Nehemiah 13:1-31
13 Tʼáá éí bijı̨́ ałdóʼ diné yílʼáhígíí bichʼįʼ Mózes binaaltsoos biyiʼdóó dajííłtaʼ, áko kóníigo biyiʼ bikʼeʼashchı̨́ı̨́ lá, Áman dineʼé índa Móʼab dineʼé Diyin God baa áłah ílı̨́įgi doo łaʼ dashdidoogááłgóó ahoolʼáa doo,
2 háálá Ízrel dineʼé yinééł yę́ędą́ą́ʼ tʼáadoo bidááh jíkaigo bááh áádóó tó bee bíká ajííjéeʼ da, nidi Béílam há idínóodzįįł biniyé nidadzistı̨́; azhą́ ákótʼée nidi, hóyéeʼgo á hadoodzih yę́ęgi nihiDiyin God bee akʼihojidlíii násdlı̨́įʼgo áyiilaa.
3 Áádóó ákódzaago bee hazʼáanii dazdiiztsʼą́ąʼgo doo Ízrel dineʼé danilínígíí tʼáá ałtso átsʼá dadziisʼnil.
4 Díí tʼah bítséedi Iiláíyashib nááʼiiłniihii nilíinii, nihiDiyin God bikin biiʼ sohodizin siʼánígíí biiʼ nahazʼą́ą́góó yee bóhólnííh nilíinii éí Tobáíyah yił achʼooʼníigo
5 nitsaago hazʼą́ yiiʼ bighan dooleeł biniyé yá hashtʼehoolaa. Éí hazʼą́ą́ góneʼ tʼah yówehdą́ą́ʼ díí ákóneʼ bá hooghan nítʼééʼ: akʼáán nááhániihii áádóó tsin bijeeh dilidgo łikání halchinii fránkinsens wolyéii áádóó łeetsʼaaʼ áádóó tłʼoh naadą́ą́ʼ neeznáajįʼ ałtsʼádashjaaʼgo tʼááłáʼí bidadeeshjaaʼii áádóó wáin ániid ályaii índa tsin áliv bineestʼąʼ bikʼah neeznáago ahádaasdziidgo tʼááłáʼí bidadeesdziidii éí Líívai dineʼé áádóó sin yee dahataałii índa dáádílkał yaa ádahalyáanii bitaa nídaajih doogo bee haʼoodzííʼ nítʼééʼ.
6 Díí baa naʼaldeeh yę́ędą́ą́ʼ Jerúsalem kin haalʼáadi doo naasháa da, háálá Artazérksiiz éí Bábilan dineʼé aláahgo yinanitʼaʼí tádiindóó baʼaan naaki náhááh góneʼ aláahgo naatʼáanii bichʼįʼ níyá, áádóó ákwii tʼáá díkwíida shiiską́ą́dóó bikʼijįʼ shanáádiʼdootʼáałgo aláahgo naatʼáanii bínáánéíkeed.
7 Áko Jerúsalem kin haalʼáadi níyáago łahgo shił bééhoozin, Iiláíyashib éí nihiDiyin God bikin góneʼ łahgo hazʼą́ Tobáíyah yá hashtʼehoolaaígíí doo ákǫ́ǫ́ áátʼįįd da lá.
8 Áko tʼáá íiyisí bąąh shíniʼ yiiʼaʼ; éí bąą Tobáíyah binaalyeʼé tłʼóóʼgóó chʼéhéłkaad.
9 Áádóó haasdzíiʼgo ákóneʼ hashtʼéédahoodlaa; bidiníná Diyin God bikin góneʼ beedí chodaoʼíinii áádóó akʼáán nááhániihii índa fránkinsens wolyéii ałtsʼádaashjaaʼ.
10 Áko Líívai dineʼé baa dadidootʼááł yę́ę doo baa nídaditʼáah da lágo baa ákoniizı̨́ı̨́ʼ; díí bąą Líívai dineʼé áádóó sin yee dahataałii naanish yaa nidaakai yę́ę bikédaayahgóó anídahineezhchą́ą́ʼ.
11 Áadi índa naatʼáanii dajílíinii hoł ałghadaʼdéshtʼą́ągo ádííniid, Haʼátʼíísh biniyé Diyin God bikin yóóʼadootʼą́? Áko áłah ánáshdlaago bá nahazʼą́ą́góó ninádasisnil.
