Nehemiah 12:1-47
12 Ákohgo díí nááʼiiłniihii áádóó Líívai dineʼé danilı̨́įgo éí Shiyáltiyel biyeʼ Zerábabel áádóó Jéshuwa yił ákóde yíkai: Siiréíyah, Jeremáíyah, Ézra,
2 Amaráíyah, Málak, Hátash,
3 Shekanáíyah, Rííham, Mériimath,
4 Ído, Gíniitho, Abáíjah,
5 Máíyamin, Meiyadáíyah, Bílgah,
6 Shiiméíyah, Jóíyarib, Jedéíyah,
7 Séílu, Éímak, Hilkáíyah índa Jedéíyah daolyé. Díí éí Jéshuwa bíyoołkááłdą́ą́ʼ náádaʼiiłniihii áádóó dabikʼisóó yiláahgo bídahólnííh nítʼééʼ.
8 Líívai dineʼé danilínígíí éí díí: Jéshuwa, Bínuwai, Kádmiyel, Sheriibáíyah, Júdah índa Matanáíyah; éí bikʼisóó yił ahééh hwiindzin bee bídahólnííh nítʼééʼ.
9 Nááʼáłdóʼ Bakbakáíyah índa Ánai éí dabikʼisóó binaashiijí naazı̨́įgo ahééh daznízingo nidahojiłáá nítʼééʼ.
10 Jéshuwa éí Jóíyakim há yizhchı̨́, Jóíyakim éí Iiláíyashib há yizhchı̨́, Iiláíyashib éí Jóíyada há yizhchı̨́,
11 Jóíyada éí Jánathan há yizhchı̨́ índa Jánathan éí Jeidúwa há yizhchı̨́.
12 Jóíyakim bíyoołkááłdą́ą́ʼ náádaʼiiłniihii éí daʼazhéʼé aláahgo bídahólnííh nítʼéʼígíí éí díí: Siiréíyah bitsʼą́ą́dóó Miiráíyah, Jeremáíyah bitsʼą́ą́dóó Hananáíyah,
13 Ézra bitsʼą́ą́dóó Miishálam, Amaráíyah bitsʼą́ą́dóó Jiihohéínan,
14 Málak bitsʼą́ą́dóó Jánathan, Shebanáíyah bitsʼą́ą́dóó Jóseph,
15 Héírim bitsʼą́ą́dóó Ádna, Miiréíyath bitsʼą́ą́dóó Helkéíyai,
16 Ído bitsʼą́ą́dóó Zekaráíyah, Gíniithan bitsʼą́ą́dóó Miishálam,
17 Abáíjah bitsʼą́ą́dóó Zíkrai, Mowadáíyah áádóó Mínyamin bitsʼą́ą́dóó Píltai,
18 Bílgah bitsʼą́ą́dóó Shamúwa, Shiiméíyah bitsʼą́ą́dóó Jiihánathan,
19 Jóíyarib bitsʼą́ą́dóó Matiinéíyai, Jedéíyah bitsʼą́ą́dóó Ázai,
20 Sáleiyai bitsʼą́ą́dóó Káleiyai, Éímak bitsʼą́ą́dóó Ííber,
21 Hilkáíyah bitsʼą́ą́dóó Hashabáíyah, Jedéíyah bitsʼą́ą́dóó Niithániyel.
22 Iiláíyashib, Jóíyada, Johéínan índa Jeidúwa bídayééłkaahdą́ą́ʼ Líívai dineʼé éí dabizhéʼé aláahgo bídahólníhígíí dabízhiʼ naaltsoos bikááʼ ádaalyaa; náádaʼiiłniihii ałdóʼ, éí Pérzha dineʼé aláahgo yinanitʼaʼí Daráíyas nantʼá silı̨́įʼjįʼ daházhiʼ ádaalyaa.
23 Líívai dineʼé dabizhéʼé aláahgo bídahólníhígíí éí Iiláíyashib binálí Johéínan bíyoołkááł nítʼééʼ yę́ęjįʼ naaltsoos Kránikals wolyéii bikááʼ dabízhiʼ ádaalyaa.
24 Líívai dineʼé aláahgo bídahólníhígíí éí díí: Hashabáíyah, Sheriibáíyah áádóó Kádmiyel biyeʼ Jéshuwa éí Diyin God baa nídahojiʼnih doo índa ahééh daznízin doo biniyé dabikʼisóó yił ahidiníłnaashii nídeidzįįh; éí yówehdę́ę́ʼ David tʼáá hó Diyin God bitsʼą́ą́dóó diné jílíinii hadzoodzíiʼii bikʼehgo ałnaashii chodaoʼı̨́ı̨́ nítʼééʼ.
