Nehemiah 2:1-20
2 Ákódzaadóó Níísan yiziłígíí binih naadiin náhááh góneʼ aláahgo naatʼáanii Artazérksiiz wáin bidááhgóó niiką́ áádóó nídiiką́ągo baa níką́. Yówehdę́ę́ʼ tʼéiyá doo binááł yínííł naasháa da nítʼééʼ.
2 Éí bąą aláahgo naatʼáanii áshidííniid, Haʼátʼíísh baa yínííł nínílnin? Doo yeeʼ nitah hatsʼíid da. Díí yeeʼ yínííł tʼéiyá nílı̨́ı̨́ lá. Áko tʼáá íiyisí nísísdzííd,
3 áádóó aláahgo naatʼáanii ábidííniid, Bíniʼ aláahgo naatʼáanii hoolʼáágóó hiná; jó, biniyéii baa yínííł nishłı̨́, háálá kin haalʼá nítʼéʼídi dashizhéʼé yę́ę biiʼ yóóʼádaalyaa yę́ędi tʼáá ádzaagóó nihidadílʼá áádóó dáńʼdaditı̨́hí adahideeskʼą́ą́ʼ.
4 Ákohgo aláahgo naatʼáanii áshidííniid, Ákoshąʼ haʼátʼíí yídííkił? Áko Diyin God yáʼąąshdi hólóonii bichʼįʼ sodeeszin.
5 Áádóó aláahgo naatʼáanii ábidííniid, Aláahgo naatʼáanii bił hóshǫ́ǫ́ ládą́ą́ʼ áádóó ná naalʼaʼí nił ałchʼooʼnéé ládą́ą́ʼ dashizhéʼé yę́ę yóóʼádaalyaa yę́ędi éí kin haalʼáá nítʼééʼ yę́ę áńdadeeshdlííł biniyé Júdah kéyahgóó shiʼníłnííh.
6 Áko aláahgo naatʼáanii áshidííniid, (asdzą́ą́ naatʼááh ałdóʼ bíighahgi sidá,) Haash nízahjįʼ ákǫ́ǫ́ nanináa doo? Hahgoshąʼ nídíídááł? Áko aláahgo naatʼáanii shiʼdoołnihgi shá bił yáʼíítʼééh áádóó, Ákohgo nídeeshdááł, bidííniid.
7 Nááʼáłdóʼ aláahgo naatʼáanii ánáábideeshʼniid, Aláahgo naatʼáanii bił hóshǫ́ǫ́ ládą́ą́ʼ bíniʼ tooh nílínígíí biláahdi naatʼáanii danilíinii naaltsoos shá bichʼįʼ ádadoolnííł, áko dabikéyahgóó chʼíhideesháałgo Júdah kéyahjįʼ anáásdzáajįʼ shadadiʼdooʼááł.
8 Áádóó Éísaf éí aláahgo naatʼáanii bitsin yílʼáhígíí yaa áhályáanii shá bichʼįʼ naaltsoos ádoolnííł, áko tsin łaʼ sheidooniłígíí bee Diyin God bikin biiʼ sohodizin bíighahgóó bighan bidáńʼdaditı̨́hígíí áádóó kin haalʼá ditą́ągo binaa ahééʼítłʼinii índa kin biiʼ shighan dooígíí bitsé naazláii ádadoolnííł. ShiDiyin God yáʼátʼéehgo shikʼi dah doolnihígíí bikʼehgo aláahgo naatʼáanii shaʼdiníʼą́.
9 Ákohgo tooh nílíní biláahdi naatʼáanii danilíinii baa níyáago aláahgo naatʼáanii binaaltsoos ádaalyaa bitaa séniiʼ. Áko aláahgo naatʼáanii éí siláo binanitʼaʼí danilíinii áádóó siláo łı̨́ı̨́ʼ yee nidaabaahii yił shiʼníłniiʼ.
10 Hóran dineʼé Sanbálat áádóó bá naalʼaʼí Áman dineʼé nilíinii Tobáíyah yaa hóóniiʼgo Ízrel dineʼé bá yáʼátʼéeh dooleełii hátʼı̨́ yiniyé diné łaʼ níyá, haʼníigo yiyííniiʼgo tʼáá íiyisí yínííł yiih níídeeʼ.
