Matthew 3:1-17
3 Ákwii yoołkááł yę́ędą́ą́ʼ John Tó Yee Ası̨́įhii, Judíya kéyah honoojíidi níyáago halneʼgo kóní,
2 Łahgo átʼéego Diyin God bichʼįʼ tsíńdahidohkeesgo ádił nidaʼiyohsíihii bitsʼáhóhkááh, háálá yáʼąąshii bee bóhólníihgo bił hazʼáanii bílátah dahashzhiizh.
3 John lą́ą, éí Aizéíyah Diyin God yá halneʼii nilíinii haa yáłtiʼgo ání:
Honoojíidi łaʼ chánahgo kójíníigo hwiinééʼ diitsʼaʼgo hojilneʼ:Bóhólníihii bá honítʼiʼii hashtʼe dahohłééh,beʼatiin kʼéhézdongo ádaahłééh.
4 John éí ghą́ą́ʼaskʼidii bighaaʼ bee ééʼ ályaago haʼééʼ, áádóó akał sis bee áká dzíszaaz, índa nahachagiitsoh índa tsésʼná bitłʼizh ałdóʼ hachʼiyąʼ.
5 Nítʼééʼ Jerúsalemdę́ę́ʼ áádóó Judíyadę́ę́ʼ tʼáá níłtéél nítʼééʼ índa Jórdan tooh binaadę́ę́ʼ tʼáá átʼéé nítʼééʼ diné haa haaskai.
6 Bibąąhági ádaatʼéii yee ádaa dahoolneʼgo Jórdan tooh nílínígíí biyiʼ tó bee dadzíísı̨́ı̨́ʼ.
7 Nidi Férisii áádóó Sádjusii danilíinii tó bee dabidiʼdoolzįh biniyé deíkáahgo jiiłtsą́ągo ábijiní, Tłʼiish baʼáłchíní danohłíinii! Háishąʼ Diyin God tʼóó báhádzidgo bibee atéʼélʼíinii bitsʼą́ąjįʼ dah dadínóohchééh nihidííniid?
8 Éí bąą łahgo átʼéego Diyin God bichʼįʼ tsíńdadohkeesgo beełtʼéego nihitsʼą́ą́dóó aneestʼąʼ dahóleʼ,
9 áádóó tʼóó ádaa dadzíínóhdlíigo tʼáá nihiyiʼídi, Éíbraham yeeʼ nihizhéʼé nilı̨́, tʼáadoo dadohníní, háálá ánihidishní, Diyin God díí tsé kǫ́ǫ́ naaznilígíí bee Éíbraham baʼáłchíní íidoolíiłgo yíneelʼą́.
10 Kʼad nidi tsin bihétłʼóól biniyé tsénił siʼą́, áko tsin tʼáá ałtso bineestʼąʼ doo yáʼátʼééhgóó bąąh nídahadleehígíí kʼídahalneʼgo, kǫʼ biyiʼ góneʼ adahaltłʼiid.
11 Łahgo átʼéego Diyin God bichʼįʼ tsíńdahidohkeesgo bąąhági ádanohtʼé yę́ę bitsʼáhóhkáahgo tó bee danihisı̨́ı̨́h, nidi shikéédę́ę́ʼ náájoodáłígíí éí shiláahgo ájítʼé, áko hakeeʼ yishłéeł* dooígíí doo bą́ą́h nishłı̨́į da; hó tʼéí Níłchʼi Diyinii índa kǫʼ bee danihidzisı̨́įh doo.
12 Hó éí ásaaʼ bee ąąh oolchʼíhígíí dah jooʼááł, áádóó hááʼjílkʼáahgi hozhdidooshǫǫłgo hatłʼoh naadą́ą́ʼ nooh níjílchíihgi yah ahizhdooyééł, nidi azhool tʼéí kǫʼ doo nitséesii bee adizhdoołkʼą́ą́ł.
Jesus éí tó bee biʼdoolzı̨́ı̨́ʼ (Mk. 1:9-11; Lk. 3:21,22)
13 Ákohgo Gáliliidę́ę́ʼ Jórdanjįʼ Jesus níyá, John tó yee hodoosįh biniyé.
14 Nidi John éí Jesus chʼééh kóbizhdííniid, Nigo yeeʼ tó bee shidíísįh nítʼééʼ, daʼ ákoósh jó nida tó bee nideesįh biniyé shéíníyá?
15 Nidi Jesus ánááhodooʼniidgo ání, Bíniʼdii kʼad éí ákótʼé, háálá ákótʼéego tʼáá ákogi ádaatʼéii tʼáá ałtso biʼdiilnííł. Áko John yee lą́ asłı̨́ı̨́ʼ.
16 Áádóó Jesus tó bee hoʼdoolzı̨́įʼgo táyiʼdę́ę́ʼ háádzísdzá, nítʼééʼ jóʼakon yáʼąąsh ąą ádzaa, áádóó Diyin God biNíłchʼi Diyinii hasbídí nahalingo Jesus bikʼijįʼ hadahooleełgo áádóó bikʼi dah neezdáago jiiłtsą́.
17 Áádóó yáʼąąshdę́ę́ʼ iinééʼ diistsʼą́ąʼgo ání, Díí shiYeʼ ayóóʼóóshʼníinii jílı̨́, tʼáá íiyisí hąą shił hózhǫ́.
Footnotes
^ Ké yoolééł nínígíí éí naalteʼ binaanish átʼéé nítʼééʼ.
