Matthew 25:1-46
25 Ákohgo yáʼąąshii bee bóhólníihgo bił hazʼáanii éí chʼikéí neeználtʼéego bee hoolʼiní dah deidiijaaʼgo iiyehii yidááhgóó eekaígíí nahalin.
2 Áko nítʼééʼ ashdlaltʼéego éí dahóyą́ą́ lá, ashdlaltʼéego éí doo ádahalyą́ą da lá.
3 Doo ádahalyánígíí bee hoolʼiní dah deidiijaaʼgo akʼah iih nídoodziłígíí tʼáágééd dah diikai,
4 nidi dahóyánígíí éí bee hoolʼiní dah deidiijaaʼ, índa akʼah iih nídoodziłígíí tózis yee dah deidiijaaʼ.
5 Nítʼééʼ iiyehii doo yíghááhgóó, tʼáá ádzíłtso bił dazniizı̨́įʼgo daʼjiiłhaazh.
6 Nidi tłʼéʼííłníiʼgo łaʼ hazhdoolghaazh yistsʼą́ą́ʼ, Aadę́ę́ʼ iiyehii yigááł! Nihílááh bidááh nohkááh.
7 Áko chʼikéí tʼáá ałtso nídiijéeʼgo bee hoolʼiní biih yítʼiʼígíí bílátahgi hashtʼeʼ niyídaʼazhgizh.
8 Nítʼééʼ doo ádahalyánígíí éí dahóyánígíí ádeidííniid, Akʼah łaʼ nihaa danohsííd, háálá nihibee hoolʼiní nihitsʼą́ą́ʼ dantséés.
9 Nidi dahóyánígíí hadaasdzíiʼgo ádaaní, Akʼah nihadaʼniidzíidgo doo bíighah da; doo hanii baa nidahaniihígíí bichʼįʼ dohkáahgo tʼáá nihí ádá nidahołniih da.
10 Áko nidazhdiʼyoołnihgóó ajookaigo, iiyehii níyá, áko hashtʼeʼ ádazhdólzinígíí iiyehii ídaʼíísįįd góneʼ iiyehii bił yah ajookaigo dáʼdeelkaal.
11 Áádóó bikʼijįʼ náánáłaʼ chʼikéí yę́ę ałdóʼ yíkaigo ádaaní, Bóhólníihii, Bóhólníihii, nihá ąą ánílééh.
12 Nidi haadzíiʼgo ání, Tʼáá aaníí ánihidishní, Doo nihéédahasin da.
13 Éí bąą hadaʼísídółʼı̨́ı̨́ʼ, háálá [Diné Silı̨́įʼii] yoołkááł áádóó oolkił góneʼ [doogáłígíí] doo nihił béédahózin da.
Béeso tálent wolyéhígíí binahjįʼ haneʼ bee akʼidiʼdootı̨́įłii (Lk. 19:11-27)
14 Yáʼąąshii bee bóhólníihgo bił hazʼáanii éí kótʼé: diné léiʼ náánáłaʼ kéyahgóó deeyáago bá nidaalʼaʼí hágo yidííniidgo, hanaalyeʼé há yaa ádahalyą́ą doo biniyé bitaazdeezʼą́,
15 nítʼééʼ łaʼ béeso tálent* wolyéhígíí ashdlaʼ bazhʼnínil, łaʼ éí tálent naaki áádóó náánáłaʼ tálent tʼááłáʼí, tʼáá yídaneelʼánígíí bikʼehgo badaʼdziiznilgo índa dashdiiyá.
16 Nítʼééʼ tálent ashdlaʼ baʼíʼnilígíí tʼáá áko naanish yee yaa nídiidzáago tálent ashdlaʼ bá bínániideeʼ.
17 Tʼáá ákótʼéego ałdóʼ tálent naaki baʼíʼnilígíí tálent naaki bá bínániideeʼ.
18 Nidi tálent tʼááłáʼí baʼítʼánígíí éí dah diiyáago hahwiizgeedgo, ákóyaa binanitʼaʼí bibéeso łeeh yiyííʼą́ągo néideesʼı̨́ı̨́ʼ.
19 Nítʼééʼ nízaad nihoolzhiizhgo éí nidaalʼaʼí binanitʼaʼí nádzá, áko bichʼįʼ ninádazhdoodlééł biniyé béeso hadaʼiisnilii bił dajííłtaʼ.
