Nahum 3:1-19
3 Kintahgóó diné nideiłtseedgo bidił nihidadíchxiiʼgo ádeiileʼii bichʼįʼ doo hojoobaʼ ájíníi da! Doo chohooʼı̨́ı̨́góó dabiyoochʼííd áádóó daʼniʼįįh. Aghaʼílyé doo yikʼi dókááh átʼée da.
2 Doo hodooyeeł átʼéégóó łı̨́ı̨́ʼ yídeiznéełtsxáás áádóó tsindaabąąs bijáád ayóogo dadiitsʼaʼ áádóó łı̨́ı̨́ʼ behétłʼiin yéego dadiitsʼaʼ índa tsindaabąąs bijáád naakiígíí bił dah nídeiʼaahgo bił deíjeeh.
3 Diné éí łı̨́ı̨́ʼ yee nidaabaahii diltłish bikʼi nidazdidlaadii áádóó tsiidétáán bitsʼádahojilgishii tʼáá áłah yił dah dadéelnííh. Diné tʼóó ahayóí nideistseed áádóó dabitsʼíís doo jóołtaʼ ánéelą́ą́ʼ átʼéégóó nihidadílʼáago ádayiilaa. Atsʼíís niheelʼáhígíí yiniinaa dahidigeeh.
4 Háálá ałjiłnii agháago baa dzólníinii biʼajił ląʼígóó yee iʼiiłjił áádóó iiníziin yee nantʼáago biʼajił yee nihokááʼ dineʼé baa nahaniih índa iiníziin yee ałkʼéí danilíinii baa nahaniih.
5 Tʼáá ałtsoní bee Bóhólníihii kóní, Nihikʼijįʼ nishłı̨́, jóʼakon. Nitłʼaakał niniiʼjįʼ bikʼístiʼgo ádeeshłííł, áko ałʼąą dineʼé bichʼįʼ tʼáá łiníchíʼígo áńdeeshłííł, índa bee íhólníihgo bił nahazʼáanii bichʼįʼ tʼóó naa yáhásin doo.
6 Nádı̨́ʼídi tsʼídá tʼóó baaʼihii nikʼijįʼ ádeeshłííł, áádóó tʼóó naaʼihgo ándeeshłíiłgo baaʼihii bee nidiʼnílʼı̨́į doo.
7 Éí ákódzaadóó bikʼijįʼ daniníłʼíinii tʼáá ałtso nitsʼą́ąjįʼ dah didoojahgo ádadidooniił, Níneveh kin haalʼáii tʼáá ádzaaí silı̨́ı̨́ʼ. Háishąʼ yaa yicha dooleeł? Háadishąʼ nikʼi dahałtaʼ dooleełii łaʼ ná hadínéeshtaał?
8 Daʼ kin haalʼáii No-Éíman hoolyéii biláahgoósh yáʼánítʼééh? Éí tooh danílínígíí bitahgóó kin haalʼá binaa tsé ahénátłʼinii nahalingo tó binídaazlı̨́; tónteel bibineʼ naʼadziʼ índa bichʼą́ą́h náádiidááh.
9 Iithiyópiya áádóó Ííjip bidziil ábósin áádóó doo nineełnéeh da. Put áádóó Lúbim níká anáʼahinilchééh nítʼééʼ.
10 Azhą́ ákótʼée nidi, abiʼdoodlóozgo yisnááh ábiʼdiilyaa. Baʼáłchíní yázhí ałdóʼ kintaa daʼaztiingóó nihídabiʼdeestsxisgo dahidiitaaʼ. Diné hoł danilíinii bá yááʼiiltʼeʼ yaa naaskai, índa hadineʼé ayóó ádaatʼéii tʼáá ałtso béésh daʼahólzhaʼí yee dah dayiiztłʼǫ́.
11 Ni ałdóʼ nił nahondooh doo; doo yínítʼı̨́į da doo; anaʼí biniinaa áká iʼdoolwoł ałdóʼ hánítʼı̨́į dooleeł.
12 Bidziilgo bineʼ nidaʼadziʼii tʼáá ałtso éí fig naazkaadii átsé fig bąąh daneestʼáanii nidahalin. Yigáadgo ayáanii tʼóó bizahindéeh dooleeł.
13 Nihitahgi nidineʼé éí sáanii nahalin daazlı̨́ı̨́ʼ. Nikéyahgi aańʼdaʼditı̨́įhii niʼanaʼí danilíinii bá ąą ádaatʼé. Dáńʼdaʼditı̨́įhgo bichʼą́ą́h dah nídaatı̨́hígíí ałtso adahideeskʼą́ą́ʼ.
14 Niʼnídoolzhish biniyé tó choiníłʼı̨́į dooleełii hashtʼenilééh. Bineʼ nandziʼ dooleełii hashtʼenilééh. Hashtłʼish taonihgo bis ádanileʼ áádóó bis nitłʼiz dooleeł biniyé bis daniłtʼees.
15 Ákweʼé adadidoohkʼą́ą́ł; diltłish bee ánihidoołdįįł. Éí nahachagiitsoh ayánígi átʼéego ánihidoołdįįł. Nahachagiitsoh kʼeeʼąą nídílzhishígi átʼéego kʼeeʼąą dínóhtʼįįh. Nahachagiitsoh naanááséełii kʼeeʼąą nootʼı̨́łígi átʼéego kʼeeʼąą dínóhtʼįįł.
16 Yádiłhił biyiʼdi sǫʼ yílʼáhígíí biláahgo naalyéhé naa nahaniihii tʼóó ahayóí áálííł nítʼééʼ. Nahachagiitsoh yaa nahodeeskaigo anoodaaʼ.
17 Nahachagiitsoh ánéelą́ʼígi átʼéego ninaatʼáanii ákónéelą́ą́ʼ, áádóó ná aląąjįʼ naazíinii éí nahachagii naanááséełii nidahalin. Éí honiikʼasgo tsé deítłʼinii yitátʼah anídaaʼnahgo, haʼaʼáahgo tʼóó ałtso yóóʼiilyis, áko daazlı̨́ı̨́ʼgóó doo bééhózin da.
18 Asíriya dineʼé aláahgo binanitʼaʼí nílíinii, ninaʼniłkaadii tʼóó daʼałhosh. Nidineʼé bindantʼáii tʼóó naazhjééʼ. Nidineʼé éí dziłghą́ą́ʼgóó ałtso tadaoskai, índa tʼáadoo áłah ánábódleʼí da.
19 Tídadíínínáanii tʼáadoo ná náyółdziihí da. Tídinilyaii tʼáá íiyisí átʼé. Naa dahodiitsʼaʼígíí tʼáá ałtso naa tsʼííd danízingo ahídaakadgo bił dahózhǫ́ǫ dooleeł. Háálá nidoo yáʼáshǫʼ tʼáá náás yitʼihgo diné tʼáá ałtso atíyiilaa.
