Numbers 1:1-54
1 Bóhólníihii éí Mózes yichʼįʼ haadzííʼ; Sáínai honoojíidi níbaal biiʼ dahozdísinii góneʼ naaki nídízííd binih łaʼa jı̨́ı̨́ góneʼ éí Ííjip kéyahdę́ę́ʼ chʼééjíʼnáádóó bikʼijįʼ naaki náhááh góneʼ áháłní,
2 Ízrel dineʼé dah deínéehii tʼáá ałtso ahiiʼ hááʼahiyoolchíiłii bitahgi dabizhéʼé yę́ę baʼáłchíní daʼahílchíihii bikʼehgo bee dabiʼdééjiʼígíí łáʼí nízínígo yíníłtaʼ,
3 Ízrel dineʼé danilíinii bitahgi naadiindóó yówehgo béédááhaii anaʼalʼı̨́ yídaneelʼáanii tʼáá ałtso dah deínéehii Éran bił yídííłtah.
4 Áádóó nihíká adoojahii éí dineʼé danilíinii dabizhéʼé yę́ę bitsʼą́ą́dóó náás ahoolchíiłii aląąjįʼ naazínígíí łáʼí nítínígo
5 éí diné nihíká adoojahígíí kódaolyé: Shédiyer éí Rúben dineʼé nilı̨́įgo biyeʼ Iiláízer,
6 Zúrishádai éí Símiyan dineʼé nilı̨́įgo biyeʼ Shiilúmiyel,
7 Amínadab éí Júdah dineʼé nilı̨́įgo biyeʼ Náshan,
8 Zúʼer éí Ísakar dineʼé nilı̨́įgo biyeʼ Niithániyel,
9 Híílan éí Zébyulan dineʼé nilı̨́įgo biyeʼ Iiláíyab,
10 Jóseph baʼáłchíní Íífreiyim dineʼé nilı̨́įgo Amáíhad biyeʼ Iilíshama, áádóó Manáseh dineʼé nilı̨́įgo Piidázer biyeʼ Gaméíliyel,
11 Gídiyónai éí Bénjamin dineʼé nilı̨́įgo biyeʼ Abáídan,
12 Amishádai éí Dan dineʼé nilı̨́įgo biyeʼ Eihaiyíízer,
13 Ákran éí Ásher dineʼé nilı̨́įgo biyeʼ Péígiyel,
14 Dúwel éí Géed dineʼé nilı̨́įgo biyeʼ Iiláíyasaf,
15 Íínan éí Náftalai dineʼé nilı̨́įgo biyeʼ Aháíra.
16 Díí éí dah daʼínéehii bitahdę́ę́ʼ náhaasdláʼígíí áádóó dabizhéʼé yę́ę bidineʼé danilínígíí Ízrel dineʼé miilgo dah deínéehii yiląąjįʼ naazíinii danilı̨́.
17 Áko Mózes índa Éran díí diné dabiʼdééjiʼígíí néidiinil,
18 áádóó naaki nídízííd binih łaʼa jı̨́ı̨́ góneʼ dah daʼínéhígíí tʼáá ałtso áłah áyiilaago daʼazhéʼé yę́ę ádadóoneʼé danilínígíí bitsʼą́ą́dóó daʼahílchíihii dabízhiʼ bikʼehgo diné naadiindóó yówehgo béédááhaii dayééltaʼ.
19 Mózes hachʼįʼ Bóhólníihii yee haadzíʼígi átʼéego Sáínai honoojíidi diné jííłtaʼ.
20 Rúben dineʼé nilíinii Ízrel alą́ąjįʼ bá yizhchíinii baʼáłchíní náás ahoolchíiłii éí ahiiʼ hááʼahiyoolchíłígíí dabizhéʼé yę́ę yaʼáłchíní danilı̨́įgo dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
21 éí Rúben dineʼé bitsʼą́ą́dóó dízdiindóó baʼaan hastą́ądi mííldóó baʼaan ashdladi neeznádiingo ánéelą́ą́ʼ.
22 Símiyan dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
23 éí Símiyan dineʼé bitsʼą́ą́dóó ashdladiindóó baʼaan náhástʼéidi mííldóó baʼaan táadi neeznádiin ánéelą́ą́ʼ.
24 Géed dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
25 éí Géed dineʼé bitsʼą́ą́dóó dízdiindóó baʼaan ashdladi mííldóó baʼaan hastą́ądi neeznádiindóó baʼaan ashdladiin ánéelą́ą́ʼ.
26 Júdah dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
27 éí Júdah dineʼé bitsʼą́ą́dóó tsostsʼidiindóó baʼaan dı̨́įdi mííldóó baʼaan hastą́ądi neeznádiin ánéelą́ą́ʼ.
28 Ísakar dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
29 éí Ísakar dineʼé bitsʼą́ą́dóó ashdladiindóó baʼaan dı̨́įdi mííldóó baʼaan dı̨́įdi neeznádiin ánéelą́ą́ʼ.
30 Zébyulan dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
31 éí Zébyulan dineʼé bitsʼą́ą́dóó ashdladiindóó baʼaan tsostsʼidi mííldóó baʼaan dı̨́įdi neeznádiin ánéelą́ą́ʼ.
