Micah 5:1-15
5 Siláo dah yikahii bitsiʼ nílíinii, nidineʼé ałʼąą dah naazhjaaʼgo ídadiʼdoolnííł, háálá nihináshzhiizhgo nihikʼijįʼ nídiildzil, áko Ízrel dineʼé bá hooʼáałii hał yee biniitsįʼ nídeididoołhał.
Béthlehemdóó hananitʼaʼí hodooleełgo bee nihootʼą́
2 Nidi nihí, Béthlehem Éfratahdóó dineʼé danohłíinii, azhą́ Júdah dineʼé miil yiltʼéego bitahgi ánółchʼı̨́ı̨́dí nidi, nihitsʼą́ą́dóó Ízrel dineʼé binanitʼaʼí éí tʼáá ałkʼidą́ą́ʼ hoolʼáádę́ę́ʼ naagháii shá chʼídoogááł.
3 Éí bąą awééʼ bíʼnahii ashchı̨́įjįʼ nahjįʼ nihodidooʼááł, áádóó bikʼisóó daadzíiʼii Ízrel dineʼé yichʼįʼ tʼą́ą́ʼ kónéidoodlííł.
4 Áádóó Bóhólníihii bibee adziilii índa biDiyin God bízhiʼ aláahdi átʼéii yee sizı̨́įgo bidibé yiʼiisą́ągo atah kéédahatʼı̨́į doo, háálá kʼad éí nahasdzáán nidaneesʼą́ąjįʼ ayóó átʼéii nilı̨́į doo.
5 Díí diné éí kʼé nilı̨́į doo. Asíriya nihikéyahjįʼ adahakáahgo índa nihinanitʼaʼí dabighan yikʼi nihidiikaigo dibé yaa ádahalyáanii tsostsʼid yiltʼéego índa naatʼáanii tseebíltʼéego bił hachʼįʼ nídidiikah.
6 Áko Asíriya kéyah áádóó Nímrad kéyah* bichʼįʼ yah adaʼiiztiinígíí diltłish yee deidoołchxǫǫł, ákótʼéego nihikéyah góneʼ íínáago áádóó nihináhásdzooígíí yiiʼ tádadikáahgo Asíriya dineʼé bitsʼą́ąjįʼ háánihidooʼnił.
7 Jéíkab dineʼé yidziihígíí éí dadineʼé tʼóó ahayóí bitahgi Bóhólníihii bitsʼą́ą́dę́ę́ʼ dahtooʼ nahalin doo, índa tłʼoh bikʼi niʼdizhołígíí éí diné índa náás daʼahílchíihii doo yibaʼ átʼée da nahalin doo.
8 Náshdóítsoh bitsiijįʼ ditłʼooígíí tsintahdóó naaldlooshii yitaaghá nahalingo áádóó náshdóí yáázh éí dibé yitaagháhígi átʼéego Jéíkab dineʼé yidziihígíí doo Jew dineʼé danilíinii ląʼí bitahgi yitaadaakai doo. Éí yitahgóó yigáałgo yikʼi nidoogaał índa niidiyoonishgo doo łaʼda yisdábidoołtéeł da.
9 Nihílaʼ bee nihiʼanaʼí nilíinii bikʼeh dadohdlı̨́ índa nihitsʼą́ą́jí nilíinii ałtso ádooldįįł.
10 Éí bijı̨́įdi nihitahdóó danihilı̨́ı̨́ʼ bee nidaʼabaahii índa nihitsindaabąąs bijáád naakiígíí ádeeshdįįł, ní Bóhólníihii.
11 Áádóó nihikéyahdóó kin hadaasʼáii nahjįʼ kódadeeshłííł índa niłdzilgo bineʼ naʼadziʼ bił nahazʼáanii ałtso naaʼahideeshtłʼił.
12 Bee idanohdzinii nahjįʼ kódeeshłíiłgo doo tʼáá bąąh dah shoojéeʼ da doo, áko álílee kʼehgo nidaʼídíłkidii ádin doo;
13 edaʼalyaii nihee hólóonii índa nihitahgi edaʼalyaii naazíinii ádeeshdįįł, áko tʼáá nihí ádaohłaii doo bichʼįʼ nináádahohłáa da doo.
14 Áádóó nihitahgi tsin naazkaadii bichʼįʼ nidahohłáii hahideeshtsʼǫł, ákótʼéego nihikin hadaasʼáii ádeeshdįįł.
15 Áádóó ałʼąą dineʼé doo ádahozdiiltsʼaʼii hachʼįʼ sháhodoochįįłgo áádóó hashké dínéesdzįįłgo kʼééhodideeshdlííł.
Footnotes
^ Asíriya kéyah ałdóʼ hoolyé. Gen. 10:8-11.
