Matthew 26:1-75
26 Jesus díí saad ałtso yee niyáníłtiʼgo bídahoołʼaahii áyidííniid,
2 Nihił béédahózingo naakiiską́ągo atisʼadeesdzá bee bééhániihii baa hoolzhíísh, ákohgo tsin ałnáoszid bikáaʼjįʼ Diné Silı̨́įʼii bił iʼdoolkałgo ninádidootʼááł.
3 Ákohgo aláahgo náádaʼiiłniihii [áádóó bee hazʼáanii yíndaʼniłtinii] índa Jew dineʼé yá aląąjįʼ naazíinii éí aláahgo nááʼiiłniihii, Kéíyafas wolyéhígíí, bighangi áłah silı̨́ı̨́ʼ,
4 áádóó tʼáá nahontʼinee dahwiidoołtsołgo áádóó dahodiyoołhéełgo yaa nídaastʼįįd.
5 Nidi ádadííniid, Hodílzingo áłah náʼádleeh góneʼ éí dooda, háálá ákódeiidzaago diné hadahodínóołchał.
Jesus éí Béthaniigi akʼah bee atsʼáltı̨́ (Mk. 14:3-9; Jn. 12:1-8)
6 Áko Béthaniigi Sáíman éí łóód atsʼíís yiyáanii naałdzidii bee bąąh dah hazʼą́ą́ nítʼéʼígíí bikin góneʼ Jesus yah ajííyáago,
7 ákwii ajiyą́ągo asdzání léiʼ tsé alabáster wolyéhígíí bee tózis ályaago akʼah tʼáá íiyisí ílínígíí yee yah ayííʼą́ągo hatsiitsʼiin yikʼi yayiiziid.
8 Nidi hódahoołʼaahii éí dayiiłtsą́ągo, Díí lá haʼátʼíí biniyé tʼóó bee naʼasʼneʼ? daaníigo yikʼee doo bił dahóózhǫǫd da.
9 Háálá díí akʼahígíí ląʼí bą́ą́h ílı̨́įgoda nahidoonih nítʼééʼ, áko éí béeso diné badahojoobáʼíígíí bitaaʼniih doo nítʼééʼ.
10 Nidi Jesus bił bééhózingo áhodííniid, Haʼátʼíí biniyé asdzání baa nídaahtʼı̨́? Jó, éí nizhónígi shá ádziidzaa.
11 Háálá badahojoobáʼíígíí tʼáá áłahjįʼ nihitaa daakai, nidi shí éí doo tʼáá áłahjįʼ nihitaasháa da.
12 Díí akʼah shitsʼíís bikʼi yadziiziidígíí, yóóʼáshidiʼdoolníłígíí bibaʼ hashtʼeshijiléehgo ájítʼı̨́.
13 Tʼáá aaníígóó ánihidishní, Nahasdzáán tʼáá siʼą́ą́ nítʼééʼ bikááʼgóó díí haneʼ yáʼátʼéehii baa dahaneʼgóó, díí asdzání ádzaaígíí bee bééhániih biniyé baa haneʼ dooleeł.
Júdas éí Jesus ninéididooʼáałgi yee lą́ asłı̨́ı̨́ʼ (Mk. 14:10,11; Lk. 22:3-6)
14 Ákohgo naakitsʼáadahígíí łaʼ, Júdas Iskáriyat wolyéii, aláahgo náádaʼiiłniihii yaa níyá,
15 áko áyidííniid, Nihaa hodiníʼą́ągoshąʼ haʼátʼíí shaa dadoohłééł? Áko béésh łigaii tádiin haa deiznil.
16 Áko áádóó haʼátʼéegoda ashjaʼiilaago nináhozhdidooʼáałgi baa nitsídzíkeesgo hodeeshzhiizh.
Jesus éí atisʼadeesdzá bee bééhániihii hódahoołʼaahii bił dazhdooyı̨́ı̨́ł (Mk. 14:12-21; Lk. 22:7-14,21-23; Jn. 13:21-30)
17 Nítʼééʼ dííkʼǫsh tʼáágééd bááh ályaii hodílzingo áłah náʼádleeh łaʼa jı̨́ aleeh góneʼ ídahoołʼaahii Jesus yaa yíkaigo ádaaní, Atisʼadeesdzá bee bééhániihgo yidánígíí dííyı̨́ı̨́ł biniyé háadishąʼ ná hashtʼediilnííł?