12 Áko índa Júdah dineʼé tʼáá ałtso éí tłʼoh naadą́ą́ʼ neeznáá daníjaaʼígíí éí tʼááłáʼí shijaaʼ áádóó wáin ániidíii índa tsin áliv bineestʼąʼ bikʼah neeznáá daníkánígíí éí tʼááłáʼí siką́ągo yódí nooh nídaachííh góneʼ yah adayiizhjaaʼ.
13 Nááʼákóneʼ yódí nooh nídaachíihgi yindaalnish dooleełii ninínil: éí nááʼiiłniihii Shelemáíyah áádóó bee hazʼáanii yínaʼniłtinii Zéídak índa Líívai dineʼé nilínígíí Piidéíyah; bíká análwoʼii Matanáíyah biyeʼ Záker, éí biyeʼ Héínan wolyéii ałdóʼ niníłtı̨́, háálá badaʼahódlíigo baa nitsídahakeesgo éí dahakʼisóó danilíinii bitaa nídajiʼnih doo.
14 ShiDiyin God nílíinii, díí bee shéénílniih: shiDiyin God bikin yáʼátʼéehii bá baa niséyáhígíí áádóó biyiʼdóó bichʼįʼ nahadláago bá baa áháshyánígíí kʼééʼóółchxǫǫh lágo.
15 Éí yoołkááłdą́ą́ʼ Júdah kéyahdi hááʼáyı̨́ı̨́h jı̨́ı̨́ góneʼ diné łaʼ chʼil naʼatłʼoʼii bitooʼ yąąh hadeiníihgo yiiłtsą́ áádóó neestʼáanii bidaʼastłʼǫ́ǫgo índa wáin, chʼil naʼatłʼoʼii, tsin bineestʼąʼ fig wolyéhígíí áádóó naalyéhé ałʼąą ádaatʼéii ałdóʼ Jerúsalem kin haalʼáajįʼ télii yee nidayiiyeehgo yiiłtsą́, áko chʼiyáán baa nidahaniih bijı̨́ı̨́ góneʼ bee hakʼijįʼ haasdzííʼ.
16 Táir kin haalʼáádę́ę́ʼ diné nidaakaii ałdóʼ łaʼ ákwii kéédahatʼı̨́; éí łóóʼ índa naalyéhé ałʼąą ádaatʼéii nidayiiyeehgo Jerúsalemgi hááʼáyı̨́ı̨́h jı̨́ı̨́ góneʼ Júdah dineʼé yichʼįʼ nidayiiłniih.
17 Áádóó Júdah dineʼé bitahdóó aląąjįʼ naazíinii bił ałghadaʼdéshtʼą́ągo áhodííniid, Díísh haʼátʼíí doo yáʼátʼéehii baa naahkai? Hááʼáyı̨́ı̨́h jı̨́ doo ílı̨́ı̨́góó ádaohłééh.
18 Daʼ danihizhéʼé yę́ęésh ákódáátʼįįd, áko nihiDiyin God doo yáʼátʼéhígi ánihííłʼįįd índa díí kin haalʼáhígi doo yáʼátʼéhígi áyííłʼįįd, áko hááʼáyı̨́ı̨́h jı̨́ doo ílı̨́ı̨́góó ádaohłéhígíí bee tʼah yówehgo tʼóó báhádzidgo bee atíʼélʼíinii Ízrel dineʼé bikʼijįʼ ádaohłééh.
19 Ákódzaago kʼadę́ę hááʼáyı̨́ı̨́h jı̨́ aleehgo, Jerúsalem bidáńʼdaditı̨́ı̨́hgóó yíłhéelgo dádaʼdinołkaał, dííniid áádóó tʼáadoo ąą ádaalnéhí hááʼáyı̨́ı̨́h jı̨́ ałtsogo índa ąą ádadoolníiłgo bee haasdzííʼ índa hááʼáyı̨́ı̨́h jı̨́ı̨́ góneʼ hééł łaʼ doo yah adoogéeł da biniyé diné shá nidaalʼaʼígíí łaʼ dáńʼdaditı̨́ı̨́hgóó nidasínil.
20 Áko nídaʼiiłniihí danilíinii índa naalyéhé ałʼąą ádaatʼéii baa nidahaniihgo Jerúsalem tłʼóoʼdi łaʼa tłʼééʼ, doodaiiʼ naaki tłʼééʼ nídabiilkááh nítʼééʼ.