20 Áko tálent ashdlaʼ baʼíʼnilígíí yichʼįʼ niníyáago, tálent ashdlaʼ bá bínániideeʼígíí yiníjaaʼgo kóní, Shinanitʼaʼí, tálent ashdlaʼ shaʼíínínil niʼ; éí tálent ashdlaʼ shá bínániideeʼígíí kǫ́ǫ́ níjaaʼ.
21 Áko hananitʼaʼí áhodííniid, Yáʼátʼéhígi íinidzaa, yáʼátʼéehgo índa baʼahódlíigo naalʼaʼí nílíinii; tʼįįhdígo bee naʼahoosdliʼígíí yáʼátʼéehgo ninaanish silı̨́ı̨́ʼ, kʼad éí ląʼí bee nóhólníihgo ándeeshłííł; ninanitʼaʼí yaa bił hózhóonii bee náʼíldįįh doo.
22 Áádóó tálent naaki baʼíʼnilígíí ałdóʼ níyáago ádííniid, Shinanitʼaʼí, tálent naaki shaʼíínínil niʼ; éí tálent naaki shá bínániideeʼígíí kǫ́ǫ́ níjaaʼ.
23 Áko hananitʼaʼí áhodííniid, Yáʼátʼéhígi íinidzaa, yáʼátʼéehgo índa baʼahódlíigo naalʼaʼí nílíinii; tʼįįhdígo bee naʼahoosdliʼígíí yáʼátʼéehgo ninaanish silı̨́ı̨́ʼ, kʼad éí ląʼí bee nóhólníihgo ándeeshłííł; ninanitʼaʼí yaa bił hózhóonii bee náʼíldįįh doo.
24 Áádóó tálent tʼááłáʼí baʼítʼánígíí ałdóʼ níyáago ádííniid, Shinanitʼaʼí, nééhasingo diné hashkéii nílı̨́, háálá tʼáadoo kʼééʼdídléehgi náʼígish, áádóó tʼáadoo náʼoołchʼihgi hééł ánáʼiilʼįįh,
25 áko ninásdzidgo bąą dah diiyáago tálent tʼááłáʼí shaʼííníʼáanii łeeh yíʼą́ągo nídéłʼı̨́ı̨́ʼ. Jó, kóoní, nííʼ nítʼéeʼii nííʼ ánánídlééh.
26 Nidi hananitʼaʼí hachʼįʼ haadzíiʼgo áhodííniid, Bąąhági ánítʼéii índa bił hóyéeʼgo naalʼaʼí nílíinii! Tʼáadoo kʼééʼdíshdléehgi náʼáshgishgo, áádóó tʼáadoo náʼooshchʼihgi hééł ánáʼiishʼįįhgo nił bééhózin lá yaʼ?
27 Áko shibéeso éí béeso yaa ádahalyánígíí baa díínił nítʼééʼ, áko nánísdzáago shibéeso ínáóltąʼí bił shaa náʼnil dooleeł nítʼééʼ.
28 Áko tálent tʼááłáʼí baʼítʼánígíí bitsʼą́ą́ʼ nídoohʼaahgo tálent neeznáá neijaahígíí baa nohʼaah.
29 Háálá tʼááłáʼí jinítínígo haʼátʼíhída hwee hólónígíí biláahgo łaʼ haa náádoolyééł, áko ląʼí hwee hólǫ́ǫ dooleeł, nidi haʼátʼíhída hwee ádinígíí éí tʼáá hwee hólónígíí nidi haghadoolyééł.
30 Áádóó naalʼaʼí tʼáadoo yee chooʼínígíí tłʼóóʼdóó nówehjįʼ chahałheeł góneʼ ahołhan; áadi diné daachxa áádóó biwooʼ ahídeidiłkʼash doo.
Ałʼąą dineʼé baa náhódóotʼįįł
31 Nidi Diné Silı̨́įʼii bitsʼádiʼnílíidgo índa diyingo nidaalʼaʼí tʼáá ałtso yił yíkaigo, áadi índa bikááʼdóó nahatʼáii bitsʼádiʼnílíidii yikááʼdóó dah dínóodaał.
