Micah 2:1-13
2 Bitsáskʼeh yikááʼ naazhjéeʼgo doo ákwii átʼéii yindahagizii bichʼįʼ doo hojoobaʼ ájíníi da! Yee hashtʼenitsídaazkéezii hoolʼįįhgo bidziil yaa dadzólíigo doo shódaatʼı̨́į da.
Badahojoobaʼíii bide ádahodzósinii doo hojoobaʼ ájíníi da
2 Áádóó dádaʼakʼeh yidádanoolníigo yił hadahidilchííd, índa daakin yidádanoolníigo tʼáá naʼníleʼdii aghadayiiʼnííł, áko diné áádóó baʼáłchíní éí tʼáá bí áádóó bííʼ dadooleełii yide ádahósin.
3 Éí bąą Bóhólníihii kóní, Díí dineʼé bikʼijįʼ doo yáʼáshóonii binahosíʼą́; éí bitsʼą́ą́dóó doo nahjįʼ háádadínóołniił da; doo ádaa dahohniih da doo, háálá díí hoolzhishii doo yáʼáshǫ́ǫ da.
4 Éí bijı̨́ łaʼda yéego atínídindleehgo niheelʼı̨́įgo yichago yee nihá nahodoołtʼih kóníigo, Ałtso ásiidįįd; shidineʼé daabíiʼii łahgo áyiilaa; dooládóʼ lá shitsʼą́ą́jí hasdlı̨́įʼ da! Nihitsʼą́ą́jí danilíinii éí nihikédaayah yitaideezʼą́.
5 Éí bąą Bóhólníihii bidineʼé bitahdóó doo łaʼda tłʼóół bee kéyah ałtsʼá daadzoii nináázhdoołdił da.
6 Dahalneʼii, Tʼáadoo dahołneʼí, deiłní, nidi doo hoł dahalneʼgóó tʼóó baa yádahodoosįįł.
7 Jéíkab dineʼé danohłı̨́įgo nihiʼdójíii, Bóhólníihii biNíłchʼi doósh haʼólníi da? Díísh bí átʼı̨́? Tʼáá ákogi átʼéego deíkáahii bá shizaad yáʼátʼéehgo áánííł.
8 Tʼáá ániidígo shidineʼé anaʼígi átʼéego deizįʼ; bíighah dahizhdikáahii haʼéétsoh áádóó haʼééʼ tʼáá bił haa deidiyiiłtłʼiid, áko anaaʼdę́ę́ʼ nináhaaskai nidahojílin.
9 Shidineʼé bitahdóó sáanii danilíinii dabighan yaa bił dahózhóonii biyiʼdóó chʼídahoołtłʼííd; bee akʼihojidlíii baʼáłchíní baa diníʼáanii hoolʼáágóó bitsʼą́ąjįʼ kódaohłaa.
10 Nídoohjeeh, áádóó nahgóó haohkááh; kweʼé doo háádadoołyįh da; tʼóó bahooʼih hazlı̨́įʼgo biniinaa tsʼídá yéego bikʼee tiʼhooʼníihgo óʼooldįįłii bee ánihidiʼdooldįįł.
11 Diné łaʼ tʼóó áhodilʼı̨́įgo tádígháahii biyoochʼíidgo kódííniidgo, Wáin áádóó tó diłhił bee nihił hashneʼ doo, áko éí díí dineʼé yá halneʼ doo.
12 Jéíkab dineʼé danohłíinii, tʼáá ánółtso tʼáá aaníí áłah ánihideeshłííł; Ízrel dineʼé daadziihígíí tʼáá aaníí áłah ádeeshłííł; dibé bighangi dibé ahanineelkaadígi átʼéego ahanihodínéeshkał, áko dibé bighan góneʼ dibé shijéeʼgo hahóółʼáhígi átʼéego dineʼé tʼóó ahayóí hahóółʼáa doo.
13 Áko bá chʼíhóótʼiʼgo áyiilaii doogááł, áádóó ąą deideeztą́ągo dáńʼdítı̨́ı̨́h góneʼ tłʼóóʼgóó chʼídookah; aláahgo binanitʼaʼí nilíinii bilą́ąjįʼ yigáał doo, áko bilą́ąjįʼ Bóhólníihii hólǫ́ǫgo chʼíhidookah.
