Matthew 21:1-46
21 Nítʼééʼ Jerúsalem tʼáá áyídídę́ę́ʼ bichʼįʼ jookahgo Dził Álivz bíighahgi Béthfajii kin sinilígi jíkai, ákohgo hódahoołʼaahii nidiltʼéego ajííłʼaʼ,
2 kóbijiníigo, Nihílááh, náwónaanídi nihidááhjí kin sinilíjįʼ dohʼaash, tʼáá áko ákwii télii łaʼ biyázhí bił dahaastłʼǫ́ǫgo bikʼídoohʼash; éí kʼeʼdoohʼałgo shaa nídoohʼish.
3 Áko tʼáá háiida haʼátʼíhída nihidííniidgo, Jó, Bóhólníihii choidoołʼįįł, didoohniił, áko tʼáá áko áádę́ę́ʼ nihił yiʼdoołnih.
4 Díí kóhóótʼįįdígíí Diyin God yá halneʼii kóníigo yee haadzíiʼii bohodoolnííł biniyé ádzaa:
5 Záíyan bichʼéʼé bił dahołneʼ,
Jóʼakon, Aláahgo niNanitʼaʼí nilíiniiaʼohgo íʼdólzingo télii,Jó, éí télii yázhí yikʼi dahsidáago nichʼįʼ bił yigááł.
6 Áko hódahoołʼaahii dah diiʼáazhgo Jesus tʼáá áhodííniidígi ádziidzaa,
7 áko télii índa biyázhí bił názhʼníʼeezhgo habeeldléí bikáaʼjįʼ adadziiznil, áádóó Jesus éí télii yázhí yikʼi dah neezdá.
8 Áko diné ląʼí dabibeeldléí atiingóó há dayíłkaad, náánáłaʼ éí tsin biʼiil dayiizhgizhgo atiingóó há dayíłjeeh.
9 Áko halą́ąjįʼ índa hakéédę́ę́ʼ nooyéłígíí dadilwoshgo ádaaní,
David biYeʼ nilíinii baa haʼniih doo!Bóhólníihii bízhiʼ bee biʼdójíigo yigáłígíí bikʼihojidlíi doo!Aghánáhóóʼáádę́ę́ʼ baa haʼniih doo!
10 Áko Jerúsalem góneʼ ajííyáago tʼáá átʼéé nítʼééʼ hahodíídláád, Díishąʼ háí átʼı̨́, haʼníigo.
11 Áko hoł nooyéłígíí ádadííniid, Díí Jesus, Diyin God yá halneʼii, Gáliliidi Názareth hoolyéédóó átʼı̨́.
Kin biiʼ sohodizin nidayiiłchxǫǫhii chʼíneelkaad (Mk. 11:15-19; Lk. 19:45-48; Jn. 2:13-22)
12 Nítʼééʼ Jesus éí Diyin God bikin biiʼ sohodizin bił hazʼą́ą́ góneʼ yah ajííyáago, ákóneʼ baa nidaʼiiniihígíí índa nidaʼiiłniihígíí* chʼízhniníłkaad, áádóó bikáaʼgi béeso ałgháádaʼaʼnilii* índa hasbídí baa nidahaniihii yikááʼ dah naazdáhígíí naaʼadziistłʼííd.
13 Áko ábijiní, Jó, bee akʼeʼashchı̨́, Shikin éí kin biiʼ sohodizin wolyée doo, nítʼééʼ nihí aghadaʼiiʼníiłii beʼaʼáán ádaahłaa lá.
