Nahum 1:1-15
1 Níneveh* bee bide áhodooníiłii Élkash hazʼą́ą́dę́ę́ʼ diné Néíham wolyéii bił ádzaii naaltsoos bikááʼ ályaa.
2 Diyin God łeʼnízin áádóó Bóhólníihii kʼééhidiʼnééh; Bóhólníihii kʼééhidiʼnéehgo hashké nídzingo atíʼéłʼı̨́. Bóhólníihii éí bikʼijįʼ danilíinii kʼéididoodlííł áádóó tʼóó báhádzidgo hashké nídzingo yee biʼanaʼí tʼéí atíidoolíiłgo hashtʼeyósin.
3 Bóhólníihii tąądee báháchįįh áádóó tsʼídá ayóó átʼéego bidziil índa tʼáá íiyisí doo yáʼáshónígi ádajíítʼįįdígíí doo tʼóó haididooʼáał da. Bóhólníihii éí náátsʼóʼoołdísii áádóó níyoltsoh bee bikʼeh hólǫ́ índa kʼosígíí éí bikétłʼááhdóó łeezh dibahí adiijoołii átʼé.
4 Tónteel néiditehgo nínéíłtsih, índa tooh danílíinii ałtso nínádeiłtsih. Béíshan kéyahgi áádóó Dził Kármelgi ałtso dahazgan. Dził Lébanangi chʼilátah hózhóón bił dahazgango bił yóóʼahóóyá.
5 Bóhólníihii binááł dził nídahidiʼnááh, áádóó dah daaskʼid dahidiłhı̨́ı̨́h, índa binááł nahasdzáán de áńdaatʼįįh. Tʼáá aaníí, nahasdzáán áádóó yikááʼ kéédahatʼíinii ákónídaatʼįįh.
6 Doo hashtʼéʼégóó báháchįįhgoshąʼ háí bidááhdóó yidoozįįłgo yíneelʼą́? Doo chohooʼı̨́ı̨́góó báhóóchįįdgoshąʼ háí yíníłdzilgo yíneelʼą́? Kǫʼ nahalingo yee hashké nídzinii naanídzoosxih áádóó tsé ałtsʼádahadlaadgo áyoolííł.
7 Bóhólníihii joobaʼ. Achʼįʼ nahwiiʼnáago yoołkáałgi bineʼ naʼadziʼii nilı̨́ índa biniitʼaa dahinichéehii yééhósin.
8 Nidi tó yíląądgo wóʼądadziiłhaałgo yee ałtso niʼdiyoołchxǫǫł áádóó chahałheeł góneʼ biʼanaʼí iidínóołkał.
9 Haʼátʼíishąʼ bee Bóhólníihii bindahohgiz? Bí tʼéiyá bíniikʼehgo nihodoogáałgo doo naakidi achʼįʼ nináhodiyooʼnaał da.
10 Chʼil deeníní ałtaaneesdiz nahalingo índa adláanii nídadíʼnéesdlą́ʼígíí nahalingo ehégod daazganii adoolkʼą́ʼígi átʼéego ádabidiʼdooldįįł.
11 Nihitsʼą́ą́dóó chʼíníyáii éí Bóhólníihii yikʼijįʼ doo yáʼátʼééhgóó nahaʼá. Éí kótʼé níinii doo yáʼáshóonii nilı̨́.
12 Bóhólníihii kóní, Azhą́ bił dahodéesyéel nidi, índa tʼóó ahojíyóí nidi, ałtso ádahodiʼdooldįįłgo hoł yóóʼahodoogááł. Azhą́ atínihishʼı̨́ı̨́ nítʼééʼ nidi, doo atínáánihideeshdlíił da.
13 Háálá kʼad biʼazéédéetı̨́hí nąąh kʼídeeshtih, áádóó bee dah nidiistłʼóonii kʼídeeshnish.
14 Nízhiʼ doo bee náániʼdójíigo oochíił da dooleełígíí áádóó nidiyin dabidiʼníinii bá kin siʼą́ągi edaʼalyaii bikʼi nidaʼashkʼaazhii áádóó edaʼalyaii nídadoolyı̨́įʼii ałtso ádeeshdįįł. Jishchááʼ ná áhodeeshłííł, háálá tsʼídá tʼáá íiyisí tʼóó baaʼihii nílı̨́, níigo Bóhólníihii ná haadzííʼ.
Níneveh kin haalʼá ádoodįįłgo baa haneʼ
15 Dziłghą́ąʼdi haneʼ baa hózhóonii éí bee hózhǫ́ náhoodleełii yaa halneʼii bikeeʼ níníłʼı̨́! Dooládóʼ Júdah dineʼé nohłíinii, hodílzingo áłah nídaohdleehii hazhóʼó ádeínóhsin; bee ádee hadahidohdziihii bidaʼíínóhsin. Háálá doo yáʼádaashóonii yę́ę ádabidisdįįdgo tsʼídá doo nihikʼi nináádookah da.
Footnotes
^ Ízrel dineʼé biʼanaʼí Asíriya dineʼé binahatʼá bá hooghangi kin haalʼá. Is. 10:5-34; 14:24-27; Zeph. 2:13-15.
