Nehemiah 3:1-32
3 Ákohgo aláahgo nááʼiiłniihii Iiláíyashib bikʼisóó nááʼiiłniihii danilíinii yił dadeeshnishgo dibé bá dáńʼdítı̨́hígíí ádayiilaago dílzingo nideideezʼą́ áádóó dáádílkał yąąh dah deiznilgo Míyah yaʼiitłʼiníjįʼ áádóó Hanániyel yaʼiitłʼiníjįʼ ałtso tsé deiztłʼingo dílzingo ádayiilaa.
2 Áádóó Jériko kin haalʼáádóó dineʼé haghą́ąhjįʼ tsé nídeiztłʼin índa éí náábíghą́ąhjįʼ Ímrai biyeʼ Záker tsé néíztłʼin.
3 Nidi Hasiinéíyah biyeʼké éí łóóʼ nidahaniihgi dáńʼdítı̨́hí ádayiilaa; tʼáá éí ałdóʼ áah sitáán yá nideiztsih áádóó dáádílkał ałdóʼ yąąh dah néísnil; bee dáńʼdadilkałígíí ałdóʼ áádóó dáádílkał bichʼą́ą́h dah nídaatı̨́hígíí ninádeiztsih.
4 Áádóó náábíghą́ąhjįʼ Yuráíjah biyeʼ Mériimath éí Kaz binálí jílı̨́įgo tsé nídzíztłʼin. Áádóó nááhághą́ąhjįʼ Miishézabiil binálí éí Berakáíyah biyeʼ Miishálam wolyéii tsé néíztłʼin. Áádóó nááhághą́ąhjįʼ Béíyana biyeʼ Zéídak tsé néíztłʼin.
5 Áádóó nááhághą́ąhjįʼ Tekówadóó dineʼé tsé nídeiztłʼin, nidi aghá dahideezínígíí binanitʼaʼí binaanish doo ádídeidééltʼiʼ da.
6 Nááʼákóneʼ Pasíyah biyeʼ Jiihóíyada áádóó Besodíyah biyeʼ Miishálam ałkʼidą́ą́ʼ dáńʼdítı̨́hí hashtʼéyiidlaa; áah sitáán yándeiztsih áádóó dáádílkał ałdóʼ yąąh dah nidéísʼnil; bee dáńʼdadilkałígíí ałdóʼ áádóó dáádílkał bichʼą́ą́h dah nídaatı̨́hígíí ninádeiztsih.
7 Áádóó nááhághą́ąhjįʼ Gíbiyan kin haalʼáádóó dineʼé Melatáíyah áádóó Miiróna nahósʼaʼdóó dineʼé Jéídan, Gíbiyandóó diné danilíinii áádóó Mízpah kin haalʼáádóó diné danilíinii tooh nílínígíí wóshchʼishjí naatʼáanii bibikʼi dah asdáhí siʼáníjįʼ tsé nídeiztłʼin.
8 Nááhághą́ąhjįʼ Harhéíjah biyeʼ Azáíyel éí óola yitsidii nilı̨́įgo tsé néíztłʼin. Nááhághą́ąhjįʼ éí łikání dahalchinii ííłʼíní łaʼ biyeʼ Hananáíyah wolyéego tsé néíztłʼin; hóteelgo ítłʼiníjįʼ bohoníłdzilgo Jerúsalem binídadziztłʼingo áá dahodzoostʼįįd.
9 Áádóó nááhághą́ąhjįʼ Her biyeʼ Riifáíyah, Jerúsalem ałnííʼdóó dinéhígíí yinanitʼaʼí nilíinii tsé néíztłʼin.
10 Nááʼákóneʼ Harúmaf biyeʼ Jedéíyah éí bighan bíighahjįʼ tsé néíztłʼin. Nááʼákóneʼ Hashabnáíyah biyeʼ Hátash tsé néíztłʼin.
