Nehemiah 4:1-23
4 Nidi ákódzaadóó Sanbálat nihí tsé nídeiitłʼinígíí yaa hodiiztsʼą́ąʼgo yikʼee tʼáá íiyisí báhóóchįįd áádóó tʼáá íiyisí hashké niidzı̨́įʼgo Jew dineʼé yá nahastʼiʼ.
2 Áko bikʼisóó áádóó Samériya dineʼé bisiláo dah yinéełii áyidííniid, Díí lá haʼátʼíí Jew dineʼé tʼóó nidanilʼeełii yaa naakai? Bee ohoníłdziliísh ádá ádeiilééh? Náádaʼiiłniihiísh doo? Tʼáá łaʼa jı̨́įjįʼísh ałtso łaʼdeidoolíiłgo ádaatʼı̨́? Daʼ tsé tsʼiilzéí bił dadíílidgo yáádaaʼáhígíí bitahdóósh tsé háádeidiyooʼnił?
3 Íídą́ą́ʼ Áman dineʼé Tobáíyah éí Sanbálat yíighahgóó sizı̨́įgo ádííniid, Azhą́ tsé nídadziztłʼin nidi, mąʼii dootłʼizhí éí yighą́ą́ʼ haaswodgo hatsʼą́ą́ʼ tsé ninéidoołkał.
4 Áko Niihemáíyah ání, Shoo, nihiDiyin God nílíinii, nihidiitsʼı̨́ı̨́h, háálá nihiʼdootʼįįd, áádóó yee nihá nidahałtʼiʼii bikʼijįʼ nináhádleehgo ánílééh índa kéyah yisnááh hólǫ́ǫdi dabidilnééh.
5 Doo ákwii ádaatʼínígíí tʼáadoo bitsʼą́ą́ʼ náhidíłʼįįhí áádóó ádił daʼiilzíhígíí tʼáadoo tʼóó kʼééʼííłchǫǫłí, háálá tsé deitłʼinígíí dabinááł ná dahóółchįįd.
6 Áko tsé inástłʼinígíí nídeiitłʼin nítʼééʼ, áádóó ałníiʼjįʼ ałtso ahéédaʼsiitłʼin, háálá bóhoneedlı̨́įgo diné nidaashnish.
7 Nidi ákódzaadóó Sanbálat áádóó Tobáíyah áádóó Aréíbiya kéyahdę́ę́ʼ dineʼé áádóó Áman dineʼé índa Áshdad dineʼé éí Jerúsalem kin haalʼá binaa ahéédaʼastłʼingo hashtʼenálnééh áádóó náʼástłʼinígíí nídaʼdeeshgizhgóó háádahodilbingo dayííniiʼgo tʼáá íiyisí yikʼee bádahazhchįįd,
8 áko hondahazʼą́ągo Jerúsalem yikʼiidoojahgo deidínóołtłʼah biniyé tʼáá łaʼ bizhiʼee ahíikai.
9 Ákótʼée nidi nihiDiyin God bichʼįʼ sodadiilzingo tʼáá ákwíí jı̨́ índa tʼáá ákwíí tłʼééʼ honiyé haʼídéesʼı̨́ʼí nidasiiʼnil.
10 Áko Júdah dineʼé ádadííniid, Tsʼiilzéí nideiyéhígíí dadínéesnaʼ; tsʼiilzéí tʼóó ahayóí yáádaaʼáago biniinaa tsé nídadiitłʼı̨́łígíí doo bídaniilʼą́ą da.
11 Áádóó nihiʼanaʼí ádadííniid, Tʼáadoo hoł béédahóziní índa tʼáadoo dazdilyésí honídiijahgo nidahodiiltsił, áko nidajilnishígíí tʼóó bikʼizhdidookah.
12 Nítʼééʼ Jew dineʼé éí anaʼí bíighahgóó kéédahatʼínígíí nídaakahgo tʼáá ahą́ą́h ádanihiłní, Tʼáá ałtsodę́ę́ʼ anaʼí nihaa nidahaakaigo nihá nahodítʼé.
