Nehemiah 1:1-11
1 Hakaláíyah biyeʼ Niihemáíyah díí saad yee hahaasdzííʼ.
Naadiin náhááh góneʼ Kízlev yiziłígíí binih Shúshan kin haalʼáagi aláahgo naatʼáanii bighan góneʼ sédáago
2 shikʼis łaʼ Hanéínai wolyéii Júdah kéyahdę́ę́ʼ diné łaʼ yił shaa yíkai, áádóó Jew dineʼé biʼdisnáádóó łaʼ béédaʼiisniiʼígíí áádóó Jerúsalem kin haalʼáadi áhootʼéhígíí bínaʼídééłkid.
3 Áádóó ádashidííniid, Yisnááh danilı̨́ı̨́ nítʼééʼ yę́ę daadziihígíí ninádahaasʼnáanii éí kéyah hazʼą́ądi ayóó átʼéego bichʼįʼ nidahwiiʼná áádóó bá nidahatʼiʼ; Jerúsalem ditą́ągo binaa ahééʼítłʼinígíí naaʼadahineezkaad áádóó bidáńʼdaditı̨́ı̨́h yę́ę adahideezkʼą́ą́ʼ.
4 Ákódzaadóó kótʼéego shił hóóneʼgo nédá áádóó yícha áádóó baa yínííł nishłı̨́įgo tʼáá díkwíhí yiską́, áádóó hodíínísingo chʼiyáán atsʼádinishtʼą́ índa Diyin God yáʼąąshdi hólóonii bichʼįʼ sodeeszingo
5 ádíshní, Bóhólníihii Diyin God yáʼąąshdi honílóonii, nánooshkąąh; ayóó átʼéii áádóó tʼáá íiyisí bitsʼąą hastiʼii nílíinii, Diyin God éí bee ahaʼdeetʼáanii áádóó aa aʼááh hasin ayóóʼádanóʼníigo bibikʼeh óʼooʼníiłii yikʼeh dahółʼíinii yá hashtʼeyósinii nílíinii,
6 kʼad hazhóʼó ííníłtsʼą́ąʼgo díníʼı̨́ı̨́ʼ, áko ná naalʼaʼí nishłíinii Ízrel dineʼé bił nichʼįʼ ádił nidaʼayeelzíiʼii bee nił hashneʼgo Ízrel dineʼé ná naalʼaʼí danilíinii kʼad tʼáá ákwíí jı̨́ índa tʼáá ákwíí tłʼééʼ bá nichʼįʼ sonídíszįįhígíí yíísíníłtsʼą́ą́ʼ; shí áádóó shizhéʼé yę́ę baʼáłchíní daʼahílchíihii bił ádił nidaʼayeelzííʼ.
7 Nichʼįʼ tʼáá íiyisí tʼóó baaʼihígi ádeiitʼįįd; nibikʼeh óʼooʼníiłii áádóó bee nihodiyíníʼáanii índa nibee nihodiitʼaahii Mózes bichʼįʼ bee hahíínídzíiʼii doo bikʼeh dahoniilʼı̨́į da nítʼééʼ.
8 Díí béénílniih doo, baa nánooshkąąh: ná naalʼaʼí Mózes bichʼįʼ bee hahíínídzííʼ, Doo ákǫ́ǫ́ ádaohtʼı̨́ı̨́góogo ałʼąą dineʼé bitahgóó tanihidínéeshkał,
9 nidi shaa nánoohkaigo áádóó shibikʼeh óʼooʼníiłii bikʼeh dahonołʼı̨́įgo áádóó bidaʼołʼı̨́įgo azhą́ nihí łaʼ yá kʼáshbąąhgóó tanihidiʼnooskaad nidi, áádę́ę́ʼ áłah ánáhodeeshdlíiłgo ákwii shiʼdójíigo ádeeshłíiłgo náhodiiʼáníjįʼ ahodeeshʼish.
10 Kʼad díí ná naalʼaʼí áádóó nidineʼé éí nibee adziilii bee áádóó nigaan bidziilii bee bikʼé nináʼíínídláii danilı̨́.
11 Bóhólníihii nílíinii, díí baa nánooshkąąh: ná naalʼaʼí nishłíinii áádóó ná naalʼaʼí danilíinii, nízhiʼ baa nihił dahózhǫ́ǫgo dadíníilzinii hazhóʼó nihisodizin nihá diitsʼı̨́ı̨́h áádóó índa ná naalʼaʼí nishłíinii díí jı̨́ díí hastiin shaa aʼáhí dínóozįįłgo shá yáʼátʼéehgo ádíílíłígíí biniyé nichʼįʼ sodeeszin.
Niihemáíyah éí Jerúsalemgóó biʼílniiʼ
Jó, aláahgo naatʼáanii bibee adlání bee banáʼáshkááh nítʼééʼ.
