Micah 1:1-16
1 Jótham áádóó Éíhaz índa Hezekéíyah éí Júdah dineʼé aláahgo yinanitʼaʼí danilı̨́įgo yoołkááł yę́ędą́ą́ʼ Móreshethdóó* dineʼé Máíkah éí Samériya áádóó Jerúsalem átʼéii bídéétʼiʼgo Bóhólníihii kóníigo yidiiztsʼą́ą́ʼ.
2 Ałʼąą dineʼé tʼáá ánółtso, daʼdoohtsʼı̨́ı̨́h; nahasdzáán nílíinii índa tʼáá ałtso niyiʼ dahojílóonii, daʼjółtsʼą́ąʼ doo; Bóhólníihii Diyin God bikin biiʼ sohodizin hodiyingo hazʼą́ą́dóó bíniʼ nihainítʼįįh.
3 Áádóó Bóhólníihii bił hazʼą́ą́dę́ę́ʼ chʼíhodooleełgo nahasdzáán bikááʼ wódahgo nahazʼą́ąjįʼ hadahodooleełgo yikʼi nidoogaał, jóʼakon.
4 Kǫʼ bíighahgi akʼahkǫʼ siʼą́ągo dííłhı̨́ʼígíí nahalingo daadził biyaajįʼ dadidoołhįh, índa dahonítsʼaaʼ góyaa tó yajiinilgo bikooh hatsʼózí dahazlı̨́ʼígíí nahalin doo.
5 Háálá Jéíkab dineʼé bee hazʼáanii dayiiztiʼígíí éí Ízrel dineʼé yee ádił niʼiisíʼígíí tʼáá ałtso biniinaa átʼé. Haʼátʼíísh yee Jéíkab bee hazʼáanii yiyiiztiʼ? Samériya lą́ą. Haʼátʼíísh éí Júdah kéyahgi ninádahałaah doo biniyé wódah nahazʼą́ągo ályaaígíí átʼé? Jerúsalem lą́ą.
6 Éí bąą Samériya éí dzígaigi yanáalkʼidgo ákwii chʼil naʼatłʼoʼii kʼéédadilyéeh doo índa tsé bee daakin honítsʼaaʼ góyaa ahideesiłgo atłʼááh nídaastłʼinii yitʼíní dadooleełgo áhodeeshłííł.
7 Áádóó edaʼalyaii tʼáá ałtso hashtʼeʼnidaashkʼaazhii dadidoolzéí, áádóó bikʼé nijishnishii tʼáá ałtso adidoolkʼą́ą́ł, índa edaʼalyaii daahóhígíí nideeshbéezhgo ádeeshłííł, áko ałjiłnii baa dahaʼníiłgo bee shódaoztʼeʼii náánáłaʼ chonáádayoołʼı̨́į doo.
8 Éí bąą shiyid nánístsʼingo atínídinishdleehgo dishwoshgo yishcha doo; shitsįʼ aheshgéeshgo áádóó tʼáá łichíʼígo mąʼii índa náʼáshjaaʼ yínííł danilı̨́įgo ádaaní nahalingo yishcha doo.
9 Háálá tídílyaii tʼáadoo bidééłníní da índa Júdah baa hoolzhiizh kʼad; shidineʼé bił yah eʼetiingi éí Jerúsalemjįʼ niníyá.
10 Gathgi* doo baa chʼíhodííʼáał da; tʼáadoo nichaí doo; Áfrah dineʼé bitahgi łeezh dibahí biiʼ nidíímas.
11 Séífer kin shijaaʼgi kéédahatʼíinii tʼáá łichíʼígo tʼóó nihaa yáhásingo nihighan bitsʼą́ą́ʼ dah doohkááh; Zéíyanan kin shijaaʼgi kéédahatʼíinii doo chʼíkáah da; Beth-íízel dineʼé yéego daachago biniinaa hasih hazʼáanii nihitsʼą́ą́ʼ nídidoolyééł.
12 Háálá Méírath kin shijaaʼgi kéédahatʼíinii bá yáʼátʼééh hodooleeł kʼadę́ę dayiiłtséehgo yibaʼ ádaatʼéé nítʼééʼ, háálá Jerúsalem bichʼéʼétiinjįʼ Bóhólníihii bitsʼą́ą́dę́ę́ʼ doo yáʼáshóonii ahóóleʼ.
13 Léíkish kin haalʼáadi kéédahohtʼíinii, nihitsindaabąąs bijáád naakiígíí éí łı̨́ı̨́ʼ dilwoʼii bighą́ą́h dadohnííł; Záíyan bichʼéʼé ádił niʼiidzííh bee deeztʼiʼii nilı̨́, háálá Ízrel dineʼé bee hazʼáanii dayiiztiʼii nitsʼą́ą́dóó bee bééhoozin.
14 Éí bąą Móresheth-gath baʼdíílééł; Ákzib dineʼé éí Ízrel dineʼé aláahgo binanitʼaʼí danilíinii deinóʼáah doo.
15 Ákohgo Marííshah kin haalʼáagi kéédahohtʼíinii nihił ałtsʼą́ą́ʼ ałkʼiiz dooleełii nihaa deesłóós; éí Ízrel dineʼé binaatʼáanii nilíinii Adálam kin haalʼáajįʼ adoogááł.
16 Nihaʼáłchíní nihił nidaʼíshǫǫhii dabiʼdisnáago nihitsʼą́ąjįʼ kólyaago biniinaa nihitsiiʼ daohshééh; jeeshóóʼ bitsiitsʼiin dilkǫǫhígi átʼéego ádaʼdoołnééh.
Footnotes
^ Díí kin shijaaʼ éí Jerúsalem kin haalʼáádóó shádiʼááhjígo naadiin tseebíí tsin sitą́.
^ Filístiya dineʼé bikin hadaasʼá łaʼ tónteel bibąąhgi haalʼá.