32 Jóseph baʼáłchíní nilíinii, Íífreiyim dineʼé náás ahoolchíiłii ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo dabiʼdééltaʼígíí dabízhiʼ bikʼehgo naadiindóó yówehgo béédááhaii tʼáá ałtso anaʼalʼı̨́ yídaneelʼáanii
33 éí Íífreiyim dineʼé bitsʼą́ą́dóó dízdiindi mííldóó baʼaan ashdladi neeznádiin ánéelą́ą́ʼ.
34 Áádóó Manáseh dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
35 éí Manáseh dineʼé bitsʼą́ą́dóó tádiindóó baʼaan naakidi mííldóó baʼaan naakidi neeznádiin ánéelą́ą́ʼ.
36 Bénjamin dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
37 éí Bénjamin dineʼé bitsʼą́ą́dóó tádiindóó baʼaan ashdladi mííldóó baʼaan dı̨́įdi neeznádiin ánéelą́ą́ʼ.
38 Dan dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
39 éí Dan dineʼé bitsʼą́ą́dóó hastą́diindóó baʼaan naakidi mííldóó baʼaan tsostsʼidi neeznádiin ánéelą́ą́ʼ.
40 Ásher dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
41 éí Ásher dineʼé bitsʼą́ą́dóó dízdiindóó baʼaan tʼááłáhídi mííldóó baʼaan ashdladi neeznádiin ánéelą́ą́ʼ.
42 Náftalai dineʼé nilíinii bidineʼé náás ahoolchíiłii éí ahiiʼ hááʼahiyoolchíłígíí dabizhéʼé yę́ę yadaʼáłchíní danilı̨́įgo éí dabiʼdééltaʼii dabízhiʼ bikʼehgo diné naadiindóó yówehgo béédááhaii tʼáá ałtso anaʼalʼı̨́ yídaneelʼáanii
43 éí Náftalai dineʼé bitsʼą́ą́dóó ashdladiindóó baʼaan táadi mííldóó baʼaan dı̨́įdi neeznádiin ánéelą́ą́ʼ.
44 Mózes áádóó Éran éí díí diné yiyííłtaʼ; éí Ízrel dineʼé binaatʼáanii naakitsʼáadahgo dabizhéʼé yę́ę yikʼeh nízı̨́įgo bił ajííłtaʼ.
45 Kótʼéego díí Ízrel dineʼé tʼáá ałtso yééltaʼígíí éí dabizhéʼé yę́ę bitsʼą́ą́dóó bikʼehgo Ízrel dineʼé naadiindóó yówehgo béédááhaii tʼáá ałtso anaʼííłʼı̨́ yídaneelʼáanii
46 éí tʼáá ałtso yééltaʼgo hastą́ądi neeznádiindóó baʼaan táadi mííldóó baʼaan ashdladi neeznádiindóó baʼaan ashdladiin ánéelą́ą́ʼ.
Líívai dineʼé éí níbaal biiʼ hodílzinii baa ádahojilyą́ą doo biniyé nihoʼdeeʼnil
47 Nidi Líívai dineʼé éí dabizhéʼé yę́ę bikʼehgo tʼáadoo atah dabiʼdééltaʼ da.
48 Háálá átséedi Bóhólníihii éí Mózes yichʼįʼ haadzíiʼgo áyidííniid,
49 Tʼáá hazhóʼó Líívai dineʼé tʼéiyá doo yídííłtah da, doo nidi Ízrel dineʼé bitahjįʼ bił íídííłtah da.
50 Nidi Líívai dineʼé éí níbaal biiʼ hodílzinii, éí neeznáago bikʼeh óʼooʼníiłii bee bééhániihii biiʼ sinilii, áádóó łeetsʼaaʼ tʼáá átʼé índa tʼáá ałtsojįʼ bił chodaoʼíinii bee hódahólníih doogo nihodíínił, índa níbaal biiʼ hodílzinii áádóó tʼáá ałtsojįʼ bił chodaoʼíinii tʼáá bił nidajiyéego baa ádahojilyą́ą dooleeł, índa níbaal biiʼ hodílzinii binaagóó ninádajiʼnéeh doo.
51 Áko níbaal biiʼ hodílzinii nihidoogéełgo Líívai dineʼé éí ninádeiʼdiiʼáah doo, índa nináádootʼáałgo Líívai dineʼé éí ninádeiʼáah dooleeł, índa tʼáá háiida doo Líívai dineʼé nilíinii níbaal biiʼ hodílzinii yíighahjįʼ deeyáii éí bidiʼyoolyééł.
52 Áádóó Ízrel dineʼé éí dahaníbaal ninádajiʼnił doo; diné tʼááłáʼí nízínígo tʼáá hó haníbaal ninátʼáahgi, tʼáá hó hadah naʼatʼaʼí bíighahgi ninádajiʼnéeh doo.
53 Nidi Líívai dineʼé éí níbaal biiʼ hodílzinii, éí neeznáago bikʼeh óʼooʼníiłii bee bééhániihii biiʼ sinilii, binaagóó biníbaal ninádeiʼnił doo, áko Ízrel dineʼé dah yinéełii atíʼélʼı̨́ doo bikʼi hwiidooleeł da; Líívai dineʼé éí níbaal biiʼ hodílzinii, éí neeznáago bikʼeh óʼooʼníiłii bee bééhániihii biiʼ sinilii, bee bídahólníihgo yaa ádahalyą́ą doo.
54 Áko Ízrel dineʼé tʼáá ákǫ́ǫ́ ádaadzaago Bóhólníihii éí Mózes yichʼįʼ yee haadzíʼígíí tʼáá átʼé yikʼeh ádaadzaa.