25 Matanáíyah, Bakbakáíyah, Obadáíyah, Miishálam, Tálman índa Ákab díí éí dáńdaʼditı̨́ı̨́h bíighahgi yódí bá dahooghan baa ádahojilyą́ągo dáádílkał yaa áhályání dajílı̨́ı̨́ nítʼééʼ.
26 Díí éí Jázadak binálí éí Jéshuwa biyeʼ Jóíyakim wolyéii bíyoołkááłdą́ą́ʼ índa naatʼáanii Niihemáíyah áádóó nááʼiiłniihii Ézra, éí bee hazʼáanii yínaʼ niłtinii bíyoołkááłdą́ą́ʼ kódahóótʼįįd.
Tsé nástłʼinígíí diyingo nideideezʼą́
27 Jerúsalem kin haalʼá ditą́ągo binaa ahééʼítłʼinígíí diyingo nidazhdidooʼáałgo Líívai dineʼé bił nidahazʼą́ą́dę́ę́ʼ Jerúsalemjįʼ nihidootʼish biniyé hadazneeztą́ą́ʼ, áko baa dahózhǫ́ǫgo áádóó ahééh daznízingo áádóó dahojitaałgo áádóó béésh ahídíʼniłgo diitsʼaʼígíí áádóó tsin tłʼóół neeznáá bąąh daneelzheeʼgo bee nidaʼaʼnéii índa tsin tłʼóół naakitsʼáadah bąąh daneelzheeʼgo bee nidaʼaʼnéii baa nizhdookah.
28 Sin yee dahataałii dabiyeʼké tʼáá bí ahíikaigo áłah daazlı̨́ı̨́ʼ; Jerúsalem binaagi dadzígaidę́ę́ʼ áádóó Niitófa dineʼé bikin dah naazhjaaʼdę́ę́ʼ áłah daazlı̨́ı̨́ʼ.
29 Gílgal kin shijaaʼdę́ę́ʼ índa Gííba áádóó Azméíveth binaa kédaayahdę́ę́ʼ ałdóʼ áłah daazlı̨́ı̨́ʼ, háálá sin yee dahataałii Jerúsalem binaagi kin dah naazhjaaʼgóó ádá ádayiilaa.
30 Náádaʼiiłniihii índa Líívai dineʼé tʼáá ałtso tʼáá bí ádaʼdooldeeʼ áádóó diné ałdóʼ yidaʼdeesdeeʼ dáńʼdaditı̨́hígíí ałdóʼ índa kin haalʼá ditą́ągo binaa ahééʼítłʼinígíí ałdóʼ ákódayiilaa.
31 Áádóó índa Júdah bitsʼą́ą́dóó oochíiłii naatʼáanii danilínígíí tsé ahénátłʼinígíí bighą́ąʼjįʼ hashíʼeezh. Áadi ahééh danízingo doonéełii naakijįʼ aháínil; éí łaʼ dah yinéłígíí nishʼnáajigo tsʼiilzéí chʼéhégeeh bá chʼéʼétiinígíí bichʼįʼgo tsé ahénátłʼin bighą́ąʼjįʼ dah adiiná;
32 éí bikéédę́ę́ʼ Hoshéíyah áádóó Júdah bitsʼą́ą́dóó naatʼáanii danilíinii ałnííʼdóó yinééł yił dah diiná,
33 áádóó ałdóʼ Azaráíyah, Ézra, Miishálam,
34 Júdah, Bénjamin, Shiiméíyah índa Jeremáíyah daolyéii akééʼ yíkai,
35 áádóó nááʼiiłniihii danilíinii dabiyeʼké łaʼ Éísaf biyeʼ Záker, éí biyeʼ Maikéíyah, éí biyeʼ Matanáíyah, éí biyeʼ Shiiméíyah, éí biyeʼ Jánathan, éí biyeʼ Zekaráíyah wolyéii béésh dilní bee íʼdílzoołí yoojihgo akééʼ yigááł,
36 áádóó bikʼisóó danilíinii: Shiiméíyah, Azéíriyel, Miyaléíyai, Gílalai, Meiyéíyai, Niithániyel, Júdah índa Hanéínai, éí Diyin God bitsʼą́ą́dóó diné nilíinii David yę́ę bibee naʼaʼnéhí sin yee nidaanéhígíí yił deíjáahgo bee hazʼáanii yínaʼniłtinii Ézra halą́ąjįʼ yigááł.
37 Áko tó háálı̨́įdi dáńʼdítı̨́hígíí binaashiijí David bikin siʼánígíí biláahdi ahééʼítłʼinígíí áádóó ákóde ałkʼi hooʼnilí haazʼáhígíí ákóde hadziskaigo haʼaʼaah bichʼijí tóogi dáńʼdítı̨́įhjįʼ akééʼ jíkai.
