Nehemiah 9:1-38
9 Áko íídą́ą́ʼ díí yiziłígíí naadiin dı̨́ı̨́ʼgóó yoołkáałgo Ízrel dineʼé dahodísingo doo daʼayą́ą́góó índa tłʼoh azis dabiʼéeʼgo áádóó łeezh yee daalbáago áłah nilı̨́.
2 Áádóó Ízrel dineʼé éí doo Ízrel dineʼé danilíinii tʼáá ałtso yitsʼáskai áádóó ádahodiilzeeʼgo ádił nidaʼiiszíʼígíí yee ádaa chʼídahwiistʼą́, índa dabizhéʼé yę́ę doo ákwii ádáátʼįįdii baa nidahodzisneʼ.
3 Áko tʼáá ákwii nidzizı̨́įgo abínídóó ałníʼníʼą́ąjįʼ naaltsoos biyiʼdóó Bóhólníihii haDiyin God bibee hazʼáanii dajííłtaʼ, áádóó ałníʼníʼą́ą́dóó iʼííʼą́ąjįʼ ádił nidaʼdziisíʼígíí bee ádaa chʼídahodziistʼą́ áádóó Bóhólníihii haDiyin God bichʼįʼ nidahodzisá.
4 Ákohgo Líívai dineʼé łaʼ Jéshuwa, Béínai, Kádmiyel, Shebanáíyah, Bánai, Sheriibáíyah, Béínai índa Kiinéínai éí ałkʼi hooʼnilígi naazı̨́įgo Bóhólníihii haDiyin God chánahgo bichʼįʼ sodazdoolzin.
5 Áko Líívai dineʼé danilı̨́įgo Jéshuwa, Kádmiyel, Béínai, Hashabnáíyah, Sheriibáíyah, Hodáíjah, Shebanáíyah índa Pethaháíyah ádadííniid, Daohsįįhgo Bóhólníihii nihiDiyin God baa dahohniihgo hoolʼáágóó ahóyéelʼáa doo; nízhiʼ ayóó átʼéii éí akʼihojidlíii índa aa haʼniihii biláahgo ayóó átʼéego baa haʼniih doo.
6 Tsʼídá tʼáá ni tʼéiyá tʼáá sáhí Bóhólníihii nílı̨́; yádiłhił aghá ánízáadii índa biyiʼdi dahólóonii tʼáá ałtso áádóó nahasdzáán índa bikááʼ hólóonii tʼáá ałtso, tónteel índa biyiʼdi dahólóonii tʼáá ałtso íinilaa; ákohgo tʼáá ałtso baa áhólyą́; yáʼąąshdi diyingo naalʼaʼí dah deínéehii tʼáá ałtso nichʼįʼ nidahałá.
7 Bóhólníihii Diyin God nilíinii nílı̨́. Ni lą́ą Éíbram atsʼéíníłtı̨́įgo Kaldíya kéyah bikáaʼdi Er kin haalʼáádóó bił chʼííníʼáazhgo Éíbraham bee yíínízhiʼ,
8 áádóó níníłʼı̨́įgo bijéí baʼahódlíigo nił bééhoozin áádóó bił ahaʼdíínítʼą́ągo Kéínan dineʼé, Het dineʼé, Ámor dineʼé, Píírez dineʼé, Jííbas dineʼé áádóó Gérgash dineʼé dabikéyah haʼáłchíní ahoolchíiłii baa didííʼáałgo bee hwiiniłʼaʼ índa ádííníniidígi átʼéego íinidzaa, háálá tʼáá ákogi áánííł.
9 Ákohgo danihizhéʼé yę́ę Ííjip kéyahdi bichʼįʼ nidahwiiʼnáago yiniłtsą́ áádóó Tónteel Łichíiʼii bíighahgi nídaʼookąąhgo disínítsʼą́ą́ʼ,
10 áádóó bee éédahózinii índa álílee ayóó ádaatʼéii Féro bikʼijįʼ kwíinilaa, índa bá nidaalʼaʼí tʼáá ałtso áádóó bikéyahgi diné kéédahatʼínígíí tʼáá ałtso bikʼijįʼ ádeinilaa, háálá nił bééhózingo ádaa dahaʼniihgo doo tsʼííd ádahóółʼįįd da. Áko nízhiʼ bééhózíní íinilaa, díí jı̨́ átʼéhígi átʼéego.
