Nehemiah 6:1-19
6 Ákódzaadóó Sanbálat áádóó Tobáíyah índa Aréíbiya dineʼé Gííshem wolyéii áádóó łahjįʼ nihiʼanaʼí danilíinii éí ałtso ahééʼnítłʼingo haaída doo łahgo bighá hoolʼáágóó íishłaaígíí dayííniiʼgo (áko íídą́ą́ʼ dáńʼdaditı̨́ı̨́hgóó dáádílkał tʼah doo dah nídaashʼnil da;)
2 Sanbálat áádóó Gííshem shichʼįʼ iʼííłʼaʼgo kóní, Hágo, Óno halgaidi łahgo kin shijaaʼgi ahididiikah. Nidi, Haada dahodiilnííł, danízingo ádaaní.
3 Haneʼ shá nideiʼáhígíí ííłʼaʼgo kódíshní, Naanish ayóó átʼéii baa naasháhígíí bąą doo ákóyaa díyáa da. Haʼátʼíísh biniyé naanish niʼ kódoolníiłgo índa bitsʼánísháahgo nichʼįʼ yisháał doo?
4 Kódzaadóó bikʼijįʼ tʼáá ákódaaníigo dı̨́įdi shaa nídaʼasʼaʼ, áko tʼáá bíighahdi tʼáá ákótʼéego haneʼ bichʼįʼ ánáshdlaa.
5 Ákohgo tʼáá ákótʼéego Sanbálat bá naalʼaʼí shaa néiníłʼaʼgo ashdladi aleeh góneʼ naaltsoos tʼáadoo bidáʼdeeljeehí yiníłtsooz;
6 éí bikááʼ akʼeʼashchı̨́, Ni áádóó Jew dineʼé danilíinii aláahgo naatʼáanii bichʼįʼ nidaałteeh doogo nidahohʼá, daaníigo ałʼąą dineʼé bitahgóó yee ahił dahalneʼ; Gííshem ałdóʼ tʼáá ákóní; éí biniyé tsé ahénátłʼingo ánílééh lá, áko díí saad bikʼehgo, Aláahgo binanishtʼáa doo, nínízin lá.
7 Índa naa dahalneʼ doo biniyé Jerúsalem kin haalʼáagi atsijįʼ dahalneʼii ałdóʼ níínínil; Júdah kéyahdi aláahgo naatʼáanii dah sidá, haʼníi doo, áko kʼad díí saadígíí bikʼehgo aláahgo naatʼáanii bee bił hodoonih. Éí bąą haaʼíyeeʼ kʼad ahíidiitʼashgo nabikʼíyádiiltih.
8 Áádóó kódíshníigo bichʼįʼ anáʼííłʼaʼ, Éí ádínínígi átʼéego tsʼídá doo ákótʼéego nidahwiitʼáa da, nidi eii ádínínígíí woochʼííd bee ninaʼadloʼgo nijéí biyiʼdóó tsíhidíkeesígíí átʼé.
9 Jó, Tʼáá ałtso tsídahodidiilyis, danízingo kódaaní, Naanish bikʼee hąąh nidahodiilkał, áko doo ałtso ádazhdoolíił da. Éí bąą kʼad, Diyin God nílíinii, shidziilgo áshílééh.
10 Éí bikéédę́ę́ʼ Mehétabel biyeʼ Diiléíyah éí biyeʼ Shiiméíyah wolyéii bighangi doo chʼóoyaʼ átʼée da lágo baa níyá, áko áshidííniid, Haaʼíshąʼ Diyin God bikin góneʼ ahididiitʼash; hodiyingo hazʼą́ą́ góneʼ yah adiitʼashgo dáʼdidiilkał, háálá dandiyoołhééł biniyé naa dadookah; tʼáá aaníí dandiyoołhééł biniyé tłʼéeʼgo naa dadookah.
11 Áádóó ádííniid, Daʼ diné shígi átʼéiísh yóóʼadínóochééł? Áko diné shígi átʼéiísh yisdádínóochééł biniyé hodiyingo hazʼą́ą́ góneʼ yah adoogááł? Shí doo yah adeesháał da.
12 Áko, jó, baa ákoniizı̨́įʼgo doo Diyin God bííłʼaad da, nidi díí yaa chʼíhoníʼánígíí éí shikʼijįʼ yisʼą́ągo haadzííʼ, háálá Tobáíyah índa Sanbálat shikʼé yichʼįʼ naʼníláago yiyííłʼaad.
13 Éí násdzidgo ádił azdoosih shóʼní áádóó doo yáʼáshǫ́ǫ́góó shaa chʼíhodootʼáałgo shá nidahałtʼiʼ doo biniyé bichʼįʼ azláago shichʼįʼ yiyííłʼaad.
14 ShiDiyin God nílíinii, díí bikʼi tsídíłkees: éí Tobáíyah índa Sanbálat díí yaa naaʼaashígíí bikʼehgo áádóó asdzání halneʼii Nowadáíyah wolyéii índa náádaałaʼ náás áhodoonííł yaa dahalneʼii éí hoł yééʼ hodooleeł dashóʼní.
15 Áko tsé ahénátłʼinígíí ałtso binaʼazhnishígíí éí Elúl yizíłígíí naadiin ashdlaʼgóó yoołkáałgo ashdladiindóó baʼaan naaki yiską́ąjįʼ łaʼyidzaa.
16 Ákódzaadóó bikʼijįʼ nihiʼanaʼí tʼáá ałtso díí yaa dahodiiztsʼą́ąʼgo áádóó ałʼąą dineʼé nihinaagóó kéédahatʼínígíí díí dayiiłtsą́ągo bąąh nidahazkaadgo yikʼee nitsidaaskai, háálá nihiDiyin God éí łaʼyiyiilaago yaa ákódaniizı̨́ı̨́ʼ.
17 Nááʼáłdóʼ éí yoołkááł yę́ędą́ą́ʼ Júdah dineʼé ałdóʼ aląąjįʼ naazíinii éí naaltsoos ląʼí Tobáíyah yichʼįʼ ádayiilaa índa binaaltsoos hachʼįʼ ánáyiidlaa.
18 Jó, Júdah kéyahdi diné ląʼí hachʼijí danilı̨́į doogo ádee hadadeesdzííʼ, háálá Tobáíyah éí Éírah biyeʼ Shekanáíyah baadaaní jílı̨́, áádóó hayeʼ Johéínan éí Berakáíyah biyeʼ Miishálam bitsiʼ yił ahaa yítʼáázh.
19 Áádóó ałdóʼ yáʼátʼéehgo ááníłígíí yee shił dahoolneʼ índa ádííniidígíí yee yił dahoolneʼ. Tobáíyah shił yééʼ áhodoolííł yiniyé naaltsoos yiʼiisniiʼ.