14 Nítʼééʼ diné doo daʼooʼínígíí índa nidaʼniłhodígíí kin biiʼ sohodizin bił hazʼą́ągi haa haaskaigo, náádahizhdiyiisá.
15 Nidi aláahgo náádaʼiiłniihii índa bee hazʼáanii yíndaʼniłtinii éí ádahooníiłii ayóó ádaatʼéii baa nijiyáhígíí, áádóó kin biiʼ sohodizin bił hazʼą́ą́ góneʼ áłchíní, David biYeʼ nilíinii baa haʼniih doo! daaníigo dadilwoshgo dayiiłtsą́ągo doo bił dahóózhǫǫd da,
16 áko Jesus ádeidííniid, Díí ádaanínígíísh dintsʼaʼ? Áko Jesus áhodííniid, Aooʼ, daʼ kóháʼnínígíísh tʼah doo dayínółtaʼ da?
Áłchíní yázhí índa awééʼtʼahdii daʼałtʼoʼiiaa haʼniih tʼáá ákogi átʼéiiyee yádaałtiʼgo íinilaa.
17 Áko bitsʼą́ą́ʼ dashdiiyáago kin haalʼáádóó chʼízhníyá, áko Béthaniidi jiníyáago ákwii hwiiską́.
Fig sikaadii bineestʼąʼ doo bąąh nááhodoodleełgóó bá haʼoodzííʼ (Mk. 11:12-14,20-24)
18 Áádóó abínígo kin haalʼáágóó níjoodáałgo dichin dzizlı̨́ı̨́ʼ.
19 Áko fig léiʼ atiin bąąhgi sikaadgo jiiłtsą́, áko baazhníyáago tʼáadoo bąąh hólónígóó tʼáá hazhóʼó bitʼąąʼ tʼéiyá bąąh hólǫ́ǫgo jiiłtsą́. Áko ábizhdííniid, Kodóó hoolʼáágóó tsʼídá tʼááká nineestʼąʼ nąąh hóleʼ yíilaʼ! Tʼáá áko fig sikaadii niiłnaʼ.
20 Áko hódahoołʼaahii éí dayiiłtsą́ągo tʼóó bił adahayóigo ádaaní, Haa lá yitʼéego fig sikaadii tsxı̨́įłgo niiłnaʼ?
21 Áko Jesus hanáánáádzíiʼgo áhodííniid, Tʼáá aaníí ánihidishní, Tʼáadoo nihił naaki danilíní daʼiinohdlą́ągo, tʼáá díí fig sikaadii áshłaaígi átʼéii doo tʼéí baa nidaahkai da doo, nidi azhą́ díí dził, Dah niʼdootʼaahgo tónteel biyiʼ góneʼ andiʼyólghan, bidooniid nidi, ákódoonííł.
22 Áko daʼiinohdlą́ągo tʼáá haʼátʼíhída dayínóhkeedgo sodadołzingo, éí nihaa dahalyée doo.
Jesus háí bee óhólnííh beidiníʼánígíí bínabídéékid (Mk. 11:27-33; Lk. 20:1-8)
23 Nítʼééʼ kin biiʼ sohodizin bił hazʼání góneʼ yah ajííyáago, diné nazhnitingo aláahgo náádaʼiiłniihii índa diné yá aląąjįʼ naazíinii haa yíkaigo ádaaní, Haʼátʼíí bee óhólnííh shı̨́įshąʼ bikʼehgo díidí baa naniná, áádóó háishąʼ díí bee óhólnííh neidiníʼą́?
24 Áko Jesus hachʼįʼ hanáádzíiʼgo áhodííniid, Shí ałdóʼ łahgo nanihídídéeshkił, áko éí bee shił dahoołneʼ ládą́ą́ʼ, shí ałdóʼ bee óhólnííh bikʼehgo díí baa naasháhígíí bee nihił hodeeshnih.
25 John lá háádę́ę́ʼ bee óhólníihii bikʼehgo tó bee adzisı̨́ı̨́h nítʼééʼ? Yáʼąąshdę́ę́ʼ daatsʼí, éí doodaléiʼ diné bitsʼą́ą́dóó daatsʼí? Áko yaa nídaatʼı̨́įgo ádaaní, Yáʼąąshdę́ę́ʼ dadiiʼniidgo laʼ, ánihididooniił, Ákoshąʼ haa yitʼéego doo dahwiisoohdląąd da?
