Nehemiah 11:1-36
11 Diné binanitʼaʼí danilíinii Jerúsalem kin haalʼáagi kéédahatʼı̨́ı̨́ nítʼééʼ; diné łahjįʼígíí yááʼiiltʼeʼ yaa naaskaigo diné neeználtʼéhígíí tʼááłáʼí bitsʼádooltéełgo éí dílzingo kin haalʼáagi Jerúsalemgi kééhatʼı̨́į doo áádóó diné náhástʼéltʼéhígíí éí náádaałahgóó kin hadaasʼáágóó kéédahojitʼı̨́į doo.
2 Ízrel dineʼé éí diné tʼáá bí ádeinízingo Jerúsalemgi kéédahatʼı̨́į dooígíí tʼáá ałtso yaa dahaznih.
3 Kéyah nahósʼaʼdóó díí diné aláahgo bídahólníhígíí Jerúsalemgi kéédahatʼı̨́, nidi Júdah kéyahdi kin hadaasʼáágóó tʼááłáʼí jinítínígo tʼáá hó hakin hadaasʼáagi hwee dahólóonii biiʼ kéédahojitʼı̨́ı̨́ nítʼééʼ; éí Ízrel dineʼé danilíinii áádóó náádaʼiiłniihii áádóó Líívai dineʼé áádóó Néthinim wolyéii índa Sálaman bá nidaalʼaʼí yę́ę bitsʼą́ą́dóó daʼahílchíihii ałdóʼ ákǫ́ǫ́ kéédahatʼı̨́ı̨́ nítʼééʼ.
4 Áko Jerúsalemgi Júdah áádóó Bénjamin baʼáłchíní ahoolchíiłii łaʼ kéédahatʼı̨́. Júdah baʼáłchíní ahoolchíiłii éí díí: Píírez baʼáłchíní ahoolchíiłii łaʼ, Mahéílalíyel biyeʼ Shefatáíyah, éí biyeʼ Amaráíyah, éí biyeʼ Zekaráíyah, éí biyeʼ Azáíyah, éí biyeʼ Atháíyah wolyéii ákwii kééhatʼı̨́,
5 índa Shilónai biyeʼ Zekaráíyah, éí biyeʼ Jóíyarib, éí biyeʼ Adéíyah, éí biyeʼ Hazéíyah, éí biyeʼ Kolhózeh, éí biyeʼ Bérak, éí biyeʼ Méíyasíyah wolyéii ákwii kééhatʼı̨́.
6 Píírez baʼáłchíní ahoolchíiłii Jerúsalemgi kéédahatʼı̨́ı̨́ nítʼéʼígíí éí dı̨́įdi neeznádiindóó baʼaan hastą́diindóó baʼaan tseebíí diné ánéelą́ąʼgo doo nídanilyéesii danilı̨́ı̨́ nítʼééʼ.
7 Nááʼákóneʼ Bénjamin baʼáłchíní ahoolchíiłii éí Jiiséíyah biyeʼ Íthiyel, éí biyeʼ Méíyasíyah, éí biyeʼ Koléíyah, éí biyeʼ Piidéíyah, éí biyeʼ Jówed, éí biyeʼ Miishálam, éí biyeʼ Séílu wolyéii ákwii kééhatʼı̨́;
8 éí bikéédę́ę́ʼ Gábeiyai índa Sáleiyai éí náhástʼéidi neeznádiindóó baʼaan naadiin tseebíí ánéelą́ą́ʼ.
9 Zíkrai biyeʼ Jówel éí honanitʼaʼí nilı̨́ı̨́ nítʼééʼ; Siinúwah biyeʼ Júdah éí akééʼ góneʼ kin haalʼáhígi dineʼé yinantʼáá nítʼééʼ.
10 Náádaʼiiłniihii łaʼ: Jóíyarib biyeʼ Jedéíyah áádóó Jéíkin.
11 Aháítab biyeʼ Miiréíyath, éí biyeʼ Zéídak, éí biyeʼ Miishálam, éí biyeʼ Hilkáíyah, éí biyeʼ Siiréíyah wolyéii éí Diyin God bikin siʼą́ą́dóó aláahgo bóhólníhígíí nilı̨́.
12 Dabikʼisóó kin biiʼ sohodizin siʼą́ągi nidaalnishígíí éí tseebíidi neeznádiindóó baʼaan naadiin naaki ánéelą́ą́ʼ, áádóó Malkáíyah biyeʼ Pásher, éí biyeʼ Zekaráíyah, éí biyeʼ Ámzai, éí biyeʼ Pelaláíyah, éí biyeʼ Jiiróham, éí biyeʼ Adéíyah wolyéii,
13 áádóó bikʼisóó éí daʼazhéʼé aláahgo bídahólníhígíí éí naakidi neeznádiindóó baʼaan dízdiindóó baʼaan naaki ánéelą́ą́ʼ, índa Ímer biyeʼ Miishíliimath, éí biyeʼ Ahéísai, éí biyeʼ Azéíriyel, éí biyeʼ Amásheiyai wolyéii,
14 áádóó dabikʼisóó diné ayóó ádabóodziilii doo nídanilyéesii éí tʼááłáhídi neeznádiindóó baʼaan naadiin tseebíí ánéelą́ą́ʼ; diné ayóó ádaatʼéii łaʼ biyeʼ Zábdiyel wolyéii honantʼáá nítʼééʼ.
15 Líívai dineʼé ałdóʼ łaʼ: Bánai biyeʼ Hashabáíyah, éí biyeʼ Ázrikam, éí biyeʼ Háshab, éí biyeʼ Shiiméíyah wolyéii,
16 áádóó Líívai dineʼé aláahgo bídahólníhígíí łaʼ Shábiithai índa Jázabad éí Diyin God bikin siʼánídóó tʼáá tłʼóóʼjí nidaʼanishígíí yinantʼáá nítʼééʼ.