13 Éí bąą tsé inástłʼinígíí bineʼdę́ęʼgo tʼáá íiyisí wóyahgo nahazʼą́ą́góó tʼáá éí náhootʼı̨́įgo nahazʼą́ą́góó diné dabikʼéí bikʼehgo diltłish índa tsiidétáán áádóó kʼaayééł yee dahéeshjéeʼgo íishłaa.
14 Áko dééʼı̨́įʼgo yiizįʼgo aląąjįʼ naazíinii índa naatʼáanii danilíinii áádóó diné tʼáá ałtso ábidííniid, Tʼáadoo béédaałdzidí; Bóhólníihii ayóó átʼé áádóó bikʼee hóyééʼ; éí béédaałniihgo nihikʼisóó áádóó nihiyeʼké índa nihitsiʼké áádóó nihedaʼasdzą́ą́ índa danihighan bichʼą́ą́h nidaahbaah.
15 Ákódzaadóó nihiʼanaʼí danilíinii bindahatʼaʼ nihił béédahoozinígíí áádóó tʼáadoo násdlı̨́ʼígóó Diyin God hatsʼą́ą́ʼ áyiilaaígíí yaa dahodiiztsʼą́ąʼgo, áko nihí tʼáá áníiltso tʼááłáʼí niitínígo tsé ahénátłʼiníjįʼ dah nídahidiikaigo nídadeelnish.
16 Áádóó bikʼijįʼ shá nidaalʼaʼígíí ałnííʼdóó nidaalnishgo łahjįʼ ałnííʼdóóígíí éí tsiidétáán áádóó naagé áádóó kʼaayééł índa béésh ééʼ dah deíjááh nítʼééʼ, índa naatʼáanii danilíinii Júdah dineʼé tʼáá ałtso chánah ádayósin nítʼééʼ.
17 Tsé deitłʼinii áádóó tsé nidayiijáhígíí éí tʼááłáʼí nítínígo dabigaan tʼááłáhíjí yee nidaalnishgo łahjí éí bee naʼabaahii dah deíjááh nítʼééʼ.
18 Áádóó tsé deitłʼinii tʼááłáʼí nítínígo boshkʼiizh diltłish bitsiistʼadadíʼáago daʼaztłʼin. Shíighahdóó éí deenástsʼaaʼ bideeʼ bee íʼdílzoołí yee anídíʼniihígíí sizı̨́ı̨́ nítʼééʼ.
19 Áko aląąjįʼ naazíinii áádóó naatʼáanii danilíinii índa diné tʼáá ałtso ábidííniid, Naanish tʼóó ahayóí áádóó ayóó ánízáágóó biʼoonish índa daʼiitłʼinígíí nízaadgóó tʼáá ałʼąą dah nishiijaaʼgo tsé deiitłʼin.
20 Tʼáá haaʼída deenástsʼaaʼ bideeʼ bee íʼdílzoołí dasidootsʼą́ąʼgo áajįʼ nihaa hidoohjah; Diyin God éí nihá nidoobah.
21 Ákohgo deíníilníishgo diné ałnííʼdóóígíí tʼóó haiłkááhdą́ą́ʼ hiłiijı̨́įhgo sǫʼ haaldahjįʼ tsiidétáán dah deíjáah łeh.
22 Tʼáá ákwii nahalzhiishgo diné ábidííniid, Tʼááłáʼí jinítínígo há naalʼaʼí bił tʼáá Jerúsalem kin haalʼáagi dazhnijah doo; éí tłʼéeʼgo nihikʼihadaʼasíid doo, áádóó jı̨́įgo nidaalnish doo.
23 Áko shída, shikʼisóóda, shá nidaalʼaʼída, diné hadaʼasíidii shikééʼ naakaígíida, tʼáadoo nihiʼééʼ hadadiiʼnil da, tʼáá hazhóʼó nidadiibeełgo tʼéí háádadiiʼnił nítʼééʼ.
