Micah 6:1-16
6 Kʼad Bóhólníihii ánínígíí deísółtsʼą́ą́ʼ: Nídoohjeeh, dził daníʼáii bidááhdóó aghadaʼdoohtʼááh, dah daaskʼidii bíniʼdii nihiinééʼ deidiitsʼı̨́ı̨́h.
2 Dził danohłíinii áádóó nihí bidziilgo nahasdzáán bee niłdzilii danohłíinii, Bóhólníihii aghaʼditʼáahgo deísółtsʼą́ą́ʼ, háálá Bóhólníihii bidineʼé yił ałghadaʼditʼááh índa Ízrel dineʼé yikʼi hodidooʼááł.
3 Shidineʼé nohłíinii, haa lá nihiishłaa? Haʼátʼíísh bee nihíniʼ yiiłʼaʼ? Bee doo ákǫ́ǫ́ áníshtʼéii bee shił dahołneʼ.
4 Jó, Ííjip kéyahdę́ę́ʼ naalteʼ danohłı̨́ı̨́ nítʼééʼ yę́ędóó nihikʼé nináʼníshdláago háánihííʼeezh; Mózes áádóó Éran índa Míriyam nihilą́ąjįʼ adasíłʼaʼ.
5 Shidineʼé nohłíinii, Móʼab dineʼé aláahgo binanitʼaʼí Béílak yinahazgizii áádóó Bíyor biyeʼ Béílam hachʼįʼ tʼą́ą́ʼ yee hanáádzíiʼii índa Shíttim hazʼánídóó Gílgal kin haalʼáajįʼ áhoodzaii béédaałniih, áko Bóhólníihii bitʼáá ákogi átʼéii nihił béédahodoozįįł.
Bóhólníihii haa dajítʼée doo, hóʼní
6 Haʼátʼíísh yishłéełgo Bóhólníihii áádóó Diyin God aláahgo átʼéii bidááhdóó nideesháałgo bichʼįʼ yaa ádeeshnííł? Daʼ béégashii yáázh łaʼ binááhaií didlidgo nááháshniihgoósh bidááhdę́ę́ʼ nideeshááł?
7 Daʼ deenástsʼaaʼ daamííl bíighahgoósh, doodaiiʼ akʼah éí neeznáadi mííl tooh danílı̨́ bíighahgoósh Bóhólníihii bił hóshǫ́ǫ doo? Daʼ alą́ąjįʼ shá yizhchíiniísh éí ádił niʼiisíihii bikʼé nááhidoonihgo ninádideeshʼááł? Daʼ shitsʼíís bineestʼąʼásh éí shiiʼ sizíinii ádił niʼiisíihii bikʼé nááhidoonihgo ninádideeshʼááł?
8 Diné nílíinii, yáʼátʼéehii nichʼįʼ yitʼíní ályaa, áko Bóhólníihii éí haa nítʼée doo, nóʼní: Éí tʼáá ákogi ááníił doo áádóó ajoobaʼ ayóóʼííníʼníi doo índa aʼohgo ánítʼéego niDiyin God bił yíʼash doo.
9 Bóhólníihii éí kin haalʼáii yichʼįʼ chánahgo biinééʼ diitsʼaʼ áádóó diné éí nízhiʼ yidósingo hóyą́; tsihał índa éí niinítáanii bikʼeh dahonołʼı̨́.
10 Doo yáʼádaashóonii bee yódí shódaoztʼeʼii índa inaʼadloʼgo bee haʼiikaahí éí doo yildinii tʼahdiísh diné doo yáʼádaashóonii bighan góneʼ hólǫ́?
11 Bee dah nídiidlohí doo yáʼáshóonii índa dah naʼaloʼii binaʼadloʼgo azis biiʼ sinilii tʼáá bee dahólǫ́ǫgoósh doo ádaatʼéhígóó bá hadeesdzih?
12 Jó, diné daʼatʼíinii éí ádílááh biiʼ daahééł áádóó yił kéédahatʼíinii éí woochʼííd ádeiłʼı̨́ índa naʼadloʼ yee yádaałtiʼ.
13 Éí bąą atídanihishłéhígíí ałdóʼ bikʼee nihitah doo dahatsʼíid da doo, índa ádił nidaʼayohsííh biniinaa nihinaagi doo siláhígóó ádeeshłííł.
14 Daʼooyą́ąʼ nidi, doo hwiih dadohłeeł da áádóó tʼáá dichin danihiiłhée doo áádóó tʼáadoo leʼé hashtʼeʼnidasooláa nidi, doo áá dasoohsįįd da doo índa hashtʼeʼnidasooláhígíí diltłish bee nihighadadoolyééł.
15 Kʼidadiʼdohłéeł nidi, doo daʼdoohhish da áádóó áliv bineestʼąʼ bikʼi nidoohkahgo bikʼah bąąh hadahidoohnihgo doo bee adadidoołtłah da índa chʼil naʼatłʼoʼii bikʼi nidoohkah, nidi wáin doo dadoohdlı̨́įł da.
16 Háálá Ámri* yee nihwiizʼáanii áádóó Éíhab bighandóó baa naʼaldeehii kótʼéego daaníinii bidaʼołʼı̨́įgo bikʼeh dayínóhkááh; éí bąą kintsʼiil tʼéiyágo ándeeshłííł índa niiʼ kéédahatʼíinii nihídaʼdiłtsʼǫǫsgo ádeeshłííł; kótʼéego shidineʼé nohłíinii bee á nahatʼiʼii bił deínóhkáah doo.
Footnotes
^ Ízrel dineʼé aláahgo binanitʼaʼí. 1Kgs. 16:23-28.
