Nahum 2:1-13
2 Adiséii nichʼįʼ nínáádiibaaʼ. Bineʼ naʼadziʼii hazhóʼó baa ádahołyą́; deínóhkááhgóó hadaʼísídółʼı̨́ı̨́ʼ; bee áká dasoołzaazígíí bidziilgo ádaahłééh; ayóó átʼéego nihibee adziilii bee nihitsʼádahazyéeʼgo ídaʼdołnééh.
2 Jó, Bóhólníihii éí Ízrel dineʼé yee ayóó átʼéii yę́ęgi átʼéego Jéíkab dineʼé yee ayóó átʼéii hashtʼeilééh. Háálá tʼáá ákohígo nidaʼiiníiłii tʼáá ákohígo nidabiiznil áádóó bichʼil naʼatłʼoʼii bitsʼádaozʼaʼ nidayiishchxǫʼ.
3 Bisiláo ayóó ádabóodziilii binaageʼ daalchíiʼgo ádaalyaa. Diné doo nídanilyéesii biʼééʼ daalchxííʼ. Hashtʼeʼhodiidzaa bijı̨́ı̨́ góneʼ tsindaabąąs bijáád naakiígíí bikʼi dazdéedlaad áádóó tsin sáípras wolyéii bee tsiidétáán ádaalyaii daditsxiz.
4 Kintah nidaʼaztiingóó tsindaabąąs bijáád naakiígíí ayóogo bił deíjeeh. Hóteelgo daʼnítiingóó ahínídadeelwoʼgo bił deíjeeh. Honooyééł jidoonił nidahalin. Atsiniltłʼish anídahataʼ nahalingo deíjeeh.
5 Bihashkééjí naatʼááh danilíinii yénálniih. Deíkáahgo nídadigoh. Ditą́ągo binaa ahééʼítłʼiníjįʼ tsxı̨́ı̨́ł daazlı̨́ı̨́ʼ. Nidi bineʼ naʼadziʼii tʼáá íídą́ą́ʼ hashtʼeelyaa.
6 Tooh danílíinii bidádadeeztáanii ąą ádaalyaa, áko aláahgo naatʼáanii bikin nídííʼéél.
7 Áko asdzą́ą́ naatʼááh dah bidiʼdiidlóozgo bidisʼná. Hasbídí ádaanínígi átʼéego biʼatʼééké daachago biyid nídeiniłtsʼin.
8 Níneveh kin haalʼá éí tʼáá náshiinídą́ʼídi tó siyı̨́ nahalingo hazʼą́ą nidi, tʼáá ałtso éí yitsʼą́ą́ʼ dah diijééʼ. Nidasoozínéii, nidasoozínéii, chʼééh deiłníigo daachxa, nidi tʼáadoo tʼą́ą́ʼ nídadéestʼı̨́ʼí aheezhjééʼ.
9 Béésh łigaii daałnééh, óola ałdóʼ daałnééh, háálá bee atʼíinii tsʼídá tʼóó ahayóí ayóó átʼéego baa hózhóonii doo óodįįh átʼéégóó hólǫ́.
10 Kin haalʼáagi hólóonii ałtso nídahasdlááʼ áádóó doo yiilaʼí da, índa kin haalʼáhígi doo siláhí da. Áko bijéí bąąh náádahakaʼ. Bitah dahoditłidgo bigod ahídadínídah. Tʼáá ałtso binííʼ gónaa daneezgai. Tʼáá ádzíłtso dajiichxiiʼ daznoosʼnííʼ.
11 Háadishąʼ náshdóítsoh bitsiijįʼ daditłʼooígíí aʼáán shijééʼ? Áadi náshdóítsoh bitsiijįʼ daditłʼooígíí biyázhí yaʼaltsoʼ. Ákwii lá náshdóítsoh bitsiijįʼ ditłʼooígíí áádóó biʼáadii índa biyázhí doo yéédaaldzidígóó naakai.
12 Náshdóítsoh bitsiijįʼ ditłʼooígíí éí kódaníshéhígo biyázhí yá niʼiiníísh áádóó naaldlooshii yizákʼídeidiyiiníihgo dabiʼádígíí yá niiníyı̨́. Haashzheeʼii dabiʼáán góneʼ bee ídaʼazįįdgo áyiiłʼįįh áádóó yíkaashzheeʼii dabiʼáán góneʼ áłah áyiiłʼįįhgo bee ídaʼazįįd.
Níneveh kin haalʼá ałtso ádoodįįł
13 Tʼáá ałtsoní bee Bóhólníihii kóní, Nihikʼijįʼ nishłı̨́, áádóó łid hahíítı̨́įgo hatsindaabąąs bijáád naakiígíí adadideeshkʼą́ą́ł, jóʼakon. Áko nihináshdóí yáázh bitsiijįʼ daditłʼooígíí diltłish bee ałtso deeshhą́ą́ł, áádóó nihokááʼgóó hadaołzheehii ałtso ádeeshdįįł, índa nihá nidaalʼaʼí biinééʼ doo náádadiitsʼaʼ da doo.