18 Áko áhodííniid, Nílááh, kin haalʼáajįʼ dohʼaash, ákweʼé diné łaʼ ábididoohniił, Naʼnitiní ání, Shá hazʼánígíí koshídę́ę́ʼ hadziih; nighangi atisʼadeesdzá bee bééhániihgo yidánígíí shídahoołʼaahii bił dadeeshı̨́ı̨́ł.
19 Áko íhoołʼaahii tʼáá Jesus ádazhdooníiłii yee hoł hoolneʼígi ádadziidzaago atisʼadeesdzá bee bééhániihgo dadoodı̨́łígíí tʼáá áłdįįłtʼéego áyiilaa.
20 Áko iʼííʼą́ągo Jesus hódahoołʼaahii naakitsʼáadahígíí bił dazhʼdooyı̨́ı̨́ł biniyé jidineezbin,
21 nítʼééʼ daʼjiyą́ągo Jesus ázhdííniid, Tʼáá aaníí ánihidishní, Nihí łaʼ nináshididoohʼááł.
22 Áko tʼááłáʼí jinítínígo tʼáá íiyisí bąąh dahániʼgo tʼáá ałkééʼ, Bóhólníihii, daʼ shíísh? dajiníigo baa nízhdiikai.
23 Áko haadzíiʼgo ádííniid, Tʼáá shił ééʼéʼáhígíí éí nináshididooʼááł.
24 Diné Silı̨́įʼii tʼáá bá bee akʼeʼashchínígíí bikʼehgo ábidiʼdoolnííł, nidi Diné Silı̨́įʼii ninázhdiníʼánígíí éí doo hojoobaʼ ájíníi da! Éí dinéhígíí tʼáadoo hoʼdizhchı̨́ı̨́jígo há yáʼátʼééh nítʼééʼ.
25 Áko Júdas, nináhodeeʼaahígíí áhodííniid, Naʼnitiní, daʼ shíísh? Áko Jesus áháłní, Jó, bee háínídzííʼ.
Bóhólníihii biDiyingo Adą́ áyiilaa (Mk. 14:22-26; Lk. 22:15-20; 1Cor. 11:23-25)
26 Áko daʼjiyą́ągo Jesus bááh néidiiʼą́, áádóó yikʼi sodoolzingo niyiiztiʼ, áádóó bídahoołʼaahii yitaizniiʼgo áyidííniid, Nídahidoohʼaahgo daahsą́; díí shitsʼíís átʼé.
27 Áádóó doodlı̨́įłii néidiiką́, áko sodoolzingo yaa ahééh niizı̨́ı̨́ʼ áádóó kóníigo hainíką́, Tʼáá ánółtso daahdlą́,
28 háálá díí shidił bee ahaʼdeetʼáanii ániidíii, tʼóó ahayóí bąąhági átʼéii bá yóóʼahididootʼááł biniyé bá deeznaʼígíí átʼé.
29 Nidi ánihidishní, Kodóó chʼil naʼatłʼoʼii bitooʼ doo łaʼ náádeeshdlı̨́įł da, shiTaaʼ bee bóhólníihgo bił hazʼáanii biyiʼdi índa chʼil naʼatłʼoʼii bitooʼ ániidíii nihił náádadeeshdlı̨́ı̨́ł.
30 Áádóó sin łaʼ bee dahojíítáalgo,* Dził Álivzgóó dashdiikai.
Peter éí Jesus doo bééhasin da bizhdidooniiłígíí tʼáá bítséedi baa haneʼ (Mk. 14:27-31; Lk. 22:31-34; Jn. 13:36-38)
31 Áko Jesus áháłní, Díí tłʼééʼ tʼáá ánółtso shí shiniinaa tʼą́ą́ʼ anídínóohdah, háálá kótʼéego bee akʼeʼashchı̨́,
Naʼniłkaadii atídeeshłííł,áádóó dibé nideiniłkaadii daʼníłtsʼą́ą́ʼgóó taidoojah.