11 Bidááhgóó tónteel aháíníłkʼolgo tónteel bitaʼ gónaa łeezh yíłtsei yikááʼ haʼnaa niníná, índa bikʼee nidanoochą́ąʼii éí tó ayóó íídéetą́ąʼii tsé biih jiyííłhanígi átʼéego táłtłʼááh hwííníghaz.
12 Áádóó nááʼákóneʼ yíʼishgo bikáaʼdi jı̨́įgo kʼos níyizgo yilzhoł, índa tłʼéeʼgo éí yinééłgóó bee bá hoolʼin doo biniyé bikáaʼdi kǫʼ níyizii bikʼehgo yííníʼeezh.
13 Nááʼáłdóʼ Dził Sáínai bighą́ąʼdi hadah hwííníleʼgo yáʼąąshdę́ę́ʼ bichʼįʼ háínídzííʼ áádóó tʼáá ákóneʼ átʼéego bee nihodiitʼaahii áádóó tʼáá aaníí bee nahazʼáanii índa yáʼátʼéehgo bee nihoyíníʼáanii áádóó bikʼeh óʼooʼníiłii haa dííníʼą́,
14 áádóó hodiyingo nihááʼáyı̨́ı̨́h jı̨́ bił béédahózingo íinilaa índa bikʼehgo iináanii áádóó bee nihoyíníʼáanii índa bee nahazʼáanii ná naalʼaʼí Mózes binahjįʼ bee bichʼįʼ hahíínídzííʼ,
15 índa dichin danilı̨́įgo yáʼąąshdę́ę́ʼ bááh baa dííníʼą́ áádóó dibááʼ danilı̨́įgo tsé biiʼdę́ę́ʼ tó bá háálı̨́įgo íinilaa, áádóó, Kéyah baa didííʼáałgo bee ádee hadíínídzíiʼii nihílááh biih wohnéehgo nihííʼ daóleʼ, bidiníigo bichʼįʼ háínídzííʼ.
16 Nidi bí áádóó danihizhéʼé yę́ę ádaa dahaʼniihgo índa doo nabídaʼdidzilgóó nibikʼeh óʼooʼníiłii doo dayíistsʼą́ąʼ da,
17 doo tʼáá kʼad akʼeh dahóółʼįįd da, índa bitahgi álílee kʼehgo ayóó ádaatʼéii baa nisíníyáhígíí doo tʼáá kʼad yaa nitsídaazkéez da, nidi doo nibídaʼdidzilgóó áádóó dooda yee nidaalteehgo yisnááh danilı̨́ı̨́ nítʼééʼ yę́ęgóó nábooʼish dooleełii łaʼ ádá nideistı̨́, nidi ni Diyin God nílíinii, ádił niʼiidzííh tsxı̨́įłgo yóóʼanídiyíʼaahii áádóó jiiníbaʼii áádóó aa aʼááh nízinii áádóó tąądee báháchįįhii índa tʼáá íiyisí nił hadleeʼgo joobaʼii nílı̨́, áko doo yóóʼadahodííníʼą́ą da.
18 Tʼáá aaníí óola doolyı̨́įʼgo béégashii yáázh ádá ádayiilaago, Díí nihiDiyin God éí Ííjip kéyahdę́ę́ʼ chʼínihiníʼeezhii átʼı̨́, dadííniidgo ayóó átʼéego doo ílı̨́ı̨́góó ádáátʼįįdígíí yee hádahóółchįįd;
19 azhą́ ákótʼée nidi, ayóó átʼéego baa aʼááh nínízingo honoojíidi tʼáadoo yóóʼahodííníʼą́ą da: jı̨́įgo hakáaʼdi kʼos níyizgo yildohgo bikʼehgo joonéłígíí tʼáadoo hatsʼą́ą́ʼ yóóʼeelzhóod da, índa tłʼéeʼgo hakáaʼdi kǫʼ níyizii bikʼehgo joonééłgóó bee hoolʼinii tʼáadoo hatsʼą́ą́ʼ dahodiileʼ da.
20 Áádóó ałdóʼ ninábintįįh dooleeł biniyé niNíłchʼi Diyinii joobaʼii baa nídíʼááh nítʼééʼ áádóó deidooyı̨́įłii bá mána wolyéii doo bitsʼábíínílnáa da nítʼééʼ índa dibááʼ danilı̨́įgo tó baa hidíʼaah nítʼééʼ.
21 Tʼáá aaníí honoojíidi baa áhólyą́ągo dízdiin nááhai, áko tʼáadoo yídin danilíní da nítʼééʼ; dabiʼééʼ éí tʼáadoo dadiizhaazh da, dabikeeʼ éí tʼáadoo daniichaad da.
