Matthew 9:1-38
9 Áko Jesus tsinaaʼeeł yiih yíyáago haʼnaa nináʼníłʼéél, áádóó tʼáá bí bikin haalʼáajįʼ nádzá.
2 Nítʼééʼ diné léiʼ doo bitah nahwiiʼnáágóó bikʼi antéhí yikʼi sitı̨́įgo haa deistsooz, áko bidaʼoodląʼ baa ákozniizı̨́įʼgo diné doo bitah nahwiiʼnánígíí ábizhdííniid, Shiyeʼ, nił hózhǫ́ǫ leʼ; ádił niʼiyínílzíʼígíí ná yóóʼadootʼą́.
3 Áádóó jóʼakon, bee hazʼáanii yíndaʼniłtinii łaʼ tʼáá biyiʼídi ádadííniid, Díí diné éí Diyin God doo yidósingóó yáłtiʼ.
4 Nidi nitsídadzikeesígíí Jesus bił bééhózingo áhodííniid, Haʼátʼéegoshąʼ bąąhági átʼéego nihijéí biiʼ nitsídaahkees?
5 Háidíígíishąʼ doo nantłʼagóó bee haʼdoodzih? Ádił niʼiyínílzíʼígíí ná yóóʼadootʼą́, haʼnííjí daatsʼí, éí doodago, Nídiiʼnéehgo dah diinááh, haʼnííjí daatsʼí?
6 Nidi nahasdzáán bikáaʼgi Diné Silı̨́įʼii ádił niʼiidzííh á yóóʼiidiiʼaah yee bóhólníhígíí nihił béédahózin doo nisin. Áko bitah doo nahwiiʼnánígíí áyidííniid, Nídiiʼnééh, áádóó bikʼi nítéhí nídiiníiłgo nighangóó nídídááh.
7 Áko nízhdiiʼnaʼgo haghangóó dah nízhdiidzá.
8 Nítʼééʼ diné yílʼáhígíí éí dayiiłtsą́ągo nídaasdzííd, áádóó Diyin God éí bee óhólnííh ákótʼéii nihokááʼ dineʼé yeidiníʼánígíí bąą Diyin God yaa dahaznih.
Matthew, Shikééʼ yínááł, biʼdooʼniid (Mk. 2:13-17; Lk. 5:27-32)
9 Áádóó Jesus dashdiiyáago joogááł, nítʼééʼ diné léiʼ Matthew wolyéego, tax nahalyéhígi sidáago jiiłtsą́, áko ábizhdííniid, Shikééʼ yínááł. Áko nídiiʼnaʼgo hakééʼ dah diiyá.
10 Matthew bighan góneʼ Jesus áádóó bídahoołʼaahígíí bił daʼjiyą́ą́ nítʼééʼ, jóʼakon, tax nahalyéhígíí yiniyé naazdáii índa bąąhági ádaaníiłii tʼóó ahayóí neheeskaigo hoł idaʼniiyą́ą́ʼ.
11 Áko Férisii danilíinii éí dayiiłtsą́ągo hódahoołʼaahii ádeidííniid, Haʼátʼéegoshąʼ nanihizhnitinígíí tax nahalyéhígíí yiniyé naazdáii índa bąąhági ádaaníiłii bił daʼjiyą́?
12 Nidi Jesus éí yidiiztsʼą́ąʼgo ádííniid, Diné doo bąąh dah nidahazʼánígíí azeeʼ ííłʼíní doo yichʼįʼ dadikáah da, nidi bąąh dah nidahazʼánígíí tʼéiyá.
13 Nidi nihílááh, díí ááhyiłníinii nihił béédahoozįįh, Aa aʼááh hasin éí nisin, nááhániihii éí dooda. Háálá tsʼídá tʼáá ákogi ádaatʼéii doo bíká ádideeshniił biniyé níyáa da, nidi bąąhági ádaaníiłii, Łahgo átʼéego Diyin God bichʼįʼ tsíńdadohkeesgo nihibąąhági átʼéii bitsʼáhóhkááh, bidideeshniił biniyé níyá.
Hodílzingo doo adą́ągi bínaʼídíkid (Mk. 2:18-22; Lk. 5:33-39)
14 John bídahoołʼaahii kódaaníigo Jesus yaa yíkai, Haʼátʼéegoshąʼ nihí áádóó Férisii danilíinii tʼáá ahą́ą́h hodílzingo doo adánígíí bee ádá nídahwiilʼaah, ákondi ni nídahoołʼaahii doo ákódaatʼı̨́į da?
15 Áádóó Jesus áhodííniid, Iiyehii tʼah hoł naakaigo iigehgi nidahaaskaígíísh yínííł danilı̨́į doo? Nidi beidoołkááł, iiyehii hatsʼą́ą́ʼ nídidooltéełgo índa dahodísingo doo daʼayą́ą da doo.
16 Diné łaʼda haʼééʼ haastihgo adańdaditʼaʼí ániidíígíí doo bidańdazhdidooʼáał da, háálá bidazhdiníʼánígíí bitsʼádoodlałgo haʼééʼ íídládígíí tʼóó yówehda adoodlał.
17 Índa wáin ániidíii tó abid hadaastihii doo biih yikaah da; ákódziidzaago tó abid dadooldoh, áádóó wáin yóóʼíínaʼ doo, áádóó tó abid tʼáá ádzaaí dadooleeł, nidi wáin ániidíii tó abid ádaaniidíii biih yikááh, áko tʼáá áłah nízaadgóó chooʼı̨́.