32 Nidi dasétsą́ą́dę́ę́ʼ nááshiʼdiilzáádóó bikʼijįʼ Gáliliigóó nihibaʼ yisháał doo.
33 Nidi Peter haadzíiʼgo áhodííniid, Azhą́ tʼáá ádzíłtso niniinaa tʼą́ą́ʼ anázhníídeeʼ nidi, shí tʼéí tsʼídá doo tʼą́ą́ʼ anídeeshtłish da.
34 Jesus áhodííniid, Tʼáá aaníígóó ándishní, Díí tłʼééʼ naaʼahóóhai bikąʼí tʼáadoo ániihí, táadi doo hwééhasin da náshididííʼniił.
35 Peter áháłní, Azhą́ tʼáá níighah dasétsą́ą nidi, doo hwééhasin da doo nidideeshniił da. Áko hódahoołʼaahii ałdóʼ tʼáá ałtso tʼáá ákótʼéego hadaasdzííʼ.
Gethsémaniidi Jesus sodilzin (Mk. 14:32-42; Lk. 22:39-46)
36 Ákohgo Jesus Gethsémanii hoolyéhígi bídahoołʼaahii yił yíkaigo ííłní, Tʼáá kweʼé nahísóotą́, shí éí tʼah wónásígóó deesháałgo áadi sodideeszįįł.
37 Áko Peter índa Zébedii biyeʼ nidiltʼéego bił dashdiikai, nítʼééʼ tʼáá íiyisí yíní biih jíítłizh áádóó nitsidzídzá.
38 Ákohgo áhodííniid, Shiiʼ sizíinii nitseeltłah, tʼáá hoyółhéełgo, tʼáá kǫ́ǫ́ nahísóotą́ągo shił hadaʼísídółʼı̨́ı̨́ʼ.
39 Áádóó tʼáá áháníjįʼ dashdiiyáago, ákwii tséʼyaa jineeshjoolgo kójíníigo sozdoolzin, ShiTaaʼ, bohónéedzą́ą́ ládą́ą́ʼ, díí doodlı̨́įłii shitsʼą́ąjįʼ kódíílííł, ákondi shí íinisinígíí éí dooda, nidi ni íinínízinígíí ádoonííł.
40 Áko hódahoołʼaahii baa nídzídzá, nítʼééʼ daʼałhosh lá, áko Peter ábijiní, Haʼátʼíí lá! Daʼ tʼááłáʼí ahééʼílkidjįʼ nidiísh doo shił hadaʼísídółʼı̨́ı̨́ʼ ádanohtʼée da?
41 Hadaʼísídółʼı̨́ı̨́ʼ áádóó sodadołzin, áko doo nihídahodínóotah da; níłchʼi iiʼ sizíinii éí lą́ nízin, nidi atsʼíís éí doo bidziil da.
42 Áádóó naakidi aleeh góneʼ anáádzoodzáago, kójíníigo sonáázdoolzin, ShiTaaʼ, díí tʼáadoo yishdlání tsʼídá doo shitsʼą́ąjįʼ kódoolnííłgóogo, íinínízinii bohodoolnííł.
43 Áko haa nínáádzídzá, nítʼééʼ náádaʼjiłhosh lá, háálá tʼáá íiyisí bił hoʼniighą́ą́ʼ.
44 Áko hatsʼą́ą́ʼ dah náázdiidzáago, táadi aleeh góneʼ saadígíí tʼáá éí bee sonáázdoolzin.
45 Ákohgo hódahoołʼaahii baa nínáádzídzáago ábijiní, Daʼ tʼahdiísh daʼołhosh áádóó háádaałyı̨́ı̨́h? Jóʼakon, áajįʼ oʼoolkid, índa Diné Silı̨́įʼii éí bąąhági ádaaníiłii bílákʼeejįʼ ninádeetʼą́.
46 Nídoohjeeh, kʼad yiikah doo; jóʼakon, nináshideeʼaahígíí aadę́ę́ʼ yigááł.
Jesus ninádeetʼą́ áádóó biʼdiiltsood (Mk. 14:43-50; Lk. 22:47-53; Jn. 18:3-12)
47 Tʼahdii yájíłtiʼgo Júdas, naakitsʼáadahígíí łaʼ nilíinii níyá, áádóó aláahgo náádaʼiiłniihii índa diné yá aląąjįʼ naazíinii bitsʼą́ą́dóó diné tʼóó ahayóí diltłish índa tsihał dayíjáahgo yił haa nánízą́.
