Micah 7:1-20
7 Dooládóʼ hojoobaʼ ádíshníi da! Shı̨́įgo neestʼáanii áádóó chʼil naʼatłʼoʼii bineestʼąʼ ahandayiijáahii nahonishłin; aneestʼąʼ doodı̨́įłii, doodaiiʼ shiiʼ sizíinii átsé neestʼáanii yídin nilíinii ádin.
2 Nahasdzáán bikáaʼgi Diyin God kʼehgo hináanii ásdįįd, áko diné bitahgi tʼáá ákogi átʼéii doo łaʼ naagháa da; tʼáá ałtso diné diyoolyéełgo bidił bitsʼádoonah biniyé ahéeshjééʼ; tʼááłáʼí nítínígo bikʼis danilíinii yee deidoolohii tʼéí hádaatʼı̨́.
3 Bílaʼ tʼáá ałchʼijí yee tʼáá bizááká tʼáá íiyisí doo yáʼáshóonii ádayoolííł; naatʼáanii áádóó ánihwiiʼaahii éí nályééh yókeed índa diné ayóó átʼéii tʼáá íiyisí doo yáʼáshǫ́ǫ́góó nitsíkeesii yee yáłtiʼ, áko doo yáʼáshǫ́ǫ́góó nidahaʼáii ahiih dayiiníiłgo yistłʼǫ́ nahalingo yaa naakai łeh.
4 Atisdi yáʼátʼééh nahalinii éí chʼil adishahiigi átʼé; aláahgo tʼáá ákogi átʼé nahalinii éí chʼil hooshahiigi átʼé; nihá hadaʼasíidii baa hodoolzhishii yee nihił dahoolneʼ yę́ę éí atínihiʼdiʼdoolníłígíí beiníłką́.
5 Nikʼis tʼáadoo baʼíínílíhí áádóó hánígo nikʼis nidi tʼáadoo baa dzíínílíhí; asdzání bił nániiłkáahii bitsʼąą nizaad baa áhólyą́.
6 Háálá ayeʼ nilíinii bizhéʼé doo bił nilı̨́į da áádóó achʼéʼé nilíinii bimá yikʼijįʼ nilı̨́ índa azhááʼáád nilíinii éí yizhááʼáád nilíinii yikʼijįʼ nilı̨́; diné éí tʼáá bighandóó biʼanaʼí hólǫ́.
Bóhólníihii éí adinídíín áádóó yisdáʼdoonił yił níyá
7 Éí bąą shí éí Bóhólníihii bichʼįʼgo dídéeshʼįįł; Diyin God yisdáshiiłteehii bibaʼ áníshtʼée doo; shiDiyin God éí shididootsʼı̨́ı̨́ł.
8 Tʼáadoo shikʼijįʼ nílı̨́įgo nił nihoozhǫǫhí, shiʼanaʼí nílíinii, naaʼíígoʼgo náádideeshʼnah; chahałheeł sédáago Bóhólníihii shá adiníłdíin doo.
9 Bóhólníihii bichʼįʼ ádił asisziihígíí biniinaa yee hashkéii yee atíshiilaajįʼ haʼííníshníi doo, índa shá naʼakʼíyáłtiʼgo bee ádąąh dahosistʼánígíí shá yáʼátʼééh neheleeh; adinídíinjįʼ shił nidooʼashgo bitʼáá ákogi átʼéii yideestsééł.
10 Áko shiʼanaʼí jílíinii éí yizdoołtsééł áádóó, Háadish Bóhólníihii niDiyin God? shizhdííniidii tʼáá íiyisí yázdínóozįįł. Shoo, hodínéeshʼįįł; kʼad kintahgóó atiingi hashtłʼish bikʼi naʼaldeehígi átʼéego hakʼi niʼdooldah.
11 Nihikin hadaasʼá binaa ahéédaʼastłʼinii éí bijı̨́ áńdoolnííł índa hoodzooígíí bilááh nídoodzoh.
12 Éí bijı̨́ Asíriya kéyahdóó Ííjip kéyahgi kin hadaasʼáajįʼ índa Ííjip kéyahdóó Yofréítiiz tooh nílı̨́įjįʼ, tónteel dahiníyı̨́ı̨́dóó náánáłaʼ náádahiníyı̨́įjįʼ índa dził daníʼáádóó náánáłaʼ dził náádaníʼáajįʼ áádę́ę́ʼ nihaa hidookah.
13 Áádóó kéyahgi kéédahatʼíinii yaa nidaakaígíí biniinaa kéyah doo siláhí da hodooleeł.
Bóhólníihii éí Ízrel dineʼé yaa aʼááh niizı̨́ı̨́ʼ
14 Nidineʼé nííʼ danilínígíí, éí Dził Kármel bąąh tsin yílʼá ałníiʼgi kééhatʼíinii dibé nahalingo nitsihał binahjįʼ biʼiyísą́ągo íínísin; bíniʼdii ałkʼidą́ą́ʼ átʼéé nítʼééʼ yę́ęgi átʼéego Béíshan kéyahgi índa Gíliyad kéyahgi* daʼayą́ą doo.
15 Ííjip kéyahdę́ę́ʼ chʼínóhnééh yę́ędą́ą́ʼ tʼáá íʼiishłaii bikʼehgo álílee ayóó ádaatʼéii hachʼįʼ yitʼíní ádeeshłííł.
16 Ałʼąą dineʼé daʼiidoołtséełgo dabidziilii yaa yádadínóozįįł, áko bizééʼ dádadidoolnih, índa bijééhkał dadooleeł.
17 Tłʼiish nahalingo łeezh deildeeł doo, nihokááʼdóó chʼosh nahalingo bił nahazʼą́ą́dóó chʼídahaʼnéeh doo; Bóhólníihii nihiDiyin God yéédaaldzid doo índa nikʼee bił daayéeʼ doo.
18 Háísh Diyin God nílínígi átʼé? Éí bííʼ danilíinii yidziihígíí doo ákwii ádáátʼįįdii yá yóóʼiidiiʼaah índa bee hazʼáanii dayiitíihii yitis hidighááh. Doo hoolʼáágóó báháchįʼ da dooleeł, háálá aa aʼááh hasin bił hóshǫ́.
19 Nihaa aʼááh náádínóodzįįł; doo ákwii ádeiitʼįįdii yikʼeh didoodleeł áádóó yee ádił nidaʼiisíiʼii tónteel ditą́ą́ góyaa ahidííłtłʼił.
20 Ałkʼidą́ą́ʼ danihizhéʼé yę́ę bichʼįʼ ádee hadíínídzíiʼii bikʼehgo Éíbraham baa aʼááh díníízįįł, índa Jéíkab aʼahódlí baa didííʼááł.
Footnotes
^ Jórdan tooh haʼaʼaahjí kéyah.