22 Nááʼáłdóʼ kédaayah áádóó dadineʼé tʼáá bił bee hódahólníih doo biniyé kéyah nidahósʼaʼ tʼáá átʼé bá bitaa hosínízo, áko Héshban kin haalʼáádóó aláahgo naatʼáanii Sáíhan wolyéii bikéyah índa Béíshan kéyahdóó aláahgo naatʼáanii Ag wolyéii bikéyah hwííʼ daazlı̨́ı̨́ʼ.
23 Yádiłhił biyiʼdi sǫʼ yílʼáhígi átʼéego badaʼáłchíní ałdóʼ kʼeeʼąą díníníłtʼą́, índa kéyah hóóʼ dadooleeł biniyé biih dazhdoonéełgo dahazhéʼé yę́ę baa dííníʼáanii biih hwííníʼeezh.
24 Áko Ízrel dineʼé éí kéyah yiih yínáago bííʼ daazlı̨́įʼgo éí kéyah yiiʼ kéédahatʼı̨́ı̨́ nítʼééʼ yę́ę Kéínan dineʼé bikʼeh dínídlı̨́ı̨́ʼ, áko tʼáá hó daznízinígi átʼéego ádazhdoolííł biniyé éí kéyahdóó aláahgo naatʼáanii danilíinii índa dadineʼé hálákʼee dadííníʼą́.
25 Áádóó bidziilgo kin hadaasʼáii índa kéyah bikááʼ nidaʼntʼąʼii nishódadziyoostʼeʼ áádóó yáʼádaatʼéehii tʼáá ałtso kin biiʼ hadadeezbingo áádóó tó tʼáá áłdįįd hadahaasʼnilgo áádóó chʼil naʼaʼtłʼoʼii deílʼáago áádóó áliv deílʼáago índa tsin naazkaadii bineestʼąʼ ałʼąą ádaatʼéii tʼóó ahayóigo hwííʼ daazlı̨́ı̨́ʼ, áko daʼjiyą́ągo hwiih nídajidleeh áádóó hodaʼniilkʼai índa ayóó átʼéego jiiníbaʼígíí bąą hoł nidahoozhǫǫh nítʼééʼ.
26 Azhą́ ákótʼée nidi, doo akʼeh dahóółʼįįd da índa nichʼįʼ nidaalteehgo nibee hazʼáanii yaa dáádiikai áádóó nichʼįʼ dah nídahizhdidookah biniyé doo ákǫ́ǫ́ ádáátʼįįdii éí ná dahalneʼii yee bił nídahoolneʼ yę́ę nideistseed índa ayóó átʼéego doo ílı̨́ı̨́góó ádáátʼįįdígíí yee ná dahóółchįįd.
27 Éí bąą hodaʼanaʼí bílákʼee hodííníʼą́ągo tiʼdahoyoosniiʼ, áádóó hachʼįʼ nidahwiiʼnáago hoolzhish yę́ędą́ą́ʼ nídanookąąhgo yáʼąąshdę́ę́ʼ dahodisínítsʼą́ą́ʼ, áádóó ląʼígóó aa aʼááh nínízinii bikʼehgo yisdádaʼiiníiłii haa dadííníʼą́; éí hodaʼanaʼí bitsʼą́ąjįʼ yisdádahwiiznil.
28 Nidi háádaasyı̨́ı̨́ʼdóó bikʼijįʼ ninááł doo yáʼáshónígi ánáádáátʼįįd; éí bąą hodaʼanaʼí tʼáá biyaa dziznilgo áhwiinilaa, áko éí hwee ádídahólnííh nítʼééʼ, nidi nichʼįʼ dah nídahidiikaigo áádóó nídanooskango yáʼąąshdę́ę́ʼ dahodisínítsʼą́ą́ʼ índa haa aʼááh nínízinígíí bikʼehgo ląʼídi yisdáhwííníjaaʼ,
29 áádóó nibee hazʼáanii bikʼeh náádahojíłʼı̨́įgo baa náhoyíʼéesh doo biniyé bee hwiʼííníłniiʼ nítʼééʼ; azhą́ ákótʼée nidi, ádaa dahaʼniihgo nibikʼeh óʼooʼníiłii doo dayíistsʼą́ąʼ da, nidi ádił nidaʼiilzíihgo nibee nihodiitʼaahii yikʼijįʼ danilı̨́ı̨́ nítʼééʼ, (éí diné yikʼehgóó áátʼįįdgo yee hináa doo;) éí yichʼįʼ ádił nídaʼalnaad nítʼééʼ áádóó doo nibídaʼdidzil da nítʼééʼ índa doo tʼáá kʼad daʼdiiztsʼą́ąʼ da.