48 Áko nináhodiníʼánígíí éí yaa honíłtínígíí bee ééhózin dooleełii łaʼ yee yił hoolneʼ lá kóníigo, Tʼáá sétsʼǫsígíí ííshją́ą́ éí bí átʼı̨́į doo; éí deidoołtsoł.
49 Tʼáá áko Jesus yichʼįʼ niníyáago, Yáʼátʼéhéii, Naʼnitiní! hałníigo haztsʼǫs.
50 Áádóó Jesus áhodííniid, Kwáʼásiní, haʼátʼíishąʼ biniyé kweʼé yíníyá? Áko Jesus yichʼįʼ niikaigo deisiłgo dayiiłtsood.
51 Nítʼééʼ jóʼakon, Jesus yił naakaígíí łaʼ bidiltłish hayíítą́ągo aláahgo nááʼiiłniihii binaalteʼ bijaaʼ naʼiidiiłhaal.
52 Nítʼééʼ Jesus ábíłní, Nidiltłish iih nánítįįh, háálá tʼáá diltłish bił hadajiideełígíí éí tʼáá ádzíłtso diltłish bee ádazhdoodįįł.
53 Daʼ shiTaaʼ néideeshkąąłgo, tʼáá áko diyingo nidaalʼaʼí tsostsʼidiindóó baʼaan naakidi mííl yázhí bilááh ánéelą́ąʼgo shichʼįʼ iidiyoołʼaałígíísh doo baa nitsídaahkees da?
54 Nidi kótʼéego áhodooníiłgoshąʼ Diyin God bizaad bee akʼedaʼashchínígíí haa yitʼéego bohodoolnííł?
55 Áko ákwii hoolzhishgo Jesus éí diné yílʼáhígíí áyidííniid, Daʼ shił nidadoohdiłísh biniyé diltłish índa tsihał dayínóhjáahgo aghaʼiiʼníiłii bichʼįʼ oonééł nahalingo shichʼįʼ chʼínooná? Shą́ą́ʼ, tʼáá ákwíí jı̨́ kin biiʼ sohodizin bił hazʼání góneʼ sédáago naʼnishtin nítʼééʼ, nidi tʼáadoo dashoołtsood da.
56 Nidi Diyin God yá dahalneʼii yee akʼedaʼashchínígíí bohodoolnííł biniyé díidí tʼáá ałtso kʼad áánííł. Ákohgo hódahoołʼaahii tʼáá ałtso hatsʼą́ą́ʼ dah diijéeʼgo yóóʼaheeswod.
Jesus éí diné ándahaʼáii bidááhdę́ę́ʼ nihoʼdeedlóóz (Mk. 14:53-65; Lk. 22:54,55,63-71; Jn. 18:13,14,19-24)
57 Áádóó índa Jesus dahoołtsoodígíí Kéíyafas aláahgo nááʼiiłniihii yaa dahazlóóz, áadi bee hazʼáanii yíndaʼniłtinii índa diné yá aląąjįʼ naazíinii haa áłah silı̨́ı̨́ʼ.
58 Nidi Peter éí nízaadę́ę́ʼ hakééʼ yigáałgo, aláahgo nááʼiiłniihii bikin binaagi hazʼą́ągo bináʼástłʼiní góneʼ yah ííyá, áko haa hodoonííł nízingo, ákwii siláo yił naháaztą́.
59 Ákohgo aláahgo náádaʼiiłniihii [áádóó diné yá aląąjįʼ naazíinii] índa diné ándahaʼáii tʼáá ałtso woochʼííd binahjįʼ Jesus hodiʼyoolyéłígíí chʼééh yíkadadiltsʼiʼ,
60 nidi tʼáá ádin lá, azhą́ ląʼí dabiyoochʼíidgo dahalneʼii hadahaasdzíiʼ nidi. Áadi índa diné nidiltʼéego tʼáá ádzaagóó haa halneʼgo niníʼáázh,
61 áko áháłní, Díí diné ání, Diyin God bikin biiʼ sohodizin atídeeshłííł, áádóó tááʼ yiską́ąjįʼ áńdeeshdlíiłgo bíneeshʼą́, jiní.
