʼįʼ nidiʼyoolyééł].
8 Áádóó iʼííʼą́ągo, chʼil naʼatłʼoʼii bee bóhólníihii éí bikʼehgo naʼanishígíí ííłní, Nidaalnishí hágo bidiní, áádóó bichʼįʼ nidiʼyíílééł, akéeʼdi dadeeshnishígíí éí áłtsé, índa áłtsé dadeeshnishígíí éí akéédę́ę́ʼ.
9 Áko ashdlaʼígi daatsʼí oolkiłgo naanish baa dadeestʼánígíí yíkaigo, tʼááłáʼí nítínígo denériyas tʼááłáʼí bichʼįʼ nidahaasyaʼ.
10 Áko áłtsé dadeeshnishígíí neheeskaigo, éí aláahgo nihichʼįʼ nidadoolyééł danízin, nítʼééʼ éí ałdóʼ tʼááłáʼí nítínígo denériyas tʼááłáʼí bichʼįʼ nináádahaasyaʼ.
11 Áko nídeidiinilgo kéyah bee bóhólníihii yichʼįʼ saad dahółǫ́ǫgo,
12 ádaaní, Díí akéeʼdi dadeeshnishgo tʼááłáhídi ahééʼílkidjįʼ nidaashnishígíí tʼáá nihikʼehgo bichʼįʼ nidaʼiisyaʼ, nidi nihí tʼéiyá shá bíighah hadoh béédaʼiiʼníihgo dayíníilníishgo iʼííʼą́.
13 Áko łaʼ yichʼįʼ haadzíiʼgo áyidííniid, Kwáʼásiní, daʼ doósh ákǫ́ǫ́ ániishłaa da? Shą́ą́ʼ, denériyas tʼááłáʼígo bee ahaʼdiʼniitʼą́ą niʼ.
14 Éí bąą yisíníłbánígíí nídiiʼaahgo nílááh yínááł; díí akéeʼdiígíí tʼáá nigi átʼéego bichʼįʼ niʼdeeshłééłjí nisin.
15 Daʼ shinaalyeʼéésh doo tʼáá shí nisinígi ádeeshłíiłgo bee shá hazʼą́ą da? Daʼ shił hadleeʼígíísh biniinaa iiníłchʼı̨́ı̨́d?
16 Éí bąą daʼakéédę́ʼígíí éí daʼalą́ąjįʼ doo, índa daʼalą́ąjįʼígíí éí daʼakéédę́ęʼ doo. [Háálá ląʼí bíká ádahodooʼniid, nidi tʼáá díkwíí nídahaasdlááʼ.]
Jesus bidiʼyoolyéłígíí yaa nááhálneʼ (Mk. 10:32-34; Lk. 18:31-34)
17 Nítʼééʼ Jesus éí Jerúsalem góde joogáałgo, naakitsʼáadahgo hódahoołʼaahígíí bił atsʼádzískai, áko jookahgóó ábizhdííniid,
18 Jóʼakon, Jerúsalem góde deekai, áko Diné Silı̨́įʼii aláahgo náádaʼiiłniihii índa bee hazʼáanii yíndaʼniłtinii baa hodiʼdootʼááł, áádóó éí hodiʼyoolyéełjįʼ há nidahodooʼááł,
19 índa doo Jew dineʼé danilíinii yaa dahodidooʼááł, áko éí há nidahodoołtʼih áádóó nahódaʼdoołtsxis índa tsin ałnáoszid bikáaʼjįʼ hoł idaʼdoołkał, índa tágí jı̨́ aleeh góneʼ dadziztsą́ą́dę́ę́ʼ nááhodiʼdoodlááł.
James áádóó John adííkeed (Mk. 10:35-45)
20 Nítʼééʼ Zébedii biyeʼké bimá yił haa yíkaigo tʼáadoo leʼé yíídóokił biniyé Jesus yichʼįʼ nitsidinígoʼ.
21 Áko Jesus áhodííniid, Haʼátʼíishąʼ nínízin? Nítʼééʼ ábijiní, Díí shiyáázh nidiltʼéego bee nóhólníihgo bił hazʼáanii biyiʼdi, łaʼ ninishʼnáájí dah sidáa doogo índa łaʼ éí ninishtłʼají dah sidáa doogo bee bá handziih.