Niihemáíyah éí diné nídaʼatłʼinii chánah áyiilaa
11 Áko Jerúsalem kin haalʼáagi níyáago ákwii tááʼ shiiską́.
12 Áádóó tłʼéeʼgo shí índa diné tʼáá díkwíhígo bił nídiishjééʼ áádóó shiDiyin God shijéí yiih yiyííláhígíí bikʼehgo Jerúsalemgi baa nideeshaałii tʼáadoo łaʼ hoł hweeshneʼí da, áko naaldlooshii doo łaʼ shiná naagháa da; łı̨́ı̨́ʼ shił yíldloozhígíí tʼéiyá shiná sizı̨́.
13 Áko honítsʼaaʼ dáńʼdítı̨́hí góneʼ chʼíníyáago naʼashǫ́ʼii łibáhítsoh bitó hahadleeh bíighahgóó áádóó tsʼiilzéí chʼéhégeeh bá chʼéʼétiinjí yisháałgo Jerúsalem ditą́ągo binaa ahééʼítłʼinii ałtso nidahaasdáazgo áádóó dáńʼdaditı̨́hí adahideezkʼą́ąʼgo háísid.
14 Áko tó háálı̨́įdi dáńʼdítı̨́hígi náánísdzá índa aláahgo naatʼáanii bitó siyíníjįʼ níyá, nidi łı̨́ı̨́ʼ shił yíldloozhígíí tʼáá haaʼída doo bá chʼíhonítʼiʼ da.
15 Tʼahdii tłʼéeʼgo tó nílínígíí bibąąhgóó níyáago tsé ahénátłʼin nítʼéʼígíí háísid; áadi índa naanísísdzáago honítsʼaaʼ bidáńʼdítı̨́hígíí bíighahdę́ę́ʼ chʼéénísdzáago nánísdzá.
16 Áko naatʼáanii danilíinii niséyáágóó áádóó baa niséyáii nidi, doo bił béédahózin da índa Jew dineʼéda, náádaʼiiłniihiida, aląąjįʼ naazíiniida, naatʼáanii danilíiniida índa nidaalnishii nidi tʼah doo łaʼ bił hashneʼ da.
17 Áadi índa ábidííniid, Yínííł nitsaii biiʼ dahoniidlǫ́ǫgo nihił béédahózin; Jerúsalem kin haalʼá tʼáá ádzaaí silı̨́ı̨́ʼ índa bidáńʼdaditı̨́įhii adahideezkʼą́ą́ʼ; sołtįʼ, doo tʼóó nihá ninááhátʼiʼ da doo biniyé Jerúsalem ditą́ągo binaa ahééʼítłʼin dooígíí háádadiitłʼı̨́ı̨́ł.
18 Nááʼákóneʼ shiDiyin God shaa joobaʼgo shikʼi dah doolnihígíí, índa aláahgo naatʼáanii shaa joobaʼgo shichʼįʼ haadzííʼ, dishníigo ałdóʼ bee bił hweeshneʼ. Áko ádadííniid, Ákǫ́ǫ́ nídidiiʼnéełgo háádaʼdiitłʼı̨́ı̨́ł. Áko naanish yáʼátʼéehii yiniyé dadeesdzil.
19 Ákohgo Hóran dineʼé Sanbálat áádóó bá naalʼaʼí Áman dineʼé nilíinii Tobáíyah áádóó Aréíbiya dineʼé nilíinii Gííshem deidiiztsʼą́ąʼgo nihá nidahałtʼiʼgo nihaa daadlohgo áádóó danihiʼı̨́įgo ádaaní, Díísh haʼátʼíí baa nídoohkai? Aláahgo naatʼáaniísh bichʼįʼ nídadoołteeʼ?
20 Áko índa shí bichʼįʼ haasdzíiʼgo ábidííniid, NihiDiyin God yáʼąąshdi hólóonii éí lą́ą yáʼátʼéehgo nihá áánííł áyósin doo; éí bąą nihí bá nideiilʼaʼii nídidiiʼnéełgo háádaʼdiitłʼı̨́ı̨́ł, nidi Jerúsalem éí łahdóó doo nihí da índa doo nihikʼehdii da, doo nidi nihídéétʼiʼ da.