32 Áádóó ałʼąą dineʼé tʼáá ałtso baa áłah ádoolnííł, índa naʼniłkaadii bidibé éí tłʼízí yitsʼáyiiníłígi átʼéego, éí tʼááłáʼí nítínígo ałtsʼáidoonił,
33 áko dibé éí binishʼnáájígo niidoonił, tłʼízí éí binishtłʼajígo niidoonił.
34 Áko índa Aláahgo Naatʼáanii binishʼnáájígo yílʼáhígíí áyididooniił, ShiTaaʼ nihikʼijidlíii, hágo, aláahgo bee óhólníihgo bił hazʼáanii nahasdzáán niitʼą́ą́dę́ę́ʼ nihá hashtʼeelyaaígíí nihííʼ ádaahłééh,
35 háálá dichin nishłı̨́įgo shadaʼsoołtsood, dibááʼ nishłı̨́įgo tó shaa dasooką́, déʼéyóní nishłı̨́įgo shił yah adasoohkai,
36 shiʼééʼ ádingo hadashidoohłaa, daastsaahgo shaa nidasinootą́ą́ʼ, awáalyaa góneʼ sédáago shaa dasoohkai.
37 Ákohgo tʼáá ákogi ádaatʼéii kódaaníigo hachʼįʼ hadadoodzih, Bóhólníihii, hádą́ąʼshąʼ dichin nílı̨́įgo daniiltsą́ągo nadaʼsiiltsood, éí doodaiiʼ dibááʼ nílı̨́įgo tó naa dasiiką́?
38 Áádóó hádą́ąʼshąʼ déʼéyóní nílı̨́įgo daniiltsą́ągo, nił yah adasiikai, doodaiiʼ niʼééʼ ádingo hadandiilyaa?
39 Áádóó hádą́ąʼshąʼ dantsaahgo, éí doodago awáalyaa góneʼ sínídáago daniiltsą́ągo naa dasiikai?
40 Áádóó Aláahgo Naatʼáanii hachʼįʼ tʼą́ą́ʼ háádoodzihgo áhodidooniił, Tʼáá aaníí ánihidishní, Díí shikʼis łaʼ tsʼídá hojoobaʼ ádaatʼéii bá baa nidasoohkaígíí, éí shí shá baa nidasoohkai.
41 Áádóó binishtłʼajígo jílʼáhígíí áhodidooniił, Nihí atídanihidiʼdoolníiłgo nihá hadaʼiisdzíiʼii hoolʼáágóó hodookʼą́ą́ł, níłchʼi bidaʼiiníziinii binanitʼaʼí áádóó bá nidaalʼaʼí bá hashtʼehoolyaaígíí biyiʼjįʼ shitsʼánóhkááh,
42 háálá dichin nishłı̨́įgo tʼáadoo shadaʼsoołtsood da, dibááʼ nishłı̨́įgo tʼáadoo tó shaa dasooką́ą da,
43 déʼéyóní nishłı̨́įgo tʼáadoo shił yah adasoohkai da, shiʼééʼ ádingo tʼáadoo hadashidoohłaa da, daastsaahgo índa awáalyaa góneʼ sédáago tʼáadoo shaa nidasinootą́ąʼ da.
44 Ákohgo éí ałdóʼ kódaaníigo hachʼįʼ tʼą́ą́ʼ háádadoodzih, Bóhólníihii, hádą́ąʼshąʼ dichin nílı̨́įgo, doodaiiʼ dibááʼ nílı̨́įgo, doodaiiʼ déʼéyóní nílı̨́įgo, doodaiiʼ niʼééʼ ádingo, doodaiiʼ dantsaahgo, doodaiiʼ awáalyaa góneʼ sínídáago daniiltsą́ągo, tʼáadoo naa ádahosiilyąąd da?
45 Áádóó kóníigo hachʼįʼ hanáádoodzihgo áhodidooniił, Tʼáá aaníí ánihidishní, Díidí tsʼídá hojoobaʼ ádaatʼéii tʼáadoo bá baa nidasoohkaígíí, éí tʼáadoo shá baa nidasoohkai da.
46 Áko díidí hoolʼáágóó atéʼélʼı̨́ biyiʼjįʼ dashdidookah, nidi tʼáá ákogi ádaatʼéii éí iiná doo ninítʼiʼii yiyiʼjįʼ dah didookah.
Footnotes
^ Béeso tálent wolyéhígíí tʼááłáhídi mííl béeso bíighahgo óolyé.
