Micah 3:1-12
3 Áádóó ádíshní, Daʼíísółtsʼą́ą́ʼ, Jéíkab dineʼé bá nisoozíinii, Ízrel dineʼé binanitʼaʼí danohłíinii, ánihidishní, Doo haada yitʼéii nihił béédahózin doo nítʼééʼ.
2 Yáʼádaatʼéehii deijoołáii áádóó tʼáá íiyisí doo yáʼáshóonii ayóóʼádayóʼníinii danohłíinii, diné bikágí bikʼi dahołdlaad índa bitsʼin bąąhdóó bitsįʼ nahjįʼ adahołdlaad;
3 shidineʼé bitsįʼ ałdóʼ daołghał áádóó dabikágí bikʼi dahołdlaad índa dabitsʼin nidahohtı̨́įhgo dahołneʼ; atsįʼ doobish biniyé bee abézhí biih yiʼnilígi átʼéego ádaołʼı̨́.
4 Áko índa Bóhólníihii yichʼįʼ daacha doo, nidi doo hachʼįʼ ééhodoosįįł da, ákwii nahalzhiishgo biniiʼ hatsʼąą neiniłʼin doo, háálá tʼáá íiyisí doo yáʼáshǫ́ǫ́góó ádajoonííł.
5 Shidineʼé ádił daʼasiihgo ádayiilaii hódadéétʼiʼgo Bóhólníihii kóní, Biwooʼ yee daʼaʼaałgo ádaaní, Kʼé danohdzin áádóó doo bidaʼiisánígíí tʼóó yikʼijįʼ anaaʼ ádeiłʼı̨́.
6 Éí bąą nihił daatłʼéeʼgo doo nihił ádahatʼı̨́į da doo, índa nihił daatłʼéeʼ doo, áko doo álílee kʼehgo nidaʼídółkid da doo áádóó áhodooníiłii yaa dahalneʼii doo bá ooʼáał da doo índa jínígíí chahałheeł dooleeł.
7 Áko áhodooníiłii yaa dahalneʼii ádaa yádadínóodzįįł áádóó álílee kʼehgo nidaʼídíłkidii tʼóó bił dahodooląął; tʼáá aaníí, tʼáá ádzíłtso hazééʼ dádazhdidoolnih, háálá Diyin God doo hachʼįʼ hadoodzih da.
8 Nidi Jéíkab dineʼé bee hazʼáanii dayiiztiʼii, tʼáá éí Ízrel dineʼé yee ádił daʼasziihii bee bichʼįʼ hadeesdzihgo biniyé tʼáá aaníí Bóhólníihii biníłchʼi áádóó bibee adziilii áádóó doo haada yitʼéii índa bee ayóó óʼóodziilii shiiʼ hadeezbin.
9 Jéíkab dineʼé bá aląąjįʼ nisoozíinii, tʼáá éí Ízrel dineʼé binanitʼaʼí danohłíinii, éí doo haada yitʼéii dajiinohłáii áádóó aheełtʼéego baa nitsáhákeesii tʼáá ałtso átsʼą́ąjįʼ kódaołʼíinii, díí deísółtsʼą́ą́ʼ, nihidishní.
10 Záíyan kin haalʼáii éí dił bee dahołbįʼ índa Jerúsalem kin haalʼáii éí doo ákwii éʼétʼéii bee dahołbįʼ.
11 Aląąjįʼ naazíinii éí nályééh dayókeedgo nidahwiiʼaah áádóó náádaʼiiłniihii éí adeenáago tʼéí nidaʼntin índa áhodooníiłii yaa dahalneʼii éí álílee kʼehgo naʼídíkid yee béeso dayókeed, ákondi Bóhólníihii yaa dadzólí nidahalingo ádaaní, Bóhólníihii nihitah hólǫ́, áko tʼáá íiyisí doo yáʼáshóonii doo nihikʼi hwiidooleeł da.
12 Éí bąą niniinaa Záíyan dáʼákʼeh bił nihwiildlaadígi átʼéego bił nihwidiyooldlał; Jerúsalem éí bikʼi dahooyolgo yáádaalkʼid dooleeł, Diyin God bikin biiʼ sohodizin bił hazʼánígi dził éí tsin bee hodíłchʼilgi ninádahałaah doo biniyé wódah nahazʼą́ągo ádaalyaaígíí nahalin dooleeł.*
Footnotes
^ Záíyan éí Jerúsalem kin haalʼáii jiníigo óolyé. Jer. 26:18.