17 Éísaf biyeʼ Zábdai, éí biyeʼ Máíka, éí biyeʼ Matanáíyah wolyéii hó éí alą́ąjįʼ ahééh hwiindzingo sodilzin; bikééʼ góneʼ Bakbakáíyah, éí bikʼisóó danilíinii bitahgi naaki góneʼ sizı̨́ı̨́ nítʼééʼ, índa Jedúthan biyeʼ Géílal, éí biyeʼ Shamúwa, éí biyeʼ Ábda wolyéii ałdóʼ íjóltąʼ nítʼééʼ.
18 Diyingo kin haalʼáagi Líívai dineʼé danilíinii éí naakidi neeznádiindóó baʼaan tseebídiindóó baʼaan dı̨́ı̨́ʼ ánéelą́ąʼgo kééhatʼı̨́ı̨́ nítʼééʼ.
19 Nááʼákóneʼ dáádílkał yaa ádahalyáanii Ákab áádóó Tálman índa dabikʼisóó danilíinii dáádílkał yaa ádahalyáanii éí tʼááłáhídi neeznádiindóó baʼaan tsostsʼidiindóó baʼaan naaki ánéelą́ą́ʼ.
20 Áádóó łahjįʼ Ízrel dineʼé áádóó náádaʼiiłniihii índa Líívai dineʼé tʼááłáʼí nítínígo Júdah kéyahgi tʼáá ałtso kin hadaasʼáágóó bííʼ daazlı̨́įʼgi kéédahatʼı̨́.
21 Nidi Néthinim wolyéii éí Ófel deílkʼidgi kéédahatʼı̨́ı̨́ nítʼééʼ áádóó Záíha índa Gíspa éí Néthinim dineʼé yinantʼáá nítʼééʼ.
22 Máíka biyeʼ Matanáíyah, éí biyeʼ Hashabáíyah, éí biyeʼ Béínai, éí biyeʼ Ázai wolyéii éí Jerúsalemgi ałdóʼ Líívai dineʼé yinantʼáago Éísaf baʼáłchíní ahoolchíiłii sin yee dahataałii łaʼ nilı̨́įgo Diyin God bikin siʼánígi nidaʼanishígíí yinantʼáá nítʼééʼ.
23 Aláahgo naatʼáanii díí yee haadzííʼ: sin yee dahataałii éí dayíłkiinii tʼáá ákwíí jı̨́ bá ninádajiʼnił.
24 Júdah biyeʼ Zíírah baʼáłchíní ahoolchíiłii łaʼ Miishézabiil biyeʼ Pethaháíyah éí diné bídadéétʼiʼii tʼáá ałtso aláahgo naatʼáanii bee bił hojilneʼ nítʼééʼ.
Jerúsalem kin haalʼá binaagóó kéédahatʼíinii
25 Índa kin dah naazhjaaʼgóó áádóó binaagóó nidahósʼaʼígíí tʼáá bił ákǫ́ǫ́ Júdah dineʼé łaʼ éí Kírjath-árba kin haalʼáadi índa binaagóó kin naazhjaaʼgóó kéédahatʼı̨́ı̨́ nítʼééʼ áádóó Dáíban kin haalʼáadi índa binaagóó kin naazhjaaʼgóó áádóó Jiikábziyel kin haalʼáadi índa binaagóó kin naazhjaaʼgóó kéédahatʼı̨́ı̨́ nítʼééʼ,
26 nááʼákóneʼ Jéshuwa áádóó Móladah áádóó Beth-péílet
27 áádóó Héízar-shúwal áádóó Bíyer-shííba kin hadaasʼáágóó índa dabinaagóó kin naazhjaaʼii tʼáá bił,
28 áádóó Zíklag áádóó Miikónah kin haalʼáadi índa binaagóó kin naazhjaaʼii tʼáá bił ákǫ́ǫ́ kéédahatʼı̨́ı̨́ nítʼééʼ
29 áádóó En-ríman áádóó Zaríyah áádóó Jármath
30 áádóó Zanówah áádóó Adálam kin hadaasʼáágóó índa binaagóó kin naazhjaaʼii tʼáá bił; Léíkish kin haalʼáadi áádóó binaa nahósʼaʼgóó; Azííkah kin haalʼáadi índa binaagóó kin naazhjaaʼii tʼáá bił. Áko Bíyer-shííba kin shijaaʼdóó níléí Hínam yíldzis góyaajįʼ kéédahatʼı̨́ı̨́ nítʼééʼ.
31 Bénjamin baʼáłchíní ahoolchíiłii ałdóʼ Gííba, Míkmash, Eiyáíja índa Béthel kin hadaasʼáágóó áádóó binaagóó kin naazhjaaʼgóó kéédahatʼı̨́ı̨́ nítʼééʼ,
32 nááʼákóneʼ kin hadaasʼáhígíí Ánathath, Nob, Ananáíyah,
33 Héízar, Réímah, Gíteiyim,
34 Héídid, Ziibówim, Niibálat,
35 Lad áádóó Óno índa honítsʼaaʼ, éí diné daʼiichįįhii kéédahatʼı̨́įgi kéédahojitʼı̨́ı̨́ nítʼééʼ.
36 Ákohgo Líívai dineʼé éí Júdah kéyahdi kéédahatʼı̨́ı̨́ nítʼééʼ yę́ę łaʼ Bénjamin bikéyahdi kéédahatʼı̨́ı̨́ nítʼééʼ.