22 Nidi Jesus haadzíiʼgo ashiiké áyidííniid, Yínóhkeedígíí doo nihił bééhózingóó ádóhní. Deeshdlı̨́įłgo sheíkáanii daatsʼí doohdlı̨́įłgo bínoołʼą́? [Áádóó bee shidiʼdoolzįhii daatsʼí bee nihidiʼdoolzįhgo bínoołʼą́?] Áko, Bíniilʼą́ą́ lą́ą, hodííniid.
23 Áko ábijiní, Sheíkáanii lá tʼáá aaníí doohdlı̨́ı̨́ł ni, [áádóó bee shidiʼdoolzįhii lá bee nihidiʼdoolzįh ni,] nidi łaʼ shinishʼnáájí áádóó łaʼ shinishtłʼají dah soodáa dooleełígíí shí aʼdideeshʼáałgo doo bee shóhólníih da, nidi shiTaaʼ há hashtʼeyiilaaígíí éí yee aʼdidooʼááł.
24 Áko neeználtʼéhígíí éí deidiiztsʼą́ąʼgo, tʼáá łaʼ hááʼázhígíí yichʼįʼ doo bił dahóózhǫǫd da.
25 Nidi tʼáá ádzíłtso Jesus hágo hodííniidgo áháłní, Nihił béédahózingo doo Jew dineʼé danilíinii bindanitʼaʼí ayóogo ádídahólníihgo yindantʼáa łeh, áko bitahgóó tʼáá bí bidineʼé ayóó ádaatʼéii ídaʼniłkadgo bee bídahólnííh.
26 Nidi nihí nihitahgóó éí doo ákótʼée da dooleeł, nidi tʼáá háiida nihitahgóó ayóó átʼéii deeshłeeł jinízinígíí éí nihá nijilʼaʼ doo,
27 áádóó tʼáá háiida nihitahgóó shí alą́ąjįʼ dooleeł jinízinígíí éí nihinaalteʼ jílı̨́į doo:
28 tʼáá Diné Silı̨́įʼii doo bá naʼalʼaʼ da, nidi á naalʼaʼ doo, índa beʼiinaʼ ninéidiníʼą́ągo daaztsánígíí yee ląʼí ninéidiyoołnih yiniyé níyá.
Jesus éí diné doo ooʼíinii nidiltʼéego ooʼı̨́ áyiilaa (Mk. 10:46-52; Lk. 18:35-43)
29 Áko Jérikodóó chʼíjíkaigo, diné ayóó átʼé yílʼáhígíí hakééʼ dah nídiizą́.
30 Áádóó jóʼakon, diné naaki doo ooʼı̨́ı̨́góó atiin bąąhgi sikéé lá, áko aadę́ę́ʼ Jesus yigááł haʼníigo yidiiztsʼą́ąʼgo kóníigo hadoolghaazh, Bóhólníihii, David biYeʼ nílíinii, nihaa jiiníbaah!
31 Áko diné yílʼáhígíí, Tʼáadoo ádóhníní, dahałníigo hachʼadahashké, nidi tʼóó nówehda hanáázhdoolghaazhgo ájíní, Bóhólníihii, David biYeʼ nílíinii, nihaa jiiníbaah!
32 Áko Jesus tʼáá ákǫ́ǫ́ yiizįʼgo, hágo hodííniidgo áháłní, Haʼátʼíí nihá baa nideeshaał shíínóhʼní?
33 Áko ábijiní, Bóhólníihii, nihinááʼ bee iitʼı̨́įgo ánihílééh.
34 Áko Jesus haa aʼááh niizı̨́įʼgo hanááʼ yideelchid, áko tʼáá áko ajooʼı̨́ dzizlı̨́ı̨́ʼ, áádóó bikééʼ dashdiiʼáázh.
Footnotes
^ Denériyas łaʼa jı̨́įjįʼ nidaalnishgo nídayííłbįįh nítʼééʼ.
