Matthew 8:1-34
8 Dził bąąhdę́ę́ʼ hadáádzoodzáago, diné ayóó ánéelą́ą́ʼ hakééʼ nooyééł,
2 áko jóʼakon, diné łaʼ łóód atsʼíís yiyáanii naałdzidii bee bąąh dah hazʼą́ą́ léiʼ haa níyá, áádóó hachʼįʼ nahasáago ání, Bóhólníihii, íinínízin ládą́ą́ʼ nááshididííłááł.
3 Áko Jesus kʼídeesníiʼgo hodeelchid* kóníigo, Íinisin lą́ą; łóód nąąh óodįįh. Tʼáá áko łóód atsʼíís yiyáanii naałdzidii yę́ę hąąh ásdįįd.
4 Áádóó Jesus áhodííniid, Tʼááká diné łaʼda bił hóólneʼ lágo, nidi nílááh dah diináahgo nááʼiiłniihii bíniʼdii átsé niníłʼı̨́, áádóó nááhidoonihii tʼáá Mózes yee nihoníʼánígi átʼéego nááhidííłnih, áko éí bee nilóód náádzíʼígíí diné bił béédahózin doo.
Jesus éí siláo neeznádiingo yinanitʼaʼí nilíinii bá naalʼaʼí néidiisá (Lk. 7:1-10)
5 Áádóó Kapérniyamgi jiníyáago siláo neeznádiin yiltʼéego binanitʼaʼí nilı̨́ı̨́ léiʼ hachʼįʼ niníyáago náhookąąh,
6 áko áháłní, Bóhólníihii, diné shá naalʼaʼígíí doo bitah nahwiiʼnáágóó tʼáá íiyisí tiʼhooníihgo hooghandi sitı̨́.
7 Áko Jesus áhodííniid, Ákǫ́ǫ́ deesháałgo nááhodideeshłááł.
8 Nidi siláo binanitʼaʼí hanáánáádzíiʼgo ání, Bóhólníihii, shighan góneʼ shił yah adíínáałgi doo bą́ą́h anishłı̨́į da, nidi tʼóó saad bee handziih, áko shá naalʼaʼí náádidoodááł.
9 Háálá shí ałdóʼ shinanitʼaʼí hólǫ́, áádóó siláo binanitʼaʼí nishłı̨́, áko łaʼ, Ákǫ́ǫ́ díínááł, bidishniihgo dah diighááh, náánáłaʼ, Hágo, bidishniihgo shaa yighááh, áádóó shinaalteʼ, Kónínééh, bidishniihgo tʼáá áko éí yiʼiiłʼįįh.
10 Áko Jesus éí yidiiztsʼą́ąʼgo tʼóó bił ahóóyóí, áádóó bikééʼ nidaakaígíí áyidííniid, Tʼáá aaníí ánihidishní, Oodlą́ ayóó átʼéii Ízrel dineʼé bitahgi nidi, tʼah doo kótʼéii bikʼínísháah da.
11 Áádóó ánihidishní, Haʼaʼaahdę́ę́ʼ índa eʼeʼaahdę́ę́ʼ diné ląʼí nidahidookah, áádóó yáʼąąshii bee bóhólníihgo bił hazʼą́ądi Éíbraham áádóó Áízak índa Jéíkab yił daʼdooyı̨́ı̨́ł biniyé yił dah dínóobįįł,
12 nidi yáʼąąshii bee bóhólníihgo bił hazʼáanii hwííʼ dadooleeł yę́ę tłʼóóʼdóó yówehjįʼ chahałheełjįʼ ahodiʼyooltłʼił; áadi diné daachxa áádóó biwooʼ ahídeidiłkʼash doo.
13 Áko Jesus éí siláo binanitʼaʼí áyidííniid, Nílááh yínááł; tʼáá iinídlánígi átʼéego ná ádoolnííł. Tʼáá áko hanaalʼaʼí náádiidzá.
Jesus éí diné tʼóó ahayóí hadaałtʼé áńdayiidlaa (Mk. 1:29-34; Lk. 4:38-41)
14 Áádóó Peter bighan góneʼ Jesus yah ajííyáago, Peter beʼasdzą́ą́ bimá bitah honeezgaigo sitı̨́įgo jiiłtsą́,
15 áko bílaʼ bizhdeelchidgo, tah honiigááh yę́ę bitsʼáldoh, áko nídiiʼnaʼgo há choozʼįįd.
16 Tʼáá éí bee iʼííʼání, níłchʼi biʼiiníziinii biiʼ dahólóonii ląʼí hachʼįʼ yił neheeskai, áko tʼááłáhídi hadziidziihgo níłchʼi bidaʼiiníziinii hazʼniiskaad, índa diné bitah dahoneezgai tʼáá ałtso hadaałtʼé áńdajiidlaa.
17 Kótʼéego baa nijiyáhígíí, Aizéíyah, Diyin God yá halneʼii, yaa hoolneʼígíí bohodoolnííł biniyé baa nijiyá, Tʼáá hó, doo nihitah dahółdzilii ákʼijįʼ kójiilaa, índa nihitah dahoneezgaii bá dziizįʼ, dííniid.