38 Áko ahééh danízinii łahjįʼ bił ałtsʼááʼnilii yidááh doonééł biniyé łahjigo yinaashiijí dah diiná, áádóó łahjįʼ diné ałnííʼdóó bił yishnéłígíí éí biiʼ déédadiljahgo bá chʼíláyiʼ yaaʼáhígíí biláahdi áádóó tsé ahénátłʼinígíí bikááʼgóó hóteelgo tsé ahénátłʼinjįʼ bikééʼ niikai,
39 áádóó Íífreiyim bidáńʼdítı̨́ı̨́h bideijígo índa dáńʼdítı̨́ı̨́h sání bideijígo áádóó łóóʼ nidahaniihgi dáńʼdítı̨́ı̨́h bideijígo índa Hanániyel yaʼiitłʼinígíí bideijígo áádóó Míyah yaʼiitłʼinígíí bideijígo dibé bá dáńʼdítı̨́hí bideíjįʼ niniikai, áko awáalyaa bíighahgóó dáńʼdítı̨́įhgi hashtʼeʼdeizįʼ.
40 Áko naakidę́ę́ʼ ahidiikaigo Diyin God bikin siʼánígi ahééh danízinii ákwii deizįʼ; shí áádóó bídahólníihii ałnííʼdóóígíí ákwii shił naazı̨́;
41 náádaʼiiłniihii ałdóʼ éí: Iiláíyakim, Méíyasíyah, Mínyamin, Maikéíyah, Íílaiyowíínai, Zekaráíyah índa Hananáíyah béésh dilní bee íʼdílzoołí dah deítįįhgo naazı̨́,
42 índa Méíyasíyah, Shiiméíyah, Eliyéízar, Ázai, Jiihohéínan, Malkáíyah, Íílam índa Íízer yił naazı̨́. Áko sin yee dahataałii éí bibóhólníihii Jezraháíyah yił tsʼídá yéego dahóótáál.
43 Ákwii éí bijı̨́ ayóó ánéelą́ą́ʼ náádadziisniiʼgo hoł nidahoozhǫǫh nítʼééʼ; Diyin God ił hózhǫ́ ayóó átʼéii bee hoł nidahoozhǫǫhgo áhoolaa; asdzání ałdóʼ, badaʼáłchíní tʼáá yił bił nidahoozhǫǫh nítʼééʼ, áko Jerúsalem kin haalʼáagi hoł dahózhónígíí ayóó ánízáádgóó adahideesdláád.
Náádaʼiiłniihii índa Líívai dineʼé dayííłkiin dooígíí
44 Tʼáá éí hoolzhish yę́ędą́ą́ʼ kin biiʼ nooh nídaʼachíihgi naalyeʼé áádóó nidaneestʼánígíí áádóó átsé neestʼáanii índa neeznáago ahádaashjaaʼgo tʼááłáʼí bidadeeshjaaʼígíí yaa ádahalyą́ą dooleełgo łaʼ nibideeʼnil; diné éí bee hazʼáanii bikʼehgo náádaʼiiłniihii Líívai dineʼé danilíinii baa dadeestʼánígíí kin hadaasʼáago binaagóó dádaʼakʼehdę́ę́ʼ neestʼáanii áłah áńdajiilʼįįh dooleełgo biniyé nihodeeʼnil, háálá éí Júdah dineʼé bił nidahoozhǫǫhgo náádaʼiiłniihii áádóó Líívai dineʼé nidaalʼaʼ.
45 Áádóó sin yee dahataałii áádóó dáńʼdaditı̨́hí yaa ádahalyáanii dabiDiyin God bichʼįʼ nahaghá áádóó íʼdídééh ałtso áńdaajiilʼįįhgo nidajilʼaʼ nítʼééʼ; David yę́ę índa biyeʼ Sálaman yę́ę éí tʼáá yee haadzíiʼii bikʼeh ádajítʼéé nítʼééʼ.
46 Háálá ałkʼidą́ą́ʼ David áádóó Éísaf bíyoołkááłdą́ą́ʼ sin yee dahataałii aláahgo bídahólníhígíí áádóó sin bee Diyin God baa haʼniihii índa bichʼįʼ ahééh hwiindzin nítʼééʼ.
47 Índa Zerábabel áádóó Niihemáíyah bíyoołkááłdą́ą́ʼ Ízrel dineʼé tʼáá ałtso éí sin yee dahataałii índa dáńʼdítı̨́ı̨́h yaa ádahalyáanii tʼáá ákwíí jı̨́ baa nídaditʼáahii bitaa nídaʼaltsoʼ nítʼééʼ, áádóó Líívai dineʼé baa dahiditʼaahígíí diyingo bá nidazhdiiʼaah nítʼééʼ, índa Líívai dineʼé éí Éran baʼáłchíní ahoolchíiłii yaa deidiiʼaahígíí diyingo bá nidazhdiiʼaah nítʼééʼ.