21 Haʼátʼíí lá biniyé tsé ahénátłʼinígíí tłʼóoʼdi nídanihiilkááh? Ákónáádaahdzaago yah anihideeshnił, dishníigo bichʼįʼ bee haasdzííʼ. Éí áádóó hááʼáyı̨́ı̨́h jı̨́ı̨́ góneʼ tʼáadoo náádaaskai da.
22 Áádóó índa Líívai dineʼé ábidííniid, Ádaʼdołdéehgo áádóó hááʼáyı̨́ı̨́h jínígíí diyingo óolzin doo biniyé nihidoohkahgo dáńʼdítı̨́hí baa ádahołyą́ą doo. ShiDiyin God nílíinii, díí ałdóʼ bee shéénílniihgo ayóó átʼéego aa aʼááh nínízinii bikʼehgo shaa sínízid doo.
23 Éí yoołkááłdą́ą́ʼ ałdóʼ Jew dineʼé éí Áshdad dineʼé áádóó Áman dineʼé índa Móʼab dineʼé bitahdóó asdzání danilíinii yił naazkéego yiiłtsą́;
24 hadaʼáłchíní éí Áshdad bizaad łahjįʼ yee yádaałtiʼgo Jew dineʼé bizaad doo yee yádaałtiʼ da, nidi dadineʼé danilínígíí dabizaad yikʼehgo yádaałtiʼ.
25 Áádóó bił ałghadaʼdéshtʼą́ągo hóyéeʼgo há haasdzííʼ, áádóó łaʼ hataaʼsíłtsʼingo hatsiiʼ hadaháłdláád índa doo ákónáádazhdooʼnííłgóó Diyin God bee ádee hadadziisdzíiʼgo áhodííniid, Nihitsiʼké éí dabiyeʼké doo baa dahidoohnił da índa dabitsiʼké éí danihiyeʼké doo baa dahidoohnił da, áádóó tʼáá nihí nidi doo ádá shódeidoołtʼeeł da.
26 Shą́ą́ʼ, tʼáá ákótʼéego ałdóʼ Ízrel dineʼé aláahgo binanitʼaʼí Sálaman ádił niʼiiszííʼ. Azhą́ ákótʼée nidi, tʼóó ahayóí ałʼąą dineʼé bitahgóó tʼáadoo łaʼ ákótʼéego aláahgo naatʼáanii nilíní da; éí Diyin God ayóóʼábóʼníigo Ízrel dineʼé tʼáá ałtso yinantʼáago áyiilaa; azhą́ ákótʼée nidi, asdzání déʼéyóní danilíinii ádił nidziisíihgo ádahoolaa.
27 Díí tʼáá íiyisí doo yáʼátʼéhígi ádaohtʼínígíí danohsingo doo danihíísíiltsʼą́ąʼ da doo; éí asdzání déʼéyóní danilíinii bił ahándaʼohgehgo Diyin God bichʼįʼ bee hazʼáanii kʼídahohtíih doo.
28 Áko aláahgo nááʼiiłniihii Iiláíyashib biyeʼ Jóíyada biyeʼ łaʼ éí Hóran dineʼé Sanbálat yaadaaní nilı̨́ı̨́ lá; éí bąą hó éí níwehjįʼ ahonííłchą́ą́ʼ.
29 ShiDiyin God nílíinii, ádáátʼįįdii béénílniih, háálá nááʼiiłniihii binaanish áádóó nááʼiiłniihii dajílı̨́į doogo índa tʼáá Líívai dineʼé dajílı̨́įgo éí biniyé bee ahaʼdeetʼáanii bá íinilaii dayííłchxǫʼ.
30 Ákótʼéego hąąh hóółdeeʼgo déʼéyóní danilíinii tʼáá ałtso bitsʼáhonínil, áádóó nááʼiiłniihii binaanish ádaatʼée dooleełii índa Líívai dineʼé binaanish ádaatʼée dooleełii baa dahidíʼą́,
31 áádóó nááʼiiniih biniyé chizh dilidii índa átsé neestʼáanii nihootʼą́ą́ góneʼ yah anídayiijih dooleełii ałdóʼ biniyé łaʼ nihonínil. ShiDiyin God nílíinii, shaa jiiníbaʼgo shéénílniih.