Naatʼáanii bitsiʼ áádóó asdzání Jesus biʼééʼ yideelchidii (Mk. 5:21-43; Lk. 8:40-56)
18 Ákótʼéego bichʼįʼ yájíłtiʼ, nítʼééʼ naatʼáanii léiʼ haa níyáago hachʼįʼ nitsidinígoʼgo ání, Áníídí yeeʼ shitsiʼ daaztsą́, nidi tįʼ ákǫ́ǫ́ diitʼashgo bikʼi dah didíílnih, áko hinááh nídoodleeł.
19 Áko Jesus nízhdiiʼnaʼgo hódahoołʼaahii bił bikééʼ dashdiikai.
20 Nítʼééʼ asdzání léiʼ dił bighá nídiniiltałgo naakitsʼáadah nááhai lá, éí haneʼdę́ę́ʼ niníyáago haʼééʼ bijánil yideelchid,
21 háálá tʼáá biyiʼídi ádííniid, Biʼééʼ tʼéiyá bidinishchid nidi, hadaałtʼé ánáshidoodlííł.
22 Nidi Jesus názyizgo honíłʼı̨́įgo áháłní, Shitsiʼ, nił hózhǫ́ǫ leʼ; neʼoodląʼ bee doo ánítʼéhí da násínídlı̨́ı̨́ʼ. Tʼáá áko éí asdzání doo átʼéhí da ánábiʼdiilyaa.
23 Áádóó Jesus éí naatʼáanii bighandi jiníyáago dilní bee íʼdílzoołí yee nidaanéhígíí áádóó diné áłah silı̨́ʼígíí hahóółʼáago jiiłtsą́,
24 áko ábizhdííniid, Chʼínóhkááh; jó, atʼééd doo daaztsą́ą da, tʼóó ałhosh. Nidi tʼóó haa daadloh.
25 Áko diné áłah silı̨́ʼígíí chʼíneelkaadgo yah ajííyáago, atʼééd yę́ę bílaʼ jiiłtsoodgo nídiiʼnaʼ.
26 Áko éí kéyah tʼáá níłtéél nítʼééʼ bee baa haneʼgo nidadeezdláád.
Diné doo ooʼíinii nidiltʼéego ooʼı̨́ ánábiʼdiilyaa
27 Áádóó Jesus joogááł, nítʼééʼ diné naaki doo ooʼı̨́ı̨́góó hakééʼ yiʼashgo, dilwoshgo kóní, David biYeʼ nílíinii, nihaa jiiníbaah.
28 Áádóó hooghan góneʼ yah ajííyáago, diné doo ooʼíinii haa níʼáázh, áko Jesus áháłní, Díí baa nideeshaałígíísh bíneeshʼą́ągo yinohdlą́? Nítʼééʼ áháłní, Aooʼ, Bóhólníihii.
29 Áko kójíníigo binááʼ bizhdeelchid, Iinohdlánígíí bikʼehgo nihá ádoonííł.
30 Áko ajooʼı̨́ ánáhoodlaago Jesus hachʼįʼ haadzíiʼgo áháłní, Tʼááká diné łaʼ bił bééhoozı̨́ı̨́ʼ yíilaʼ.
31 Nidi dah diiʼáazhgo éí kéyah tʼáá níłtéél nítʼééʼ bee haa haʼniihgo haa nahasneʼ.
Diné doo yáłtiʼii yáłtiʼ ánábiʼdiilyaa
32 Áádóó dashdiikai, nítʼééʼ diné łaʼ níłchʼi biʼiiníziinii biiʼ hólǫ́ǫgo doo yáłtiʼ da léiʼ yił haa daaskai.
33 Áko níłchʼi biʼiiníziinii hanoolchą́ąʼgo, diné doo yáłtiʼ da yę́ę yáłtiʼ silı̨́ı̨́ʼ, áko diné áłah nilínígíí kódaaníigo tʼóó bił adahayóí, Ízrel dineʼé bitahgi tʼah doo ákóhánéehgo yiiltséeh da.
34 Nidi Férisii danilíinii ádadííniid, Níłchʼi bidaʼiiníziinii binanitʼaʼí bibee adziil bee níłchʼi bidaʼiiníziinii hahizhniłkaad lá.
Jesus éí diné baa aʼááh jiniizı̨́ı̨́ʼ
35 Áko nítʼééʼ kin hadaasʼáágóó índa kin naazhjaaʼgóó tʼáá ałtso kéédahatʼínígíí kin yiiʼ áłah nídaadleehí naaznilgóó Jesus nazhʼnitingo, áádóó yáʼąąshii bee bóhólníihgo bił hazʼáanii baa haneʼ yáʼátʼéehii baa hojilneʼgo, índa diné bitahgóó naałniih bąąh dahólóonii tʼáá ałtso, áádóó ka nidaakaígíí tʼáá ałtso hadaałtʼé áńdajidleʼgo tázhdííyá.
36 Nidi diné yílʼáhígíí jiiłtsą́ągo baa aʼááh jiniizı̨́ı̨́ʼ, háálá dibé yaa áhályáanii ádin nahalingo bichʼįʼ nidahwiiʼná áádóó tʼáadoo bíká oolyeedí da.
37 Áko hódahoołʼaahii ábijiní, Tʼáá íiyisí daʼneestʼą́, nidi daʼdooyishii tʼáá díkwíí.
38 Éí bąą agizh bee Bóhólníihii bá daʼdooyishígíí bidáʼákʼehgóó iidiyoołʼaałgi bíká sodadołzin.