26 Doodaiiʼ, Diné bitsʼą́ą́dóó, dadiiʼniidgo laʼ, diné yílʼáhígíí béédeiildzid, háálá éí tʼáá ałtso John yę́ę Diyin God yá halneʼii nilı̨́ı̨́ nítʼééʼ dayóʼní.
27 Áko Jesus yichʼįʼ hadaasdzíiʼgo ádaaní, Doo nihił béédahózin da. Áko Jesus áhodííniid, Shí ałdóʼ bee óhólnííh bikʼehgo díidí baa naasháhígíí doo bee nihił hodeeshnih da.
Ayeʼ nilíinii nidiltʼéego binahjįʼ haneʼ bee akʼidiʼdootı̨́įłii
28 Nidi díí haash yitʼéego baa nitsídaahkees? Diné léiʼ biyeʼ naaki, áko alą́ąjįʼ naagháhígíí yaa níyáago áyidííniid, Shiyeʼ, nílááh díí jı̨́ shichʼil naʼatłʼoʼii bitahgi nidíílnish.
29 Nítʼééʼ biyeʼ ání, Doo ádeeshníił da, nidi áádóó bikʼijįʼ łahgo átʼéego yąąh tsíńdeezkéezgo ákǫ́ǫ́ dah diiyá.
30 Áádóó akéédę́ę́ʼ naagháhígíí yaa náánádzáago tʼáá ákótʼéego yichʼįʼ hanáánáádzííʼ, áko nítʼééʼ, Deeshááł, shizhéʼé, dííniid, nidi tʼáadoo ákǫ́ǫ́ deeyáa da.
31 Díí naakigoshąʼ háidíígíí bizhéʼé íinízinígíí yiʼiilaa? Áko ádaaní, Áłtséhígíí lą́ą. Jesus áháłní, Tʼáá aaníígóó ánihidishní, Tax nahalyéhígíí yiniyé naazdáii áádóó daʼałjiłnii éí Diyin God bee bóhólníihgo bił hazʼáanii tʼáá nihí átsé yiih hikááh.
32 Háálá John yę́ę tsʼídá tʼáá ákogi éʼétʼé bił nahaztʼiʼii yił nihaa níyáa nidi, tʼáadoo deisoohdląąd da, nidi tax nahalyéhígíí yiniyé naazdáii áádóó daʼałjiłnii daboosdląąd, áádóó azhą́ hadasidoołʼı̨́ı̨́ʼdóó bikʼijįʼ nidi, tʼáadoo łahgo átʼéego bąąh nitsíńdasookéezgo deisoohdląąd da.
Chʼil naʼatłʼoʼii áádóó yaa ádahalyáanii binahjįʼ haneʼ bee akʼidiʼdootı̨́įłii (Mk. 12:1-12; Lk. 20:9-19)
33 Haneʼ bee akʼidiʼdootı̨́įłii náánáłaʼ dadoohtsʼı̨́ı̨́h. Diné łaʼ kéyah bee bóhólníihii jílı̨́įgo, chʼil naʼatłʼoʼii kʼizhdííláago tsé binaa ahénátłʼingo ájiilaa, áádóó ákwii chʼil naʼatłʼoʼii yiljizh dooleełgi hahodziiznil, índa bikááʼdóó haʼalzídí hajíítłʼingo nízaadgóó yaaʼáago ájiilaa, áko chʼil naʼatłʼoʼii yaa ádahalyą́ą dooleełii baa dzisįįdgo náánáłaʼ kéyahgóó ajííyá.
34 Áko kʼadę́ę daʼnitʼą́ągo, há nidaalʼaʼí łaʼ daneestʼánígíí łaʼ há nídeidoojih biniyé chʼil naʼatłʼoʼii yaa ádahalyánígíí bichʼįʼ adziisʼaʼ.