Jesus yikééʼ dayíkáah dadooleeł nítʼéeʼii (Lk. 9:57-62)
18 Nítʼééʼ Jesus binaagi diné tʼóó ahayóí yílʼáago yiyiiłtsą́ągo, Wónaanígóó diikah, dííniid.
19 Nítʼééʼ bee hazʼáanii yíndaʼniłtinii łaʼ níyáago áhodííniid, Naʼnitiní, tʼáá nanináágóó nikééʼ naasháa doo.
20 Áko Jesus áháłní, Mąʼii dootłʼizhí beʼaʼáán dahólǫ́, áádóó tsídii wódahgo nidaatʼaʼígíí bitʼoh dahólǫ́, nidi Diné Silı̨́įʼii éí tʼáadoo nizhnótʼáałgi da.
21 Áádóó ídahoołʼaahii náánáłaʼ ábidííniid, Bóhólníihii, áłtsé shizhéʼé łeeh deeshtééłgóó* nídeeshdáałgo bee shaʼdiʼníʼaah.
22 Nidi Jesus áhodííniid, Shikééʼ yínááł, áádóó bíniʼdii daneeznáanii tʼáá bí łeeh daʼahiiʼnííł.
Jesus tó náádadiidáahii índa níyol hashtʼeidííłtʼeʼ (Mk. 4:35-41; Lk. 8:22-25)
23 Áádóó tsinaaʼeeł biih jííyáago hódahoołʼaahii hakééʼ iih yíjééʼ.
24 Áádóó jóʼakon, táłkáaʼgi ayóó átʼéego deeyolgo, tó náádadiidáhígíí tsinaaʼeeł biih yilkʼooł, nidi Jesus éí ajiłhosh.
25 Áko hódahoołʼaahii hachʼįʼ niikaigo chʼéédahasidgo ádaaní, Táłtłʼááh yiildaas, Bóhólníihii, yisdánihínííł.
26 Nítʼééʼ áháłní, Haʼátʼéegoshąʼ nídasoołdzííd, tʼįįhdígo daʼiinohdláanii? Áko yiizįʼgo níyol índa tó yideezteh, áko tʼáá íiyisí hodiiyeel.
27 Áko hódahoołʼaahii tʼóó bił adahayóigo kódaaní, Díí lá haʼátʼíí diné shı̨́ı̨́ átʼı̨́įgo, níyol áádóó tó nidi bikʼeh dahółʼı̨́?
Gérgasa dineʼé nidiltʼéego níłchʼi bidaʼiiníziinii biiʼ hólóonii hanoolkaad (Mk. 5:1-20; Lk. 8:26-39)
28 Wónaaníjįʼ Gérgasa* dineʼé bikéyahjįʼ haʼnaa nidaʼdzisʼéelgo, dajishchááʼdę́ę́ʼ diné nidiltʼéego níłchʼi bidaʼiiníziinii tsiʼnabiiłʼaashgo hadááh ahiʼneelchą́ą́ʼ, éí tʼáá íiyisí báhádzidgo bąą diné łaʼ doo áajigo chʼóoyaʼ átʼée da.
29 Nítʼééʼ jóʼakon, éí kóníigo hadoolghaazh, Haashąʼ nihíléehgo ánítʼı̨́,* Jesus, Diyin God biYeʼ nílíinii? Atínihidiʼdoolníłígíí tʼah doo baa hoolzhíish da nidiísh atínihidíílíiłgo biniyé yíníyá?
30 Áko éí áádóó tʼáá nízaadi bisóodi ląʼí nidaʼałchozh.
31 Áko níłchʼi bidaʼiiníziinii nídahookąąhgo ádaaní, Hanihiníłkaad ládą́ą́ʼ, níléí bisóodi naakaígíí biih danihidííłʼaał.
32 Áko ábizhdííniid, Nihílááh lą́ą. Áko níłchʼi bidaʼiiníziinii éí diné yiyiʼdę́ę́ʼ hahaazhjéeʼgo bisóodi yiih heezhjééʼ, áko jóʼakon, bisóodi tʼáá ałtso bidah chʼééjéeʼgo beʼekʼid yiih heezhjééʼ, áko tó bííghą́ą́ʼ.
33 Áko bisóodi baa ádahojilyánígíí dashdiijéeʼgo kin haalʼáágóó aníjííjéeʼgo, éí áhóótʼįįdígíí tʼáá ałtso índa diné níłchʼi bidaʼiiníziinii biiʼ hólónę́ę biiʼ hanoolkaadígíí baa dahojoolneʼ.
34 Áko kin haalʼáádóó diné tʼáá ałtso chʼíheezhjéeʼgo Jesus bidááh náznísą́. Áko dajiiłtsą́ągo nídajookąąhgo ádajiní, Nihikéyahdóó nówehjįʼ haninááh.
Footnotes
^ Diné łaʼ łóód atsʼíís yiyáanii tʼóó yideelchidgo bee hazʼą́ kʼehgo hwí ałdóʼ hąąh dahazʼą́ągo baa nitsáháskééz.
^ Shizhéʼé łeeh deeshtééł, jiníigo éí, Shizhéʼé daaztsą́ąjįʼ baa áháshyą́ą doo, jiníigo óolyé.
^ Diyin God bizaad tʼáá ałkʼidą́ą́ʼ bee akʼedaʼashchínígíí łaʼ kótʼéego dabikááʼ, Gádara dineʼé; łaʼ, Gérasa dineʼé.
^ Haashąʼ nihíléehgo ánítʼı̨́, daanínígíí éí hashké danízingo yaa halneʼ.