11 Héírim biyeʼ Malkáíjah áádóó Péíhath-móʼab biyeʼ Háshab éí łahjiígíí áádóó biiʼ déédadiljahgo bá chʼíláyiʼ yaaʼáhígíí hashtʼéyiidlaa.
12 Áádóó nááhághą́ąhjįʼ Halóhesh biyeʼ Shálam, éí Jerúsalem ałnííʼdóó łahjįʼ dinéhígíí yinanitʼaʼí nilíinii bitsiʼké yił tsé nídeiztłʼin.
13 Héínan áádóó Zanówah kin shijaaʼgi kéédahatʼíinii honítsʼaaʼ bichʼįʼgo dáńʼdítı̨́hígíí áńdayiidlaago dáádílkał ałdóʼ yąąh dah néísnil; bee dáńʼdadilkałígíí ałdóʼ áádóó dáádílkał bichʼą́ą́h dah nídaatı̨́hígíí ninádeiztsih, índa tsʼiilzéí chʼéhégeeh bá chʼéʼétiinígíí bichʼįʼgo tʼááłáhídi mííldóó baʼaan ashdladi neeznádiin ké silá bíighahjįʼ tsé nídeiztłʼin.
14 Nidi Rííkab biyeʼ Malkáíyah Beth-hákarem kin haalʼá łahdóó yinanitʼaʼí nilíinii éí tsʼiilzéí chʼéhégeeh bá chʼéʼétiinígíí ánáyiidlaago dáádílkał ałdóʼ yąąh dah néísnil; bee dáńʼdadilkałígíí ałdóʼ áádóó dáádílkał bichʼą́ą́h dah nídaatı̨́hígíí ninádeiztsih.
15 Nidi Kolhózeh biyeʼ Shálan éí Mízpah kin haalʼá łahdóó yinanitʼaʼí nilíinii tó háálı̨́įgi dáńʼdítı̨́hígíí hashtʼéyiidlaa, áko tsé néíztłʼin áádóó yikááʼ tséʼnaa naʼnízhoozh índa dáádílkał yąąh dah néísnil; bee dáńʼdadilkałígíí ałdóʼ índa dáádílkał bichʼą́ą́h dah nídaatı̨́hígíí ninádeiztsih, áádóó aláahgo naatʼáanii bidáʼákʼeh bíighahgóó Sailówah tó siyínígíí bíighahgóó tsé ahénátłʼin nítʼéʼígíí néíztłʼin, índa David bikin haalʼáádóó ałkʼi hooʼnilíjįʼ tsé néíztłʼin.
16 Nááʼákóneʼ Ázbak biyeʼ Niihemáíyah Béth-zer kin haalʼá ałnííʼdóó yinanitʼaʼí nilíinii, éí David bitsénídaʼastsélíjįʼ áádóó tó siyı̨́įgo áhoolyaajįʼ índa diné ayóó ádaatʼéii bikiníjįʼ tsé néíztłʼin.
17 Nááʼákóneʼ Líívai dineʼé Béínai biyeʼ Rííham tsé néíztłʼin. Éí nááhághą́ąhjįʼ Hashabáíyah, éí Kiiʼáílah kin haalʼá ałnííʼdóó yinanitʼaʼí nilı̨́įgo, yininádaolnishígi tsé néíztłʼin.
18 Nááʼákóneʼ hakʼisóó nilíinii Hénadad biyeʼ Báveiyai, éí Kiiʼáílah kin haalʼá ałnííʼdóó dinéhígíí yinanitʼaʼí nilíinii tsé néíztłʼin.
19 Áádóó nááhághą́ąhjįʼ Jéshuwa biyeʼ Íízer, éí Mízpah kin haalʼá yinanitʼaʼí nilíinii, éí bee naʼabaahii bá hooghan bichʼįʼgo haʼatiin bíighahgi tsé naanástłʼinígi tsé néíztłʼin.