62 Áádóó aláahgo nááʼiiłniihii nídiiʼnaʼgo áhodííniid, Daʼ doósh ákʼihadidíídzih da? Díí dinéshąʼ haʼátʼíí yee naa dahalneʼ?
63 Nidi Jesus tʼáadoo ákʼihazdoodzíiʼ da. Nítʼééʼ aláahgo nááʼiiłniihii ánááhodooʼniid, Diyin God hináanii binahjįʼ ándishní, Christ, Diyin God biYeʼ daatsʼí nílínígíí bee nihił hólneʼ.
64 Nítʼééʼ Jesus áháłní, Jó, bee háínídzííʼ. Nidi ándishní, Diné Silı̨́įʼii éí Aláahgo Bidziilii yinishʼnáájí dah sidáago, índa yádiłhił biyiʼdę́ę́ʼ kʼos bił yildohgo deidoołtsééł.
65 Nítʼééʼ aláahgo nááʼiiłniihii ákʼinaʼooldláadgo* ání, Diyin God baaʼihgo bá hadzoodzííʼ. Haʼátʼíishąʼ biniyé łaʼ chʼínáádahótʼaah doo? Jó, kʼad Diyin God baaʼihgo bá hadzoodzíiʼgo dahosidootsʼą́ą́ʼ.
66 Éí haash yitʼéego baa nitsídaahkees? Nítʼééʼ, Hodiyoolyééł lą́ą, dadííniid.
67 Ákohgo haniiʼjįʼ yikʼídahidizheeh, áádóó nídahoniłtsʼin, índa łaʼ yéego ninádahodiikaʼgo,
68 ádaaní, Christ nílíinii, Diyin God yá halneʼii nílı̨́įgo háí nándííłtsʼin, bee nihił hólneʼ.
Peter éí, Jesus doo bééhasin da, jiní (Mk. 14:66-72; Lk. 22:56-62; Jn. 18:15-18,25-27)
69 Áko Peter tłʼóoʼdi kin binaagi hazʼą́ągo bináʼástłʼiní góneʼ dzizdá. Nítʼééʼ asdzání naalʼaʼí kóníigo hachʼįʼ niníyá, Ni laʼ ałdóʼ Jesus Gáliliidóóígíí bił nanikai niʼ.
70 Nidi tʼáá ałtso dabinááł dooda jidííniid, Baa yáníłtiʼígíí doo shił bééhózin da, jiníigo.
71 Áko chʼéʼétiin hazʼáníjįʼ chʼízhníyáago náánáłaʼ asdzání naalʼaʼí nááhoołtsą́, áko ákǫ́ǫ́ naazínígíí ííłní, Díí diné ałdóʼ Jesus Názarethdóóígíí yił naakai niʼ.
72 Áko dooda náázhdooʼniid, Éí dinéhígíí doo bééhasin da, jiníigo bee ádee hadzoodzííʼ.
73 Áádóó tʼóó nááhodooʼnaʼgo, ákǫ́ǫ́ naazínígíí Peter yaa yíkaigo ánáádeidooʼniid, Tʼáá aaníí ni ałdóʼ éí łaʼ ánítʼı̨́, jó, nizaadígíí bee nééhózin.
74 Áko ádił niʼjítʼįįhgo ádee hanáázdoodzííʼ, Éí dinéhígíí doo bééhasin da. Tʼáá áko naaʼahóóhai bikąʼí ádííniid.
75 Áko Peter éí Jesus, Naaʼahóóhai bikąʼí tʼáadoo ániihí táadi doo hwééhasin da shididííniił, hodííniidii bééjoolniiʼ. Áko chʼízhníyáago aníjíchago jíícha.
Footnotes
^ Atisʼadeesdzá bee bééhániihii ałtsogo Sin 115-118 bee dahojiitáál.
^ Ákʼinaʼooldláadgo jiníigo éí hashké hwiindzin índa tʼóó hoł badaaʼihgo yaa halneʼ.