35 Nítʼééʼ chʼil naʼatłʼoʼii yaa ádahalyánígíí há nidaalʼaʼí deisiłgo, łaʼ nídeineesxaal, łaʼ éí dayiisxı̨́, índa náánáłaʼ éí yił nidadzisneʼ.
36 Áko nááʼáłdóʼ nááná łaʼ há nidaalʼaʼí áłtséédą́ʼígíí tʼah bilááh ánéelą́ąʼgo ákǫ́ǫ́ anáádziisʼaʼ, áko éí ałdóʼ tʼáá ákónáádayiidlaa.
37 Áádóó éí bikʼijįʼ índa, Shiyeʼjígo bił danilı̨́į dooleeł, jiníigo bichʼįʼ hayeʼ ajííłʼaʼ.
38 Nidi chʼil naʼatłʼoʼii yaa ádahalyánígíí hayeʼ dayiiłtsą́ągo ádaʼahidooʼniid, Díí chʼil naʼatłʼoʼii bííʼ dooleełígíí átʼı̨́ı̨́ lá; sołtįʼ, dadiyiilyééł, áko bííʼ dooleeł yę́ę nihííʼ dadooleeł.
39 Áko dahasiłgo chʼil naʼatłʼoʼii bitahdóó chʼídahwiisxango dahwiisxı̨́.
40 Áko chʼil naʼatłʼoʼii bee hóhólníhígíí jiníyáago, chʼil naʼatłʼoʼii yaa ádahalyánígíí lá haazhdoolííł lá?
41 Áko diné ádahodííniid, Éí diné doo ádadiilkóhígíí bikʼeʼíyéeʼii yee neidoołtsił, áko chʼil naʼatłʼoʼii éí náánáłaʼ yaa ádahalyą́ą dooleełii yaa néidoosįįł, áko éí daʼnitʼą́ąjįʼ anáhwiilzhíishgo chʼil naʼatłʼoʼii bineestʼąʼ baa nídayiigéeh doo.
42 Nítʼééʼ Jesus áháłní, Daʼ kótʼéego Diyin God bizaad bee akʼedaʼashchínígíísh biyiʼ tʼah doo dayínółtaʼ da?
Kin ádeiłʼíní tsé doo deiniizı̨́ʼígíí,tʼáá éí tsé bee naanáʼástłʼinii silı̨́ı̨́ʼ;díidí Bóhólníihii áátʼįįdígíí átʼé,áko daníilʼı̨́įgo bikʼee tʼóó nihił adahayóí.
43 Éí bąą ánihidishní, Diyin God bee bóhólníihgo bił hazʼáanii nihighadidootʼááł, índa náánáłaʼ dineʼé éí bitsʼą́ą́dóó aneestʼąʼ nídahoodleeł doo biniyé baa didootʼááł.
44 [Áádóó tʼáá háiida díí tsé bikʼijįʼ ajíígoʼígíí nihizhdooltǫǫł, nidi tʼáá háiida hakʼijįʼ naaltsʼidígíí chʼíhodoołkʼááł.]
45 Áko aláahgo náádaʼiiłniihii índa Férisii danilíinii haneʼ bee akʼidiʼdootı̨́įłii bee hadziisdzíʼígíí deidiiztsʼą́ąʼgo, éí binahjįʼ bí baa níjítʼı̨́įgo bił béédahoozin.
46 Nidi hodiʼdooltsoł chʼééh daniizı̨́ı̨́ʼ, diné yílʼáhígíí yéédaaldzidgo biniinaa, háálá Diyin God yá halneʼii átʼı̨́ danízin.
Footnotes
^ Sohodizin bił hazʼą́ą́ góneʼ dibé hadaałtʼéii áádóó hasbídí nidahaniihígíí diné nízaadę́ę́ʼ nidaakaígíí yichʼįʼ nidayiiłniiʼ.
^ Ałʼąą kédaayahdę́ę́ʼ nidaakaigo biniinaa bibéeso łahgo átʼé, áko béeso ałdóʼ ałgháádaʼaʼnil.