20 Nááʼákóneʼ Zábeiyai biyeʼ Bérak éí naanáʼástłʼinídóó aláahgo nááʼiiłniihii Iiláíyashib bighan chʼéʼétiiníjįʼ haleebee tsé néíztłʼin.
21 Nááʼákóneʼ Yuráíjah biyeʼ Mériimath, éí Kaz biyeʼ jílı̨́įgo náánáłahgo Iiláíyashib bikin bichʼéʼétiindóó kin niníʼáhíjįʼ tsé nídzíztłʼin.
22 Nááʼákóneʼ halgaidę́ę́ʼ náádaʼiiłniihii tsé nídeiztłʼin.
23 Nááʼákóneʼ Bénjamin áádóó Háshab tʼáá bí bighan bíighahgóó tsé néíztłʼin, áádóó nááhághą́ąhjįʼ Ananáíyah binálí éí Méíyasíyah biyeʼ Azaráíyah tʼáá bí bighan bíighahgóó tsé néíztłʼin.
24 Nááʼákóneʼ Hénadad biyeʼ Bínuwai éí Azaráíyah bikinídóó tsé yítłʼinígíí tʼáá naanáʼástłʼinjįʼ tsé néíztłʼin.
25 Éí naanáʼástłʼin bíighahdóó áádóó awáalyaa bichʼéédą́ą́ʼgóó hazʼánígíí bíighah góde aláahgo naatʼáanii bighan bighą́ą́ʼdóó yaʼiitłʼinígíí bíighahjįʼ Ázai biyeʼ Péílal tsé néíztłʼin. Nááʼákóneʼ Péírash biyeʼ Piidéíyah tsé néíztłʼin.
26 Nááʼáłdóʼ Néthinim daolyéii Ófel hoolyéedi kéédahatʼínígíí éí haʼaʼaahjí tó bidáńʼdítı̨́hí bíighahgóó hazʼáníjįʼ áádóó atsʼáhoníʼą́ądi yaʼiitłʼinígíí bíighahjįʼ tsé nídeiztłʼin.
27 Hakéédę́ę́ʼ Tekówa dineʼé éí atsʼáhoníʼą́ądi nitsaago yaʼiitłʼinígíí bíighahgóó tʼáá Ófeljįʼ tsé náádeiztłʼin.
28 Łı̨́ı̨́ʼ bidáńʼdítı̨́ı̨́h bideiidóó náádaʼiiłniihii danilíinii tʼááłáʼí nítínígo dabighan bíighahgóó tsé nídeiztłʼin.
29 Nááʼákóneʼ Ímer biyeʼ Zéídak tʼáá bí bighan bíighahgóó tsé néíztłʼin. Nááʼákóneʼ Shekanáíyah biyeʼ Shiiméíyah éí haʼaʼaahjígo dáńʼdítı̨́ı̨́h yaa áhályánígíí ałdóʼ tsé néíztłʼin.
30 Nááʼákóneʼ Shelemáíyah biyeʼ Hananáíyah áádóó Zéílaf biyeʼ hastą́ą́h góneʼ naagháhígíí Héínan wolyéii łahgo tsé néíztłʼin áádóó haghą́ąhjįʼ Berakáíyah biyeʼ Miishálam tʼáá bí bighan bíighahjįʼ tsé néíztłʼin.
31 Nááʼákóneʼ óola yitsidii biyeʼ Malkáíyah éí Néthinim dineʼé bił hazʼáníjįʼ índa baa nidaʼiiniihí bił hazʼáníjįʼ áádóó dáńʼdítı̨́ı̨́h Mífkad wolyéii bíighahgóó índa tsé naanástłʼiní góde tsé néíztłʼin.
32 Áádóó naanástłʼiní góde hazʼánídóó dibé bidáńʼdítı̨́įhjįʼ óola deitsidii áádóó baa nidaʼiiniihí tsé nídeiztłʼin.