30 Nidi ląʼí nááhaigóó haʼíínílníigo hoolzhiizh áádóó hakʼijįʼ nílı̨́įgo ná dahalneʼii niNíłchʼi Diyinii biiʼ dahólóonii bee hoł dahwíínílneʼ, nidi doo dajíistsʼą́ąʼ da; éí bąą kéyah naaznilgóó dineʼé danilíinii bílákʼee dahodííníʼą́.
31 Nidi ayóó átʼéego aa aʼááh nínízinígíí bąą tʼáadoo áhosíníłdįįd da índa tʼáadoo yóóʼahodííníʼą́ą da, háálá Diyin God tʼáá íiyisí joobaʼii índa aa aʼááh nízinii nílı̨́.
32 Éí bąą kʼad, nihiDiyin God nílíinii, Diyin God ayóóʼátʼéii áádóó bidziilii índa bikʼeʼíyéeʼii nílíinii, bee ahaʼdeetʼáanii biʼíínísinii áádóó aa aʼááh hasin bee ááníiłii nílíinii, Asíriya dineʼé aláahgo binanitʼaʼí dah nídahidinoobįįł yę́ędóó díí jı̨́įjįʼ nihí áádóó aláahgo nihindanitʼaʼí áádóó nihinanitʼaʼí danilíinii áádóó nihá náádaʼiiłniihii, íinínízinii yee nihił dahalneʼii áádóó danihizhéʼé yę́ę índa nidineʼé tʼáá ałtso nihichʼįʼ dahodiisʼnáʼígíí tʼáá átʼé tʼáadoo tʼįįhdígo átʼéego baa nitsíníkeesí.
33 Ákondi ánihiʼdiilyaaígíí tʼáá ałtso bee tʼáá ákogi ánítʼı̨́, háálá ni tʼáá ákogi áánííł, nidi nihí éí doo yáʼáshǫ́ǫ́góó ádeiiʼnííł,
34 áádóó aláahgo nihindanitʼaʼí áádóó nihinanitʼaʼí danilíinii áádóó nihá náádaʼiiłniihii índa danihizhéʼé yę́ę nibee hazʼáanii doo yikʼeh dahóółʼįįd da, áádóó nibikʼeh óʼooʼníiłii índa bee hahínídzíiʼii éí bee hakʼijįʼ nílı̨́įgo háínídzíʼígíí doo dayíistsʼą́ąʼ da.
35 Jó, bee hódahólníihgo hazʼą́ą́dóó áádóó tʼáá íiyisí yáʼádaatʼéehii índa kéyah hótsaago bikááʼ ádaʼazįįdii baa dííníʼáanii éí bikááʼgóó tʼáadoo ná nidaasʼaʼ da, índa doo yáʼáshǫ́ǫ́góó ádaaníiłii tʼáadoo yitsʼáhaaskai da.
36 Jó, díí jı̨́ ná nidaalʼaʼí daniidlı̨́, áádóó kéyah bikááʼdóó aneestʼąʼ danilíinii índa yáʼátʼéehii danihizhéʼé yę́ę deiyą́ą doo biniyé baa dííníʼáanii, shoo, éí biyiʼ ná nidaalʼaʼí daniidlı̨́;
37 ádił nidaʼayiilzíʼígíí biniinaa aláahgo naatʼáanii nihindantʼáago ádeinilaaígíí éí kéyah bikááʼgóó tʼóó ahayóí bá nidaʼntʼąʼ áádóó ałdóʼ baa bił dahózhǫ́ǫgo nihitsʼíís índa danihilı̨́ı̨́ʼ yee ádídahólnííh, áko nihí éí tʼáá íiyisí ádił nitsiniikai.
Ízrel dineʼé éí bee hazʼáanii yikʼeh dahółʼı̨́į doo ahadaʼdeestʼą́
38 Díí tʼáá ałtso biniinaa bee ahaʼdeetʼáanii tʼáá aaníí nilíinii ádeiilnéehgo akʼedaʼiilchí; éí nihinanitʼaʼí danilíinii áádóó Líívai dineʼé índa nihá náádaʼiiłniihii dabízhiʼ yikááʼ ádeidoolííł.
